လါအီးကထိဘၢၣ်၂၄သီ, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့(၃),ချၢၣ်လွံၢ်ထူၣ်ကီၢ်ရ့ၣ် ခီဖျိသုးကရူၢ်အတၢ်မၤထီဒါပှၤဂ့ၢ်ဝီခွဲးယၥ်ခီဖျိ တၢ်ဟဲတ့ၢ်လီၤမ့ၣ်ပိၢ်ဒီးကဘီယူၤ,ခးတပျုၤတပျီၤကျိဖးဒိၣ်ဒီးဟဲတ့ၢ်လီၤမ့ၣ်ပိၢ်ဒီးဒြိအဃိ လါစဲးပထ့ဘၢၣ်တလါအတီၢ်ပူၤ ကီၢ်ဆၣ်(၃)ဘ့ၣ်အပူၤ ကမျၢၢ်ဘၣ်သံဝဲဒၣ်(၈)ဂၤ,ဘၣ်ဒိဝဲဒၣ်(၃၃)ဂၤအဂ့ၢ် သ့ၣ်ညါဘၣ်ဒ် ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်အတၢ်ပၥ်ဖျါအိၣ်ဝဲအသိးန့ၣ်လီၤ.
တကတီၢ်ဃီ လါစဲးပထ့ဘၢၣ်တလါအတီၢ်ပူၤ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်,ဆီထံးကီၢ်ဆၣ်, လၢၢ်ဒိၣ်ကီၢ်ဆၣ်, ကီၢ်ဆၣ်(၃)ဘ့ၣ်အပူၤ ပယီၤသုးခးတပျုၤတပျီၤဝဲကျိဖးဒိၣ်(၄၀)ဘျီခးလီၤဝဲကျိချံ(၁၄၈)ဖျၢၣ်, ဟဲတ့ၢ်လီၤမ့ၣ်ပိၢ်ဒီးကဘီယူၤ(၁၁)ဘျီ,တ့ၢ်လီၤဝဲမ့ၣ်ပိၢ်(၂၀)ဖျၢၣ်ဒီးတဘျီဃီခးလီၤဃုၥ်ဝဲဒီးအီလံကၢၣ်ကျိအမဲၥ်ညါဟဲတ့ၢ်လီၤမ့ၣ်ပိၢ်ဒီးဒြိအကလုၥ်ကလုၥ်အိၣ်ဝဲအဘျီ(၂၁)ဘျီ,တ့ၢ်လီၤဝဲ မ့ၣ်ပိၢ်(၃၆)ဖျၢၣ်အဂ့ၢ် ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်ပၥ်ဖျါဃုၥ်ဝဲဒၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါခီဖျိလၢ ပယီၤသုးအဒြိ,ကဘီယူၤဒီးကျိဖးဒိၣ်အဃိ ကမျၢၢ်ဟံၣ်ဟးဂီၤဝဲ(၉)ဖျၢၣ်,ကၠိဟးဂီၤဝဲ(၃)ဖျၢၣ်ဒီးဘၣ်ဟးဂီၤဝဲတၢ်ဘူၣ်တၢ်ဘါအလီၢ်ဒ်အမ့ၢ်သီခါဖၠၣ်(၂)ဖျၢၣ်အဂ့ၢ် ခ့ၣ်အဲၣ်ယူၣ်ချၢၣ်-လွံၢ်ထူၣ်ကီၢ်ရ့ၣ်ပၥ်ဖျါဝဲဒၣ်အသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးလီၤ ဖဲအပူၤကွံၥ်လါအီးကထိဘၢၣ် အသီ(၂၀)အနံၤ,မုၢ်ဃ့ၢ်လီၤ(၂)နၣ်ရံၣ်ဘျဲၣ်အဆၢကတီၢ်န့ၣ် ခီဖျိပယီၤသုးသူဝဲဒြိဒီးတ့ၢ်လီၤဝဲဒၣ်မ့ၣ်ပိၢ်လၢ ယ့ၤလဲသဝီပူၤအဃိဘၣ်ဒိဝဲဒၣ်သဝီဖိ(၃)ဂၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဝဲဖဲလါအီးကထိဘၢၣ်(၂၄)သီအနံၤအိၣ်ဝဲဒၣ်စ့ၢ်ကီးန့ၣ်လီၤ.
ခီဖျိလၢ သုးကရူၢ်အတၢ်မၤထီဒါဝဲဒၣ်ပှၤဂ့ၢ်ဝီခွဲးယၥ်ဒ်အံၤအဃိ တကီၢ်ခါခဲအံၤန့ၣ် ချၢၣ်လွံၢ်ထူၣ်ကီၢ်ရ့ၣ်,ကီၢ်ဆၣ်သၢဘ့ၣ်အပူၤ ဒ်ကီၢ်ပူၤကညီပှၤလီၢ်အိၣ်ကမှံဖိကမံးတံၥ် (CIDKP) အတၢ်မၤနီၣ်အိၣ်ဝဲအသိးန့ၣ်ပှၤလီၢ်အိၣ်ကမှံဖိအနီၣ်ဂံၢ်အိၣ်ဝဲဒၣ်လွံၢ်ကလီၢ်ဘျဲၣ်အဂ့ၢ် သ့ၣ်ညါန့ၣ်လီၤ.
