လါအီးကထိဘၢၣ် ၇သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ကီးတရံးကီၢ်ဆၣ်(မၠးပတဲၤ)ဒီး(နီထၣ်ပၤ)သဝီဟီၣ်ကဝီၤအပူၤပယီၤသုးကရူၢ်နုၥ်လီၤဝံၤအလီၢ်ခံ,မၢန့ၣ်ဆူၣ်ဝဲပှၤသဝီဖိတဖၣ်လၢကက့ၤအိၣ်ဆိးက့ၤဝဲလၢသဝီပူၤအဂ့ၢ်,သဝီလီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
မၠၣ်ပတဲၤ-နီထၣ်ပၤသဝီကမျၢၢ်လီၤကဝီၤဖိတဖၣ်အံၤတနီၤစံၣ်ထီၣ်ဝဲစးထီၣ်လၢတၢ်ဒုးစဲးပြဲးစးထီၣ်ကဲထီၣ်ဖဲကီးတရံးကျဲမုၢ်ပူၤအခါလံၤလံၤအိၣ်ဝဲဘၣ်ဆၣ်တနီၤအိၣ်ဒံးဝဲသဝီပူၤစှၤကိးဂၤအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒီးအပူၤကွံၥ်သၢသီအတီၢ်ပူၤပယီၤသုးနုၥ်လီၤဝဲလၢသဝီသ့ၣ်တဖၣ်အံၤအပူၤဝံၤအလီၢ်ခံ,ကိးဖှိၣ်ဝဲသဝီပူၤပှၤလၢထံၣ်ဝဲတဖၣ်ဒီးဒိပၥ်ဝဲတၢ်ဂီၤဒီးစံးထွဲဝဲလၢပှၤကဘၣ်ဟဲက့ၤအိၣ်ဆိးက့ၤလၢသဝီပူၤကိးဂၤအသိး,အပူၤကွံၥ်တလါအတီၢ်ပူၤတၢ်မၤပျံၤမၤဖုးဝဲလၢကဒွဲၣ်အူအီၣ်ကွံၥ်အဝဲသ့ၣ်အဟံၣ်အိၣ်ဝဲအဂ့ၢ်,ကမျၢၢ်လီၢ်ကဝီၤပိၥ်မုၣ်တဂၤစံးဝဲဒ်အံၤန့ၣ်လီၤ.
“တၢ်အနံၤဝဲန့ၣ်,အဝဲဟ့ၣ်ဟဲထီၣ်နုၥ်လီၤတုၤဖဲပအိၣ်တကပၤဘျီကယဲၢ်မ့ၢ်ထံၣ်ဝဲပှၤန့ၣ်ကိးဖှိၣ်ဝဲ,မၢလဲၤပၥ်ဖှိၣ်သးလၢကၠိပူၤ.ဝံၤဘျီဒိန့ၢ်ဝဲပှၤတၢ်ဂီၤတၢ်ဖီၣ်သ့ၣ်တဖၣ်မီၤ.မၤအသးလီၤဂၥ်ဒ်သိးအဝဲသ့ၣ်ဟဲထီၣ်ရှဲလဲကျဲအံၤန့ၣ်အသုနါက့ကဘၣ်ပၥ်ဖျါထီၣ်က့ၤဝဲဆူထးတဆီဒ်န့ၣ်မီၤနီၤ.မ့ၢ်ဝံၤဟံၣ်လၢပှၤတအိၣ်ဘၣ်သ့ၣ်တဖၣ်န့ၣ်တဲဝဲပှၤဘၣ်ဟဲက့ၤအိၣ်က့ၤကိးဂၤလီၤ.တဂၤလၢဟံၣ်တဂၤကဘၣ်ဟဲက့ၤအိၣ်က့ၤဝဲ”အဂ့ၢ်စံးဝဲဒၣ်န့ၣ်လီၤ.
ပယီၤသုးကရူၢ်အတၢ်မၢဆူၣ်အဖီခိၣ်ကမျၢၢ်လီၢ်ကဝီၤဖိတနီၤက့ၤအိၣ်ဝဲဒၣ်ဘၣ်ဆၣ်တနီၤပျံၤတၢ်ဖုးတၢ်ဒီးဘၣ်ယိၣ်ဘၣ်ဘှီဝဲတၢ်အိၣ်ဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဘၣ်ဃးတၢ်ကဘၣ်က့ၤအိၣ်လၢဒူသဝီပူၤအဖီခိၣ်ကမျၢၢ်တနီၤအတၢ်ပၥ်သးအိၣ်ဝဲဒ်လဲၣ်အဂ့ၢ်,လီၢ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
“ကမျၢၢ်ခီဒုပှဲၤသိးယသ့ၣ်ညါန့ၣ်ပှၤတဲအသုလၢက့ၤအိၣ်သ့လံ,နါက့တနီၤအဝဲသ့ၣ်တဲလိၥ်သးကဒဲကဒဲလၢအတၢ်နၥ်န့ၢ်ပယီၤတအိၣ်ဘၣ်ဒုအိၣ်တနီၤမီၤ.အဃိပှၤက့ၤအိၣ်ထဲစှၤဂၤဒုအိၣ်ဝဲဒီးအါတက့ၢ်လၢပှၤတက့ၤအိၣ်ဒံးဘၣ်လီၤခဲအံၤ.ပယီၤခီန့ၣ်ဟဲထီၣ်ဘျီကယဲၢ်မ့ၢ်ထံၣ်တၢ်လၢပှၤဟံၣ်ပူၤဖီၣ်ဝဲတုၤမၤဝဲန့ၢ်သ့ၣ်တဖၣ်န့ၢ်,ဟံးကွံၥ်န့ၢ်ဝဲခဲလၢၥ်အဃိတနီၤတၢ်တအိၣ်နီၤမံၤက့ၤဝဲတသ့ဘၣ်.တနီၤက့ၤအိၣ်တဘူၣ်ဘၣ်အိၣ်ဝဲလီၤ”အဂ့ၢ်စံးဝဲဒၣ်န့ၣ်လီၤ.
ပယီၤသုးတဖၣ်အံၤနုၥ်လီၤဝဲလၢမၠၣ်ပတဲၤ-နီထၣ်ပၤသဝီအဆၢကတီၢ်တနံၤဃီအတီၢ်ပူၤဖီၣ်ကိးပၥ်ဝဲကမျၢၢ်လီၢ်ကဝီၤဖိတနီၤဒီးလဲၤပၥ်မံဝဲလၢနီထၣ်ပၣ်သီခါဖၠၣ်အပူၤအိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲအသိးန့ၣ်လီၤ.
တကးဒံးဘၣ်,မုၢ်ဆ့ၣ်ထီၣ်အနံၤအပူၤပျၢ်လီၤက့ၤဝဲလီၢ်ကဝီၤဖိတနီၤအိၣ်ဝဲဘၣ်ဆၣ်တနီၤတပျၢ်လီၤက့ၤဝဲဒံးဘၣ်ဒီးမၢဝဲတၢ်လဲၤဆှၢအီၤဆူ(တန့ခၠါ)(နဘူး)တကပၤအိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲစ့ၢ်ကီးန့ၣ်လီၤ.
ဒ်န့ၣ်အသိး,ခီဖျိပယီၤသုးကရူၢ်နုၥ်လီၤဝဲလၢသဝီပူၤဒ်အံၤအဃိမၠၣ်ပတဲၤ-နီထၣ်ပၤသဝီအမဲၥ်ညါခိၣ်ဃၢၤဒူသဝီကမျၢၢ်တဖၣ်စ့ၢ်ကီးပျံၤတၢ်ဖုးတၢ်အဃိ,သုးကွံၥ်ဝဲအသးလၢဒူသဝီအဂၤတဖၣ်အပူၤအိၣ်ဝဲအသိး,မ့မ့ၢ်မၠးပတဲၤနီထၣ်ပၤကမျၢၢ်လီၢ်ကဝီၤဖိတဖၣ်အံၤလီၤဆီဒၣ်တၢ်ဘၣ်ယိၣ်ဝဲလၢပယီၤသုးတဖၣ်ကဆီလီၤသးအိၣ်ဆိးလၢအတၢ်လီၢ်တၢ်ကျဲ,တၢ်ဖံးအီၣ်မၤအီၣ်လီၢ်ကျဲ,ကျီးဒီးဒဲတဖၣ်အပူၤအိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲဒၣ်အသိးန့ၣ်လီၤ.
