လါအီးကထိဘၢၣ် ၂၁သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်(နဘူ)တန့ခၠါကီၢ်ဆၣ်ဟီၣ်ကဝီၤအပူၤပယီၤသုးကဘီယူၤခးလီၤတၢ်အဃိထံဖိစီသဝီအမဲၥ်ညါ,သဝီကရူၢ်အပူၤဒူသဝီ(၅)ဖျၢၣ်ဘၣ်ဃ့ၢ်ထီၣ်ဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဖဲမဟါလါအီးကထိဘၢၣ်(၂၀)သီအနံၤဟါခီ(၃)နၣ်ရံၣ်ဘျဲၣ်အဆၢကတီၢ်ပယီၤသုးပယီၤယူၤ(Y12)ဟဲထီၣ်ဟးခးလီၤဝဲတၢ်လၢထံဖိစီသဝီဟီၣ်ကဝီၤဒူသဝီတဖၣ်အပူၤဒီး,ဘၣ်ဟးဂီၤဝဲဟံၣ်တၢ်သူၣ်ထီၣ်,ကၠိ,ကျးဒီးသီခါဖၠၣ်တဖၣ်အိၣ်ဝဲအဃိဒူသဝီ(၅)ဖျၢၣ်အပူၤကမျၢၢ်တဖၣ်ဃ့ၣ်ထီၣ်ဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“မဟါခးလီၤတၢ်တဘၣ်ဒိပှၤကညီဘၣ်.ဘၣ်ဝဲပှၤဟံၣ်,ကျး,ကၠိဒီးသီခါဖၠၣ်ဟးဂီၤဝဲတက့တခီန့ၣ်လီၤ.ခးလီၤတၢ်ဆၢကတီၢ်ဖၠၣ်ပူၤသီဘုၣ်သီခါတပွဲဖိစှၤပါဒုအိၣ်နၥ်က့ပှၤအိၣ်ခူသူၣ်လၢတၢ်ပူၤမီၤ.အအံၤထံဖိစီသဝီအမဲၥ်ညါဒူသဝီအိၣ်(၅)ဖျၢၣ်ဒ်အမ့ၢ်(ကွံမီၤတဲၤ)(နီၤထိၣ်ထး)(ကီၣ်သၤစူ)(မၠးပတဲၤနဲၤ)(ကီၣ်ဖၤယၣ်)ကမျၢၢ်လီၢ်ကဝီၤဖိသ့ၣ်တဖၣ်န့ၣ်စံၣ်လၢၥ်လံ,ခဲအံၤပှၤတအိၣ်နီတဂၤဘၣ်.ပှၤပျံၤပယီၤကျိချံမီၤ”အဂ့ၢ်စံးဝဲဒၣ်န့ၣ်လီၤ.
ထံဖိစီသဝီအံၤအပူၤကွံၥ်ပယီၤသုးကရူၢ်တ့ၢ်လီၤမ့ၣ်ပိၢ်ဒီးခးလီၤတၢ်လၢသဝီအပူၤအိၣ်ဝဲခဲအံၤခဲအံၤအဃိ,လီၢ်ကဝီၤဖိတဖၣ်အါတက့ၢ်ဃ့ၢ်ထီၣ်တ့ၢ်ဝဲစးထီၣ်ဖဲလါအီးကထိဘၢၣ်အဆိကတၢၢ်တနွံအပူၤလံအဂ့ၢ်,သ့ၣ်ညါဘၣ်န့ၣ်လီၤ.
ဒီးပှၤစံၣ်ထီၣ်တ့ၢ်တဖၣ်အံၤအိၣ်ဆိးဝဲတဘူးတယံၤဒီးအနီၢ်ကစၢ်ဒူသဝီအသိး,ပှၤလၢအိၣ်တ့ၢ်က့ၤဝဲစှၤကိးဂၤသ့ၣ်တဖၣ်အံၤမ့ၢ်ဒၣ်ပိၥ်ခွါလၢအကူးဘုကူးဟုဒီးခိးကွၢ်က့ၤဟံၣ်ဃီတၢ်ဖိတၢ်လံၤသ့ၣ်တဖၣ်လီၤအဂ့ၢ်,လီၢ်ကဝီၤပိၥ်မုၥ်တဂၤစံးဝဲဒ်အံၤန့ၣ်လီၤ.
“သဝီပူၤပှၤအိၣ်တ့ၢ်ပူၤဂၤပူၤဂၤလီၤ.ဆၢကတီၢ်ဘၣ်လၢပှၤဘၣ်ကူးဘုအခါလံမီၤအဃိပှၤအိၣ်တ့ၢ်က့ၤထဲဟံၣ်တဖျၢၣ်ပိၥ်ခွါတဂၤလီၤပှၤဘၣ်အိၣ်ခိးပှၤတၢ်ဖိတၢ်လံၤကျီၢ်ပနၢ်ဘၣ်ယိၣ်ကလီၤမၢ်မီၤ.မဟါခးလီၤတၢ်န့ၣ်သ့ၣ်ဘၣ်ဖဲပှၤကူးဘုအဆၢကတီၢ်ဃိပှၤဘၣ်စံၣ်ဒံး.အအံၤပအိၣ်ဖဲအံၤနၥ်က့ကဘီယူၤမ့ဟဲထီၣ်ပနၢ်ဟူပှၤမ့ခးလီၤတၢ်နၥ်က့ပနၢ်ဟူလီၤ”အဂ့ၢ်စံးဝဲဒၣ်န့ၣ်လီၤ.
ထံဖိစီသဝီအံၤကမျၢၢ်ဟံၣ်ခိၣ်ကအိၣ်ဝဲအဖျၢၣ်(၄၀၀)ဘျဲၣ်ဒီးသဝီအပူၤဒူသဝီဖိတဖၣ်အမဲၥ်ညါကီးတရံးကမျၢၢ်ပှၤဃ့ၢ်တၢ်ဒုးဖိတဖၣ်လဲၤအိၣ်ကဒုတ့ၢ်ဝဲအသးအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,တကီၢ်ခါခဲအံၤတၢ်အိၣ်သးအဖီခိၣ်ပှၤလီၢ်ကဝီၤဖိတဖၣ်ဘၣ်ဃ့ၢ်ထီၣ်ဝဲအဃိ,ကီးတရံးလီၢ်အိၣ်ကဒုဖိတဖၣ်စ့ၢ်ကီးဘၣ်ဃ့ၢ်ထီၣ်ပိၥ်ပှၤခံအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ.
