ပယီၤသုးကျိၤလၢဟဲထီၣ်ဖဲမီတီၤကီၢ်ဆၢကျဲတဖၣ် ဆဲးလဲၤထီၣ်ဆူညါတန့ၢ်ဒီးတၢ်ဒုးကဲထီၣ်

လါစဲးပထ့ဘၢၣ် ၂၅ သီ, ၂၀၂၅ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)တနီသရံၣ်ကီၢ်ဆၣ်အပူၤ ပယီၤသုးကျိၤလၢဟဲထီၣ်ဖဲ မီတီၤ (မောတောင်)ကီၢ်ဆၢကျဲအံၤတဖၣ်ဒီး ဟီၣ်ကဝီၤကညီဒီ ကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤ တၢ်ဒုးဆဲးကဲထီၣ်ဝဲ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.

ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ပယီၤသုးလၢအဟဲထီၣ်တဖၣ်အံၤဖဲအဝဲသ့ၣ်ဟဲထီၣ်အခါန့ၣ် လၢကဘီယူၤအံၤတဆီ ဟဲတ့ၢ်လီၤစၢၤဝဲမ့ၣ်ပိၢ်သ့ၣ်တဖၣ်ဒီး သုးကျိၤလၢအဟဲထီၣ်တဖၣ်န့ၣ်မ့ၢ်ဝဲ ခီၣ်သုးရ့ၣ်,ခီၣ်ချ့သုးရ့ၣ်(၄)ရ့ၣ်, အမျိၥ်သုးရ့ၣ်(၁)ရ့ၣ်ဒီး ဒြိကရူၢ်(၃)ဒူၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

စးထီၣ်ဖဲတလါအံၤလါစဲးပထ့ဘၢၣ် ၇ သီအနံၤန့ၣ် တၢ်ဒုးကဲထီၣ်ဝဲလၢကီၢ်ဆၢကျဲ သ့ၤခိ(သိန်ခွန်း)သဝီကပၤအံၤဒီး ပယီၤသုး ကဘီယူၤလဲၤတ့ၢ်လီၤဝဲပီၣ်(၅၀၀)မ့ၣ်ပိၢ်သ့ၣ်တဖၣ်အဂ့ၢ်န့ၣ် လီၢ်ကဝီၤကမျၢၢ်လၢအိၣ်ဘူးဖဲန့ၣ်တဂၤ စံးဘၣ်ခ့ၣ်အဲးစံၣ်- ကညီ တၢ်ကစီၣ်ဒ်အံၤန့ၣ်လီၤ.

အဝဲစံးဝဲလၢ“ခဲအံၤတၢ်ဒုးကဲထီၣ်တပယူၥ်ဃီဒီး ခီဖျိပယီၤသုးတကပၤတၢ်ဘၣ်ဒိအီၤဆါအဃိ လၢကဘီယူၤအံၤတဆီ ဟဲတ့ၢ်လီၤဝဲ ပီၣ်(၅၀၀)မ့ၣ်ပိၢ်သ့ၣ်တဖၣ်တပယူၥ်ဃီလီ”အဂ့ၢ်န့ၣ် စံးဝဲန့ၣ်လီၤ.

ဘၣ်ဆၣ်မ့ၣ်ပိၢ်လၢကဘီယူၤဟဲတ့ၢ်လီၤဝဲတဖၣ်အံၤ လီၤတဲၥ်ပိၢ်ဖးထီၣ်လၢ(သိန်ခွန်း)သဝီဃၢၤအဃိ ကမျၢၢ်တၢ်ဘၣ်ဒိဘၣ်ထံး မ့တအိၣ်ဝဲဘၣ် ဆၣ်ဆၣ်မ့မ့ၢ်တၢ်ပၢၢ်ဆၢကရူၢ်အပှၤတကပၤန့ၣ်ဘၣ်ဒိဘၣ်ထံးအိၣ်ဝဲအဂ့ၢ်န့ၣ် လီၢ်ကဝီၤကမျၢၢ်တဂၤဃီဝဲန့ၣ် စံးအါထီၣ်ဝဲန့ၣ်လီၤ.

ပယီၤသုးအံၤလၢကထီၣ်ဒိၣ်စိက့ၤမီတီၤ(မောတောင်)ကီၢ်ဆၢကျဲအံၤအဂီၢ် အသုးဂံၢ်ဘါလၢအဟဲထီၣ်တဖၣ်အံၤ ဆဲးလဲၤထီၣ်ဆူညါ တန့ၢ်ဒံးဝဲဘၣ်ဒီး ဒ်န့ၣ်အသိးခီဖျိလၢကဘီယူၤလဲၤခးလီၤတၢ်အဃိ လီၢ်ကဝီၤကမျၢၢ်လၢအိၣ်ဘူးဖဲန့ၣ်သ့ၣ်တဖၣ် စ့ၢ်ကီးဘၣ်သုးလီၢ်သုး ကျဲဆူ တၢ်လီၢ် အဂၤ အဂ့ၢ်န့ၣ် ပှၤမၤစၢၤပှၤလီၢ်အိၣ်ကမှံဖိတဂၤ စံးဝဲန့ၣ်လီၤ.

“ဒူသဝီလၢအိၣ်ဘူးဖဲန့ၣ်သ့ၣ်တဖၣ်အါဒၣ်တက့ၢ်န့ၣ်တုၤလၢခဲအံၤတက့ၤဘၣ်ဒံးလၢအဟံၣ်အဃီဘၣ်.ဘၣ်မနုၤအဃိလဲၣ်န့ၣ် ခီဖျိကဘီယူၤဟဲတလီၢ်လီၢ်အဃိအဝဲသ့ၣ်က့ၤတဘူၣ်ဘၣ်.မူခိၣ်ကလံၤသီၣ်ဂီၤစ့ၢ်ကီးခဲအံၤခီဖျိတၢ်စူၤအဃိတၢ်ကီတၢ်ခဲအိၣ်လၢတၢ်အိၣ်တၢ်ဆိးအဂီၢ်မီၤနီၤ.မ့မ့ၢ်လၢတၢ်ခိၣ်ဒုးသ့ၣ်တဖၣ်န့ၣ်ဒုတုၤလၢခဲအံၤတကူတလၢဒံးဘၣ်လိၣ်ဒံးဝဲဒၣ်”အဂ့ၢ်န့ၣ် စံးဝဲန့ၣ်လီၤ.

ဘျံးဒဝဲၢ်ကီၢ်ရ့ၣ်အမဲၥ်ညါ တကီၢ်ခါခဲအံၤ ခ့ၣ်အဲၣ်ယူၣ်ကီၢ်ရ့ၣ်သ့ၣ်တဖၣ်လၢအမ့ၢ် မုၢ်တြီၢ်ကီၢ်ရ့ၣ်,ဖၣ်အၣ်ကီၢ်ရ့ၣ်,ဒူပျၥ်ယၥ်ကီၢ်ရ့ၣ် ဟီၣ်ကဝီၤသ့ၣ်တဖၣ်အံၤအပူၤစ့ၢ်ကီး ပယီၤသုးဟဲထီၣ်မၤအါထီၣ်အဂံၢ်အဘါတပယူၥ်ဃီအသိး တၢ်ဒုးစ့ၢ်ကီးကဲထီၣ်ဝဲလၢခံခီခံကပၤ အဘၢၣ်စၢၤ တလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.