လါအီးကထိဘၢၣ် ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ကီၢ်သူလ့ၤတၢ်ပၢဟီၣ်ကဝီၤ,သုးက့(၃),ချၢၣ်လွံၢ်ထူၣ်ကီၢ်ရ့ၣ်,မူကီၢ်ဆၣ်ပူၤ ကညီပှၤလီၢ်အိၣ်ကမှံကမံးတံၥ်(CIDKP)နုၥ်လီၤဟ့ၣ်မၤစၢၤဝဲဒၣ်ကျိၣ်စ့လၢသဝီ(၁၃)ဖျၢၣ်ဟံၣ်ခိၣ်(၁၂၅၀)ဒူၣ်,ပှၤကညီနီၣ်ဂံၢ်(၆၉၃၉)ဂၤအဂီၢ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဝဲဖဲအပူၤကွံၥ်လါအီးကထိဘၢၣ်(၇)သီအနံၤန့ၣ်လီၤ.
ခီဖျိလၢတၢ်ဝံစိၥ်တီဆှၢအဂီၢ်ကျဲတၢ်ကီတၢ်ခဲဒီးတၢ်ဘံၣ်တၢ်ဘၢအဖီခိၣ်အဃိကမျၢၢ်(၆၉၃၉)အဂီၢ်တၢ်ဆီၣ်ထွဲမၤစၢၤသ့ၣ်တဖၣ်အံၤဘၣ်တၢ်မၤစၢၤအီၤလၢကျိၣ်စ့အဂ့ၢ် ကီၢ်ပူၤကညီပှၤလီၢ်အိၣ်ကမှံဖိအပှၤဘၣ်မူဘၣ်ဒါစံးဝဲဒၣ်အသိးသ့ၣ်ညါဘၣ်န့ၣ်လီၤ.
ဘၣ်ဃးတၢ်နုၥ်လီၤမၤစၢၤကီၢ်ပူၤပှၤလီၢ်အိၣ်ကမှံဖိတၢ်ရဲၣ်တၢ်ကျဲၤအိၣ်ဝဲဒ်လဲၣ်အဂ့ၢ်န့ၣ် (CIDKP)အပှၤနဲၣ်တၢ်ခံဂၤတဂၤ သရၣ်ခဲလ့ၣ်စံးဘၣ်ဝဲဒၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
“တၢ်ဆီၣ်ထွဲမၤစၢၤတၢ်ရဲၣ်တၢ်ကျဲၤန့ၣ် အိၣ်ဒိးသန့ၤထီၣ်သးလၢတၢ်ကဲထီၣ်သးအဖီခိၣ်န့ၣ်လီၤ.ပဟ့ၣ်တၢ်ဆီၣ်ထွဲမၤစၢၤလၢဂ့ၢ်ဂီၢ်အူကိးပၤဒဲးဒ်အမ့ၢ် တၢ်ဒုးတၢ်ယၤကဲထီၣ်မ့ၢ်ဂ့ၢ်,န့ဆၢၣ်ခိၣ်ဃၢၤတၢ်ကဲထီၣ်သးဒ်အမ့ၢ် မူခိၣ်စူၤထံဒိၣ်လုၢ်ဘၢတၢ်,ဟီၣ်ခိၣ်ဟူးကဲထီၣ်မ့ၢ်ဂ့ၤသ့ၣ်တဖၣ်ခဲလၢၥ်န့ၣ်လီၤ.တသ့ဖဲအသ့ပကျဲၤန့ၢ်တၢ်လၢကမျၢၢ်သ့ၣ်တဖၣ်အံၤအဂီၢ်ဘၣ်ဆၣ်တမ့ၢ်လၢတၢ်လၢတၢ်ပှဲၤဘၣ်.တၢ်မၤစၢၤလၢပမၤစၢၤဘၣ်အအါကတၢၢ်န့ၣ်မ့ၢ်ဝဲဒၣ် ဒူပျၥ်ယၥ်,ခံတီၤတီၤန့ၣ်မ့ၢ်ဝဲဒၣ်ချၢၣ်လွံၢ်ထူၣ်,သၢတီၤတတီၤန့ၣ်ဖၣ်အၣ် ဝံၤန့ၣ် မုၢ်ြတီၢ်,တီအူ,ဘျံးဒဝဲၢ်သ့ၣ်တဖၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ဒ်ကီၢ်ပူၤကညီပှၤလီၢ်အိၣ်ကမှံဖိကမံးတံၥ် အတၢ်မၤနီၣ်အိၣ်ဝဲအသိးန့ၣ်ချၢၣ်လွံၢ်ထူၣ်တၢ်ပၢဟီၣ်ကဝီၤ မူ,ဆီထံး,လၢၢ်ဒိၣ် ကီၢ်ဆၣ်(၃)ဘ့ၣ်အပူၤ တကီၢ်ခါခဲအံၤန့ၣ် ပှၤလီၢ်အိၣ်ကမှံဖိအနီၣ်ဂံၣ်အိၣ်ဝဲဒၣ်(၄၀၀၀၀၀)ဘျဲၣ်အဂ့ၢ် သ့ၣ်ညါန့ၣ်လီၤ.
တကတီၢ်ဃီ တကီၢ်ခါတၢ်အိၣ်သးခဲအံၤလၢကနုၥ်လီၤမၤစၢၤ ကီၢ်ပူၤပှၤလီၢ်အိၣ်ကမှံဖိအဂီၢ် သဂၢၢ်ဘၣ်ဒီး တၢ်တၤတၢ်လၢ ထံဆၢကီၢ်ဆၢ တၢ်ဝံစိၥ်တီဆှၢအမဲၥ်ညါ လၢပှၤမၤတၢ်ဖိအဂီၢ်စ့ၢ်ကီးသးသမူဒီးတၢ်ဘံၣ်တၢ်ဘၢတၢ်လီၤဘၣ်ယိၣ်အိၣ်ဝဲဒၣ်အဂ့ၢ်သရၣ်စီၤခဲလ့ၣ်တဲအါထီၣ်ဝဲဒၣ်စ့ၢ်ကီးန့လီၤ.
ဒ်န့ၣ်အသိး ခီဖျိပယီၤသုးမီၤစိရိၤ ပညိၣ်ခးလီၤကျိဖးဒိၣ်,ကဘီယူၤဒုးသုးဒီးဒြိသ့ၣ်တဖၣ်အံၤလိၤလိၤဆူကမျၢၢ်အိၣ်ဆိးတၢ်အလီၢ်အဃိ ချၢၣ်လွံၢ်ထူၣ်ကီၢ်ရ့ၣ်ပူၤကမျၢၢ်ဘၣ်ဒိဘၣ်ထံးဒီးဘၣ်သံဝဲအမဲၥ်ညါဟံၣ်ဃီဒီးတၢ်ဘူၣ်တၢ်ဘါတၢ်သူၣ်ထီၣ်ဟးဂီၤဝဲဒၣ်ကဲထီၣ်သးအိၣ်ခဲအံၤခဲအံၤအဂ့ၢ် ခ့ၣ်အဲၣ်ယူၣ် ပၥ်ဖျါဝဲဒၣ်န့ၣ်လီၤ.
တၢ်ဒုးတၢ်ယၤအဃိပှၤလၢတၢ်လုၢ်အီၣ်နီၢ်ခိသးသမူဒီးတၢ်လုၢ်အီၣ်နီၢ်ကစၢ်သးသမူဘၣ်ဒိမ့ၢ်ဂ့ၤ,ပှၤလၢအိၣ်လၢကစၢ်ဟံၣ်ဃီတဘူၣ်ဒီးဘၣ်ဃ့ၢ်အိၣ်လၢပှၤတၢ်လီၢ်တၢ်ကျဲမ့ၢ်ဂ့ၤ,မ့တမ့ၢ်ပှၤလၢအိၣ်လၢကစၢ်လီၢ်ကစၢ်ကျဲဘူၣ်ဘၣ်ဆၣ်ဘၣ်ပျံၤဘၣ်ဖုးတၢ်လၢသးသမူအတၢ်လီၤဘၣ်ယိၣ်အဂီၢ်သ့ၣ်တဖၣ်ခဲလၢၥ်န့ၣ် ပၥ်နီၣ်ဝဲဒၣ်လၢအမ့ၢ် ကီၢ်ပူၤပှၤလီၢ်အိၣ်ကမှံဖိသ့ၣ်တဖၣ်ဒီး တကီၢ်ခါခဲအံၤ ကီၢ်သူလ့ၤတၢ်ပၢၢ်ဟီၣ်ကဝီၤပူၤပှၤလီၢ်အိၣ်ကမှံဖိအိၣ်ဝဲဒၣ်(၁.၂)ကကွဲၢ်အဂ့ၢ် သ့ၣ်ညါဘၣ်လၢ(CIDKP)အပှၤဘၣ်မူဘၣ်ဒါအအိၣ်န့ၣ်လီၤ.
