လါအီကူး ၁၆ သီ, ၂၀၂၅ နံၣ်, ခ့ၣ်အဲးစံၣ်
ဖဲမဟါလါအီကူး ၁၅ သီအနံၤန့ၣ် လၢကညီသုးခိးကီၢ်ဆၢ(BGF/KNA) သုးဟီၣ်ကဝီၤ(၂) အဟီၣ်ကဝီၤပူၤန့ၣ် တၢ်မၤဝဲ ၁၉ ဝီတဝီ တၢ်ပျၢ်က့ၤဂံၢ်ခီၣ်ထံးသုးတၢ်မၤလိမူးတၢ်ရဲၣ် တၢ်ကျဲၤဝံၤဝဲလံ အဂ့ၢ်န့ၣ် သ့ၣ်ညါဘၣ်န့ၣ်လီၤ.
၁၉ ဝီတဝီ ဂံၢ်ခီၣ်ထံးသုးတၢ်မၤလိလၢအဘၣ်တၢ်တီခိၣ်ရိၣ်မဲအိးထီၣ်ဝဲလၢ(BGF/KNA)အံၤ လၢဂံၢ်ခီၣ်ထံးသုးတၢ်မၤလိဘျီဝဲအံၤ အပူၤ ပှၤသုးဖိပၥ်ဖှိၣ်(၅၂၀)ဂၤဖျိထီၣ်ဝဲဒီး တကးဒံးဘၣ်လၢတၢ်ရဲၣ်တၢ်ကျဲၤအပူၤသုးဖိသံၣ်ဖိလၢအဖျိထီၣ်တဖၣ်တၢ်ဟ့ၣ်လီၤဃုၥ်ဝဲ ဒီးကျိ တဂၤစုၥ်စုၥ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ဟ့ၣ်ဂံၢ်ခီၣ်ထံးသုးမၢ်မၤလိဘျီဝဲအံၤ တၢ်ဆၢကတီၢ်တံၥ်တၥ်ဝဲ(၃)လါတခီဒီး ပှၤသုးဖိသံၣ်ဖိလၢအဖျိထီၣ်ဂံၢ်ခီၣ်ထံးသုးတၢ်မၤလိ သ့ၣ်တဖၣ်အံၤအါဒၣ်တက့ၢ်မ့ၢ်ဝဲသူၣ်ဘီၣ်သးစၢ်သ့ၣ်တဖၣ်လီၤအဂ့ၢ်န့ၣ် သ့ၣ်ညါလၢ(BGF)ပှၤဘၣ်မူဘၣ်ဒါအအိၣ်န့ၣ်လီၤ.
တကးဒံးဘၣ်ခါဆူမဲၥ်ညါထံကီၢ်တဘ့ၣ်အပူၤဒ်သိးကအိၣ်ဒီးတၢ်မုၥ်တၢ်ခုၣ်,တၢ်လဲၤထီၣ်လဲၤထီအဂီၢ်မူဒါအိၣ်လၢသုးဖိသူၣ်ဘီၣ်သးစၢ် တဖၣ်အံၤအစုပူၤအဂ့ၢ်န့ၣ် (BGF/KNA)သုးဟီၣ်ကဝီၤ-၂ အခိၣ် သုးခိၣ်ကျၢၢ်ဖိ စီၤတ့ၤဝ့ စံးလီၤဝဲလၢတၢ်ရဲၣ်တၢ်ကျဲၤအပူၤ န့ၣ်လီၤ.
“သးစၢ်သုးဖိတဖၣ်မူဒါအိၣ်လၢကဘၣ်မၤဂုၤထီၣ်ပသီထီၣ်,မၤလဲၤထီၣ်လဲၤထီထံလီၢ်ပူၤတၢ်မုၥ်တၢ်ခုၣ်.ဒီးဖဲလၢထံကီၢ်တၢ်မုၥ်တခုၣ် ဘၣ်အကတီၢ်အံၤဒ်သိးထံဖိကီၢ်ဖိကအိၣ်ဘၣ်ဘံၣ်ဘံၣ်ဘၢဘၢအဂီၢ်မူဒါအိၣ်လၢကဘၣ်ဒီသဒၢအဝဲၣ်သ့ၣ်န့ၣ်လီၤ.ကလုၥ်ဒူၣ်လၢအိၣ်ကီၢ်ပယီၤပူၤတဖၣ်တလိၣ်ပဲၥ်ဖးနီၤဖးတၢ်ဘူၣ်တၢ်ဘါ,ကလုၥ်ဒူၣ်ဘၣ်ဒီးမူဒါအိၣ်လၢကမၤလဲၤထီၣ်လဲၤထီၣ်ဟီၣ်ကဝီၤတၢ်လီၢ်လၢသုအိၣ်အပူၤတဖၣ်န့ၣ်လီၤ”အဂ့ၢ်န့ၣ် စံးဝဲန့ၣ်လီၤ.
တကတီၢ်ဃီလၢတၢ်ပျၢ်က့ၤဂံၢ်ခီၣ်ထံးသုးတၢ်မၤလိတၢ်ရဲၣ်တၢ်ကျဲၤအပူၤ (BGF/KNA)သုးဟီၣ်ကဝီၤ-၂ အခိၣ် သုးခိၣ်ကျၢၢ်ဖိ စီၤတ့ၤဝ့ ကတိၤလီၤတၢ်အမဲၥ်ညါ သုးခိၣ်မီၤဝ့, သုးခိၣ်စီၤမိၣ်သိၤ ဒီး (DKBA)သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤစွ့ၤဝၣ် ကတိၤဟ့ၣ်ဂံၢ်ဟ့ၣ်ဘါလီၤ သုးဖိသံၣ်ဖိတဖၣ်စုၥ်စုၥ်န့ၣ်လီၤ.
ဂံၢ်ခီၣ်ထံးသုးတၢ်မၤလိလၢ(BGF)အိးထီၣ်ညီနုၢ်ဝဲအံၤ တၢ်ပၥ်ပနီၣ်အီၤလၢတၢ်ကဟ့ၣ်ဝဲတနံၣ်ပှဲၤဘျီလဲၣ်န့ၣ်တအိၣ်ဘၣ်ဒီး ဘၣ်ဆၣ်သုးဖိအနီၣ်ဂံၢ်မ့အိၣ်(၂၀၀)ဂၤန့ၣ်တၢ်စးထီၣ်ဟ့ၣ်ဝဲတၢ်မၤလိအံၤအဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ ဆှဲပၠးစံးဝဲန့ၣ်လီၤ.
အဝဲစံးဝဲလၢ“ပအိးထီၣ်တနံၣ်ပှဲၤဘျီလဲၣ်န့ၣ်ပပၥ်ပနီၣ်အီၤတအိၣ်ဘၣ်.ပကွၢ်လၢသုးနီၣ်ဂံၢ်မ့အိၣ်အဂၤ(၂၀၀)န့ၣ်ပစးထီၣ်ဟ့ၣ်တၢ်မၤလိလီၤ.မၤလိတဘျီန့ၣ်ပပၥ်ပနီၣ်တၢ်ဆၢကတီၢ်(၃)လါ.တဘျီတခီၣ်န့ၣ်ပှၤနီၣ်ဂံၢ်ကအိၣ်လၢ(၄၀၀),(၅၀၀)ဂၤညါ.ဘၣ်ဆၣ်တဘျီတခီၣ် န့ၣ်ကအိၣ်(၂၀၀),(၃၀၀)တဘျီတဘျီတဒ်သိးလိၥ်အသးဘၣ်.ဒိးသန့ၤထီၣ်သးလၢသုးဖိတၢ်အိၣ်သးလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးတၢ်ပျၢ်တၢ်မၤလိတၢ်ရဲၣ်တၢ်ကျဲၤဘျီဝဲအံၤ(BGF/KNA)တကပၤသုးခိၣ်သုးနၢ်,ပှၤဘၣ်မူဘၣ်ဒါ,( DKBA)တကပၤ သုးခိၣ်သုးနၢ်,ပှၤဘၣ်မူဘၣ်ဒါဃုၥ်ဒီးခိၣ်နၢ်ပှၤဘၣ်မူဘၣ်ဒါဘၣ်ထွဲလၢအဂၤတဖၣ်ဃုၥ်ဒီးကဝီၤပှၤဘၣ်မူဘၣ်ဒါ လဲၤထီၣ်ဝဲတၢ်ရဲၣ် တၢ်ကျဲၤအံၤန့ၣ်လီၤ.
ကညီသုးခိးကီၢ်ဆၢ(BGF/KNA)ကရူၢ်အံၤအိၣ်ဆီလီၤသးဟူးဂဲၤဝဲဒၣ်ဖဲမၠၣ်၀တံၣ်,စွ့ၤကိၣ်ကိၤဟီၣ်ကဝီၤဃုၥ်ဒီးကညီကီၢ်စဲၣ် ဟီၣ်ကဝီၤတၢ်လီၢ်လၢအဂၤတဖၣ်အပူၤဒီး သုးဟီၣ်ကဝီၤအိၣ်ဝဲ(၄)ဘ့ၣ်,အသုးရ့ၣ်ပၥ်ဖှိၣ်အိၣ်ဝဲခဲလၢၥ်(၆၄)ရ့ၣ်အဂ့ၢ်န့ၣ် သ့ၣ်ညါ ဘၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါလၢအိၣ်(BGF/KNA)ဟီၣ်ကဝီၤပူၤတဖၣ်စံးဝဲအသိးန့ၣ် စးထီၣ်ဖဲအပူၤကွံၥ်(၂၀၂၄)တၢ်ကစီၣ် ဟးထီၣ်လၢ BGF ကဆီတလဲက့ၤအသးဆူ(KNA)ဝံၤ လီၢ်ခံန့ၣ် လီၤဆီဒၣ်တၢ်လၢလူၢ်ပျဲၢ်ကီၢ်ဆၣ်အပူၤ တၢ်လူၤထၢဝဲ သုးသီ,တၢ်ဟ့ၣ်ဝဲဂံၢ်ခီၣ်ထံး သုးတၢ်မၤလိဟဲအိၣ်ထီၣ်ဝဲ ဖျိဖျိဖျါဖျါ န့ၣ်လီၤ.
အပူၤကွံၥ်နံၣ်တဖၣ်အခါ ကညီသုးခိးကီၢ်ဆၢ(BGF/KNA)အံၤအသုးဂံၢ်ဘါကအိၣ်ထဲလၢအကထိလီၤဒီး ဘၣ်ဆၣ်စးထီၣ်ဖဲ (၂၀၂၄)နံၣ်န့ၣ် အသုးဂံၢ်ဘါနီၣ်ဂံၢ်ကအိၣ်လၢအကလးညါအဂ့ၢ်န့ၣ် တၢ်ပဲၥ်ထံနီၤဖးစံးန့ၣ်လီၤ.
