လါယူၤလံ ၂၁ သီ, ၂၀၂၅ နံၣ်, ခ့ၣ်အဲးစံၣ်
အပူၤကွံၥ်စှၤသီအခါလၢ(facebook social media)အပူၤ ဘၣ်ဃးတၢ်ကစီၣ်ရၤလီၤသးလၢဘူးဒးကညီသုးမုၢ်ဒိၣ် (DKBA) သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ ဘိၤဘံၣ် သံအံၤ တမ့ၢ်တၢ်ကစီၣ်လၢအမ့ၢ်အတီဘၣ်ဒီး မ့မ့ၢ်တခီ အတ့ကျဲကိးမုၢ်နံၤဒဲးအဂ့ၢ်န့ၣ် သုးခိၣ်ဘိၤဘံၣ်အမါ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်တၢ်ကစီၣ်ရၤလီၤသးအသိးန့ၣ် အပူၤကွံၥ်လါယူၤလံ ၁၅ သီခိၣ်ဃၢၤအခါန့ၣ် လၢကြုၢ်တုဟီၣ်က၀ီၤအပူၤ သုးခိၣ်ဘိၤဘံၣ်ဒီး အပှၤ,ပယီၤသုး ပၥ်ဖှိၣ်တဖၣ်လၢကဟဲထီၣ်မၤအါထီၣ်သုးဂံၢ်ဘါအဂီၢ် ခီဖျိဟီၣ်က၀ီၤ(KNLA)သုးပၥ်ဖှိၣ်ခးဝဲအဃိ ပယီၤသုးသံ ဘၣ်ဒိဘၣ်ထံးအါမးအသိး (DKBA)တကပၤစ့ၢ်ကီးသံဘၣ်ဒိဘၣ်ထံးအကျါပၣ်ဃုၥ်ဝဲသုးခိၣ်ဘိၤဘံၣ်အံၤအဂ့ၢ်န့ၣ် စံး၀ဲန့ၣ်လီၤ.
ဘၣ်ဆၣ်ဘၣ်ဃးတၢ်ကစီၣ်ရၤလီၤသးအံၤတမ့ၢ်တတီဘၣ်အသိး သုးခိၣ်ဘိၤဘံၣ်အံၤတလဲၤတက့ၤနီတပူၤဘၣ်ဒီး လဲၤတ့ကျဲကိး မုၢ်နံၤဒဲးအဂ့ၢ်န့ၣ် သုးခိၣ်ဘိၤဘံၣ်အမါနီၢ်ကစၢ်ဒၣ်ဝဲဆှဲပၠး စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“နဖုတဟးလၢတၢ်ချၢနီတဘျီဘၣ်.အိၣ်ဖဲကၠၤအ့(ပီၣ်တီၣ်မူၣ်)အံၤမၢ်မၢ်လီၤ.အလဲၤတ့ကျဲကိးမုၢ်နံၤဒဲးလီၤဘၣ်မနုၤအဃိလဲၣ်ခဲအံၤဘူးထီၣ်လါခူးကံၢ်စုမ့ဝံၤခဲကၢၥ်တလါ(လါအီကူး)န့ၣ်ဘၣ်လၢဖုသီခါအနံၤအိၣ်ဖျဲၣ်အဃိမီၤနီၤ.နသံကွၢ်ယၤကျၢလီၤတမ့ၢ်တၢ်နီတမံၤဘၣ်.တၢ်ကစီၣ်ဟးထီၣ်ဘျီပှၤဆဲးဖိလၢအအိၣ်ဒီဒူၣ်.အကစၢ်တဲလၢပှၤတဲလၢသါသံတဒူၣ်န့ၣ်မၢဆှၢလီၤစ့ဟဲမၤဘူၣ်ထီၣ်သါန့ၣ်တဲဝဲဒ်န့ၣ်.ပအိၣ်ဒီးအီၤဒ်သိးလီၤ,ပဝၤဒီးပကစၢ်အမ့သံအမ့ဘၣ်ဒိဒုပကတဲဧါသၢၣ်.ပလံၣ်တၢ်တသ့ဘၣ်”အဂ့ၢ်န့ၣ် စံးဘၣ်န့ၣ်လီၤ.
တၢ်ကစီၣ်ဟးထီၣ်လၢသုးခိၣ်ဘိၤဘံၣ်သံအမဲၥ်ညါ ဒ်ပှၤတနီၤစံးဝဲအသိးန့ၣ်တၢ်တနံၤဃီလၢတၢ်ဒုးကဲထီၣ်ဖဲကြုၢ်တုအခါ (DKBA) တကပၤသံဘၣ်ဒိဘၣ်ထံးအိၣ်ဒီးဖဲန့ၣ်အကျါခီဖျိသုးခိၣ်ဘိၤဘံၣ်အံၤဘၣ်ဒိနးနးကျံၤကျံၤအဃိ ဘၣ်တၢ်က့ၤဆှၢလီၤကူစါယါဘျါ အီၤဆူဖၣ်အၣ် တီၤကလ့တၢ်ဆါဟံၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ကစီၣ်ဟးထီၣ်လၢသုးခိၣ်ဘိၤဘံၣ်သံအံၤတမ့ၢ်ဘၣ်ဘၣ်ဆၣ် ခဲအံၤခီဖျိအဘၣ်ဒိနးအဃိဘၣ်အီၣ်က့ၤဝဲမ့ၤချီလီၤ အဂ့ၢ်န့ၣ် (DKBA)ကရူၢ်ပူၤဂံၢ်ခီၣ်ထံးပှၤဟ့ၣ်တၢ်ကစီၣ်ဖိလၢတအဲၣ်ဒိးပၥ်ဖျါအမံၤတဂၤစံးဝဲဒ်အံၤန့ၣ်လီၤ.
“အတသံဒံးဘၣ်.အဘၣ်ဒိဒုအနီၢ်ကီၢ်လီၤ.အအီၣ်မ့ၤဒီဖျၢၣ်တန့ၢ်လၢၤဘၣ်,ဘၣ်အီၣ်မ့ၤချီလီၤ.မ့ၤချီန့ၣ်မးအီထီၣ်အကိၥ်ပူၤပှၢ်တဃဲးလီၤ.”အဂ့ၢ်န့ၣ် စံး၀ဲန့ၣ်လီၤ.
တကတီၢ်ဃီဖဲလါယူၤလံ ၁၈ သီဟါခီအဆၢကတီၢ်န့ၣ်စ့ၢ်ကီး လၢတီၤကလ့တၢ်ဆါဟံၣ်အံၤတဆီ တၢ်ဟဲက့ၤစိၥ်(DKBA) အသံစိၣ် လၢဃိၣ်ဖိတကပၤကအိၣ်လၢ(၃)ဂၤညါအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဖဲန့ၣ်တဖၣ်စံး၀ဲအိၣ်ဘၣ်ဆၣ် ဘၣ်ဃးတၢ်ဂ့ၢ် အံၤ ပခ့ၣ်အဲးစံၣ်-ကညီတၢ်က စီၣ်ပၥ်ဂၢၢ်ပၥ်ကျၢၤတန့ၢ်ဝဲဒံးဘၣ်န့ၣ်လီၤ.
ဘူးဒးကညီသုးမုၢ်ဒိၣ်(DKBA)ကရူၢ်လၢအဘၣ်တၢ်တီခိၣ်ရိၣ်မဲဝဲလၢသုးခိၣ်ဘိၤဘံၣ်အံၤ လီၤဆီဒၣ်တၢ်သုးဟံန့ၢ်တၢ်စိတၢ်ကမီၤ ဝံၤလီၢ်ခံ ဖဲတၢ်ပၢၢ်ဆၢကရူၢ်ကရၢက့ၤဒုးထီဒါဝဲသုးကီၣ်ကးအတီၢ်ပူၤအံၤ လၢ(သုးက့ ၁)ဖၣ်ဘၣ်ကီၢ်ဆၣ်ဒီး(သုးက့ ၆)ကြုၢ်တု -ကီးတရံးကီၢ်ဆၣ်အပူၤန့ၣ် အတၢ်ပၥ်ဖှိၣ်မၤသကိးတၢ်ဒီးသုးကီၣ်ကးလၢဒုးယၤဂ့ၢ်၀ီအပူၤဟဲအိၣ်ဖျါထီၣ်ဝဲဖျိဖျိဖျါဖျါအဂ့ၢ်န့ၣ် တၢ်ပဲၥ်ထံနီၤဖးစံးဝဲ အိၣ်န့ၣ်လီၤ.
တကးဒံးဘၣ် ခ့ၣ်အဲၣ်ယူၣ်-ဟီၣ်က၀ီၤအပူၤ သုးကီၣ်ကးတကပၤတၢ်ရဲၣ်တၢ်ကျဲၤအိၣ်လၢကထီၣ်ဟံန့ၢ်ဝဲတၢ်လီၢ်(၅)တီၤအဖီခိၣ် ဒ်သိးဒုၣ်ဒါနုၥ်လီၤလၢဟီၣ်က၀ီၤပူၤသုတန့ၢ်တဂ့ၤအဂီၢ် ဘၣ်ဆီလီၤအဝဲသ့ၣ်ပှၤလၢကမၤတံၥ်တၥ်ဝဲဒုၣ်ဒါအဂီၢ်လီၤအဃိ တၢ်သ့ၣ်တဖၣ်အံၤလၢကမၤဘၣ်ဒိကမျၢၢ်ဒုတအိၣ်ဘၣ်အဂ့ၢ်န့ၣ် (DKBA)သုးခိၣ်ဘိၤဘံၣ် စံးဘၣ်တ့ၢ်ဃၥ်(KPTV)တၢ်ကစီၣ် ဖဲအပူၤကွံၥ်နွံအခါဒ်အံၤန့ၣ်လီၤ.
“ဒုၣ်ဒါန့ၣ်ထီဘိအတၢ်သးလီအိၣ်လီၤ.သုဒုၣ်ဒါနုလီၤတသ့တဂ့ၤအဂီၢ်လီၤ.ကဘၣ်ဒိကမျၢၢ်ဒိၣ်ဒိၣ်မုၢ်မုၢ်ဒုတအိၣ်ဘၣ်.ဒုၣ်ဒါဟဲဂုၤဘူးထီၣ်ဒီးပှၤအံၤပမၤတံၥ်တၥ်ထီၣ်ဒုၣ်ဒါလီၤ.တနီၤန့ၣ်အတနၥ်အီၣ်ဝဲဘၣ်.ပမ့တဲနီၢ်နီၢ်န့ၣ်ဒုၣ်ဒါန့ၣ်ကထီၣ်ဟံန့ၢ်တၢ်လီၢ်(၅)တီၤ.တချုးအထီၣ်ဟံဝဲဘၣ်န့ၣ်ပလဲၤဆီလီၤဆိပပှၤဖဲတၢ်လီၢ်သ့ၣ်တဖၣ်န့ၣ်.ယဆိမိၣ်ပှၤဖီၣ်ကျိတဂၤဂ့ၤတဂၤဂ့ၤန့ၣ်ကမၤတၢ်လၢအပှၤကလုၥ်အဂီၢ်ခဲလၢၥ်လီၤ.ဘၣ်မနုၤလဲၣ်န့ၣ်တၢ်ဖီလၥ်န့ၣ်တလိၣ်ဘၣ်,လိၣ်လၢခိၢ်နၢ်လီၤ.ခိၣ်နၢ်မ့ဂ့ၤန့ၣ်အဖိအလံၤကအိၣ်တဒူၣ်ဃီလီၤ.တၢ်သဘံၣ်သဘုၣ်လၢအကဲထီၣ်လၢအပူၤကွံၥ်တဖၣ်န့ၣ်ကဆီၣ်လီၤက့ၤဝဲကိးဂၤဒဲးလီၤ.”အဂ့ၢ်န့ၣ် စံးဝဲန့ၣ်လီၤ.
တကတီၢ်ခါခဲအံၤလၢကြုၢ်တု-ကီးတရံးဟီၣ်က၀ီၤအပူၤလၢကထီၣ်ဒိၣ်စိက့ၤဝဲအဂီၢ် ဖဲအပူၤကွံၥ်လါယူၤလံ ၁၇ သီအနံၤန့ၣ် ပယီၤသုးကျိၤ(၂)ဘိလၢသုးနီၣ်ဂံၢ်ကအိၣ်(၃၀၀)ဃၣ်ဃၣ်ဟဲထီၣ်နုၥ်လီၤဟူးဂဲၤဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးပယီၤသုးကျိၤဟဲထီၣ်ဝဲၤလီၢ်ခံဖဲမဟါလါယူၤလံ ၂၀ သီအနံၤန့ၣ်စ့ၢ်ကီး တၢ်ဒုးကဲထီၣ်ဝဲလၢပယီၤသုးဒီး(KNLA) သုးပၥ်ဖှိၣ်အဘၢၣ်စၢၤ ဒီတနံၤကျၢၤတုၤလၢမုၢ်ဟါအဃိ ပယီၤသုးတကပၤသံဘၣ်ဒိဘၣ်ထံးအိၣ်ဝဲ အဂ့ၢ်န့ၣ် တၢ်ပၢၢ်ဆၢသုးကရူၢ်တကပၤ စံးဝဲအသိးသ့ၣ်ညါဘၣ်န့ၣ်လီၤ.
