ကညီကီၢ်စဲၣ်အပူၤ ၦၤမၤသံလီၤကစၢ်သးကဲထီၣ်သးဟဲအါထီၣ်

လါယူၤ ၆ သီႇ ၂၀၂၃ နံၣ်ႇ ခ့ၣ်အဲးစံၣ်

သုးဟံးန့ၢ်ထံကီၢ်တၢ်စိတၢ်ကမီၤ၀ံၤလီၢ်ခံလၢကညီကီၢ်စဲၣ်အပူၤ ခီဖျိတၢ်အိၣ်သးအကလုာ်ကလုာ်အဃိ ၦၤမၤသံလီၤကစၢ်သးဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢဆူၣ်ချ့ကသံၣ်သရၣ်တဖၣ်အအိၣ်န့ၣ်လီၤႉ
လၢဟီၣ်က၀ီၤပူၤတၢ်ဒုးကဲထီၣ်အဃိဟံၣ်ဖိဃီဖိႇဘူးတံၢ်သမူသကိးသံဘၣ်ဒိဘၣ်ထံးဒီးဟံၣ်ဃီဟးဂူာ်ဟးဂီၤအိၣ်၀ဲအဃိပှၤသူၣ်ဟးဂီၤသးဟးဂီၤသးတၢ်ဆိမိၣ်ဆိမးအိၣ်ထီၣ်ဘျီပှၤအီသံးႇသူကသံၣ်မူၤဘှီးဟဲအါထီၣ်အဃိၦၤမၤသံလီၤကစၢ်သးဘၣ်ဟဲအါထီၣ်၀ဲဒ်အံၤလီၤအဂ့ၢ်န့ၣ် သ့ၣ်ညါဘၣ်လၢၦၤမၤသံလီၤကစၢ်သးအဟံၣ်ဖိဃီဖိဒူၣ်ပူၤထၢပူၤတဂၤအအိၣ်န့ၣ်လီၤႉ

လၢကညီကီၢ်စဲၣ် ကီၢ်ဆၣ်(၇)ဘ့ၣ်အပူၤန့ၣ် ကီးတရံးႇဖၣ်အၣ်ႇနိၣ်တကီကီၢ်ဆၣ်အံၤၦၤမၤသံလီၤကစၢ်သးအါန့ၢ်ဒံး ကီၢ်ဆၣ်လၢအဂၤတဖၣ်ဒံးဒီး လၢကီၢ်ဆၣ်ကိးဘ့ၣ်ဒဲးတၢ်ဆါဟံၣ်ႇကသံၣ်ဒၢးသ့ၣ်တဖၣ်စ့ၢ်ကီး ကိးမုၢ်နံၤဒဲးန့ၣ် ၦၤဟဲဒိးပၠးသးလၢသးသဟီၣ်ဂံၢ်ဘါလီၤ(စိတ်ကျရောဂါ)တၢ်ဆါအံၤဟဲအါထီၣ်၀ဲအဂ့ၢ်န့ၣ် ဖၣ်အၣ်ကီၢ်ဆၣ် ဆူၣ်ချ့ၦၤမၤတၢ်ဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ

“ၦၤဟဲဒိးပၠးသးလၢသးသဟီၣ်ဂံၢ်ဘါလီၤ(စိတ်ကျရောဂါ)တၢ်ဆါအံၤအဃိန့ၣ်အိၣ်ဒီဒူၣ်ညါႉလၢအီသံးႇအီကသံၣ်မူဘှီးအဃိဒီးတၢ်ဂ့ၢ်လၢအဂၤနါက့ပၣ်စ့ၢ်မီၤနီၤႉၦၤလၢအအိၣ်တဂၤတဖၣ်န့ၣ်အမၤသံလီၤကစၢ်သးကဲထီၣ်သးအါ၀ဲ,တၢ်လီၢ်ကိးတီၤဒဲးဃၣ်ဃၣ်န့ၣ်ၦၤမၤသံလီၤကစၢ်သးဟဲအါထီၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

လၢကညီကီၢ်စဲၣ်ပူၤ ခီဖျိလၢၦၤအီသံးအီမ့ၤႇၦၤသူကသံၣ်မူၤဘှီးႇထံရူၢ်ကီၢ်သဲးတၢ်အိၣ်သးဒီး ဒုးယၤတၢ်သဘံၣ်သဘုၣ် တၢ်အိၣ်သးတဖၣ်အံၤအဃိၦၤမၤသံလီၤကစၢ်သးဟဲအါထီၣ်၀ဲဒီးလၢသုဟံၣ်ခိၣ်ဟံၣ်ဃၢၤသုမ့ထံၣ်ၦၤသးသဟီၣ်ဂံၢ်ဘါလီၤတၢ်ဆါမ့အိၣ်န့ၣ်ဆဲးကျိးဘၣ်ဆူၣ်ချ့ၦၤဘၣ်မူဘၣ်ဒါလၢအဆိအချ့အဂ့ၢ်န့ၣ် ဆူၣ်ချ့ကသံၣ်သရၣ် ဆီၣ်တခူထီၣ်၀ဲဒၣ် န့ၣ်လီၤႉ

နိၣ်တကီကီၢ်ဆၣ် ၀ီၢ်ရ့ၣ်လီၢ်က၀ီၤ သ၀ီသးၦၢ်တဂၤ စံး၀ဲလၢ“တနံၣ်ညါအံၤဖဲသ၀ီပူၤအံၤၦၤစၢၢ်သံလီၤကိာ်အိၣ်(၃)ဂၤလံႉ ဟီၣ်က၀ီၤတၢ်အိၣ်သးတဂၢၢ်တကျၢၤတၢ်ဒုးကဲထီၣ်တလီၢ်လီၢ်အဃိတၢ်ဖံးတၢ်မၤတအိၣ်လၢၤဘၣ်မီၤနီၤႉတနီၤန့ၣ်အဟံၣ်ဖိဃီဖိအတၢ်ဖိတၢ်လံၤတအိၣ်လၢၤဘၣ်ဒ်န့ၣ်အိၣ်လီၤႉမ့၀ံၤလၢခံန့ၣ်အ၀ဲသ့ၣ်သူက့ၤ၀ဲကသံၣ်မူၤဘှီးမီၤနီၤႉတၢ်အိၣ်သးဆီတလဲၤသးချ့သဒံးဒ်အံၤအဃိၦၤတူၢ်တန့ၢ်ခီၣ်တကဲလၢၤဘၣ်ႉအဃိၦၤမၤသံလီၤကစၢ်သးဟဲအါထီၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ၦၤလၢအမၤသံလီၤကစၢ်သးတဖၣ်အါဒၣ်တက့ၢ်န့ၣ်အီ၀ဲဒၣ်ကသံၣ်မၤသံနီၣ်ႇအီ၀ဲဒၣ်ကသံၣ်လၢအိၣ်ဒီးအစုၣ်အပျၢ်ႇ စၢၢ်သံလီၤကိာ်ႇခးသံလီၤသးဒီးကျိသ့ၣ်တဖၣ်ဒီးၦၤမၤသံလီၤသးတဖၣ်အံၤအါဒၣ်တက့ၢ်န့ၣ်မ့ၢ်၀ဲၦၤပိာ်ခွါသူၣ်ဘီၣ်သးစၢ်ႇၦၤဒိၣ်တုၤခိၣ်ၦဲၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

စးထီၣ်(၂၀၂၂)တုၤလၢတနံၣ်အံၤ(၂၀၂၃)န့ၣ် လၢကညီကီၢ်စဲၣ် ကီၢ်ဆၣ်(၇)ဘ့ၣ်အပူၤန့ၣ် ၦၤမၤသံလီၤကစၢ်သးအိၣ်၀ဲအဂၤ(၂၀)ဘျဲၣ်လံအဂ့ၢ်န့ၣ် ဆူၣ်ချ့ၦၤမၤတၢ်ဖိဒီး(လူမှုကယ်ဆယ်ရေး)ကရူၢ်တဖၣ် တယးကွၢ်စံး၀ဲန့ၣ်လီၤႉ