လါအီကူး ၂၆ သီ, ၂၀၂၅ နံၣ်, ခ့ၣ်အဲးစံၣ်
ဘူးဒးကညီသုးမုၢ်ဒိၣ်(DKBA)တြဲၤလၢအိၣ်ဆီလီၤသးဖဲဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် နီဖးဒိၣ်ကရူၢ် ကၠီတလူၢ် သဝီဃၢၤအံၤ မဟါတၢ်လဲၤကွံၥ်ဝဲဒီးမ့ၣ်ပိၢ်ကဲထီၣ်ဝံၤ ဖဲတဂီၤအံၤ(DKBA)သုးသိလ့ၣ်ဟဲထီၣ်(၅)ခိၣ်ဝံၤခးလီၤဝဲတၢ်ဆူဘီနီၤကျိ ဝၢ်ခီတကပၤ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဖဲတနံၤအံၤလါအီကူး ၂၆ သီ ဂီၤခီအဆၢကတီၢ်န့ၣ် (DKBA)သုးခိၣ်ဘိၤဘံၣ်အပှၤလၢအိၣ်ဃိၣ်ဖိတၢ်လီၢ်အံၤတဖၣ် ဟဲဒိးဝဲဒီး သိလ့ၣ်(၅)ခိၣ်လၢသုးဂံၢ်ဘါကအိၣ်အဂၤ(၅၀)ဃၣ်ဃၣ်အံၤ လဲၤဃီၤဝဲဆူထံဃီဝါသဝီချံသန့တၢ်လီၢ်ဝံၤ ခးလီၤဝဲမီထး, (7)ကျိ တစှၤန့ၢ် (၁၅)ဖျၢၣ်အံၤဆူ ဘီနီၤကျိဝၢ်ခီ သထူၣ်ကီၢ်ဆၣ်ပူၤတကပၤ အဂ့ၢ်န့ၣ်စံးဝဲန့ၣ်လီၤ.
လၢ(DKBA)ခးလီၤတၢ်ဘျီဝဲၤအံၤ ကမျၢၢ်အတၢ်သူၣ်ထီၣ်ဒဲအထူၣ်ဘၣ်ဒိဘၣ်ထံးဝဲအိၣ်အမဲၥ်ညါ မၤဟးဂီၤကွံၥ်ဝဲကမျၢၢ်အထိ (၂)ဘ့ၣ် အဂ့ၢ်န့ၣ် သထူၣ်ကီၢ်ဆၣ် ပှၤဘၣ်မူဘၣ်ဒါတဂၤ စံးဝဲဒ်အံၤန့ၣ်လီၤ.
အဝဲစံးဝဲလၢ“အဝဲသ့ၣ်ဟဲဖဲချံသန့န့ၣ်ကခီဃီၤလၢပအိၣ်(သထူၣ်ကီၢ်ဆၣ်)တကပၤနါက့ခီဝဲတဘူၣ်ဘၣ်အဃိခးစိဃီၤတၢ်န့ၣ်.ခးစိကျိန့ၣ်ဘၣ်ပှၤဒဲထူၣ်တတၢၣ်ခံတၢၣ်ညါ.ခးဝဲဝံၤဘျီအမၤဟးဂီၤပှၤထိ,ဒွဲၣ်ထီၣ်ကွံၥ်ပှၤထိမီၤနီၤ.အဝဲမၤကဒံကဒါဟဲထီၣ်မၤဟးဂီၤထိဘျီပတသ့ၣ်ညါတၢ်နီတမံၤဘၣ်.ခးလီၤကျိဝံၤပဆိမိၣ်လၢအဝဲသ့ၣ်မ့ခီဃီၤန့ၣ်ပကသဂၢၢ်အီၤမီၤ.အတခီဝဲစ့ၢ်ဘၣ်.ခးလီၤတၢ်ဝံၤဘျီက့ၤထုးကဒါသးန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တချုး(DKBA)သုးဟဲလီၤဒီးခးလီၤကျိဖဲတဂီၤညါအံၤကဲထီၣ်ဒံးဘၣ် ဖဲမဟါလါအီကူး ၂၅ သီ ဂီၤခီအဆၢကတီၢ်န့ၣ် ဟီၣ်ကဝီၤ (KNLA) သုးရ့ၣ် ၁ အပှၤလဲၤကွံၥ်ဝဲ(DKBA)အတြဲၤလၢအိၣ်ကၠီတလူၢ်သဝီဃၢၤအံၤအဃိ ဖဲန့ၣ်သံ(၃)ဂၤ,ဘၣ်ဒိ(၂)ဂၤဒီး တၢ်ကဲထီၣ်သးဖဲန့ၣ်ဝံၤမုၢ်ဆ့ၣ်ထီၣ်တၢ်ဘၣ်ဟဲကဲထီၣ်သးဒ်အံၤန့ၣ်လီၤ.
တကးဒံးဘၣ်လၢန့ၣ်အမဲၥ်ညါဖဲ(DKBA)အပှၤဟဲလီၤဆူထံဃီဝါချံသန့အဆၢကတီၢ်န့ၣ် ကၠိလၢအိၣ်နီဖးဒိၣ်သဝီ, နိရါသဝီ,ဖှ့ဒူကူ, ထံဃီဝါသဝီပူၤတဖၣ်အံၤ (DKBA)မၢတၢ်ပံၥ်ကွံၥ်ဝဲခဲလၢၥ်ဒီး ပှၤသဝီဖိစ့ၢ်ကီးတပျဲဟးထီၣ်ဝဲလၢတၢ်ချၢဘၣ်အဂ့ၢ်န့ၣ် လီၢ်ကဝီၤပှၤ ဘၣ်မူဘၣ်ဒါ လၢအိၣ်ဘူးဖဲန့ၣ်တဂၤ စံးဝဲဒ်အံၤန့ၣ်လီၤ.
“အဝဲသ့ၣ်န့ၣ်ဟဲလီၤဒီးကါန့ၣ်(၅)ခိၣ်.ပတယးအနီၣ်ဂံၢ်ကအိၣ်ဖဲ(၄၀)ဘျဲၣ်ဒ်န့ၣ်လီၤ.မ့မ့ၢ်လၢအခးလီၤကျိဖးဒိၣ်အတၢ်ပညိၣ်ဒုတသ့ၣ်ညါဘၣ်.ဖဲတဂီၤအံၤအဝဲသ့ၣ်ဟဲလီၤဘျီမၢပှၤပံၥ်ကွံၥ်ကၠိ,လဲၤဆူထံနံၤခိၣ်ဘျီခးလီၤကျိလီၤ.မ့မ့ၢ်လၢအဝဲသ့ၣ်ဟဲလီၤန့ၣ်အိၣ်လၢဃိၣ်ဖိအဃိဟဲလီၤဘၣ်ဝဲဖဲကၠီတလူၢ်ဆၢခိၣ်,ဝၣ်တရဲၢ်,နီဖးဒိၣ်,နိၣ်ချံး,ဖှ့ဒူကူ,နိရါသဝီဒီးထံဃီဝါသဝီတဖၣ်န့ၣ်လီၤ.ဘၣ်ဆၣ်မ့မ့ၢ်ကၠိလၢအပံးဝဲန့ၣ်ပံၥ်ဝဲထဲနီဖးဒိၣ်,ဖှ့ဒူကူ,နိရါဒီးထံဃီဝါသဝီ(၄)ဖျၢၣ်အံၤလီၤ.မ့ဝံၤပှၤသဝီဖိနါက့တပျဲဟးထီၣ်ဝဲလၢတၢ်ချၢလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဖၣ်စံးဝဲအသိးန့ၣ် (DKBA)ခးစိကျိ,မၤဟးဂီၤပှၤထိဖဲထံဃီဝါဘီနီၤကျိကပၤဝံၤ ဖီၣ်က့ၤကိးဝဲ ကမျၢၢ်အိၣ်ဝဲဘၣ်ဆၣ် တၢ်ဖီၣ်က့ၤကိးဝဲပှဲၤဂၤလဲၣ်န့ၣ်မၤလီၤတံၢ်တန့ၢ်ဒံးဘၣ်အဂ့ၢ်န့ၣ် စံးဝဲန့ၣ်လီၤ.
ဘၣ်ဃးတၢ်ဂ့ၢ်လၢအကဲထီၣ်သးဖဲမဟါဒီးတနံၤအံၤ တဖၣ် ဒ်သိးကသ့ၣ်ညါဘၣ်တၢ်ဂ့ၢ်တၢ်ကျိၤလၢ(DKBA)အအိၣ်တကပၤအဂီၢ် ပခ့ၣ်အဲးစံၣ်- ကညီတၢ်ကစီၣ်ဆဲးကျိး(DKBA)ပှၤဘၣ်မူဘၣ်ဒါဘၣ်ဆၣ် ဆဲးကျိးတန့ၢ်ဝဲဘၣ်န့ၣ်လီၤ.
ဟီၣ်ကဝီၤဒူသဝီတၢ်လီၢ်လၢတၢ်ကဲထီၣ်သးခဲအံၤတဖၣ်န့ၣ်မ့ၢ်ဝဲကညီဖိအဒူသဝီလီၤဘၣ်ဆၣ် စးထီၣ်ဖဲ(၂၀၂၁)သုးဟံန့ၢ်တၢ်စိ တၢ်ကမီၤဝံၤလီၢ်ခံန့ၣ် သုးမီၤစိရိၤပၥ်လီၤဝဲဂၢၤကီၢ်(ပၠံၤသူၣ်စ့ၣ်)တဖၣ်ဒီး ခ့ၣ်အဲၣ်ယူၣ်တကပၤစ့ၢ်ကီးတတူၢ်လိၥ်ဝဲဘၣ်အဃိ တၢ်သဘံၣ်သဘုၣ်စးထီၣ်ကဲထီၣ်ဝဲန့ၣ်လီၤ.
ဘၣ်ဆၣ်ဖဲအပူၤကွံၥ်(၂၀၂၄)လါအီကူးအခါန့ၣ် ဂၢၤကီၢ်သုး(ပၠံၤသူၣ်စ့ၣ်)တဖၣ်အံၤ(ခ့ၣ်အဲၣ်ယူၣ်)ထုးထီၣ်လံၥ် ဟ့ၣ်ပလီၢ်အဝဲသ့ၣ် အိၣ်ထီၣ်ဒီး အနီၢ်ကစၢ်စ့ၢ်ကီးတအဲၣ်ဒိးအိၣ်လၢသုးမီၤစိရိၤ စုတီၤဖီလၥ်ဘၣ်အဃိတနီၤန့ၣ်အဝဲသ့ၣ်က့ၤအးကဒါက့ၤကျိ တဖၣ်ဆူ ဖၣ်အၣ်သုးမီၤစိရိၤ အအိၣ်အသိး တနီၤန့ၣ်လဲၤပၥ်ဖှိၣ်မၤသကိးတၢ်ဒီး(DKBA)ဒီးတနီၤန့ၣ်က့ၤဟ့ၣ်လီၤအကျိဆူ (ခ့ၣ်အဲၣ်ယူၣ်) အအိၣ်စ့ၢ်ကီးအိၣ်ဝဲန့ၣ်လီၤ.
လၢတၢ်န့ၣ်အဃိစးထီၣ်ဖဲန့ၣ် (DKBA)သုးခိၣ်ဘိၤဘံၣ်တကပၤမၤအါထီၣ်အသုးဂံၢ်ဘါဖီၣ်လိၥ်စုမၤသကိးတၢ်ဒီးသုးမီၤစိရိၤ အမဲၥ်ညါ (ပၠံၤသူၣ်စ့ၣ်)လၢအက့ၤမၤသကိးတၢ်ဒီးအဝဲသ့ၣ်တဖၣ် ဆဲးဟူးဂဲၤဝဲဖဲန့ၣ်ဒီးဆီလီၤတြဲၤခိးထၢစ့လၢအတအိၣ်ဒီးကမျၢၢ် တၢ်အဲၣ်ဒိးအဃိ တၢ်ဘၣ်ဂံၥ်ဂူၥ်ဘၣ်ဟဲအိၣ်ထီၣ်ဝဲလၢဟီၣ်ကဝီၤ(KNLA)သုးရ့ၣ်-၁ အပှၤဒီး (DKBA)အဘၢၣ်စၢၤဟဲအိၣ်ထီၣ်ဝဲ တုၤလၢခဲအံၤန့ၣ် လီၤ.