လါစဲးပထ့ဘၢၣ် ၂၀ သီ, ၂၀၂၅ နံၣ်, ခ့ၣ်အဲးစံၣ်
ပယီၤသုးမိၤစိရိၤအသုးသုးကျိၤလၢအဟဲထီၣ်ဝဲဒၣ်ဖဲ(မူၣ်ဒိၤ-ကၠးအ့စ့ၣ်ကၠံ)ကျဲမုၢ်အဖီခိၣ်သ့ၣ်တဖၣ်ဖီၣ်ဝဲပှၤသဝီဖိ သ့ၣ်တဖၣ်လၢတၢ်ဂ့ၢ်တၢ်ကျိၤ,တၢ်ကမၣ်တအိၣ်နီမံၤဘၣ်အဂ့ၢ်ပနီကျဲပှၤသဝီဖိလၢပယီၤသုးကျိၤဟဲနုၥ်လီၤအသဝီပူၤတဂၤစံးဝဲဒၣ်န့ၣ်လီၤ.
ဖဲ မူၣ်ဒိၤ-ခၠီနခွၣ်-ကၠးအ့စ့ၣ်ကၠံ ကျဲမုၢ်ဟီၣ်ကဝီၤအံၤပယီၤသုးမီၤစိရိၤဟဲထီၣ်မၤဝဲသုးကျိၤတၢ်ထီၣ်ဒုးဖဲလါစဲးပထ့ဘၢၣ် ခံနွံတနွံအတီၢ်ပူၤအခါဒီးဖဲလါစဲးပထ့ဘၢၣ်(၁၆)သီအနံၤန့ၣ်ပယီၤသုးကျိၤအံၤဟဲတုၤဃီဝဲဒၣ်ဖဲ(ပနီကျဲ)သဝီပူၤအဆၢကတီၢ်ဖီၣ်ဝဲပှၤမၤအီၣ်ညၣ်ဖိသ့ၣ်တဖၣ်ဒ်အံၤလီၤအဂ့ၢ်ပှၤသဝီဖိတဂၤစံးဝဲဒၣ်န့ၣ်လီၤ.
အဝဲစံးဝဲလၢ “ဖဲပနီကျဲသဝီထံကျိအပူၤန့ၣ်ပယီၤသုးအသုးကျိၤဖီၣ်ဝဲဒၣ်ပှၤမၤအီၣ်ညၣ်ဖိလၢအမ့ၢ်(အူမ့စိ)ဃုၥ်ဒီးပှၤသ ဝီဖိ(၅)ဂၤလၢတၢ်ဂ့ၢ်တၢ်ကျိၤတအိၣ်နီမံၤဘၣ်န့ၣ်လီၤ. အဝဲသ့ၣ်န့ၣ်မ့ၢ်ဝဲပှၤမၤအီၣ်ညၣ်ဖိသ့ၣ်တဖၣ်လီၤ.” အဂ့ၢ်(ပနီကျဲ) သဝီဖိတဂၤစံးဝဲန့ၣ်လီၤ.
လၢန့ၣ်အမဲၥ်ညါဖဲပယီၤသုးကျိၤဟဲထီၣ်အဆၢကတီၢ်ခီဖျိခးလီၤဃုၥ်ဝဲဒၣ်ဒီးကျိဖးဒိၣ်အဃိဘၣ်သံကွံၥ်ဝဲ(ပနီကျဲ)သဝီဖိဒံးတဂၤအဂ့ၢ်ပှၤသဝီဖိသ့ၣ်တဖၣ်စံးဝဲအသိးသ့ၣ်ညါဘၣ်န့ၣ်လီၤ.
တကီၢ်ခါခဲအံၤန့ၣ်ပယီၤသုးကျိၤလၢဟဲထီၣ်သ့ၣ်တဖၣ်အံၤပယီၤသုးလၢအိၣ်(ကၠးအ့စ့ၣ်ကၠံ)သ့ၣ်တဖၣ်ခးလီၤစၢၤန့ၢ်ဝဲ ကျိဖးဒိၣ အသိးပယီၤသုးအံၤလၢတၢ်ကက့ၤဒိၣ်စိက့ၤဝဲ မူၣ်ဒိၤ, ကၠးအ့စ့ၣ်ကၠံ ကျဲမုၢ်ဟီၣ်ကဝီၤဒီး ကၠးအ့စ့ၣ်ကၠံ, ကၠဲၣ်မယီ, ချၢၣ်တကူၣ်တၢၣ် ကျဲမုၢ်ဟီၣ်ကဝီၤအဂီၢ်မၤလဲၢ်ထီၣ်,အါထီၣ်ဝဲ ဒြိ, ကျိဖးဒိၣ်,ဒီးသုးကျိၤတၢ်ထီၣ်ဒုးတၢ်ဟူး တၢ်ဂဲၤသ့ၣ်တဖၣ်အဂ့ၢ်တၢ်မဲၥ်ညါ(KNLA)တၢ်ပၢၢ်ဆၢသုးပၥ်ဖှိၣ်စံးဝဲဒၣ်န့ၣ်လီၤ.
“ပယီၤသုးကျိၤသ့ၣ်တဖၣ်အံၤတၢ်တိၥ်အိၣ်ဝဲလၢကထီၣ်ဝဲဆူ ကၠးအ့စ့ၣ်ကၠံ, ဃိၣ်သၢဖျၢၣ်, ကြုၢ်တု တကပၤန့ၣ်လီၤ. လၢ ကီးတရံးတကပၤစ့ၢ်ကီးနါက့ ပယီၤသုးကျိၤဟဲထီၣ်ဝဲတဘိ, ဟဲထီၣ်န့ၢ်ဝဲလၢ တီၤကၠးအ့ တကပၤန့ၣ်လီၤ. တၢ်ဒုး ကဲထီၣ်လၢတၢ်လီၢ်ကိးတီၤဒဲးန့ၣ်လီၤ.” အဂ့ၢ်(KNLA)တၢ်ပၢၢ်ဆၢသုးပၥ်ဖှိၣ်စံးဝဲန့ၣ်လီၤ.
ဘၣ်ထွဲဒီးတၢ်ဟူးဂဲၤမၤဝဲဒုးယၤတၢ်ရဲၣ်တၢ်ကျဲၤအံၤပယီၤသုးမီၤစိရိၤလၢမုၢ်ထီၣ်ကလံၤထံးကီၢ်ခီသုးဝဲၤလီၢ်ခိၣ်သ့ၣ်အသုးခိၣ်သုးနၢ်သ့ၣ်တဖၣ်ဖဲလါစဲးပထ့ဘၢၣ်(၁၅)သီအနံၤန့ၣ်ဟဲတုၤဃီဝဲဖဲ(ကၠးအ့စ့ၣ်ကၠံ)ဒုးယၤလၢကဘီယူၤတဆီဒီးမၤဝဲတၢ်ထံၣ်လိၥ်သးဒီး(DKBA)သုးကရူၢ်,ကညီဖီၣ်စုကဝဲၤခိၣ်နၢ်တနီၤဒီးတဲသကိးဝဲဘၣ်ဃးတၢ်ကတ့ထီၣ်က့ၤဝဲတိၤ,ကျဲမုၢ်လၢဟးဂီၤတဖၣ်ဒီးတၢ်ဆီၣ်ထွဲမၤစၢၤသုးကျိၤအတၢ်ဘံၣ်တၢ်ဘၢအဂီၢ်အဂ့ၢ်ပှၤလၢအဘူးဒီး(DKBA)တကပၤသ့ၣ်တဖၣ်စံးဝဲန့ၣ်လီၤ.
