လါစဲးပထ့ဘၢၣ် ၁၂သီ, ၂၀၂၅နံၣ်, ခ့ၣ်အဲးစံၣ်.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄)ဘျံးဒဝဲၢ်ကီၢ်ရ့ၣ်အပူၤ ခီဖျိပယီၤသုးမီၤစိရိၤခးတပျုၤပျီၤကျိဖးဒိၣ်ဒီးကဘီယူၤဟဲခးလီၤတၢ်အဃိ(၈)လါအတီၢ်ပူၤဘၣ်သံဝဲကမျၢၢ်(၃၁)ဂၤအဂ့ၢ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါလါစဲးပထ့ဘၢၣ်(၁၁)သီအနံၤန့လီၤ.
ကမျၢၢ်လၢသံ(၃၁)တဂၤအကျါ(၉)ဂၤန့ၣ်ဘၣ်သံဝဲဒၣ်ဒီးပယီၤသုးမီၤစိရိၤအကျိဖးဒိၣ်ဒီး(၂၂)ဂၤန့ၣ်ဘၣ်သံဝဲခီဖျိကဘီယူၤအဂ့ၢ်န့ၣ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ပၥ်ဖျါဝဲဒၣ်အသိး ကမျၢၢ်ဘၣ်ဒိဒီးကျိဖးဒိၣ်(၅)ဂၤဒီး ကဘီယူၤ(၁၈)ဂၤအဂ့ၢ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ပၥ်ဖျါဝဲဒၣ်စ့ၢ်ကီၢ်ကီးန့ၣ်လီၤ.
ဒ်န့ၣ်အသိး(၂၀၂၅)နံၣ်(၈)လါအတီၢ်ပူၤ ပယီၤသုးကဘီယူၤအတၢ်လီၤဘၣ်ယိၣ်ဒီးအတၢ်ထီၣ်ဒုးအဃိ ဘျံးဒဝဲၢ်ကီၢ်ရ့ၣ် လၢၢ်မုၢ်လါ,လၢၢ်ဒိၣ်စိ,ကစၢၢ်ဒိၣ်,တနီသရံၣ်,လၢၢ်ကဆီကီၢ်ဆၣ် ကီၢ်ဆၣ်(၅)ဘ့ၣ်ဒီးထံမိၢ်ပှၢ်ဟီၣ်ကဝီၤလီၤဆီ(၁)ဘ့ၣ်အပူၤ သဝီ(၂၂၃)ဖျၢၣ်,ဟံၣ်ခိၣ်(၂၇၀၆၄)ဒူၣ်,ပှၤကညီနီၣ်ဂံၢ်(၁၃၆၂၃၀)ဘၣ်ဃ့ၢ်အိၣ်ကဒုဝဲဒၣ်အဂ့ၢ် ဘျံးဒဝဲၢ်ကီၢ်ရ့ၣ်စံးဝဲဒၣ်န့ၣ်လီၤ.
ခီဖျိတၢ်ဒုးတၢ်ယၤဒိးပယီၤသုးကဘီယူၤတၢ်မၤပျံၤမၤဖုးအဃိဘျံးဒဝဲၢ်ကီၢ်ရ့ၣ်ပူၤ ကမျၢၢ်တကလီၢ်ဘျဲၣ်ဘၣ်ဃ့ၢ်အိၣ်ကမှံတုၤအခဲအံၤဒီး ကမျၢၢ်သ့ၣ်တဖၣ်အံၤလိၣ်ဘၣ်ဝဲဒၣ်တၢ်အီၣ်တၢ်အီ, ကသံၣ်ကသီဘၣ်ဆၣ် တၢ်ဆီၣ်ထွဲမၤစၢၤ တုၤလီၤစှၤဝဲဒၣ်အဂ့ၢ် ဘျံးဒဝဲၢ်ကီၢ်ရ့ၣ်စံးဝဲဒၣ်စ့ၢ်ကီးန့ၣ်လီၤ.
တကီၢ်ခါခဲအံၤ ပယီၤသုးကီၣ်ကးအတၢ်ဟူးတၢ်ဂဲၤန့ၣ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ် အနဲၣ်ရွဲၣ် ပဒိၣ်စီၤအဲၣ်နၤ စံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ“ပယီၤသုးတၢ်ဟူးတၢ်ဂဲၤန့ၣ် လၢမိၢ်တီၣ်တပၤန့ၣ်မၤဝဲတၢ်ထီၣ်ဒုးစးထီၣ်လၢ(၂၀၂၄)လါဒံၣ်စဲဘၢၣ်တုၤအခဲအံၤလီၤ.မ့မ့ၢ်ဝ့ၢ်တၢ်အဲၣ်ဆူဒဝဲၢ်တကပၤန့ၣ်မၤဝဲတၢ်ထီၣ်ဒုးဒီးဖဲ(၂၀၂၅)နံၣ်အတီၢ်ပူၤအံၤဆီတလဲဝဲတၢ်ထီၣ်ဒုးအက့ၢ်အဂီၤချုး(၃)ဘျီဒီးတၢ်တဘျီအံၤန့ၣ်လီၤ.တဘျီအံၤန့ၣ်မၤအါထီၣ်ဝဲအပှၤနီၣ်ဂံၢ်န့ၣ်လီၤ.မ့မ့ၢ်လၢပလီၣ်ဟီၣ်ကဝီၤ လီၤဆီဒၣ်တၢ် တၢ်လီၢ်လၢဝ့ၢ်ကပိၤကပၤ ပပှၤမၤန့ၢ်သ့ၣ်တဖၣ်န့ၣ် အဝဲသ့ၣ်ဟူးဂဲၤဟဲထီၣ်ဝဲထီဘိလၢကမၤန့ၢ်က့ၤဝဲအဂီၢ်န့ၣ်လီၤ.လၢသယဲၢ်ခၠီတကပၤစ့ၢ်ကီးဟဲထီၣ်တုၤဖဲဒူသဝီဒီးဟးဒွဲၣ်အူဟံၣ်ဃီအိၣ်န့ၣ်လီၤ.လၢနၣ်အ့ၣ်တီၣ်တပၤန့ၣ်ဟဲမၤပှဲၤထီၣ်ဂံၢ်ဘါအိၣ်,ဘၣ်ဆၣ်တၢ်ပၢၢ်သုးပၥ်ဖှိၣ်ခိးခးလၢကျဲဒီးက့ၤဂုၤကဒါက့ၤအခံဒ်န့ၣ်အိၣ်န့ၣ်လီၤ.ဒီးမလွဲတီၣ် ဆူ ဒဝဲၢ် ဒီးဆူ ရ့ၣ် တဆီန့ၣ်ခီဖျိတၢ်ပၢၢ်ဆၢသုးပၥ်ဖှိၣ်နုၤလီၤဟံးန့ၢ်တၢ်လီၢ်အဃိအဝဲသ့ၣ်ဟဲထီၣ်ဒီးတၢ်ဘၣ်သဂၢၢ်ခးလိၥ်သးအိၣ်ဝဲထီဘိန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ၂၀၂၅နံၣ် (၈)လါအတီၢ်ပူၤ (KNLA)သုးက့(၄)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ် မၤန့ၢ်ဝဲဒၣ်ပယီၤသုးကလၢၤ(၅)ဖျၢၣ်ဒ်အမ့ၢ် လါအ့ဖြ့ၣ်အတီၢ်ပူၤ မဲၢ်သမံၣ်ထၣ်, လါမ့ၤအတီၢ်ပူၤ မဲၢ်သမံၣ်ခံ, လါယူၤအတီၢ်ပူၤ အံသၣ်ဃ့ၣ်ဒီးညၣ်ပျၤခံ ဒီးလါယူၤလံအတီၢ်ပူၤ သူးခး ပယီၤသုးကလၢၤသ့ၣ်တဖၣ်အဂ့ၢ်န့ၣ် ဘျံးဒဝဲၢ်ကီၢ်ရ့ၣ် ပၥ်ဖျါဃုၥ်ဝဲဒၣ်န့ၣ်လီၤ.
တကတီၢ်ဃီ (၈)လါအတီၢ်ပူၤ ပယီၤသုးလၢအဟဲဟ့ၣ်လီၤသးလၢ သုးက့(၄)တၢ်ပၢဖီလၥ် KNLAသုးရ့ၣ်(၁၀,၁၂,၁၁)ဒီးဂၤသးသုးရ့ၣ်(၇)အစုပူၤခဲလၢၥ်အိၣ်ဝဲအဂၤ(၂၀)အဂ့ၢ် သ့ၣ်ညါဘၣ်ဒ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်အတၢ်ပၥ်ဖျါအိၣ်ဝဲအသိးန့ၣ်လီၤ.
