လါအီးကထိဘၢၣ် ၂၁ သီ, ၂၀၂၆ နံၣ်, ခ့ၣ်အဲးစံၣ်
လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်ကဝီၤအံၤတဆီ (BGF)သုးခိၣ်စီၤမိၣ်သိၤ အတၢ်လဲၤအိၣ်ဆီလီၤသးလၢ(သုးက့ ၅)ဟီၣ်ကဝီၤပူၤအဖီခိၣ် တၢ်တူၢ်လိၥ်ဝဲဘၣ်ဒီးတၢ်ဆီၣ်သနံးကလုၥ်ကလုၥ်အဃိ ဟးထီၣ်ကွံၥ်ဝဲလၢဟီၣ်ကဝီၤဖဲန့ၣ်အပူၤလံအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါယူၤလံဘူးကလၢၥ်အခါန့ၣ် သုးခိးကီၢ်ဆၢ(BGF)သုးခိၣ်စီၤမိၣ်သိၤလၢတၢ်ထုးထီၣ်အီၤ(ဖမ်း၀ရမ်း)အံၤ အဝဲဃုၥ်ဒီး အသုးဂံၢ်ဘါ(၃၀၀)ဃၣ်ဃၣ်လဲၤဆီလီၤအလီၢ်အကျဲနုၥ်လီၤအိၣ်ဝဲဒၣ်လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅) မဲၤကၠံၣ်ကစၢၢ်ခီၣ် ထံးအံၤဒီး ဖဲန့ၣ်မၤစၢၤဆီၣ်ထွဲဝဲလီၢ်ကဝီၤကမျၢၢ်ဃုၥ်ဒီးကမျၢၢ်ပှၤဃ့ၢ်မှံဟးဖျိးအံၤလၢဂံၢ်ခီၣ်ထံးတၢ်အီၣ်တၢ်အီအိၣ်ဝဲဒၣ် န့ၣ်လီၤ.
ဒ်န့ၣ်အသိးလၢတကပၤစ့ၢ်ကီး ကၠါဖၠၣ်တၢ်လံၣ်အီၣ်လီအီၣ်တၢ်ဖံးတၢ်မၤလၢအတၢ်ဘျးစဲအိၣ်ဒီးအီၤအံၤစ့ၢ်ကီး တၢ်ရဲၣ်တၢ်ကျဲၤအိၣ် ကလဲၤဟူးဂဲၤဝဲဖဲန့ၣ်အိၣ်အဂ့ၢ်န့ၣ် တၢ်ကစီၣ်ရၤလီၤအသးစ့ၢ်ကီးအိၣ်ဝဲဒၣ်အါမးန့ၣ်လီၤ.
သုးခိၣ်စီၤမိၣ်သိၤ လဲၤနုၥ်လီၤအိၣ်ဖဲန့ၣ်ဝံၤတၢ်ဆၢကတီၢ်န့ၢ်ခံလါဘျဲၣ်လီၢ်ခံ အပူၤကွံၥ်ခံနွံဃၣ်ဃၣ်အခါန့ၣ် လၢတၢ်ဆီၣ်သနံး အကလုၥ်ကလုၥ်အဃိ အဝဲဃုၥ်ဒီးအပှၤတဖၣ်ဟးထီၣ်ကွံၥ်ဝဲလၢတၢ်လီၢ်ဖဲန့ၣ်ဝံၤ က့ၤကဒါဝဲဆူအကစၢ်တၢ်လီၢ် တၢ်ကျဲလံအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ လီၢ်ကဝီၤပှၤဘၣ်မူဘၣ်ဒါတဂၤလၢအိၣ်ဖဲ(သုးက့ ၅)ဒီး(သုးက့ ၁)အဆၢအံၤစံးဝဲလၢ “အဟးထီၣ်လၢ(သုးက့ ၅) ဟီၣ်ကဝီၤပူၤဖဲန့ၣ်ကအိၣ်လၢအသီ(၁၀)ညါလံ. ဖဲအဟးထီၣ်က့ၤလီၢ်ခံဘျီန့ၣ် အပှၤလၢအအိၣ်တ့ၢ်တဖၣ်နါက့ဟးထီၣ် ကဒါတဘျီ တစဲး တဘျီစဲးက့ၤဝဲဒၣ်လၢအကစၢ်လီၢ်ကစၢ်ကျဲန့ၣ်လီၤ.မ့ၢ်လၢအဝဲသ့ၣ်န့ၣ်အမံၤဟူလၢကၠါဖၠၣ်အဃိ ပတအဲၣ်ဒိးမၤဘၣ်ထွဲပသး ဒီးအဝဲဘၣ် ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
သုးခိၣ်စီၤမိၣ်သိၤလၢအမ့ၢ်ဝဲBGF() သုးဟီၣ်ကဝီၤနီၣ်ဂံၢ်(၄)အခိၣ်အံၤ မ့ၢ်ပှၤတဂၤလၢအမံၤဟူသၣ်ဖျါဝဲလၢ(အီၤလါ)ကၠါဖၠၣ် တၢ်လံၣ်အီၣ်လီအီၣ်ပှၤကျိၣ်ပှၤစ့တၢ်ဖံးတၢ်မၤအပူၤဒီး ဒ်န့ၣ်အသိးလၢတၢ်သ့ၣ်တဖၣ်အံၤအဃိ ဖဲအပူၤကွံၥ်လါယူၤလံ ၂၇ သီ အခါန့ၣ် ကီၢ်ကၠီၣ်တဲၣ်တၢ်ဃိထံသမံးသမိးဝဲၤကျိၤ(DSI)ထုးထီၣ်ဘိးဘၣ်ရၤလီၤဝဲလၢ(ဖမ်း၀ရမ်း)တၢ်ကဘၣ်ဖီၣ်အီၤန့ၣ်လီၤ.
ခီဖျိလၢတၢ်သ့ၣ်တဖၣ်အံၤအဃိ စးထီၣ်ဖဲန့ၣ်သုးခိၣ်စီၤမိၣ်သိၤသုးတဒၢအသးလဲၤအိၣ်ဆီလီၤသးလၢ(သုးက့ ၅) ဟီၣ်ကဝီၤ အပူၤဒီး လၢအတၢ်လဲၤအိၣ်ဆီလီၤသးအဖီခိၣ်စ့ၢ်ကီး ကီၢ်ရ့ၣ်/သုးက့ခိၣ်နၢ်ပှၤဘၣ်မူဘၣ်ဒါတတူၢ်လိၥ်ဝဲဘၣ်အဂ့ၢ်န့ၣ် (သုးက့ ၅) ပှၤဘၣ်မူဘၣ်ဒါစံးစ့ၢ်ကီးဝဲန့ၣ်လီၤ.
“စးထီၣ်ဖဲအဟဲအိၣ်လၢမဲၤကၠံၣ်ကစၢၢ်ခိၣ်အခါန့ၣ်ပ(သုးက့ ၅)ဒုတတူၢ်လိၥ်ဘၣ်. မ့ဝံၤပဒုးသ့ၣ်ညါအီၤလၢနမ့ဆဲးအိၣ်ဖဲအံၤန့ၣ် တၢ်ဘၣ်ဂံၥ်ဂူၥ်ကဲထီၣ်သ့လီၤ. တကးဒံးဘၣ်ဖဲအဟဲအိၣ်ဖဲန့ၣ်အခါန့ၣ် ပပှၤလဲၤခးအဝဲသ့ၣ်အိၣ်အဃိ ကဘၣ်မ့ၢ်အဟးထီၣ်ကွံၥ် ဒ်အံၤလီၤ”အဂ့ၢ်န့ၣ် (သုးက့ ၅)သုးက့ခိၣ် သုးခိၣ်ကျၢၢ်ဖိ စီၤဂံၢ်နွံ စံးဝဲန့ၣ်လီၤ.
ဒ်န့ၣ်အသိးဘၣ်ဃးသုးခိၣ်စီၤမိၣ်သိၤ အတၢ်ဟးထီၣ်ကွံၥ်လၢဟီၣ်ကဝီၤပူၤတၢ်ဂ့ၢ်အံၤန့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးဝဲလၢ“သုးခိၣ်မိၣ်သိၤအတၢ်ဟဲအိၣ်လၢ(သုးက့ ၅)ဒီး(သုးက့ ၁)အဘၢၣ်စၢၤတၢ်ဂ့ၢ်အံၤန့ၣ် အပူၤကွံၥ်ယတဲ တ့ၢ်ဃၥ် အိၣ်လီၤ. လၢ(သုးက့ ၅)အဂီၢ်န့ၣ်တဂ့ၤဘၣ်ဒီးလၢအဝဲအဂီၢ်စ့ၢ်ကီးတမ့ၢ်တၢ်လၢအဂ့ၤဘၣ်. ခဲအံၤအဟးထီၣ်က့ၤကဒါလၢ အလီၢ် လံ အဃိဂ့ၤဝဲ. အခိၣ်သ့ၣ်န့ၣ်ဂ့ၤဒိၣ်ကတၢၢ်လၢကမျၢၢ်အဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်လီၢ်ကဝီၤခ့ၣ်အဲၣ်ယူၣ်ပှၤဘၣ်မူဘၣ်ဒါစံးဝဲအသိးန့ၣ် အပူၤကွံၥ်လါစဲးပထ့ဘၢၣ်အခါ လၢသုးခိၣ်စီၤမိၣ်သိၤအတၢ်လဲၤအိၣ်ဆီလီၤ သးဖဲမဲးကၠံၣ်ကစၢၢ်ခီၣ်ထံးအဖီခိၣ်အံၤန့ၣ် တၢ်တဘၣ်မၤဘၣ်ထွဲသးဒီးအဝဲသ့ၣ်ဘၣ်အဂ့ၢ် မုၢ်တြီၢ်ကီၢ်ရ့ၣ်(သုးက့ ၅) ထုးထီၣ်ဝဲလံၥ် တၢ်ကလုၢ်တဘ့ၣ်လၢလီၢ်ကဝီၤကမျၢၢ်ကလူၤပိၥ်မၤထွဲဝဲအံၤအိၣ်ဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်သ့ၣ်တဖၣ်အံၤအဖီခိၣ် တကီၢ်ခါခဲအံၤသုးခိၣ်စီၤမိၣ်သိၤဃုၥ်ဒီးအပှၤလၢလဲၤအိၣ်ဆီလီၤသးဖဲန့ၣ်တဖၣ် ဟးထီၣ်ဒီး ဟဲက့ၤဟူးဂဲၤကဒါဝဲလၢအဟီၣ်ကဝီၤ(သုးက့ ၆)ကီးတရံးကီၢ်ဆၣ်အပူၤလံအဂ့ၢ်န့ၣ် သ့ၣ်ညါဘၣ်န့ၣ်လီၤ.
