လါအီးကထိဘၢၣ် ၂၃သီ, ၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢတၢ်လံၣ်အီၣ်လီအီၣ်ကျိၣ်စ့တၢ်မၤလီၢ်အပူၤ(KKPark)ကၠါဖၠၣ်ပှၤမၤတၢ်ဖိလၢအလဲၤစံၣ်နုၥ်လီၤဝဲလၢရၤမတံဝ့ၢ်ပူၤတဖၣ်အံၤပယီၤသုးပၢၤကီၢ်တဖၣ်အိၣ်ခိးဖီၣ်ဝဲအဝဲသ့ၣ်အဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ရမၤတံဝ့ၢ်ကလံၤထံးတၢ်လံၣ်အီၣ်လီအီၣ်ကျိၣ်စ့တၢ်မၤလီၢ်အပူၤ(KKpark)ပှၤမၤတၢ်ဖိတဖၣ်အံၤစးထီၣ်ဖဲလါအီးကထိဘၢၣ်(၂၁)ဟါခီအနံၤအပူၤ,ဘၣ်သုးကွံၥ်ဝဲအလီၢ်ကျဲကဲထီၣ်သးဝံၤအလီၢ်ခံ,တနီၤနုၥ်လီၤခူသူၣ်ဝဲလၢကီၢ်ကၠီၣ်တဲၣ်အပူၤဒီးတနီၤနုၥ်လီၤဝဲလၢရၤမတံဝ့ၢ်ပူၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒီးပှၤလၢနုၥ်လီၤဝဲဖဲရၤမတံဝ့ၢ်ပူၤသ့ၣ်တဖၣ်အံၤပယီၤသုးပၢၤကီၢ်သ့ၣ်တဖၣ်ခိးဖီၣ်အဝဲသ့ၣ်ဖဲကၠီၣ်လိကၠံကျဲဒီးဘိၤမီၣ်သိးနီၢ်ဂံၢ်(၁)တြဲၤတၢ်အိၣ်ခိးတၢ်လီၢ်ပူၤအိၣ်ဝဲအဂ့ၢ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ.
“ပှၤဟဲစံၣ်နုၥ်ဖဲအံၤသ့ၣ်တဖၣ်န့ၣ်ပယီၤသုးပၢၤကီၢ်အိၣ်ခိးဖီၣ်အသုဖဲ(ကၠီၣ်လိကၠံ)ကျဲဒီးဘိၤမီၣ်သိးတၢ်အိၣ်ခိးတြဲၤနီၢ်ဂံၢ်(၁)ကျဲအပူၤန့ၣ်လီၤ.ပှၤဟဲလၢန့ၣ်အကျဲနုၥ်လီၤအိၣ်ထဲတၢ်ခံဘိအံၤလီၤ.ခိးဖီၣ်ဝဲပယီၤကလုၥ်ဒူၣ်ဒီးတရူးခဲလၢၥ်လီၤ.ပှၤလၢတၢ်ဖီၣ်ချူးဝဲတဖၣ်န့ၣ်မ့ၢ်အလဲၤပၥ်ဝဲဖဲလဲၣ်ခီလဲၣ်ဒုပတသ့ၣ်ညါဘၣ်.အသုနုၥ်လီၤဝ့ၢ်ပူၤတၢ်ပံးပူးခဲအံၤပလဲၤမၤဘူးသးတဘူၣ်စ့ၢ်ကီးဘၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,(KKPark)တၢ်မၤလီၢ်အပူၤကီၢ်ပယီၤပှၤမၤတၢ်ဖိသ့ၣ်တဖၣ်အံၤအါတက့ၢ်နုၥ်လီၤဝဲလၢရၤမတံဝ့ၢ်ပူၤဒီးခီၣ်ဒီးမ့မ့ၢ်တရူးပှၤမၤတၢ်ဖိသ့ၣ်တဖၣ်တခီသုးခိးကီၢ်ဆၢ(BGF)တီဆှၢနုၥ်ခူသူၣ်အဝဲသ့ၣ်ဒီး(၆)ပၣ်သိလ့ၣ်,မ့တမ့ၢ်သိလ့ၣ်တီဟီၣ်ခိၣ်ဖးဒိၣ်သ့ၣ်တဖၣ်အိၣ်ဝဲအမဲၥ်ညါကးဘၢဝဲဒီးတးလးပၣ်တဖၣ်အိၣ်ဝဲအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
(KKPark)ကရၢၢ်ပူၤပှၤမၤတၢ်ဖိလၢဘၣ်ဟးထီၣ်သုးလီၢ်သုးကျဲတဖၣ်အံၤတကီၢ်ခါခဲအံၤနုၥ်လီၤခူသူၣ်ဝဲလၢကီၢ်ကၠီၣ်တဲၣ်ပူၤအိၣ်ဝဲလၢ(၆၀၀)ဘျဲၣ်ဃၣ်ဃၣ်လံဒီးကၠီၣ်တဲၣ်ပှၤဘၣ်မူဘၣ်ဒါတဖၣ်ဖီၣ်ဝဲအိၣ်ဝဲအဂ့ၢ်,လီၢ်ကဝီၤတၢ်ကစီၣ်သန့ဒီးကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
တကတီၢ်ဃီ,ပယီၤသုးပၢၤကီၢ်တဖၣ်ခိးဖီၣ်ဝဲ(KKPark)ပှၤမၤတၢ်ဖိတဖၣ်အံၤအဖီခိၣ်ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ.
“ပှၤဟဲက့ၤလၢကၠါဖၠၣ်တၢ်လံၣ်အီၣ်လီအီၣ်တၢ်မၤလီၢ်အဃိအသုဖီၣ်ဝဲန့ၣ်လီၤ.ကယဲၢ်ပှၤဟဲက့ၤလၢခီၣ်တဖၣ်န့ၣ်မ့ချူးဒုဖီၣ်ဝဲကိးဂၤလီၤ.သနၥ်က့မ့မ့ၢ်ပှၤလၢဘူးတံၢ်ဆွ့ၣ်မၠိလဲၤအိၣ်က့ၤန့ၣ်တဖၣ်တခီတဖီၣ်ဝဲဘၣ်.တရူးနုၥ်လီၤလၢခီၣ်တဖၣ်န့ၣ်ခီပၥ်ပနီၣ်ဝဲအါတစဲးန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
တကတီၢ်ခါခဲအံၤ(KKPark)ကရၢၢ်ပူၤပှၤမၤတၢ်ဖိတဖၣ်တအိၣ်ဝဲလၢၤဘၣ်ဒီးအိၣ်တ့ၢ်က့ၤထဲသုးခိးကီၢ်ဆၢ(BGF)ကရူၢ်ကရၢသ့ၣ်တဖၣ်လီၤအဂ့ၢ်,ပှၤလၢအဘူးဒီးပှၤမၤတၢ်ဖိလၢအဟဲစံၣ်နုၥ်လၢရၤမတံဝ့ၢ်ပူၤတဖၣ်စံးဝဲဒၣ်န့ၣ်လီၤ.
ဒ်န့ၣ်အသိး,လီၤဆီဒၣ်(KKPark)တရူးပှၤမၤတၢ်ဖိလၢသုးခိးကီၢ်ဆၢတီဆှၢဒုးနုၥ်လီၤဝဲဆူရၤမတံဝ့ၢ်ပူၤသ့ၣ်တဖၣ်အံၤတကီၢ်ခါခဲအံၤအိၣ်ကဒုဆိဝဲအသးလၢ(Hotel)တၢ်အိၣ်ဘှံးအိၣ်သါအလီၢ်တဖၣ်အပူၤအိၣ်ဝဲအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
