လါစဲးပထ့ဘၢၣ် ၂၅သီ, ၂၀၂၅နံၣ်, ခ့ၣ်အဲးစံၣ်.
ပယီၤသုးကရူၢ်စံးဝဲလၢ ခီဖျိ မၤဟးဂီၤဝဲပၣ်တံၣ်ခဲလၢၥ်တၢ်ဃုထၢတၢ်ဖံးတၢ်မၤတၢ်ရဲၣ်တၢ်ကျဲၤအဃိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အကရၢခိၣ်ဃုၥ်ဒီး ခ့ၣ်အဲၣ်ယူၣ် ခိၣ်နၢ်ခဲလၢၥ်(၁၂)ဂၤ သုးကရူၢ်လၢလူၢ်ပျဲၢ်ကီၢ်ဆၣ်လိၥ်ဘၢလိၥ်ကွီၢ်အဝဲသ့ၣ် လၢန့ၣ်ပၠံၣ်တီၣ် အဂ့ၢ် သုးကရူၢ် ထံလီၢ်ကီၢ်ပူၤဝဲၤကျိၤကိတိၥ် ဘိးဘၣ်ရၤလီၤဝဲဖဲအပူၤကွံၥ်လါစဲးပထ့ဘၢၣ်(၂၃)သီအနံၤန့ၣ်လီၤ.
ခ့ၣ်အဲၣ်ယူၣ် ခိၣ်နၢ်လၢသုးကရူၢ်လိၥ်ဘၢလိၥ်ကွီၢ်ဝဲသ့ၣ်တဖၣ်န့ၣ်မ့ၢ်ဝဲ ခ့ၣ်အဲၣ်ယူၣ်-ကရၢခိၣ် ပဒိၣ်စီၤကွဲၤထူဝ့ဃုၥ်ဒီးပဒိၣ်စီၤဆၢဂ့ၤ,ပဒိၣ်စီၤတၤဒိၣ်မူ,ပဒိၣ်စီၤသီသံၣ်ဘှဲ,ပဒိၣ်စီၤလၣ်ထိ,သုးခိၣ်ကျၢၢ်ဒိၣ်စိစီၤကၠီၣ်နံၣ်,သုးခိၣ်ကျၢၢ်ဖိစီၤတၢ်မျၢ်သီ, ပဒိၣ်စီၤလီၤအဲၣ်မူ,ပဒိၣ်စီၤအဲၣ်ကလုၥ်စ့,ပဒိၣ်နီၢ်ဒါဒါ,ပဒိၣ်စီၤတီနံ ဃုၥ်ဒီး ခ့ၣ်အဲၣ်ယူၣ်-ဖၣ်အၣ်ကီၢ်ရ့ၣ်,တၢ်ြကဲၢ်ကီၢ်ဆၣ်ခိၣ် ပဒိၣ်စီၤပလဲဒံၤဝါသ့ၣ်တဖၣ်ပၣ်ဃုၥ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ.
ဘၣ်ဃးဒီးသုးကရူၢ်တၢ်လိၥ်ကွီၢ်ဝဲအံၤန့ၣ် ဒ်အတၢ်မၤအိၣ်အသိးကမၤဝဲလီၤအဃိ ဘၣ်ခီဆၢအလီၢ်တအိၣ်ဘၣ်အဂ့ၢ် ခ့ၣ်အဲၣ်ယူၣ်-ကညီကူၣ်သ့ဆဲးလၤဝဲၤကျိၤခိၣ် ပဒိၣ်စီၤလီၤအဲၣ်မူ စံးဘၣ်ဝဲဒၣ် ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ဘၣ်ဃးတၢ်ဝဲန့ၣ် န့ၣ်တအဲၣ်ဒိးခီဆၢနီတမံၤဘၣ်.အဝဲသ့ၣ်တၢ်မၤအဃိန့ၣ်မၤဝဲဒၣ်န့ၣ်လီၤ.တဘၣ်ဃးဒီးပှၤဘၣ်.တၢ်ဝဲန့ၣ်အတၢ်မၤလီၤ.”အဂ့ၢ်စံးဝဲဒၣ်န့ၣ်လီၤ.
ပယီၤသုးကရူၢ်အံၤန့ၣ်ဒ်သိးတၢ်မၤတံၥ်တၥ်အတၢ်ဃုထၢလၢFacebookပူၤမ့ၢ်ဂ့ၤ,ဟးစံၣ်တဲၤတဲလီၤတၢ်လၢကမျၢၢ်အိၣ်အါတၢ်လီၢ်မ့ၢ်ဂ့ၤ,ဟးစံးကတိၤလၢအဂ့ၢ်မ့ၢ်ဂ့ၤ,ဆီၣ်တခူထီၣ်ကရၢကရိတၢ်မ့ၢ်ဂ့ၤ,ပၥ်ဖျါတၢ်ဘၣ်သးမ့ၢ်ဂ့ၤ,ကွဲးထီၣ်လံၥ်လဲၢ်မ့ၢ်ဂ့ၤ,ဘျးလီၤတၢ်ဂီၤဒီးPosterမ့ၢ်ဂ့ၤသုတဘူၣ်တဂ့ၤအဂီၢ်ဖဲအပူၤကွံၥ်လါယူၤလံအသီ(၃၀)အနံၤန့ၣ် ထုးထီၣ်ဝဲဒၣ်တၢ်ဘျၢသဲစးအသီတခါလၢကဒီသဒၢဝဲဒၣ်တၢ်ဃုထၢတၢ်ရဲၣ်တၢ်ကျဲၤအိၣ်ဝဲဒၣ်န့ၣ်လီၤ.
ဒ်သုးကရူၢ်အတၢ်ဘိးဘၣ်ရၤလီၤအိၣ်ဝဲအသိးန့ၣ် ခ့ၣ်အဲၣ်ယူၣ်-ကရၢခိၣ်ပဒိၣ်စီၤကွဲၤထူဝ့န့ၣ် လူၢ်ပျဲၢ်ကီၢ်ဆၣ်ပၢၤသုးဝဲၤလီၢ်လိၥ်ဘၢလိၥ်ကွီၢ်ထီၣ်အီၤဆူန့ၣ်ပၠံၣ်တီၣ် လၢ သဲစးတၢ်ဘျၢခံခါလၢအမ့ၢ်(ပ) ၁၃/၂၀၂၅ဒီး ၁၄/၂၀၂၅, မ့မ့ၢ်လၢအဂၤတဖၣ်န့ၣ်ဘၣ်တၢ်လိၥ်ကွီၢ်အီၤလၢ(ပ)၁၄/၂၀၂၅အသိးမ့မ့ၢ် ခ့ၣ်အဲၣ်ယူၣ် တၢ်ကြဲၢ်ကီၢ်ဆၣ် ပဒိၣ်စီၤပလဲဒံၤဝါ တခီန့ၣ်တၢ်လိၥ်ကွၢ်အီၤလၢ (ပ)၆/၂၀၂၅အဂ့ၢ်ပၥ်ဖျါဝဲဒၣ်န့ၣ်လီၤ.
တၢ်ဘျၢသဲစးလၢတၢ်လိၥ်ကွီၢ်ဝဲဒၣ်ခ့ၣ်အဲၣ်ယူၣ်ခိၣ်နၢ်ဒိၣ်ထီသ့ၣ်တဖၣ်အံၤန့ၣ် ဘၣ်တူၢ်တၢ်ကမၣ် အစှၤကတၢၢ်လီၤဃိၥ်ပူၤ(၃)နံၣ်ဒီးအအါကတၢၢ်မ့ၢ်တၢ်စံၣ်ညီၣ်သံအဂ့ၢ် သ့ၣ်ညါဘၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါဖဲအပူၤကွံၥ်လါအီကူး(၂၈)သီအနံၤန့ၣ် ပယီၤသုးကရူၢ်ဘိးဘၣ်ရၤလီၤတ့ၢ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဒ်အမ့ၢ်ပှၤပူထီၣ်လီထီၣ်တၢ် ကရၢလၢတဖိးသဲစးတဖုအိၣ်တ့ၢ်ပၥ်ဝဲဒၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
ဒ်ခ့ၣ်အဲၣ်ယူ-ကညီဒီကလုၥ်စၢဖှိၣ်ကရၢအသိးလီၤ ခၠ့ကီၢ်စဲၣ်ပဒိၣ်ကရူၢ်ခိၣ်နၢ်ခဲလၢၥ်(၁၇)ဂၤသ့ၣ်တဖၣ်စ့ၢ်ကီးပယီၤသုးကရူၢ်ဟါခါပၢၤကီၢ်သုးဝဲလီၢ်လိၥ်ဘၢလိၥ်ကွီၢ်အဝဲသ့ၣ်လၢတၢ်ဘျၢသဲစး(ပ)၃၅/၂၀၂၅အဂ့ၢ် ပၥ်ဖျါဝဲလၢသုးကရူၢ်အတၢ်ဘိးဘၣ်ရၤလီၤအပူၤန့ၣ်လီၤ.
