လါနိၣ်ဝ့ဘၢၣ် ၂၄ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤအပူၤ လါအီးကထိဘၢၣ် ၁ သီတုၤ ၃၁ သီတလါအတီၢ်ပူၤ ကျိဖးဒိၣ်ဒီး ကဘီယူၤအဃိ လီၢ်ကဝီၤကမျၢၢ်သံ ၈ ဂၤ ဒီး ဘၣ်ဒိဘၣ်ထံး ၂၇ ဂၤအဂ့ၢ်န့ၣ် သ့ၣ်ညါဘၣ်ဒ်တလါတဘျီ ကီၢ်ရ့ၣ်တၢ်မၤနီၣ်စရီ ပူၤအသိးန့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအသိးန့ၣ် တလါအတီၢ်ပူၤ ပယီၤသုးကဘီယူၤလဲၤခးလီၤတၢ် ၂ ဘျီ, သုးကလၢၤခးလီၤကျိဖးဒိၣ် ၉ ဘျီ ဒီး သူဝဲဒြိဟးတ့ၢ်လီၤဝဲမ့ၣ်ပိၢ် ၁ ဘျီ အဃိ ကမျၢၢ်သံဘၣ်ဒိဘၣ်ထံးဘၣ်ဟဲကဲထီၣ်ဝဲဒ်အံၤန့ၣ်လီၤ.
လီၢ်ကဝီၤကမျၢၢ်သံ ၈ ဂၤအကျါန့ၣ်ပၣ်ဃုၥ်ဝဲဖိသၣ် ၁၂ နံၣ်ဆူဖီလၥ် ၆ ဂၤဒီး ပှၤဘၣ်မူဘၣ်ထံးတဖၣ်အကျါစ့ၢ်ကီး ဖိသၣ်လၢ အသးနံၣ်တပှဲၤဒံးဘၣ်ပၣ်ဃုၥ်ပၣ်ဂီၢ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ခီဖျိလၢကျိဖးဒိၣ်ဒီးကဘီယူၤအမ့ၣ်ပိၢ်အံၤအဃိ ကမျၢၢ်ဟံၣ်တၢ်သူၣ်ထီၣ်ဟးဂီၤလီၤပှီၢ်ဝဲ ၅ ဖျၢၣ်ဒီး ဘၣ်ဒိဘၣ်ထံးဝဲ ၁၀ ဖျၢၣ်အသိး ကျီၢ်ဃုၥ်ဒီးဆၣ်ဖိကီၢ်ဖိလၢအဂၤတဖၣ်စ့ၢ်ကီးသံဘၣ်ဒိဘၣ်ထံးတစှၤန့ၢ်ဝဲ ၁၁ ဒု အဂ့ၢ်န့ၣ် လံၥ်တၢ်မၤနီၣ်စရီအပူၤ ပၥ်ဖျါဝဲန့ၣ်လီၤ.
လၢန့ၣ်အမဲၥ်ညါလါအီးကထိဘၢၣ်တလါအတီၢ်ပူၤန့ၣ် ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) အဘၢၣ်စၢၤ ဒုးယၤတၢ် သဘံၣ်သဘုၣ်ကဲထီၣ်ဝဲ ၃၂ ဘျီအဃိ ပယီၤသုးတကပၤသံ ၁၂ ဂၤ ဒီး ဘၣ်ဒိဘၣ်ထံးဝဲ ၂၃ ဂၤအမဲၥ်ညါ သုးသိလ့ၣ်ဟးဂီၤဝဲ ၂ ခိၣ် န့ၣ်လီၤ.
လၢဒုးယၤတၢ်သဘံၣ်သဘုၣ်ကဲထီၣ်ထီၣ် ၃၂ ဘျီအပူၤအံၤအကျါ (KNLA) သုးရ့ၣ်-၁ ဒီး ဘူးဒးကညီသုးမုၢ်ဒိၣ်(KNLA)အဘၢၣ်စၢၤ ဒုးယၤတၢ်သဘံၣ်သဘုၣ်ကဲထီၣ်ဝဲ(၉)ဘျီအဂ့ၢ်န့ၣ် လံၥ်တၢ်ပၥ်ဖျါ အပူၤပၥ်ဖျါဝဲ န့ၣ်လီၤ.
ဒူသထူၣ်ကီၢ်ရ့ၣ်ပူၤ ခဲအံၤဘူးထီၣ်စ့ၢ်ကီးလၢတၢ်ဃုထၢလံအဃိ ပယီၤသုးမၤအါထီၣ်သုးဂံၢ်ဘါဟူးဂဲၤဟဲထီၣ်ဝဲလၢ ဝ့ၢ်ခိၣ်ဝ့ၢ်ဃၢၤ ဒူသဝီတဖၣ်အပူၤအသိး တၢ်ဒုးစ့ၢ်ကီးကဲထီၣ်လၢခံခီခံကပၤအဘၢၣ်စၢၤအိၣ်ဝဲတလီၢ်လီၢ်ဒီးပယီၤသုးတကပၤခးလီၤ ကျိဖးဒိၣ် ဟဲအါထီၣ်ဝဲအဂ့ၢ်န့ၣ် သုးက့ပှၤဘၣ်မူဘၣ်ဒါစံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်န့ၣ်လီၤ.
