လါအီးကထိဘၢၣ် ၂၁ သီ, ၂၀၂၆နံၣ်, ခ့ၣ်အဲးစံၣ်
ခီဖျိ ယူရိၤပၤခီပနံၣ်တနီၤ ဆဲးမၤဒံးတၢ်လၢ ကီၢ်ပယီၤ အရ့ၣ်နီၣ်သိဒီးန့ဆၢၣ်ဂၥ်သဝံတၢ်မၤတဖၣ်ပူၤအဃိ ဒ်သိး EU ကမၤဃံးထီၣ် တၢ်မၤပတုၥ်ဟံးန့ၢ်အရ့အဂီၢ် Burma Campaign UK ဒီး တၢ်တဲန့ၢ်ခဲးတၢ် တၢ်ကရၢကရိ ၁၄ ဖုလၢ အိၣ်သူၣ်လီၤသးလၢ ယူရပၤတဖၣ် ဃ့ထီၣ်ဝဲဒၣ်ဖဲလါအီးကထိဘၢၣ် အသီ ၂၀ အနံၤန့ၣ်လီၤ.
အပူၤကွံၥ်အနွံပူၤ သုးကရူၢ်ခိၣ်မ့အီၤလဲၤ အိးထီၣ်ဝဲ သၣ်လၠ့ၣ် တၢ်ထုးထီၣ် ရ့ၣ်နီၣ်သိအလီၢ် လၢထုးထီၣ်ကဘီယူၤသိသ့ဝဲ တခါအံၤဝံၤအလီၢ်ခံ ဒ်ကဒုးတၢ်ဒီးကဘီယူၤအဂီၢ် သုးကရူၢ်ကဒိးန့ၢ်ဘၣ် ကဘီယူၤသိ ညီဒိၣ်ထီၣ်ဝဲအဂ့ၢ် တၢ်ကရၢကရိတဖၣ် ဘၣ်ယိၣ်ဝဲဒၣ်န့ၣ်လီၤ.
၂၀၂၂ နံၣ်အပူၤ EU မၤပတုၥ်ဟံးန့ၢ်အရ့ဆူ ကီၢ်ပယီၤ ရ့ၣ်နီၣ်သိဒီး န့ဆၢၣ်ဂၥ်သဝံတၢ်မၤ (MOGE) နၥ်သက့ ခီဖျိလၢ တၢ်ဟံးန့ၢ်အရ့ဆူ ဂၥ်သဝံသနၢၣ်ဒီတခါညါ တအိၣ်ဘၣ်အဃိ ယူရပၤခီပနံၣ်တနီၤ ဆဲးမၤဒံးတၢ်ဆူညါသ့ဝဲလီၤအဂ့ၢ် Burma Campaign UK ပၥ်ဖျါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါ ယူရပၤခီပနံၣ် SED Energy ဆဲးလီၤလံၥ်တၢ်အၢၣ်လီၤဒီး ကၠီၣ်တဲၣ်ခီပနံၣ် PTTEP ဒီး ဖံးမၤတၢ်ဖဲ Zawtika Gas Field (ဇီတံၣ်ကၣ် န့ဆၢၣ်ဂၥ်သဝံ) တၢ်မၤလီၢ်အပူၤန့ၣ်လီၤ. တၢ်မၤလီၢ်အဝဲန့ၣ် ကဆှၢန့ၢ်ဂၥ်သဝံဆူ သၣ်လၠ့ၣ်တၢ်ထုးထီၣ်ရ့ၣ်နီၣ်သိအလီၢ်အဖီခိၣ် တၢ်ကစီၣ်တဖၣ်အိၣ်ဝဲအဂ့ၢ် ပၥ်ဖျါထီၣ်ဝဲလၢ လံၥ်ပၥ်ဖျါအပူၤန့ၣ်လီၤ.
လၢတၢ်န့ၣ်အဃိ ဒ်ကတြီပဒီ ကီၢ်ပယီၤသုး ဒ်သုတဒိးန့ၢ်ဘၣ် ကျိၣ်စ့ စုကဝဲၤဒီး သုးတၢ်ပီၤတၢ်လီတဖၣ် လၢကမၤသံမၤဝီက့ၤ ထံဖိကီၢ်ဖိတဖၣ် တဂ့ၤ အဂီၢ် ဒီး ဒ် EU တကပၤ ကမၤဃံးထီၣ်တၢ်ပတုၥ်ဟံးအရ့ တဖၣ်အဂီၢ် Burma Campaign UK ဒီး တၢ်တဲန့ၢ်ခဲးတၢ် တၢ်ကရၢကရိ ၁၄ ဖု တဖၣ် ဆီၣ်သခူထီၣ်ဝဲဒၣ်န့ၣ်လီၤ.
