လါစဲးပထ့ဘၢၣ် ၂၆ သီ, ၂၀၂၅ နံၣ်, ခ့ၣ်အဲးစံၣ်
ကညီကီၢ်စဲၣ် ဖၣ်အၣ်-လူၢ်ပျဲၢ်ကျဲမုၢ်ဒီတကျိၤ ပယီၤသုးတၢ်သမံသမိးတြဲၤဒီးသုးခိးကီၢ်ဆၢ(BGF)တၢ်သမံသမိးတြဲၤတဖၣ် သမံသမိးဝဲ သိလ့ၣ်ဒီးကမျၢၢ်လၢအလ့ၢ်ထီၣ်လ့ၢ်လိၤတဖၣ်ဟဲအါထီၣ်ဒိၣ်န့ၢ်အပူၤကွံၥ်လၢညါအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤကမျၢၢ်အအိၣ် န့ၣ်လီၤ.
စးထီၣ်ဖဲတလါအံၤလါစဲးပထ့ဘၢၣ်ထီၣ်အံၤန့ၣ် လူၢ်ပျဲၢ်ကီၢ်ဆၣ်အပူၤ ကယဲၢ်မ့ၢ်ဝ့ၢ်ပူၤကျဲနုၥ်လီၤဟးထီၣ်အလီၢ်သ့ၣ်တဖၣ်န့ၣ် ပယီၤသုးဒီး (BGF)ဆီလီၤအါထီၣ်ဝဲတၢ်သမံသမိးတြဲၤလီၢ်သ့ၣ်တဖၣ်ဒီး တကးဒံးဘၣ်ခိးထၢစ့, သမံသမိးသံဒိးသံကွၢ်တၢ်စ့ၢ်ကီး ဟဲအါထီၣ် အဂ့ၢ်န့ၣ် လီၢ်ကဝီၤကမျၢၢ်ပိၥ်မုၣ်တဂၤစံးဝဲန့ၣ်လီၤ.
အဝဲစံးဝဲလၢ“မ့မ့ၢ်တၢ်သမံသမိးတြဲၤဒုဟဲအါထီၣ်အနီၢ်ကီၢ်လီၤ.တြဲၤတဖၣ်န့ၣ်အိၣ်ဃုၥ်ဝဲပယီၤသုးဒီး(BGF)တဖၣ်လီၤ.အဝဲသ့ၣ်သမံသမိးတၢ်, ဝံၤဒီးဃ့အီၣ်ဝဲတၢ်ခီတြဲၤအဘူးအလဲစ့ၢ်ကီးအိၣ်.တြဲၤကိးဘ့ၣ်ဒဲးဃၣ်ဃၣ်န့ၣ်ဘၣ်ဟ့ၣ်လီၤကအိၣ်လၢ(၄၀၀၀),(၅၀၀၀)ညါ. လၢသဝီပူၤ ကျဲဖးဒ့တနီၤန့ၣ် အဝဲသ့ၣ်ပၥ်လီၤအပှၤအိၣ်ခိးတၢ်ဒ်န့ၣ်စ့ၢ်ကီးအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
လၢန့ၣ်အမဲၥ်ညါ စးထီၣ်လၢဖၣ်အၣ်-မဲဘီၤ(မဲဘောင်)ကျဲဖးဒ့ တုၤဃီၤလၢတီၤကလ့-မံၣ်စၤတြဲၤ, ထံၤလိၤ-ဒီၤလါကျဲဖးဒ့, ဒဲပၠၣ် တကးဒံးဘၣ်အမဲၥ်ညါ လၢထံၤလိၤ-တန့ခၠါကျဲစ့ၢ်ကီး ပယီၤသုးဒီး(BGF)သုးပၥ်ဖှိၣ်မၤအါထီၣ်ဝဲတြဲၤအိၣ်ဝဲ(၂)တီၤအဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤ ကမျၢၢ်အအိၣ်န့ၣ်လီၤ.
တကီၢ်ခါခဲအံၤ လၢဖၣ်အၣ်-လူၢ်ပျဲၢ်ကျဲဒီတကျိၤန့ၣ် တၢ်ဆီလီၤမၤအါထီၣ်တၢ်သမံသမိးတြဲၤဒီး သမံသမိးတၢ်ဟဲအါထီၣ်အမဲၥ်ညါ တြဲၤသ့ၣ်တဖၣ်န့ၣ် ပၥ်ပနီၣ်ဃၥ်ဝဲတၢ်စိၥ်ထီၣ်စိၥ်လီၤဟုသးထၢၣ်သ့ၣ်တဖၣ်အိၣ်ဝဲအဂ့ၢ်န့ၣ် လီၢ်ကဝီၤကမျၢၢ်စံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤလီၢ်ကဝီၤကမျၢၢ်ပိၥ်မုၣ်လၢအဂၤတဂၤစ့ၢ်ကီးစံးဝဲလၢ“နစိၥ်ဟုသးထၢၣ်အါဒ်သိးလၢညါခါန့ၣ်တန့ၢ်လၢၤဘၣ်. ပနၢ်ဟူလၢနစိၥ်န့ၢ်အအါကတၢၢ်(၂)ထၢၣ်လီၤ. နစိၥ်န့ၢ်ထဲနကအီၣ်ကအီအဂီၢ် လီၤမီၤနီၤ. လၢနကက့ၤဆါလၢကျးပူၤဒုတန့ၢ်ဘၣ်”အဂ့ၢ်န့ၣ် စံးဝဲန့ၣ်လီၤ.
လၢပယီၤသုးအပၥ်ပနီၣ်ဃၥ်တၢ်စိၥ်ထီၣ်စိၥ်လီၤဟုသးအထၢၣ်ဒ်အံၤ မ့ၢ်ဒ်သိးကဒီၣ်တဲၥ်ကွံၥ်ဝဲတၢ်ပၢၢ်ဆၢကရူၢ်ကရၢလၢ အနုၥ်ဟးလီၤထီၣ် ဖဲဟီၣ်ကဝီၤပူၤသ့ၣ်တဖၣ်အံၤအတၢ်အီၣ်တၢ်အီ အဃိ စးထီၣ်တလါအံၤန့ၣ်သုးမီၤစိရိၤစုတီၤဖီလၥ် ကီၢ်ဆၣ်ပှၤဘၣ်မူဘၣ်ဒါထုးထီၣ် တၢ်ကလုၢ်လၢတၢ်တဘၣ်ပၥ်ကီၤဃၥ်ဟုသးဘၣ်ဒီးတၢ်ပျဲမ့ၢ်တအိၣ်စိၥ်ဟုသးတန့ၢ်ဘၣ်အဂ့ၢ်န့ၣ် ဟီၣ်ကဝီၤတၢ်ကစီၣ်ပၥ်ဖျါဝဲအသိး သ့ၣ်ညါဘၣ် န့ၣ်လီၤ.
ဒ်န့ၣ်အသိးတကီၢ်ခါခဲအံၤ လၢဖၣ်အၣ်ကီၢ်ရ့ၣ် ဒူယီၢ်ကီၢ်ဆၣ် ခ့ၣ်အဲၣ်ယူၣ်တၢ်ပၢဟီၣ်ကဝီၤတနီၤအပူၤန့ၣ် သုးခိးကီၢ်ဆၢ(BGF) နုၥ်လီၤဆ့ၣ်နီၤအိၣ်ဝဲ ဒီး ပယီၤသုးစ့ၢ်ကီးမၤအါထီၣ်ဝဲအဂံၢ်အဘါကွ့ၢ်ကွ့ၢ်အဂ့ၢ်န့ၣ် လီၢ်ကဝီၤကမျၢၢ်တဖၣ်စံးဝဲန့ၣ်လီၤ.
