လါနိၣ်ဝ့ဘၢၣ် ၂၅ သီ, ၂၀၂၅ နံၣ်, ခ့ၣ်အဲးစံၣ်
တၢ်ဘၣ်ဘျုးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်(DKBA)သုးဝဲၤလီၢ်ခိၣ်သ့ၣ်အစုတီၤဖီလၥ်လၢအမ့ၢ်သုးရ့ၣ်(၉၀၅)အသုးရ့ၣ်ခိၣ်ခံလၢအမ့ၢ်သုးခိၣ်ဒိၣ်ဖိ စီၤကၠီၣ်ကိၤမ့(ကိး)သခွါသံ အံၤခီဖျိလၢအမၤကမၣ်သုးတၢ်သိၣ်တၢ်သီတၢ်ဘျၢအဃိတၢ် ထုးထီၣ်လံၥ်တၢ်ကလုၢ်လၢတၢ်ကဖီၣ်အီၤအဂ့ၢ်(DKBA)သုးဝဲၤလီၢ်ခိၣ်သ့ၣ်ထုးထီၣ်ဝဲလံၥ်(Warrant)ဖဲမဟါလါနိၣ်ဝ့ဘၢၣ်(၂၄)သီအနံၤန့ၣ်လီၤ.
သုးခိၣ်ဒိၣ်ဖိ စီၤကၠီၣ်ကိၤမ့(ကိး)သခွါသံ အံၤဒ်တၢ်ကရၢကရိအပူၤတၢ်ပၥ်လီၤဃၥ်ဝဲသုးတၢ်သိၣ်တၢ်သီအိၣ်ဝဲအသိးန့ၣ် မၤကမၣ်ဝဲဒၣ်အဖီခိၣ်ကဘၣ်ဟံးန့ၢ်ဝဲမူဒါဘၣ်ဆၣ်တကီၢ်ခါခဲအံၤမ့ၢ်လၢအဃ့ၢ်ပလဲၥ်အသးအဃိဘၣ်တၢ်ထုးထီၣ်လံၥ်တၢ်ကလုၢ်လၢတၢ်ကဖီၣ်အီၤအဂ့ၢ်(DKBA)အပှၤကတိၤတၢ်ပၢစံးဝဲဒ်အံၤန့ၣ်လီၤ.
“ပ(DKBA)တၢ်ကရၢကရိဒီးပသုးမုၢ်ဒိၣ်သဲစးတၢ်ဘျၢအဖီခိၣ်အဝဲခီကပၥ်ဝဲအဃိပကဘၣ်ဟံးထီၣ်အရ့ဒီးဖီၣ်အီၤန့ၣ်လီၤ. ဘၣ်မနုၤလဲၣ်န့ၣ်အတဃ့ထီၣ်တၢ်ကလုၢ်လၢတၢ်ဖီခိၣ်ဘၣ်,အတန့ၢ်တၢ်ကလုၢ်လၢတၢ်ဖီခိၣ်ဘၣ်ဒီးမၤဝဲတထံၣ်. မ့ၢ်ဝံၤအတန့ၢ်တၢ်ကလုၢ်ဘၣ်ဒီးနဲၣ်လီၤကဒါက့ၤဝဲန့ၣ်လီၤ. တၢ်ကမၣ်န့ၣ်အိၣ်ဝဲခံထံၣ်န့ၣ်လီၤ. တၢ်ကဲထီၣ်သးအံၤအဖီ ခိၣ်အဝဲကဘၣ်ဟံးမူဒါန့ၣ်လီၤ. အခဲအံၤအဝဲဃ့ၢ်ပလဲၥ်သးအဃိပထုးထီၣ်လံၥ်(Warrant)လၢတၢ်ကဖီၣ်အီၤမီၤနီၤ.” အဂ့ၢ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤသုးခိၣ်ဒိၣ်ဖိစီၤကၠီၣ်ကိၤမ့(ကိး)သခွါသံအံၤမ့ၢ်အဃ့ၢ်ပလဲၥ်အသးလၢတၢ်လီၢ်ဖဲလဲၣ်ခီန့ၣ်တၢ်တသ့ၣ်ညါဘၣ်ဝဲဒံးဘၣ်ဆၣ်သနါက့ဒ်ခိၣ်နၢ်ပှၤဘၣ်မူဘၣ်ဒါလၢတၢ်ဖီခိၣ်သ့ၣ်တဖၣ်တၢ်နဲၣ်လီၤအသိးတၢ်လူၤဃုဖီၣ်ဝဲလံဒီးတၢ်ဖီၣ်မ့ၢ်ချုးခီန့ၣ်တၢ်ကဆှၢထီၣ်ဆူလီၢ်ခၢၣ်သးဒီးမ့ၢ်တၢ်ကထုးထီၣ်တထုးထီၣ်အီၤလၢမူဒါလီၢ်လၤအပူၤန့ၣ်ခိၣ်နၢ်တၢ်လၢတၢ်ဖီၣ်ခိၣ်ကဆၢတဲၥ်ဝဲအဂ့ၢ်စံးအါထီၣ်ဝဲန့ၣ်လီၤ.
ဒ်န့ၣ်အသိးပှၤတဂၤလၢမ့ၢ်ထံၣ်ထွဲဝဲသုးခိၣ်ဒိၣ်ဖိ(သခွါသံ)တဂၤအံၤကဖီၣ်န့ၢ်ဘၣ်ဝဲဒီးဆှၢထီၣ်ဘၣ်အီၤဆူ(DKBA)သုးဝဲၤလီၢ်ခိၣ်သ့ၣ်အအိၣ်အဂ့ၢ်လၢလံၥ်တၢ်ပၥ်ဖျါအပူၤပၥ်ဖျါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါဘၣ်ထွဲဒီးသုးခိၣ်ဒိၣ်ဖိ(သခွါသံ)တၢ်ဂ့ၢ်ကဲထီၣ်အသးအံၤန့ၣ်လၢကညီဖီၣ်စုကဝဲၤခံခီခံကပၤအဘၢၣ်စၢၤတၢ်သူၣ်မံသးမုၥ်ကအိၣ်အဂီၢ်ဆၢမုၢ်လၢ်လၢခိၣ်နၢ်သ့ၣ်တဖၣ်ကထံၣ်လိၥ်တၢၣ်ပီၣ်သကိးလိၥ်သးဒီးကဘှါၡဲဝဲလၢအဂ့ၤကတၢၢ်အဂ့ၢ်စံးစ့ၢ်ကီးဝဲဒၣ်န့ၣ်လီၤ.
ဒ်(DKBA)အလံၥ်(ဖီၣ်တၢ်-Warrant )တၢ်ပၥ်ဖျါပူၤအသိးန့ၣ်တၢ်ဂ့ၢ်အခီၣ်ထံးခီၣ်ဘိလၢကဲထီၣ်အသးဒီးသုးခိၣ်ဒိၣ်ဖိ(သခွါသံ)ဒ်လဲၣ်ခီန့ၣ်တၢ်ပၥ်ဖျါထီၣ်အီၤတအိၣ်ဘၣ်ဘၣ်ဆၣ်ဖဲအပူၤကွံၥ်လါနိၣ်ဝ့ဘၢၣ်(၂၁)သီအနံၤန့ၣ်ပယီၤသုးကရူၢ်ဒီး(KNLA)အဘၢၣ်စၢၤတၢ်ဒုးဆူၣ်ဝဲဖဲရၤမတံဟီၣ်ကဝီၤ(မ့လဲၣ်ပၤ)သဝီပူၤအဆၢကတီၢ်(DKBA)အပှၤလၢအိၣ်ခိးဟံးန့ၢ်တၢ်ဘံၣ်တၢ်ဘၢၣ်ဖဲ(ကၠါဖၠၣ်)ကရၢၢ်အပူၤဖဲန့ၣ်တဖၣ်မ့ၢ်လၢခးပိၢ်ထီၣ်ဝဲကျိအဃိ(KNLA)နုၥ်လီၤဖီၣ်ဝဲ(DKBA)အပှၤအဂၤ(၂၀)ဘျဲၣ်ကဲထီၣ်ဝဲအဂ့ၢ်တၢ်ပၢၢ်ဆၢသုးပၥ်ဖှိၣ်တကပၤစံးဝဲအသိးသ့ၣ်ညါဘၣ်န့ၣ်လီၤ.
