လါယူၤလံ ၂၂သီ, ၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢတးကီၢ်ရ့ၣ်,ထၣ်စီၤယါတၢ်ပၢဟီၣ်ကဝီၤအပူၤတနံၤအံၤလါယူၤလံ(၂၂)သီအနံၤအပူၤ,လီၢ်ကဝီၤဖိတဂၤထံၣ်န့ၢ်ဝဲသုးကီၣ်ကး(ကၣ်မံးကၣ်စ့ၤဒြိ)လီၤတဲၥ်တဘ့ၣ်အဂ့ၢ်,ကၠီၣ်တဲၣ်(Matichon Online)တၢ်ကစီၣ်သန့ပၥ်ဖျါဝဲဒၣ်န့ၣ်လီၤ.
ဘၣ်ဃးတၢ်ထံၣ်န့ၢ်ဝဲသုးကီၣ်ကး(ကၣ်မံးကၣ်စ့ၤ)ဒြိအံၤအဖီခိၣ်,သုးက့(၇)သုးက့ခိၣ်,သုးခိၣ်ကျၢၢ်ဖိစီၤဒံၣ်ကွဲၤစံးဘၣ်ကညီတၢ်ကစီၣ်ဒ်အံၤန့ၣ်လီၤ.
“တၢ်တခါအံၤနုၥ်လီၤလၢယိၤကီၢ်တကပၤကအိၣ်ဝဲ(၁၂)ကံလိၣ်န့ၣ်လီၤ.ယဆိမိၣ်ကမ့ၢ်ဝဲဖဲအပူၤကွံၥ်ပယီၤဟဲခးဝဲဖဲအူမူထၣ်ကၠိအခါန့ၣ်လီၤ.ဘၣ်မနုၤအဃိလဲၣ်ဟဲခးဝဲလၢအူမူထၣ်ကၠိအခါန့ၣ်,မၤဝဲခဲလၢၥ်သၢဘ့ၣ်သနၥ်က့လီၤတဲၥ်ဖဲအူမူထၣ်ကၠိအံၤန့ၣ်ထဲတဘ့ၣ်ဧိၤလီၤ.ဖဲန့ၣ်အဆၢကတီၢ်မ့မ့ၢ်အဂၤခံဘ့ၣ်လီၤမၢ်ဝဲအဃိန့ၣ်,တၢ်ထံၣ်ဝဲတဘ့ၣ်အံၤကဘၣ်မ့ၢ်ဖဲအလီၤမၢ်(၂)ဘ့ၣ်အကျါတဘ့ၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ.
သုးကီၣ်ကးအတၢ်ဟဲတ့ၢ်လီၤဝဲဒြိဖဲ(သုးက့(၇)အူမူထၣ်ကၠိဟီၣ်ကဝီၤအပူၤအံၤ,ကယံၤဝဲလၢ(၃)လါဃၣ်ဃၣ်လံအဂ့ၢ်,သုးက့(၇)သုးက့ခိၣ် သုးခိၣ်ကျၢၢ်ဖိစီၤဒံၣ်ကွဲၤ စံးအါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါ,(ကၣ်မံးကၣ်စ့ၤဒြိ)လၢအလီၤတဲၥ်ဝဲလၢကၠီၣ်တဲၣ်အပူၤတဘ့ၣ်အံၤ,ထၣ်စီၤယါတၢ်ပၢဟီၣ်ကဝီၤ(မဲးဝ့ၤ)သဝီလီၢ်ကဝီၤဖိတဂၤထံၣ်ဝဲလၢပှၢ်ပူၤတၢ်လီၢ်တတီၤအပူၤ,လၢအစီၤစုၤဝဲဒီးကမျၢၢ်ဒူသဝီ(၅)ကံလိမံးတၢၣ်အပူၤအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
တကတီၢ်ဃီ,ခီဖျိလီၢ်ကဝီၤဖိတဖၣ်အတၢ်တီၣ်ဖျါထီၣ်အဃိ,ပှၤဘၣ်မူဘၣ်ဒါတဖၣ်လဲၤကွၢ်ထံသမံသမိးက့ၤဝဲဒီးဖဲတၢ်သမံးသမိးလီၤတံၢ်က့ၤဝဲအဆၢကတီၢ်ထံၣ်ဃုၥ်ဝဲ(မ့ၣ်ပိၢ်)လၢအလီၤဘၣ်ယိၣ်တဖျၢၣ်ပၣ်ဃုၥ်ဝဲလၢဒြိအံၤအလိၤအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိး,သုးကီၣ်ကး အကၣ်မံးကၣ်စံၣ်ဒြိအံၤ ပညိၣ်တ့ၢ်လီၤဝဲလၢကထီၣ်ဒုးမၤဟးဂီၤဝဲ(KNU)တၢ်လီၢ်တၢ်ကျဲဘၣ်ဆၣ်,တၢ်ရဲၣ်တၢ်ကျဲၤဘျီဝဲအံၤခီဖျိတလံၤတပျၥ်ဝဲအဃိလီၤတဲၥ်က့ၤဝဲလၢကၠီၣ်တဲၣ်ပူၤလီၤအဂ့ၢ်ကၠီၣ်တဲၣ်တၢ်ကစီၣ်သန့တဖၣ်ပဲၥ်ထံနီၤဖးပၥ်ဖျါဝဲဒၣ်စ့ၢ်ကီးန့ၣ်လီၤ.
