လါအီးကထိဘၢၣ် ၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်(၇)ဘ့ၣ် ၆ လါအတီၢ်ပူၤ လီၢ်ကဝီၤကမျၢၢ်ပှၤလီၢ်အိၣ်ကမှံနီၣ်ဂံၢ် အိၣ်ထီၣ်တုၤ လၢ(၁,၂၀၄,၃၇၃)ဂၤအဂ့ၢ်န့ၣ် ကညီတၢ်ဆီၣ်ထွဲမၤစၢၤတၢ်မုၥ်တၢ်ခုၣ်ပှၥ်ဘျးစဲကရူၢ်-KPSN ထုးထီၣ်ပၥ်ဖျါဝဲအသိး သ့ၣ်ညါဘၣ် န့ၣ်လီၤ.
ဒ်(KPSN)လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် စးထီၣ်ဖဲအပူၤကွံၥ်လါအ့ဖြ့ၣ်တုၤလၢလါစဲးပထ့ဘၢၣ် လၢ(၆)လါအတီၢ်ပူၤအံၤ ခီဖျိလၢတၢ်ဒုးတၢ်ယၤ,ကျိဖးဒိၣ်ဒီးကဘီယူၤအံၤအဃိ ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤပူၤ ကမျၢၢ်ပှၤလီၢ်အိၣ်ကမှံ နီၣ်ဂံၢ် အိၣ်ထီၣ်တုၤလၢ(၁၄၂,၇၄၇),တီအူကီၢ်ရ့ၣ်(သုးက့ ၂) ၁၆၄,၁၄၂ ဂၤ, ချၢၣ်လွံၢ်ထူၣ်ကီၢ်ရ့ၣ်(သုးက့ ၃) ၄၇၂,၅၀၀ ဂၤ, ဘျံးဒဝဲၢ် ကီၢ်ရ့ၣ်(သုးက့ ၄) ၁၃၆,၂၃၀ ဂၤ, မုၢ်တြီၢ်ကီၢ်ရ့ၣ်(သုးက့ ၅) ၇၃,၄၈၈ ဂၤ, ဒူပျၥ်ယၥ်ကီၢ်ရ့ၣ်(သုးက့ ၆) ၁၇၅,၄၆၆ ဂၤ ဒီး ဖၣ်အၣ်ကီၢ်ရ့ၣ်(သုးက့ ၇) န့ၣ်ကမျၢၢ်ပှၤလီၢ်အိၣ်ကမှံနီၣ်ဂံၢ်အိၣ်ထီၣ်တုၤလၢ ၄၀,၃၅၉ ဂၤ အဂ့ၢ်န့ၣ် စံးဝဲန့ၣ်လီၤ.
လီၤဆီဒၣ်တၢ်ကီၢ်ရ့ၣ်(၇)ဘ့ၣ်အံၤအကျါမ့မ့ၢ်လၢချၢၣ်လွံၢ်ထူၣ်ကီၢ်ရ့ၣ်အံၤ ခီဖျိတၢ်ဒုးကဲထီၣ်ဒီးပယီၤသုးခးလီၤကျိဖးဒိၣ်, ကဘီယူၤလဲၤတ့ၢ်လီၤမ့ၣ်ပိၢ်အဃိ ကမျၢၢ်သံဘၣ်ဒိဘၣ်ထံးအိၣ်ဝဲအသိး လီၢ်ကဝီၤပှၤလီၢ်အိၣ်ကမှံနီၣ်ဂံၢ်အါထီၣ်ဒိၣ်န့ၢ် ဒံး ကီၢ်ရ့ၣ်/သုးက့လၢအဂၤသ့ၣ်တဖၣ်အဂ့ၢ်န့ၣ် (KPSN)လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဒ်န့ၣ်အသိးဟီၣ်ကဝီၤတဖၣ်အံၤအပူၤတုၤလၢခဲအံၤတၢ်ဒုးဆဲးကဲထီၣ်ဒံးဝဲလၢပယီၤသုးဒီးကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA),(PDF)သုးပၥ်ဖှိၣ်သ့ၣ်တဖၣ်အံၤအဘၢၣ်စၢၤတပယူၥ်ဃီအဃိ လီၢ်ကဝီၤပှၤလီၢ်အိၣ်ကမှံဖိတဖၣ် ဘၣ်သုးလီၢ်သုးကျဲ ဆီတလဲတၢ်လီၢ်လၢအသီခဲအံၤခဲအံၤအဃိ သဂၢၢ်ဘၣ်ဝဲတၢ်ကီတၢ်ခဲအဂ့ၢ်န့ၣ် (KPSN)စံးစ့ၢ်ကီးဝဲန့ၣ်လီၤ.
လၢန့ၣ်အမဲၥ်ညါတကီၢ်ခါခဲအံၤလၢဒူပျၥ်ယၥ်ကီၢ်ရ့ၣ်(သုးက့ ၆) ကီၢ်ဆၣ် ၄ ဘ့ၣ်အပူၤ ပယီၤသုးကျိၤဟဲထီၣ်မၤအါထီၣ်အဂံၢ်အဘါ ဒီးတၢ်ဒုးဆဲးကဲထီၣ်ဝဲအဃိ လီၢ်ကဝီၤပှၤလီၢ်အိၣ်ကမှံဖိအသီအနီၣ်ဂံၢ်အိၣ်ထီၣ်ဝဲ(၃၇၆၃)ဂၤဒီး ဒ်န့ၣ်အသိးလၢပှၤသ့ၣ်တဖၣ်အံၤ အဂီၢ် လိၣ်ဘၣ်ဝဲဂ့ၢ်ဂီၢ်အူ တၢ်ဆီၣ်ထွဲမၤစၢၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဖဲလါစဲးပထ့ဘၢၣ် ၂၁ သီ ဒ်လီၢ်ခၢၣ်သးထုးထီၣ်ပၥ်ဖျါဝဲအသိးန့ၣ် ခ့ၣ်အဲၣ်ယူၣ်ဟီၣ်ကဝီၤ တနံၣ်အံၤ(၂၀၂၅)လါယနူၤအါရံၤ တုၤလါအီကူး လၢ(၈)လါအတီၢ်ပူၤ သုးမီၤစိရိၤသူဝဲကဘီယူၤလဲၤခးလီၤတၢ်လၢကမျၢၢ်အိၣ်ဆိး ဒူသဝီ, တၢ်ဖံးအီၣ်မၤအီၣ်လီၢ်ကျဲ အိၣ်ဝဲ (၃၉၈)ဘျီအဃိ ကမျၢၢ်သံဝဲ(၆၄)ဂၤဒီးဘၣ်ဒိဘၣ်ထံးဝဲ(၁၉၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးခီဖျိလၢကဘီယူၤအံၤအဃိ ကမျၢၢ်ဟံၣ်(၆၄)ဖျၢၣ်,ကၠိတၢ်သူၣ်ထီၣ်(၁၂)ဖျၢၣ်,တၢ်ဆါဟံၣ်(၄)ဖျၢၣ်,သီခါဖၠၣ်တၢ်သူၣ်ထီၣ် (၁၃)ဖျၢၣ်ဒီး ခရံၥ်ဖိတၢ်ဘါယွၤသရိၥ်(၄)ဖျၢၣ် ဟးဂီၤဝဲဒၣ်အဂ့ၢ်န့ၣ် ခ့ၣ်အဲၣ်ယူၣ်လံၥ်တၢ်ဖျါအပူၤပၥ်ဖျါဝဲန့ၣ်လီၤ.
