လါစဲးပထ့ဘၢၣ် ၃၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢ, မုၢ်တြီၢ်ကီၢ်ရ့ၣ်(သုးက့-၅), ဒွဲၣ်လိကီၢ်ဆၣ်ဟီၣ်ကဝီၤအပူၤပယီၤသုးမီၤစိရိၤအသုးကျိၤ လၢမၤအါထီၣ်အသုးဂံၢ်ဘါဖဲ(ဝါဒူ)ဟီၣ်ကဝီၤအပူၤလၢကထီၣ်ဆူအပှၤ(ကတၢတံး)သုးကလၢၤအအိၣ်သ့ၣ်တဖၣ်သုးခိးကီၢ်ဆၢ(BGF)ဒီး(DKBA)ဘိၤဘံၣ်အပှၤပၣ်ဃုၥ်ဝဲဒၣ်အဂ့ၢ်မုၢ်တြီၢ်ကီၢ်ရ့ၣ်အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ပယီၤသုးကျိၤလၢအိၣ်ဆီလီၤအသးဖဲ(ကမၣ်မိၢ်)ဝ့ၢ်အဆၢခိၣ်ဖဲ(ဝါဒူ)ဟီၣ်ကဝီၤအပူၤတၢ်တိၥ်အိၣ်လၢကထီၣ်ဆူအပှၤ(ကတၢတံး)သုးကလၢၤအအိၣ်သ့ၣ်တဖၣ်အကျါပၣ်ဃုၥ်သုးခိးကီၢ်ဆၢ(BGF)ဒီး(DKBA)ဘိၤဘံၣ်အပှၤသ့ၣ်တဖၣ်အသိးတၢ်ဒုးကဲထီၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(သုးက့-၅)အဘၢၣ်စၢၤစ့ၢ်ကီးအဂ့ၢ်မုၢ်တြီၢ်ကီၢ်ရ့ၣ်အပှၤကတိၤ တၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဝဲန့ၣ်လီၤ.
“ဘၣ်ဃးဒီးမဟါကၢၥ်ပယီၤသုးအပှၤလၢအအိၣ်ဖဲ(ဝါဒူ)ဒီးကထီၣ်ဆူ(ကတၢတံး)တဖုန့ၣ်ပမၤလီၤတံၢ်လၢ(BGF)အပှၤဒီး(DKBA)ဘိၤဘံၣ်အပှၤသ့ၣ်တဖၣ်ပၣ်ဃုၥ်ဝဲလၢပှၤဟဲထီၣ်အကျါန့ၣ်လီၤ. ဘၣ်ဆၣ်သနါက့မ့ၢ်အနီၣ်ဂံၢ်နီၣ်ဒွးပၣ်ဃုၥ် ဆံးအါလဲၣ်ခီန့ၣ်မၤလီၤတံၢ်လီၤဆဲးတန့ၢ်ဘၣ်. မ့ၢ်ပၣ်ဃုၥ်ဒုလီၤတံၢ်န့ၣ်လီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ဒ်န့ၣ်အသိးဘၣ်ထွဲဒီးသုးခိးကီၢ်ဆၢပၣ်ဃုၥ်ပၣ်ဂီၢ်လၢပယီၤသုးကျိၤအပူၤလၢကထီၣ်ဆူ(ကတၢတံး)သုးကလၢၤအဂီၢ်အံၤန့ၣ်ပဆဲးကျိးသံကွၢ်ဝဲသုးခိးကီၢ်ဆၢ(BGF)အပှၤဘၣ်မူဘၣ်ဒါဘၣ်ဆၣ်တစံးဆၢဝဲဒၣ်ဒံးဘၣ်အဂ့ၢ်ဒုးသ့ၣ်ညါဘၣ်ပှၤဒိကနၣ်တၢ်ဖိကိးဂၤဒဲးန့ၣ်လီၤ.
ဖဲအပူၤကွံၥ်လါစဲးပထ့ဘၢၣ်(၁၇,၁၈)သီအနံၤန့ၣ်ပယီၤသုးအံၤပၥ်ဖှိၣ်ထီၣ်အသးဒီးဖဲဟဲထီၣ်တလၢထီၣ်(ဝါဒူ)ဟီၣ်ကဝီၤအဆၢကတီၢ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(သုးက့-၅)တကပၤခိးခးဝဲအဃိပယီၤသုးတကပၤသံ(၄)ဂၤ,ဘၣ် ဒိဝဲဒၣ်(၈)ဂၤအသိးဂုၥ်က့ၤလီၤကဒါက့ၤဝဲအခံဆူ(ဝါဒူ)ဟီၣ်ကဝီၤပူၤအဂ့ၢ်သ့ၣ်ညါဘၣ်လၢပှၤဘၣ်မူဘၣ်ဒါအအိၣ်န့ၣ်လီၤ
လၢန့ၣ်အမဲၥ်ညါပယီၤသုးကျိၤလၢဟဲထီၣ်သ့ၣ်တဖၣ်အကျါသုးခိးကီၢ်ဆၢ(BGF)ဒီး(DKBA)ဘိၤဘံၣ်အပှၤသ့ၣ်တဖၣ်နီၣ်ဂံၢ်နီၣ်ဒွးပၣ်ဃုၥ်ဝဲဒၣ်ထဲလဲၣ်ခီန့ၣ်တၢ်မၤလီၤတံၢ်အီၤတန့ၢ်ဒံးဘၣ်ဒီးတကီၢ်ခါခဲအံၤတၢ်ဒုးကဲထီၣ်အိၣ်ဒံးဝဲအသိးပယီၤသုးမီၤစိရိၤတကပၤဆူမဲၥ်ညါကဟဲထီၣ်ဟူးဂဲၤအါထီၣ်ဝဲအဂ့ၢ်သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဝဲအသိးသ့ၣ်ညါဘၣ်န့ၣ်လီၤ.
