လါအီးကထိဘၢၣ် ၂၉ သီ, ၂၀၂၅ နံၣ်, ခ့ၣ်အဲးစံၣ်
မဲၢ်လးဘၣ်ကီဘၣ်ခဲဒဲကဝီၤလၢပှၤနီၣ်ဂံၢ်အါကတၢၢ်အံၤ ဖဲမဟါလါအီးကထိဘၢၣ် ၂၈ သီအနံၤန့ၣ်ကၠီၣ်တဲၣ်ခီပနံၣ်တၢ်မၤလီၢ် ဟဲကိးကဒီးပှၤမၤတၢ်ဖိအဂၤ(၄၀၀၀)ဘျဲၣ် လၢတၢ်မၤ(၅)ကလုၥ်အဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကၠီၣ်တဲၣ်ခီပနံၣ်ဟဲကိးဝဲပှၤမၤတၢ်ဖိလၢမဲၢ်လးဒဲကဝီၤပူၤဘျီဝဲအံၤ မ့ၢ်ဝဲတၢ်သူၣ်ထီၣ်ဘှီထီၣ်(ကီးစၣ်), တၢ်ဘှီမ့ၣ်အူ, တၢ်ဘိကါသိ, တၢ်သူၣ်တၢ်ဖျးအကလုၥ်ကလုၥ်,ညၣ်တၢ်ဖံးတၢ်မၤသ့ၣ်တဖၣ်ဒီးဘၣ်ဆၣ် လီၤဆီဒၣ်လၢတၢ်သူၣ်ထီၣ်ဘှီထီၣ် (ကီးစၣ်) တၢ်မၤ အဂီၢ်န့ၣ် ခီပနံၣ်(၃)ဖျၢၣ်လိၣ်ဘၣ်ဝဲပှၤမၤတၢ်ဖိအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဝဲန့ၣ်လီၤ.
အဃိဖဲမဟါလါအီးကထိဘၢၣ် ၂၈ သီအနံၤန့ၣ် ပှၤဒဲကဝီၤဖိစးထီၣ်လဲၤတီၣ်ထီၣ်ဝဲအမံၤစရီအါအါဂီၢ်ဂီၢ်အဃိ ပှၤသ့ၣ်သ့ၣ် ပှၤကညီနီၣ်ဂံၢ်ပှဲၤလံအဂ့ၢ်န့ၣ် ဒဲကဝီၤပူၤကမျၢၢ်တဂၤစံးဝဲန့ၣ်လီၤ.
အဝဲစံးဝဲလၢ“ဒ်သိးပှၤဘၣ်မူဘၣ်ဒါတဲပှၤန့ၣ်ဖဲမဟါ ၂၈ သီန့ၣ် ဒ်သိးယသ့ၣ်ညါန့ၣ်ပှၤဟဲကိးတၢ်မၤအိၣ်ဝဲတၢ်သူၣ်ထီၣ်ဘှီ ထီၣ်န့ၣ် ခီပနံၣ်အိၣ်ဝဲ(၃)ဖျၢၣ်,တၢ်ဘှီမ့ၣ်အူန့ၣ်ခီပနံၣ်(၁)ဖျၢၣ်,သိတၢ်ဖံးတၢ်မၤကျး(၁)ဖျၢၣ်,ဘၣ်ဃးတၢ်သူၣ်တၢ်ဖျးန့ၣ်(၁)ဖျၢၣ်,မ့ဝံၤန့ၣ်ညၣ်တၢ်ဖံးတၢ်မၤတၢ်ဘုၣ်ဆၣ်ဖိကီၢ်ဖိန့ၣ်(၁)ဖျၢၣ်အိၣ်ဒၣ်ပှဲၤန့ၣ်လီၤ.မ့မ့ၢ်စးထီၣ်ဖဲမဟါဂီၤခီန့ၣ်ပှၤလဲၤတီၣ် ထီၣ်ပှၤကညီနီၣ်ဂံၢ် ဘူးကပှဲၤခီ.နါက့ပှၤတဲလၢတၢ်သူၣ်ထီၣ်ဘှီထီၣ်တကပၤန့ၣ်လိၣ်ဒံး(၁၅)ဂၤဘၣ်ဆၣ်တနံၤအံၤဒုယဆိမိၣ်ပှၤကညီပှဲၤလၢၤလံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်ဒဲကဝီၤပှၤဘၣ်မူဘၣ်ဒါစံးဝဲအသိးန့ၣ် တၢ်သူၣ်ထီၣ်ဘှီထီၣ်(ကီးစၣ်)ခီပနံၣ်(၃)ဖျၢၣ်အံၤလိၣ်ဘၣ်ဝဲပှၤမၤတၢ်ဖိ ခွါ (၁၄၄)ဂၤ /မုၣ်(၁၈)ဂၤ, တၢ်ဘိသိတၢ်မၤ မုၣ်(၂၅)/ခွါ(၂၅)ဂၤ, တၢ်ဘှီမ့ၣ်အူ ခွါ(၅၀)/မုၣ်(၅၀)ဂၤ, ဒီး ညၣ်တၢ်ဖံးတၢ်မၤ ခွါ(၁၀)ဂၤ /မုၣ်(၅၀)ဂၤ, တၢ်သူၣ်တၢ်ဖျးပှၤမၤတၢ်ဖိခိၣ်ခီန့ၣ်လိၣ်ဘၣ်ဝဲအိၣ်လၢ (၄၀၂၁)ဂၤအဃိ ခီပနံၣ်ပၥ်ဖှိၣ်ခဲလၢၥ် လိၣ်ဘၣ်ဝဲ ပှၤမၤတၢ်ဖိ(၄၃၉၁)ဂၤ န့ၣ်လီၤ.
ဒီးခီပနံၣ်တၢ်မၤလီၢ်လၢအလိၣ်ဘၣ်ဝဲပှၤမၤတၢ်ဖိသ့ၣ်တဖၣ်အံၤန့ၣ် အိၣ်ဝဲဒၣ်လၢအးယူၣ်ထယါကီၢ်ရ့ၣ်,ဘီကီး,စရးဘူရံ, စမူၤစိၤခရါ,ပထိၤထၤနံၤ,စးကဲးကီၢ်ရ့ၣ်လၢကထံပိၥ်ဒီးလါမယါကျီးလၢမဲၢ်လးဒဲကဝီၤဖိလဲၤတုၤဖံးမၤဝဲတၢ်မၤအလီၢ်သ့ၣ်တဖၣ်အံၤအပူၤန့ၣ်လီၤ.
ဒ်န့ၣ်အသိးအပူၤကွံၥ်စှၤသီအခါမဲၢ်လးဒဲကဝီၤဖိလၢအလဲၤမၤတၢ်မၤဖဲ(လါမယါ)ကျီးပူၤတဖၣ်တနီၤန့ၣ်ခီဖျိရၤလီၤတၢ်ဂီၤမူလၢအဘၣ်ဃးဒီးတၢ်ဖံးတၢ်မၤတၢ်အိၣ်သးအဃိ တကီၢ်ခါခဲအံၤမဲၢ်လးဒဲကဝီၤပူၤ ပှၤဒဲကဝီၤဖိ လၢအအိၣ်တ့ၢ်ဒံးတနီၤလၢကဘၣ်လဲၤမၤဝဲ (လါမယါ)ကျီးလၢကဘၣ်ဟးထီၣ်ဖဲတနံၤအံၤလါအီးကထိဘၢၣ် ၂၉ သီတဖၣ်အံၤ သ့ၣ်ခိၣ်တဟံအဝဲသ့ၣ်လၢၤဘၣ်အဃိ တၢ်လဲၤ တၢ်က့ၤတကဲထီၣ်လၢၤဘၣ်အဂ့ၢ်န့ၣ် မဲၢ်လးဒဲကဝီၤခိၣ် စီၤဆါဒ့ စံးဝဲန့ၣ်လီၤ.
“ဖဲမဟါပှၤလၢလဲၤတီၣ်ထီၣ်လၢကလဲၤမၤလါမယါတဖၣ်န့ၣ် တၢ်မၤကစၢ်(သထ့)န့ၣ်ဘၣ်ဒီတသးအိၣ်အဝဲသ့ၣ်,တ(စ့ၣ်ဝ့ၤဆါ)ဝဲ အါအါလၢၤဘၣ်. တနံၤအံၤပှၤလၢအဲၣ်ဒိးမၤတၢ်နီၢ်နီၢ်လၢကလဲၤမၤ(လါမယါ)ကျီးပူၤတဖၣ်အံၤတလဲၤဘၣ်လၢၤဘၣ်.ပှၤကဘၣ်လဲၤ တနံၤအံၤကအိၣ်လၢအဆံညါ.ဘၣ်ဆၣ်တကိးဝဲလၢၤဘၣ်ကကိးကဒါဝဲလၢကထံပိၥ်ကျီးခီမီၤနီၤ.မ့မ့ၢ်ကထံပိၥ်ကျီးဒုကမၤဝဲ.ဘၣ်ဆၣ်မ့မ့ၢ်လၢလါမယါကျီးဒုပှၤဒဲကဝီၤလၢအဂၤဒုကမၤဝဲဒံး.မ့မ့ၢ်ပဒဲကဝီၤဒုဘၣ်ဒီတမၤဝဲလၢၤဘၣ်..မ့မ့ၢ်လၢပှၤထုးထီၣ်မ့ၣ်အူပျံၤတၢ်မၤတခါန့ၣ်ကဟးထီၣ်ဖဲ ၃၁ သီအံၤ”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်ဒ်သိးပှၤဒဲကဝီၤဖိကန့ၢ်ဟးထီၣ်မၤဘၣ်တၢ်လၢတၢ်ချၢလၢအဖိးသဲစးအဂီၢ်န့ၣ် တၢ်ကရၢကရိခိၣ်နၢ်ပှၤဘၣ်မူဘၣ်ဒါ ပၥ်ဖျါထီၣ်ဂုၥ်ကျဲးစၢးကတိၤန့ၢ်ခဲးတၢ်လၢပှၤဒဲကဝီၤဖိအဂီၢ်အဖီခိၣ် ပှၤဒဲကဝီၤဖိတဖၣ်ကဂုၥ်ကျဲးစၢးတူၢ်ဆါ သးဟံန့ၢ်တၢ်ခွဲးတၢ်ယၥ် မၤအီၤလၢအဂ့ၤကတၢၢ်ဒီး တကတီၢ်ဃီခါဆူမဲၥ်ညါတၢ်ဂ့ၢ်ဒ်အံၤမ့အိၣ်ထီၣ်ကဒီးန့ၣ်တၢ်ကီတၢ်ခဲအိၣ်ထီၣ်သ့ဝဲလၢ တၢ်ဖံးတၢ်မၤ အဂီၢ်အဂ့ၢ်န့ၣ် မဲၢ်လးဒဲကဝီၤခိၣ် စီၤဆါဒ့ စံးဝဲန့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဘၣ်ကီဘၣ်ခဲဒဲကဝီၤကိးဘ့ၣ်ဒဲးအပူၤ ကၠီၣ်တဲၣ်ခီပနံၣ်တၢ်မၤလီၢ်ဟဲကိးပှၤမၤတၢ်ဖိအိၣ်ထီၣ် ဝံၤလီၢ်ခံ စးထီၣ်ဖဲတလါအံၤလါအီးကထိဘၢၣ် ၁၅ သီ တဒူၣ် ဒီး ၂၁ သီ တဒူၣ် ပၥ်ဖှိၣ်ခဲလၢၥ်ပှၤအဂၤ ၁၄၀ ဘျဲၣ် န့ၢ်ဟး ထီၣ်လဲၤ မၤဝဲတၢ်မၤလၢတၢ်တ့ထီၣ်ဘှီထီၣ်(ကီးစၣ်)ဒီးလါမယါ,ကထံပိၥ်ကျီးတၢ်မၤလီၢ်သ့ၣ်တဖၣ်အံၤန့ၣ်လီၤ.
ဒ်န့ၣ်အသိးဖဲတလါအံၤလါအီးကထိဘၢၣ် ၂၄ သီ ဒီးတနံၤအံၤ ၂၉ သီအံၤစ့ၢ်ကီး မဲၢ်လးအူးဘၣ်ကီဘၣ်ခဲပူၤ ဒဲကဝီၤဖိတဖၣ် စးထီၣ်ဟးထီၣ်လဲၤမၤဝဲ တၢ်မၤလၢကၠီၣ်တဲၣ်ဟဲကိးဝဲအံၤလံအဂ့ၢ်န့ၣ် ဒဲကဝီၤဖိပိၥ်မုၣ်တဂၤ စံးဝဲန့ၣ်လီၤ.
“အဟးထီၣ်ဖဲတၢတဒူၣ်အခါန့ၣ်အကဘၣ်လဲၤဘိးကထံဒီးဘၣ်ဘိးနဲးသၣ်မီၤနီၤ. အလီၢ်ခံတခါအံၤနါက့ကဲဝဲဒၣ်ကထံပိၥ်ကျီးဒီး ဘီးက့ၣ်လီၤ.မ့မ့ၢ်လၢပမဲၢ်လးအူးန့ၣ်ပှၤဟးထီၣ်ဒီးတဂီၤအံၤန့ၣ်အိၣ်ခံဝီလံ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဘၣ်ဆၣ်ဖဲမဟါအနံၤတၢ်ကစီၣ်ရၤလီၤသးလၢပှၤမဲၢ်လးဒဲကဝီၤဖိလၢလဲၤမၤတၢ်မၤလၢကထံပိၥ်ကျီးတဂၤစၢၢ်သံလီၤကိၥ်အဃိ မဲၢ်လးအူးကဝီၤဒ့ဖိဟးထီၣ်ဘျီဝဲအံၤအနီၣ်ဂံၢ်တပှဲၤဒ်သိးတၢ်တီၣ်ဃၥ်မံၤစရီအသိးလၢၤဘၣ်ဟဲအိၣ်ထီၣ်ဝဲအဂ့ၢ်န့ၣ် ဒဲကဝီၤဖိ တဂၤဃီဝဲန့ၣ် စံးအါထီၣ်ဝဲန့ၣ်လီၤ.
