လါအီကူး ၂၈သီ, ၂၀၂၅နံၣ်, ခ့ၣ်အဲးစံၣ်
ကီၢ်သူလ့ၤသုးမုၢ်ဒိၣ် KTLA (၁၃)ဂၤသ့ၣ်တဖၣ်အံၤ လၢကဒုးထီဒါသုးမီၤစိရိၤတုၤလီၤတီၤလီၤအဂီၢ် ဟဲက့ၤပၥ်ဖှိၣ်က့ၤသးဒီး ကညီဒီကလုၥ်ဂၢၤသးကရၢ(KNDO) သုးရ့ၣ်(၈)အဂ့ၢ် သ့ၣ်ညါဘၣ်လၢ ပှၤလၢအဘူးဒီး(KTLA) သ့ၣ်တဖၣ်အအိၣ်န့ၣ်လီၤ.
KTLA (၁၃)ဂၤအံၤ လၢအပူၤကွံၥ်လါအီကူး(၁၅)သီအနံၤအခါလံၤလံၤ ဟဲက့ၤပၥ်ဖှိၣ်က့ၤသးဒီး(KDNO)သုးရ့ၣ်(၈) ဒီး ခီဖျိ ခါဆူကညါကဒုးထီဒါသုးမီၤစိရိၤလၢတုၤလီၤတီၤလီၤအဂီၢ်လီၤအဂ့ၢ်ပှၤတီခိၣ်ရိၣ်မဲ(KTLA)လၢဟဲက့ၤဟ့ၣ်လီၤသးအပှၤဘၣ်မူဘၣ်ဒါတဂၤစံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်ဂ့ၢ်အဂုၤအဂၤတအိၣ်ဘၣ်.ခါဆူညါလၢကဒုးထီဒါသုးမီၤစိရိၤတုၤလီၤတီၤလီၤအဂီၢ် ပရဲၣ်ကျဲၤလၢဟဲက့ၤပၥ်ဖှိၣ်မၤသကိးတၢ်ဒ်အံၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
KTLA(၁၃)ဂၤအကျါတဂၤလၢအမ့ၢ် စီၤဒံၤမိၤ အံၤန့ၣ် လၢအပူၤကွံၥ် ဟံးတ့ၢ်ဝဲမူဒါလၢ KTLA အပူၤအမ့ၢ်သုးခိၣ်စိတဂၤဒီး ဖဲအဝဲသ့ၣ်ဟဲက့ၤဟ့ၣ်လီၤသးဝံၤအလီၢ်ခံ (KNDO) သုးရ့ၣ်(၈)တကပၤဟ့ၣ်လီၤဝဲအသ့ၣ်ဒီးတၢ်စုကဝဲၤလၢလၢပှဲၤပှဲၤအဂ့ၢ် သ့ၣ်ညါဘၣ်လၢ (KNDO)သုးရ့ၣ်(၈)အပှၤဘၣ်မူဘၣ်ဒါအအိၣ်န့ၣ်လီၤ.
ပှၤလၢဘူးဒီး(KNDO)သုးရ့ၣ်(၈)တဂၤစံးဝဲလၢ“ကညီကဒဲကဒဲဒီးခီဖျိအဝဲသ့ၣ်အဲၣ်အပှၤကလုၥ်အဃိပတူၢ်လိၥ်မုၥ်အဝဲသ့ၣ်န့ၣ်လီၤ. ခီဖျိအိၣ်လၢတၢ်မဲၥ်ညါဟီၣ်ကဝီၤအဃိပတမၤန့ၢ်ဘၣ်တၢ်တူၢ်လိၥ်မုၥ်အဝဲသ့ၣ်တၢ်ရဲၣ်တၢ်ကျဲၤဘၣ်.အခဲအံၤပဟ့ၣ်လီၤဝဲသ့ၣ်ဒီးကျိဝၣ်လၢပှဲၤလၢကဟံးထီၣ်ဖီၣ်ထီၣ်မူဒါအဂီၢ်လံန့ၣ်လီၤ.”အဂ့ၢ်စံးဝဲန့ၣ်လီၤ.
လၢန့ၣ်အမဲၥ်ညါ (KTLA) သုးဖိ(၁၃)ဂၤအကျါ (၁)ဂၤလၢအမ့ၢ်စီၤဒံၤမိၤ န့ၣ် ခီဖျိတလူၤပိၥ်ဒိကနၣ်မၤထွဲဝဲဒၣ် KTLA ခိၣ်နၢ်တၢ်ထုးစုနဲၣ်ကျဲအဘျီအါလံအဃိ ဖဲအပူၤကွံၥ်လါမးရှး(၃၁)သီအနံၤန့ၣ် ဘၣ်တၣ်ထုးထီၣ်ကွံၥ်အီၤလၢ(KTLA)တၢ်ကရၢကရိပူၤအဂ့ၢ် သ့ၣ်ညါဘၣ်လၢပှၤလၢဘူးဒီး(KTLA)သ့ၣ်တဖၣ်အအိၣ်န့ၣ်လီၤ.
စးထီၣ် ၂၀၂၂နံၣ် သုးခိၣ်နၢၤဒါ တီခိၣ်ရိၣ်မဲ ကရၢကရိထီၣ် ကီၢ်သူလ့ၤသုးမုၢ်ဒိၣ်(KTLA)ဝဲအံၤဒီး တုၤဖဲ ၂၀၂၅နံၣ်အတီၢ်ပူၤအံၤန့ၣ် KTLA သုးခိၣ်သ့ၣ်တဖၣ်ဒ်အမ့ၢ် သုးခိအဲၣ်စ့ဝါ,သုးခိၣ်ဝ့မၠ့ၣ်,သုးခိၣ်ဖုချၢၣ်,သုးခိၣ်စၣ်လိ,သုးခိၣ်စွ့ၣ်အိ,သုးခိၣ် ဝါန့ၢ်မူသ့ၣ်တဖၣ်ထုးဖးကွံၥ်သးဒီး(KTLA) တၢ်ကရၢကရိဒီးတနီၤန့ၣ် ပၥ်ဖှိၣ်မၤသကိးက့ၤတၢ်ဒီး(BGF), တနီၤန့ၣ်ပၥ်ဖှိၣ်မၤသကိးက့ၤတၢ်ဒီး(KNU)ဒီးတနီၤန့ၣ်အိၣ်က့ၤဝဲဒ်ကမျၢၢ်အသိးအိၣ်ဝဲဒၣ်အဂ့ၢ် သ့ၣ်ညါဘၣ်န့ၣ်လီၤ.