စွ့ၣ်ကိၣ်ကိၤအယၣ်ဘျးသဒၢ (မ့တမ့ၢ်) KK park
လါနိၣ်ဝ့ဘၢၣ် ၁၁သီ, ၂၀၂၅နံၣ်, ခ့ၣ်အဲးစံၣ်.
သုးကရူၢ်နုၥ်လီၤဝဲဒၣ်လၢ KKPark ဝံၤအလီၢ်ခံပၥ်ဖှိၣ်သးဒီး သုးခိးကီၢ်ဆၢ-BGF ဝံၤမၤပိၢ်ဖးထီၣ်ဝဲဒၣ် KK park ကရၢၢ်ပူၤတၢ်သူၣ်ထီၣ်သ့ၣ်တဖၣ်အိၣ်ဝဲဒၣ်တပယူၤဃီန့ၣ်လီၤ. ဒ်သုးကရူၢ်ပၥ်ဖျါထီၣ်ဝဲ အသိးန့ၣ်တၢ်သူၣ်ထီၣ်အိၣ်ဝဲခဲလၢၥ်(၁၄၈)ဖျၢၣ်ဒီးအခဲအံၤ မၤလီၤပှီၢ်ကွံၥ်၀ဲဒၣ်(၁၀၁)ဒီးဆဲးမၤလီၢ်ပှီၢ်ဝဲ အဂ့ၢ်ပၥ်ဖျါဝဲဒၣ်န့ၣ်လီၤ.
KK park မ့ၢ်ဝံၤန့ၣ် တၢ်ဘၣ်ဘျုးဒံၣ်မိၢ်ခြ့ၣ်စံၣ် ကညီသုးမုၢ်ဒိၣ်-DKBA တၢ်ပၢ ကၠီးခဲးဟီၣ်ကဝီၤကမ့ၢ်ဘၣ်ဖုးသုးကရူၢ် (target)အသီတခါဧါ? မ့တမ့ၢ် စွ့ၣ်ကိၣ်ကိၤဧါ. မ့တမ့ၢ်က ကတၢၢ်ကွံၥ်ဝဲဖဲ KK Park အံၤလီၤဧါ.
ဘၣ်မနုၤသုးကရူၢ်နုၥ်လီၤလၢ KK park ကရၢၢ်ပူၤန့ၢ်လဲၣ်?
Online တၢ်လံၣ်အီၣ်လီအီၣ်ကျိၣ်စ့အလီၢ်လၢအမံၤဟူသၣ်ဖျါခဲအံၤ လၢအမ့ၢ် KK parkအံၤန့ၣ် အကရၢၢ်အလဲၢ်အထီအိၣ်ဝဲဒၣ် အ့ကၢၣ်(၅၀၀),အိၣ်ဆီလီၤဝဲသးလၢ ရၤမတံဝ့ၢ်ကလံၤထံးတကပၤဒီး ဘၣ်တၢ်စးထီၣ်ဒုးလိၣ်ထီၣ်ဖးထီၣ်အီၤဖဲ(၂၀၂၀)နံၣ်လါဖ့ၤဘြူၤအါရံၤအတီၢ်ပူၤန့ၣ်လီၤ. ဖဲပူၤကွံၥ်လါစဲးပထ့ဘၢၣ်ထီၣ်သီအဆၢကတီၢ် ပယီၤသုးကရူၢ်ထီၣ်ဒိၣ်စိက့ၤဝဲဒၣ်ရၤမတံဝ့ၢ်န့ၢ်ဝံၤအလီၢ်ခံ မၤက့ၤဝဲဒၣ်တၢ်ထီၣ်ဒုးလၢရမတံဝ့ၢ်ကလံၤထံးတကပၤတုၤအခဲအံၤန့ၣ်လီၤ.
တကတီၢ်ဃီဝၣ်နုၥ်လီၤဝဲဒၣ်လၢ KK Park ကရၢၢ်ပူၤ,ဒိဝဲတၢ်ဂီၤ,ရၤလီၤဝဲဒၣ်တၢ်ကစီၣ်အမဲၥ်ညါ စးထီၣ်လါအီးကထိဘၢၣ်အသီ(၂၀)အလီၢ်ခံတုၤခဲအံၤန့ၣ် ပယီၤသုးကရူၢ်ဒီး BGF ပၥ်ဖှိၣ်သးမၤပိၢ်ဖးထီၣ်ဝဲဒၣ်တၢ်သူၣ်ထီၣ်အိၣ်ဝဲကိးနံၤဒဲးဃၣ်ဃၣ်တုၤအခဲအံၤန့ၣ်လီၤ.
ဒ်လီၢ်ကဝီၤပှၤဟ့ၣ်တၢ်ကစီၣ်ဖိစံးဝဲဒၣ်အသိးန့ၣ် သုးကရူၢ်အံၤဒ်သိးဝၣ်နုၥ်လီၤဝဲဒၣ်လၢ KK park ကရၢၢ်ပူၤကန့ၢ်အဂီၢ် ဘၣ်တၢၣ်ပီၣ်တဲသကိးဆိတၢ်ဒီး BGF ခိၣ်နၢ်ဒိၣ်ထီဝံၤမးဝၣ်နုၥ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ.
သုးကရူၢ်နုၥ်လီၤဝဲဒၣ်လၢ KK park ကရၢၢ်ပူၤဝံၤအလီၢ်ခံန့ၣ် KK park ကရၢၢ်ပူၤ ပှၤမၤတၢ်ဖိအိၣ်လၢထံဂုၤကီၢ်ဂၤမ့ၢ်ဂ့ၤ,ပှၤကီၢ်ပယီၤဖိမ့ၢ်ဂ့ၤဟးထီၣ်ဃ့ၢ်ကွံၥ်အါအါဂီၢ်အဖီခိၣ် ခီဖျိမံၤထီၣ်သၣ်ထီၣ်လၢကၠါဖၠၣ်တၢ်ဖံးတၢ်မၤအဃိတၢ်ကရၢကရိမံၤဟးဂီၤအသိးသုးကရူၢ်အတၢ်ဆီၣ်သနံးအဃိပှၤသ့ၣ်တဖၣ်အံၤတၢ်မၢအဝဲသ့ၣ်က့ၤကဒါက့ၤအဂ့ၢ် BGF သုးခိၣ်ကျၢၢ်ဖိစီၤတ့ၤဝ့စံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဖဲလါအီးကထိဘၢၣ်(၂၂)သီအနံၤအိၣ်ဝဲဒၣ်န့ၣ်လီၤ.
အဝဲစံးဝဲလၢ“ပမၢအဝဲသ့ၣ်က့ၤကွံၥ်န့ၣ်လီၤ.မံၤထီၣ်လၢ ကၠါဖၠၣ် တၢ်လံၣ်တၢ်လီအဃိ ပတၢ်ကရၢကရိသနၥ်က့အမံၤဟးဂီၤ,လၢပယီၤတကပၤစ့ၢ်ကီးတၢ်ဆီၣ်နံးအိၣ်အဃိယပမၢအဝဲသ့ၣ်က့ၤကွံၥ်လၢတဂၤလၢတၢ်ဆဲးကျိးန့ၣ်လီၤ.”အဂ့ၢ် စံးဝဲဒၣ်န့ၣ်လီၤ.
KK park အံၤမတၤပၢဝဲလဲၣ်?
KK Park အံၤန့ၣ် ဘၣ်တၢ်ပၢအီၤလၢ ကညီကီၢ်စဲၣ်သုးခိးကီၢ်ဆၢ (BGF) သုးဟီၣ်ကဝီၤနီၣ်ဂံၢ်(၂)အသုးဟီၣ်ကဝီၤခိၣ် သုးခိၣ်ကျၢၢ်ဖိစီၤတ့ဝ့န့ၣ်လီၤ.သုးကရူၢ်နုၥ်လီၤဝဲဒၣ်လၢ KK park ကရၢၢ်ပူၤအံၤန့ၣ် သုးခိၣ်ကျၢၢ်ဖိစီၤတ့ၤဝ့တအဲၣ်ဒိးဘၣ်ဘၣ်ဆၣ် ခီဖျိ BGF အနဲၣ်ရွဲၣ် သုးခိၣ်ခၠံၣ်သူၣ်တၢ်ကလုၢ်အဃိ ဘၣ်ဟ့ၣ်ဝဲတၢ်ပျဲအဂ့ၢ် ပှၤဟ့ၣ်တၢ်ကစီၣ်လၢအိၣ်ဘူးဒီး BGFစံးဝဲဒၣ်န့ၣ်လီၤ.
ဒ်ပှၤဟ့ၣ်တၢ်ကစီၣ်လၢအိၣ်ဘူးဒီး BGFတဂၤ စံးဝဲဒၣ်အသိးန့ၣ် ခီဖျိသုးခိၣ်ကျၢၢ်ဖိစီၤတ့ၤဝ့အံၤ သုးခိၣ်ခၠံၣ် သူၣ်ဟ့ၣ်လီၤအီၤတၢ်ကလုၢ်လၢကဘၣ်လဲၤထီၣ်ခးရှဲပျီကွံၥ်ဝဲဒၣ် သုးခိၣ်ဒးဘီတီခိၣ်ရိၣ်မဲ KNLA တၢ်ပၢၢ်ဆၢသုးပၥ်ဖှိၣ်ဖဲလ့က့ၣ်ကိၥ်,မဲးဝါခံဟီၣ်ကဝီၤန့ၣ်လီၤ. ဘၣ်ဆၣ် စံးဝဲဒၣ်လၢကညီဖိကဒဲကဒဲတအဲၣ်ဒိးခးလိၥ်သးလၢၥ်ဘၣ်ဒီးတဒိကနၣ်ဝဲတၢ်ကလုၢ်ဘၣ်အဃိ သုးခိၣ်ခၠံၣ်သူၣ်ပျဲနုၥ်လီၤဝဲ ပယီၤသုးလၢ သုးခိၣ်တ့ၤဝ့ ပၢ KK Park ကရၢၢ်ပူၤဒီးမၤပိၢ်ဖးထီၣ်ဝဲတၢ်ဒ်အံၤလီၤအဂ့ၢ် စံးဝဲဒၣ်အိၣ်ဘၣ်ဆၣ်တၢ်သ့ၣ်တဖၣ်န့ၣ်မ့ၢ်ဒၣ်တၢ်ဂိၥ်စုဂိၥ်ခီၣ်လၢတဒူၣ်ဒီးတဒူၣ်အဘၢၣ်စၢၤဒ်သိးကမၤလီၤဖးတၢ်လီၤအဂ့ၢ် သုးခိၣ်ကျၢၢ်ဖိစီၤတ့ၤဝ့ သမၢဝဲဒၣ်န့ၣ်လီၤ.
သုးကရူၢ်ဟံးန့ၢ်တၢ်ဘၣ်ဘျုးဖဲ KK park
ဘၣ်ဃးဒီး ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကၠါဖၠၣ်တၢ်ဖံးတၢ်မၤအံၤန့ၣ် တရူးဃုၥ်ဒီးထံဂုၤကီၢ်ဂၤသ့ၣ်တဖၣ်ဆီၣ်သနံးဝဲဒၣ် မ့အီၣ်လဲၣ်တီခိၣ်ရိၣ်မဲ သုးကရူၢ်အံၤအိၣ်ဝဲဒၣ်တပယူၤဃီန့ၣ်လီၤ.တကတီၢ်ဃီ ဖဲအပူၤကွံၥ်လါအီးကထိဘၢၣ်(၂၆)တုၤ(၂၈)သီအနံၤန့ၣ် ဘၣ်ဖဲအၣ်စံၣ်ယၣ်ထံကီၢ်သ့ၣ်တဖၣ်မၤဝဲဒၣ်(၄၇)ဝီတဝီတၢ်အိၣ်ဖှိၣ်ဖးဒိၣ်န့ၣ်လီၤ.
အဃိ ဖဲလါအီးကထိဘၢၣ်(၁၉)သီသုးကရူၢ်နုၥ်လီၤလၢ KK parkကရၢၢ်ပူၤအဆၢကတီၢ်ဖီၣ်ချုးန့ၢ်ဝဲဒၣ် starlink လၢပှၤသူဝဲလၢကၠါဖၠၣ်တၢ်ဖံးတၢ်မၤအဂီၢ်ဒီး KNU ဒိးန့ၢ်ဘၣ်ဝဲဒၣ်တၢ်ဟဲနုၥ်ခီဖျိ KK parkအိၣ်ဝဲဒၣ်အဂ့ၢ် သုးကရူၢ်တကပၤပၥ်ဖျါထီၣ်ဝဲတဘျီဃီန့ၣ်လီၤ. ဘၣ်ဃးတၢ်ဂ့ၢ်အံၤန့ၣ် မ့ၢ်ဒၣ်သုးကရူၢ်တခီတၢၤတၢ်ပၥ်ဒ့ၣ်ပၥ်ကမၢ်ဒီးဂ့ၢ်လိၥ်ဝဲတဲၥ်တဲၥ်ဖျုဖျုအဂ့ၢ် KNU ဘိးဘၣ်ရၤလီၤတ့ၢ်ဝဲဖဲအပူၤကွံၥ်လါအီးကထိဘၢၣ်(၂၆)သီအနံၤအိၣ်ဝဲဒၣ်စ့ၢ်ကီးန့ၣ်လီၤ.
တၢ်သ့ၣ်တဖၣ်အံၤန့ၣ် ခီဖျိတၢ်ဆီၣ်သနံးကပၤကပၤအဖီခိၣ် လၢကပၥ်ဖျါထီၣ်အဝဲသ့ၣ်တၢ်ဟူးတၢ်ဂဲၤအဂီၢ် မၤဝဲဒၣ် တၢ်ဟူးတၢ်ဂဲၤလၢအဘ့ၣ်ခိၣ်ဒ်အံၤလီၤအဂ့ၢ် တၢ်မၤစၢၤဆီၣ်ထွဲကညီတၢ်မုၥ်တၢ်ခုၣ်ပှၥ်ဘျးစဲ အပှၤကတိၤတၢ်ပၢ သရၣ်မုၣ်ဝါခုၣ်ဆှံပဲၥ်ထံနီၤဖးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ “နီၢ်ကီၢ်န့ၣ်တၢ်လံၣ်အီၣ်လီအီၣ်လၢကလံၤကျါတၢ်လီၢ်အံၤတအိၣ်ထဲ KK Parkတၢ်လီၢ်တခါဘၣ်.အိၣ်တၢ်လီၢ်တဘျုးတီၤန့ၣ်လီၤ.အ(သုးကရူၢ်)တၢ်ရဲၣ်တၢ်ကျဲၤမ့ၢ်အိၣ်လၢကမၤလီၤမၢ်ဝဲခဲလၢၥ်န့ၣ်မၤလီၤမၢ်ဝဲသ့လီၤ.အခဲအံၤအိၣ်ဒၣ်မၤဝဲဖဲတၢ်လီၢ်တတီၤဝံၤမၤပိၢ်ထီၣ်ဝဲလၢန့ၣ်တထံၣ်လၢအံၤတထံၣ်ဒ်အံၤန့ၣ် အတဖျါလၢအိၣ်ဒီးတၢ်ရဲၣ်တၢ်ကျဲၤကမၤလီၤမၢ်ဝဲဘၣ်.မ့ၢ်ဒၣ်တၢ်ပၥ်ဖျါထီၣ်လၢအဘ့ၣ်ခိၣ်န့ၣ်လီၤ. ခီဖျိလၢတရူး,ထံဂုၤကီၢ်ဂၤဒ်အမ့ၢ် US, UKသ့ၣ်တဖၣ်အတၢ်ဆီၣ်သနံးဒီးဘၣ်စ့ၢ်ကီးဆၢကတီၢ်လၢအၣ်စံၣ်ယၣ်ထံကီၢ်မၤဝဲတၢ်အိၣ်ဖှိၣ်အဃိန့ၣ် အဝဲသ့ၣ် အဲၣ်ဒိးပၥ်ဖျါထီၣ်အတၢ်ဖံးတၢ်မၤတခါခါန့ၣ်လီၤ.အတၢ်ရဲၣ်တၢ်ကျဲၤလီၤတံၢ်တအိၣ်ဘၣ်.”အဂ့ၢ်စံးဝဲဒၣ်န့ၣ်လီၤ.
(၄၇)ဝီတဝီ အၣ်စံၣ်ယၣ် ထံကီၢ်တၢ်အိၣ်ဖှိၣ်လၢဘၣ်တၢ်မၤအီၤဖဲ ကီၢ်မ့လ့ရှါ,ကွၥ်လၤလါပူၤဝ့ၢ် လၢအမဲရကၤကီၢ်ခိၣ် ဒီနၢၤထြၢၣ် ဟဲထီၣ်ပၣ်ဃုၥ်ပၣ်ဂီၢ်ဘျီဝဲအံၤန့ၣ် တၢ်တကွဲမုၥ်ဝဲဒၣ်ကီၢ်ပယီၤခၢၣ်စး သုးကရူၢ်ခိၣ်နၢ်သ့ၣ်တဖၣ်ဘၣ်အဂ့ၢ်သ့ၣ်ညါဘၣ်န့ၣ်လီၤ.
KK park ဝံၤ ကၠီးခဲးဟီၣ်ကဝီၤကမ့ၢ်ဘၣ်ဖုးသုးကရူၢ် (Target)အသီတခါဧါ?
တကီၢ်ခါခဲအံၤန့ၣ် သုးကရူၢ်ဟဲထီၣ်ဒိၣ်စိဝဲဟီၣ်ကဝီၤန့ၢ်တုၤဖဲ အ့ၤကၠ့မၠဲၣ်အဃိ ဝၣ်နုၥ်လီၤဝဲဒၣ်လၢ KK parkန့ၣ်လီၤ.တကီၢ်ခါခဲအံၤန့ၣ် သုးကရူၢ်အံၤဟဲထီၣ်လၢအဝဲသ့ၣ် တၢ်ပၢဟီၣ်ကဝီၤ ကၠီးခဲးတတုၤဒံးဘၣ်အဃိ သုးကရူၢ်ကဝၣ်နုၥ်ဧါ,တဝၣ်နုၥ်ဧါန့ၣ်တဲလီၤတံၢ်တသ့ဘၣ်အဂ့ၢ် တၢ်ဘၣ်ဘျုး ဒံၣ်မိၣ်ကရ့ၣ်စံၣ် ကညီသုးမုၢ်ဒိၣ် -DKBA အပှၤဘၣ်မူဘၣ်ဒါစံးဝဲဒၣ်ဒ်အံၤန့ၣ်လီၤ.
ဘၣ်ဃးဒီးတကီၢ်ခါခဲအံၤ KK parkတၢ်အိၣ်သးဒီးအဝဲသ့ၣ်တၢ်အိၣ်သးန့ၣ် DKBA သုးက့(၁)အဒုးယၤခိၣ် သုးခိၣ်ဒိၣ်စိစီၤသရံထူစံးဝဲဒၣ်လၢ “ဟဲမ့ၢ်တုၤန့ၣ် ကဝၣ်နုၥ်ဝဲ ဧါသၢၣ်. အခဲအံၤအ(သုးကရူၢ်)ဟဲတတုၤဒံးဘၣ်.အမ့ၢ်ဟဲထီၣ်လၢအံၤန့ၣ်မၤတဘၣ်ဘၣ်,ဟဲထီၣ်ဝဲန့ၣ်.တၢ်သ့ၣ်တဖၣ်အံၤန့ၣ်တမ့ၢ်လၢဖိးသဲစးဘၣ်.ထံဂုၤကီၢ်ဂၤတတူၢ်လိၥ်ဘၣ်.တၢ်ဘျၢသဲစးမ့ၢ်အိၣ်န့ၣ်တၢ်သ့ၣ်တဖၣ်အံၤတအိၣ်ဘၣ်လၢၤဘၣ်.တမ့ၢ်လၢပှၤတူၢ်လိၥ်ဝဲနီတဒူၣ်စ့ၢ်ကီးဘၣ်.”အဂ့ၢ်စံးဝဲဒၣ်န့ၣ်လီၤ.
ခ့ၣ်အဲးစံၣ်-ကညီတၢ်ကစီၣ်သံကွၢ် DKBA ဘၣ်ဃး အတၢ်ဘၣ်ယိၣ်အိၣ်လၢ သုးကရူၢ်ကဝၣ်နုၥ်ဒီးမၤဟးဂီၤအဝဲသ့ၣ်တၢ်လီၢ်တၢ်ကျဲအိၣ်စံၢ်ဧါအဖီခိၣ်န့ၣ် DKBAသုးခိၣ်ဒိၣ်စိ စီၤသရံထူစံးဝဲလၢ “လၢညါတရူးတအိၣ်ဘၣ်သနၥ်က့ပအိၣ်သ့လီၤ.ပအိၣ်ဒီးပဒူဖိသဝီဖိပကမျၢၢ်,ပမၤအီၣ်ကျိးမၤအီၣ်သဝီပအိၣ်သ့လီၤ.ဘၣ်နီမံၤဘၣ်.အရ့ဒိၣ်လၢပကမျၢၢ်ကမၤအီၣ်ဘၣ်ဘုခ့,တီၣ်ဘၣ်ဘုခ့ မ့ခုၣ်မ့ကဘးန့ၣ်ဘၣ်လီၤ.တၢ်အရ့ဒိၣ်တၢ်အဝဲန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ပှၤလၢဖှံလီၤ(ကၠါဖၠၣ်)တၢ်ဖံးတၢ်မၤအချံအသၣ်
အပူၤကွံၥ် ၂၀၀၈ အဆၢကတီၢ်န့ၣ် စွ့ၣ်ကိၣ်ကိၤအံၤ မ့ၢ်ဝဲဒၣ် သဝီမုၢ်ဆ့ၣ်မုၢ်ဂီၤဖိတဖျၢၣ်လၢအအိၣ်သူၣ်လီၤသးလၢရၤမတံဝ့ၢ်ကလံၤစိး သူမွဲကျိကၢၢ်နံၤန့ၣ်လီၤ. ဘၣ်ဆၣ်သနၥ်က့ ဖဲ၂၀၁၀ BGF အိၣ်ထီၣ်ဝံၤအလီၢ်ခံဒီး NLDပဒိၣ်ထီၣ်ပၢတၢ်အစိၤဖဲ၂၀၁၆-၂၀၁၇ နံၣ်အတီၢ်ပူၤန့ၣ် သုးခိၣ်ခၠံၣ်သူၣ်ထံၣ်လိၥ်သးဒီး တရူးထံဖိကီၢ်ဖိ ရှံၤကၠံၤကၠါဝံၤအလီၢ်ခံ အဝဲသ့ၣ်စးထီၣ်ဖှံလီၤဝဲဒၣ်(ကၠါဖၠၣ်)တၢ်လံၣ်အီၣ်လီအီၣ်ကျိၣ်စ့လၢ(Online)တၢ်ဖံးတၢ်မၤအချံအသၣ်အံၤန့ၣ်လီၤ. ဒီးတဆီဘၣ်တဆီ စွ့ၣ်ကိၣ်ကိၤဃုၥ်ဒီး သူမွဲကျိကၢၢ်နံၤရၤမတံဝ့ၢ်ကလံၤထံးတၢ်လီၢ်သ့ၣ်တဖၣ်အံၤအမံၤဟူထီၣ်သါလီၤဝဲဒၣ်လၢဟီၣ်ခိၣ်ဒီဖျၢၣ်အမဲၥ်ညါလိၤခီဖျိတၢ်မၢဆူၣ်မၢဆိးပှၤမၤတၢ်ဖိ,တၢ်မၤကၤပှၤကညီ,တၢ်ကလုၥ်ကလိၥ်,တၢ်မူၤတၢ်ဘှီးလီၢ်,တၢ်တၤကျိၣ်တၤစ့အိၣ်တၢ်လီၢ်န့ၣ်လီၤ.
ဖဲရၤမတံဟီၣ်ကဝီၤသူမွဲကျိကၢၢ်နံၤန့ၣ် တၢ်လံၣ်အီၣ်လီအီၣ်ကျိၣ်စ့လၢ Onlineကၠါဖၠၣ် တၢ်ဖံးတၢ်မၤလီၢ်လၢအအိၣ်ဆီလီၤသးသ့ၣ်တဖၣ်န့ၣ်မ့ၢ်ဝဲ စွ့ၣ်ကိၣ်ကိၤဝ့ၢ်သီတၢ်တိၤကျဲၤ, ,ယၣ်ထဲၣ်ဝ့ၢ်သီတၢ်တိၤကျဲၤ,ဒီၤမ့ၤကရၢၢ်တၢ်တိၤကျဲၤ(Dongmei Park),Yulong Bay Park, Apollo Park, Jinxin Park, KK Park, ဒီးရမၤတံဝ့ၢ်သီ တၢ်တိၤကျဲၤသ့ၣ်တဖၣ်အိၣ်ဝဲဒီး BGF ဒီးတရူးလၢမၤကမၣ်ကွီၢ်မ့ၣ်သဲစးသ့ၣ်တဖၣ်ပၥ်ဖှိၣ်မၤသကိးဝဲတၢ်အဂ့ၢ် သ့ၣ်ညါဘၣ်န့ၣ်လီၤ.
ဖဲအပူၤကွံၥ် ၂၀၂၂နံၣ်အဆၢကတီၢ်န့ၣ် ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ကၠါဖၠၣ်တၢ်ဖံးတၢ်မၤအခိၣ်ရှံၤကၠံၤကၠါအံၤန့ၣ် ဘၣ်တၢ်ဖီၣ်န့ၢ်အီၤဖဲကီၢ်ကၠီၣ်တဲၣ်အပူၤဒီး ဒ်သိး ရှံကၠံၤကၠါကဟးထီၣ်ဘၣ်လၢတၢ်ဒုးဃၥ်ပူၤအဂီၢ် ဖဲအပူၤကွံၥ် ၂၀၂၄နံၣ် လါအီးကူးအဆၢကီၢ် သုးခိၣ်ခၠံၣ်သူၣ် မၤဝဲတၢ်ထုကဖၣ်မူးတၢ်ရဲၣ်တၢ်ကျဲၤလၢအဂီၢ်လီၤဘီလီၤမုၢ်န့ၣ်လီၤ. ဘၣ်ဆၣ် ဖဲတနံၣ်အံၤ ၂၀၂၅နံၣ် လါအီးကထိဘၢၣ် အတီၢ်ပူၤအံၤန့ၣ် ဒ်ကီၢ်ကၠီၣ်တဲၣ် တၢ်ဆှၢက့ၤပှၤထံဂုၤကီၢ်ဂၤဖိမၤကမၣ်ကွီၢ်မ့ၣ် သဲစးတၢ်ဘျၢ ၁၉ ဒီး၂၁အိၣ်ဝဲအသိး ကဆှၢက့ၤဝဲဒၣ် ရှံၤကၠံၤကၠါအံၤဆူတရူးအစုပူၤအဂ့ၢ် ကီၢ်ကၠီၣ်တဲၣ် ဂံၢ်ခီၣ်ထံး သဲစးတၢ်ဘျၢကွီၢ်ဘျီၣ်ဆၢတဲၥ်လီၤဝဲအိၣ်န့ၣ်လီၤ.
ဆူညါကၠါဖၠၣ်တၢ်မၤကလဲၤသးဒ်လဲၣ်.
သုးကရူၢ်ဒီး BGF ပၥ်ဖှိၣ်မၤဟးဂီၤကွံၥ်ဝဲဒၣ် KK park တၢ်လံၣ်အီၣ်လီအီၣ်ကျိၣ်စ့လၢ (Online) အလီၢ်ဘၣ်ဆၣ် ပှၤမၤတၢ်ဖိဒီးပှၤဘျၢလီၤကျိၣ်စ့သ့ၣ်တဖၣ်န့ၣ် ဘၣ်တၢ်သုးကွံၥ်အလီၢ်အကျဲလၢတၢ်လီၢ်အဂၤအိၣ်ဝဲအဖီခိၣ် တၢ်မ့ၢ်စိၥ်ဆှၢဝဲဒၣ် ကၠါဖၠၣ်ပှၤမၤတၢ်ဖိသ့ၣ်တဖၣ်န့ၣ် ကဟံးန့ၢ်ဝဲအရ့ဒ် KNU သဲစးတၢ်ဘျၢအိၣ်ဝဲအသိးအဂ့ၢ် ခ့ၣ်အဲၣ်ယူၣ်-ဒူပျၥ်ယၥ်ကီၣ်ရ့ၣ် ကြုၢ်တုကီၢ်ဆၣ် ထုးထီၣ်ဘိးဘၣ်ရၤလီၤဝဲလံၥ်တဘ့ၣ်ဖဲအပူၤကွံၥ် လါနိၣ်ဝ့ဘၢၣ်(၅)သီအနံၤအိၣ်ဝဲဒၣ်န့ၣ်လီၤ.
သုးကီၣ်ကးအံၤ မ့ၢ်မၤဟးဂီၤပၠးဝဲဒၣ် KK park ဘၣ်ဆၣ် မ့မ့ၢ် စွ့ၣ်ကိၣ်ကိၤဟီၣ်ကဝီၤပူၤ န့ၣ်တိဘူးထိးဘူးဝဲတဘူၣ် ဘၣ်အသိးလဲၤမၤဘူးဝဲဒၣ်လဲၥ်တဘူၣ်ဘၣ်အဃိန့ၣ် ကညီကီၢ်စဲၣ်ထံဆၢကီၢ်ဆၢကၠါဖၠၣ်တၢ်ဖံးတၢ်မၤအထူၣ်မုၢ်ကျၢၢ်အံၤတမ့ၢ်လၢကလီၤပအၣ်ကွံၥ်ညီညီဘၣ်န့ၣ်ပစံးသ့ဝဲဒၣ်န့ၣ်လီၤ.
