လါစဲးပထ့ဘၢၣ် ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဒူသထူၣ်ကီၢ်ရ့ၣ် (သုးက့ ၁)ဖၣ်အၣ်ကီၢ်ဆၣ်အပူၤ ဘူးဒးတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA)အံၤ လၢကခိးထၢဝဲတၢ်ခိတၢ်သွဲအဂီၢ် တကီၢ်ခါခဲအံၤနုၥ်လီၤဟံန့ၢ်အကလီၢ်အကျဲလၢဘူၣ်ပြၢးကရူၢ် ဝၣ်မံၤပှၢ်သဝီဃၢၤ ကျဲဖးဒ့ အဂ့ၢ်န့ၣ် ဟီၣ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဖဲလါစဲးပထ့ဘၢၣ် ၁၂ သီ မုၢ်နၤခီအဆၢအတီၢ်န့ၣ် (DKBA)သုးခိၣ်ဘိၤဘံၣ်အပှၤလၢအဘၣ်တၢ်တီခိၣ် ရိၣ်မဲအီၤလၢသုးခိၣ် စီၤအဲၣ်ဒိၣ်ဒီးသုးခိၣ်စီၤခၠ့ၣ်သါလၢအသုးဂံၢ်ဘါကအိၣ်ဝဲ(၆၀)ဂၤခိၣ်ဃၢၤအံၤ နုၥ်လီၤအိၣ်ဝဲဒၣ်ဖဲဝၣ်မံၤပှၢ်သဝီဃၢၤ သိကျးကပၤ ကျဲဖးဒ့ဝံၤ ဖဲမဟါလါစဲးပထ့ဘၢၣ် ၁၈ သီဟါခီန့ၣ် လၢကတ့ထီၣ်အလီၢ်အကျဲအဂီၢ် သိလ့ၣ်ဘျၢၣ်ဟီၣ်ခိၣ်(ဘဲးဖိ)ဟဲတုၤဝဲခံခိၣ် စးထီၣ်ခူၣ်လီၤတၢ်ပူၤလူလီၤဝဲဟီၣ်ခိၣ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ် လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ဝၣ်မံၤပှၢ်သဝီဃၢၤကျဲဖးဒ့လၢ(DKBA)လဲၤအိၣ်ဆီလီၤသးခဲအံၤန့ၣ် ခီဖျိအိၣ်ဘူး ဝဲဒီး ဘီနီၤကျိ ပှၤကျီးချံလီၢ်ဒီး တကးဒံးဘၣ်လဲၤထီၣ်ဆူကမၤမိၢ်,ကတၢၢ်တံၥ်တကပၤသ့ဝဲအဃိ ပှၤအါဂၤပဲၥ်ထံနီၤဖးဝဲလၢကအိၣ် ခိး ထၢအီၣ်ဝဲတၢ်ခိတၢ်သွဲအဂ့ၢ်န့ၣ် လီၢ်ကဝီၤပှၤ ဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ယဆိမိၣ်အတၢ်ပညိၣ်ခိၣ်သ့ၣ်န့ၣ်လၢကထၢအီၣ်စ့လီၤ.ဘၣ်မနုၤအဃိလဲၣ်န့ၣ်တၢ်လီၢ်လၢအကဆ့ၣ်နီၤဝဲခဲအံၤန့ၣ် သိလ့ၣ်က့ၤခီဘီနီၤကျိတၢ်လီၢ်န့ၣ်အိၣ်ခံတီၤညါ.အခီပညီအဝဲသ့ၣ်မ့ဆ့ၣ်နီၤဝဲဖဲန့ၣ်န့ၣ်အတံၥ်ဝဲခဲလၢၥ်ဒ်န့ၣ်.အမ့ဆ့ၣ်နီၤဝဲဖဲန့ၣ် နကလဲၤကျီးချံတၢ်လီၢ်န့ၣ်ဘၣ်လၢအဝဲသ့ၣ်အိၣ်ခံတီၤလၢၤလီၤ.ဘၣ်ဆၣ်ဆူမဲၥ်ညါဒုပတဲတဘၣ်ဘၣ်,ဘၣ်သ့ၣ်သ့ၣ်ဟဲဆ့ၣ်နီၤဝဲမ့ဝံၤန့ၣ်ကအိၣ်ခိးထၢအီၣ်တၢ်ခီတၢ်သွဲမ့ၢ်စ့ၢ်,မ့ဝံၤအဆ့ၣ်နီၤဝဲမ့န့ၢ်န့ၣ်အကသုးထီၣ်သးလၢထးခီကယီကယီဧါတပသ့ၣ်ညါဘၣ်.”အဂ့ၢ်န့ၣ် စံးဘၣ်ခ့ၣ် အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါဖဲမဟါအနံၤန့ၣ် (DKBA)ကိးထံၣ်ဝဲထိကစၢ်တဖၣ်ဒီး ထိလၢအကျီးလ့ၢ်ထီၣ်လ့ၢ်လိၤဖဲဘီနီၤကျိ ပြၢးကီးတၢ်လီၢ် အံၤတဖၣ် တနံၣ်န့ၣ်တၢ်ကဘၣ်ဟ့ၣ်အဝဲသ့ၣ်အခိ အကလီၢ်တကယၤကၠးအဂ့ၢ်န့ၣ် ကမျၢၢ်လၢအိၣ်ဖဲန့ၣ်တဂၤစံးဝဲအသိး သ့ၣ်ညါဘၣ် န့ၣ်လီၤ.
စးထီၣ်လၢအဝဲသ့ၣ်လဲၤဆ့ၣ်နီၤအိၣ်ဖဲန့ၣ်တုၤလၢတနံၤအံၤဂီၤခီန့ၣ် ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၁ အပှၤ လဲၤခးစဲးပြဲးဝဲဒီးကျိဖးဒိၣ်,ရီးကဲး ဒီး ဒြိအိၣ်လံဝဲတစှၤန့ၢ်(၆)ဘျီလံဒီး ဒ်န့ၣ်အသိး (DKBA)တကပၤစ့ၢ်ကီး က့ၤခးဆၢကဒါ တၢ်အိၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးဒီးတၢ်ဂ့ၢ်အံၤန့ၣ် ဟီၣ်ကဝီၤ(KNLA)ပှၤဘၣ်မူဘၣ်ဒါတဂၤ စံးဝဲလၢ “ဖဲမဟါမုၢ်နၤခီန့ၣ် (ဘဲးဖိ) သိလ့ၣ်ဟဲတုၤခံခိၣ်. ကဘၣ်ဖဲ ၁၀ နၣ်ရံၣ်န့ၣ်စးထီၣ်ခူၣ်လီၤတၢ်(ဘဲးဖိ)အကလုၢ်သီၣ်လဲးလိးလီၤ. အဝဲသ့ၣ်တၢ်မၤအိၣ်ဒီးအမၤ,ဝဲစ့ၢ်ကီး ပတၢ်မၤအိၣ် န့ၣ်ပကမၤလီၤ. ခဲအံၤပလဲၤခးအဝဲသ့ၣ်ဒီးဒြိကိးမုၢ်နံၤဒဲးလီၤ.ဝဲဒၣ်ဒုဒ်တၢ်သ့အိၣ်ဒီးပှၤအသိးန့ၣ်ပကမၤ. ပတဒုးဆ့ၣ်နီၤ အိၣ် အဝဲသ့ၣ်ဖဲန့ၣ်ဘၣ်.ယဆိမိၣ်အဝဲသ့ၣ်န့ၣ်ကျဲမုၢ်တဘိန့ၣ်အဲၣ်ဒိးဒိၣ်စိဝဲတုၤလၢမဲၢ်လဲခံ ဘိၤဘံၣ် အသဝီန့ၣ် မီၤနီၤ”အဂ့ၢ်န့ၣ် စံးဝဲန့ၣ်လီၤ.
ဒ်လီၢ်ကဝီၤကမျၢၢ်လၢအိၣ်ဖဲန့ၣ်တဖၣ်စံးဝဲအသိးန့ၣ် တဂီၤအံၤဖဲတၢ်လဲၤခးဝဲ(DKBA)အံၤအခါန့ၣ် ခီဖျိဒြိအံၤလီၤတဲၥ်ပိၢ်ဖး ထီၣ်ဝဲလၢဝၣ်မံၤပှၢ်သဝီပူၤအဃိ ကမျၢၢ်ဘၣ်ဒိ(၂)ဂၤအကျါတဂၤန့ၣ်ဘၣ်ဒိနးနးအဃိဘၣ်တၢ်ဆှၢအီၤဆူတၢ်ဆါဟံၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိတကီၢ်ခါခဲအံၤလၢ(DKBA)အတၢ်လဲၤဆ့ၣ်နီၤအိၣ်ဆီလီၤသးဒီး တၢ်လဲၤခးအဝဲသ့ၣ်တလီၢ်လီၢ်အဖီခိၣ်အံၤ သဝီပူၤ ကမျၢၢ်တဖၣ်ပျံၤတၢ်ဟးပလဲၥ်သးအိၣ်ဝဲတနီၤလံအဂ့ၢ်န့ၣ် လီၢ်ကဝီၤကမျၢၢ်စံးဝဲန့ၣ်လီၤ.
တကးဒံးဘၣ်စးထီၣ်ဖဲ(DKBA)လဲၤဆ့ၣ်နီၤအိၣ်ဖဲန့ၣ် ခီဖျိတၢ်လဲၤခးအဝဲသ့ၣ်အဃိ လၢဘီနီၤကျိဝၢ်ခီပနွဲၢ်ကျါသုးကလၢၤအံၤတဆီ ပယီၤသုးခးလီၤစၢၤဝဲကျိဖးဒိၣ်လီၤတဲၥ်ဝဲလၢချၢၣ်ဃဲၤသဝီပူၤ ဘၣ်ဝဲပှၤဟံၣ်ပှၤဃီအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်လါအီကူး ၂၈ သီအနံၤန့ၣ်စ့ၢ်ကီး ဟီၣ်ကဝီၤဖဲန့ၣ်အပူၤ (DKBA)အသုးဂံၢ်ဘါလၢကအိၣ်အဂၤ (၄၀)ခိၣ်ဃၢၤအံၤ နုၥ်လီၤဝဲလၢထံဃီဝါသဝီပူၤဝံၤ ဒွဲၣ်အူအီၣ်မၤဟးဂီၤကွံၥ်ဝဲ ဘီနီၤကျိကၢၢ်နံၤ ထိဃုၥ်ဒီးစဲးဖီၣ်ကဟၣ်တၢ်ဖိတၢ်လံၤ သ့ၣ်တဖၣ် ကဲထီၣ်ဒံးဝဲန့ၣ်လီၤ.
