လါယူၤလံ ၂၈ သီ, ၂၀၂၅ နံၣ်, ခ့ၣ်အဲးစံၣ်
သုးခိၣ်ဒိၣ်ဂီၢ်ဂ့ၢ် စီၤဟဲရံၤ လၢအမ့ၢ်ဝဲ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)အပှၤအံၤ ခီဖျိတလူၤပိၥ်မၤထွဲ တၢ်ကရၢကရိတၢ်သိၣ်တၢ်သီဘၣ်အဃိ ဘၣ်တၢ်ထုးထီၣ်ကွံၥ်အီၤလၢတၢ်ကရၢကရိပူၤလံအဂ့ၢ်န့ၣ် (DKBA)လီၢ်ခၢၣ်သး သုးဝဲၤလီၢ်ခိၣ်သ့ၣ် ထုးထီၣ်ပၥ်ဖျါဝဲဖဲမဟါလါယူၤလံ ၂၇ သီအနံၤန့ၣ်လီၤ.
သုးခိၣ်ဒိၣ်ဂီၢ် စီၤဟဲရံၤအံၤ ခီဖျိလဲၤဖဲအသး,က့ၤဖဲအသးတလူၤပိၥ်မၤထွဲဝဲခိၣ်နၢ်တၢ်သိၣ်တၢ်သီဘၣ်အဖီခိၣ် ဘၣ်တၢ်ထုးထီၣ်အီၤ လၢတၢ်ကရၢကရိပူၤဒ်အံၤလီၤအဂ့ၢ်န့ၣ် (DKBA)သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤစွ့ၤဝၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤ.
“သုးခိၣ်ဟဲရံၤန့ၣ်တကနၣ်တၢ်သိၣ်တၢ်သီဘၣ်.လဲၤဖဲအသးက့ၤဖဲအသးလီၤ.အိၣ်လၢသုးခိၣ်ဆါအီၤအအိၣ်တမုၥ်ဘၣ်ယမၢ်လီၤအီၤအတဟဲစ့ၢ်ကီးဘၣ်.သုးတဂၤမ့ၢ်သုးဒ်လဲၣ်တသ့ၣ်ညါဘၣ်.နီၢ်ကီၢ်သုးတဂၤန့ၣ်ကလဲၤကက့ၤန့ၣ်ကဘၣ်တဲကျၢတၢ်မီၤ.အဃိသုးတဂၤလၢတကနၣ်တၢ်သိၣ်တၢ်သီဘၣ်န့ၢ်တူၢ်လိၥ်တသ့လၢၤဘၣ်.အအိၣ်နါက့အတလီၤဆီဘၣ်,ဖဲအအဲၣ်ဒိးအိၣ်န့ၣ်အိၣ်ဝဲသ့လီၤ.လဲၤထီၣ်ယိၤကီၢ်ဒီးတတဲကျၢတၢ်ဘၣ်.တၢ်အိၣ်ဖှိၣ်အိၣ်ဒီးတဟဲက့ၤအဃိတလီကီအီၤလၢၤဘၣ်.”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ် သုးခိၣ် စီၤဟဲရံၤအံၤ အပူၤကွံၥ်မ့ၢ်တ့ၢ်ဝဲကီၢ်သူလ့ၤသုးမုၢ်ဒိၣ်(KTLA)အပှၤတဂၤဒီး ဖဲအပူၤကွံၥ်တနံၣ်အံၤလါမးရှး ၁၄ သီအခါန့ၣ် ဟဲက့ၤပၥ်ဖှိၣ်မၤသကိးတၢ်ဒီး(DKBA)ဝံၤ ဖဲလါမ့ၤ ၄ သီအနံၤန့ၣ် တၢ်ဒိန့ၢ်အီၤ(DKBA)အကးတၢ်ဂီၤဒ်သုးရ့ၣ်ခိၣ်တဂၤ အသိး အဂ့ၢ်န့ၣ် (DKBA)ပှၤဘၣ်မူဘၣ်ဒါ စံးဝဲအသိးသ့ၣ်ညါဘၣ်န့ၣ်လီၤ.
ဘၣ်ဆၣ်ဖဲအဟဲက့ၤမၤသကိးတၢ်ဝံၤလီၢ်ခံန့ၣ် တလူၤပိၥ်မၤထွဲတၢ်သိၣ်တၢ်သီဘၣ်အမဲၥ်ညါ သုးခိၣ်စီၤဟဲရ့ၤစံးဝဲလၢ သါတမ့ၢ်ဒံး (DKBA)ကရူၢ်ကရၢအပှၤဒံးဘၣ်အသိး မံၤ,စိကမီၤနီၣ်ဂံၢ်စ့ၢ်ကီးလီၤတအိၣ်ဒံးဘၣ်အဂ့ၢ်န့ၣ် သုးခိၣ်ကျၢၢ်စိ စီၤစွ့ၤဝၣ် ဆှဲပၠးအါထီၣ် ဝဲဒ်အံၤန့ၣ်လီၤ.
“သုးခိၣ်ဟဲရံၤန့ၣ်အပူၤကွံၥ်အအိၣ်ဖဲအူဟူထၣ်တၢ်လီၢ်န့ၣ်.လၢခံအဝဲဟဲက့ၤလီၤဖဲသုးခိၣ်ဆါအီၤအအိၣ်ဖဲဖလူဖိန့ၣ်.အက့ၤလီၤဖဲန့ၣ်အခါန့ၣ်တဲဆါဒံးသုးခိၣ်ဆါအီၤ.မ့ဝံၤအအဲၣ်ဒိးဒိ(DKBA)ကး.အအဲၣ်ဒိးကဲသးသုးရ့ၣ်ခိၣ်အပျဲၢ်ခီန့ၣ်အဂၤတဆံမးတအိၣ်ဘၣ်.ဘၣ်ဆၣ်ပဒိန့ၢ်အီၤကးန့ၣ်လၢသုးရ့ၣ်ခိၣ်လီၤ. ဖဲန့ၣ်သုးခိၣ်ဆါအီၤဟ့ၣ်လီၤဖီၣ်အီၤကျိ(၄)ခိၣ်,(၅)ခိၣ်ဒံး.အတဲယၤသါဆိမိၣ်သါ တအိၣ်လၢ (DKBA)အ ကျါဘၣ်.တအိၣ်ဘၣ်န့ၣ်အဟဲဒိ(DKBA)ကးဒီး ဆၣ်န့ၣ်ဝံၤလံ. အတအိၣ်ဒံးဘျီသုးတဂၤန့ၣ်သုးဒ်လဲၣ်. အဃိယတတူၢ်လိၥ်ဘၣ်ဒ်န့ၣ်လီၤ”အဂ့ၢ်န့ၣ် စံးဝဲန့ၣ် လီၤ.
ဒ်န့ၣ်အသိးဖဲအပူၤကွံၥ်လါအ့ဖြ့ၣ် ၂၆ သီအနံၤန့ၣ်စ့ၢ်ကီး (KTLA)လၢအဘၣ်တၢ်တီခိၣ်ရိၣ်မဲအီၤလၢသုးခိၣ်စီၤနၢၤဒါ အပှၤလၢ အမ့ၢ် Commando အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤစးလိ ဒီးအပှၤ(၄)ဂၤ ဟဲက့ၤပၥ်ဖှိၣ်မၤသကိးတၢ်ဒီးတၢ်ဘၣ်ဘျုး ဒံၣ်မိၣ် ခြ့ၣ်စံၣ်ကညီသုးမုၢ်ဒိၣ်(DKBA) ကဲထီၣ်ဒံးဝဲ န့ၣ်လီၤ.
