လါနိၣ်ဝ့ဘၢၣ် ၂၄ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ စွ့ၤကိၣ်ကိၤဟီၣ်ကဝီၤအပူၤ ခီဖၠူထၢၣ်ဒီးလီတဲစိ(ဖိ)လၢတၢ်မၤန့ၢ်ဝဲဖဲအီၤလါ(ကၠါဖၠၣ်)တၢ်ဖံးတၢ်မၤလီၢ် အံၤတဖၣ် ကညီသုးခိးကီၢ်ဆၢ(BGF)ဒီးပယီၤသုးတဖၣ်ပၥ်ဖှိၣ်ထီၣ်သးမၤဟးဂီၤကွံၥ်ဝဲဒၣ်န့ၣ်လီၤ.
ဒ် BGF ဒီး ကၠီၣ်တဲၣ်တၢ်ကစီၣ်သန့တနီၤပၥ်ဖျါဝဲအသိးန့ၣ် စွ့ၤကိၣ်ကိၤဟီၣ်ကဝီၤအပူၤလၢတၢ်ကမၤဆှဲကွံၥ်(ကၠါဖၠၣ်) တၢ်ဖံးတၢ်မၤအဂီၢ် စးထီၣ်ဖဲတလါအံၤလါနိၣ်ဝ့ဘၢၣ် ၁၈ သီအနံၤန့ၣ် သုးမီၤစိရိၤတီခိၣ်ရိၣ်မဲစးထီၣ်ဝဲတၢ်ဖံးတၢ်မၤသ့ၣ်တဖၣ်အံၤန့ၣ်လီၤ.
ဖဲန့ၣ်လၢ(၅)သီအတီၢ်ပူၤ BGF ဒီးပယီၤသုးဖီၣ်န့ၢ်ဝဲ(ကၠါဖၠၣ်)ပှၤမၤတၢ်ဖိတစှၤန့ၢ်အဂၤ ၁၀၀၀ ဒီး တကးဒံးဘၣ် တၢ်မၤန့ၢ်ဃုၥ်စ့ၢ်ကီးဝဲ ခီၣ်ဖၠူထၢၣ်အဖျၢၣ် ၃၀၀၀ ခိၣ်ဃၢၤ, လီတဲစိ(ဖိ)အဖျၢၣ် ၂၀,၀၀၀ ဘျဲၣ်အဂ့ၢ်န့ၣ် သုးမီၤစိရိၤစုတီၤဖီလၥ်တၢ်ကစီၣ်သန့တဖၣ်ပၥ်ဖျါဝဲ န့ၣ်လီၤ.
လၢတၢ်န့ၣ်အဃိဖဲလါနိၣ်ဝ့ဘၢၣ် ၂၂ သီ မုၢ်ထူၣ်အဆၢကတီၢ် ခီဖၠူထၢၣ်,လီတဲစိတၢ်ဖိတၢ်လံၤလၢတၢ်မၤန့ၢ်ဝဲတဖၣ်ဘၣ်တၢ်မၤဟးဂီၤ ဂံၥ်ဘျဲးကွံၥ်အီၤလၢစဲးဖီကဟၣ်အံၤဖဲစွ့ၤကိၣ်ကိၤနံၣ်ထီၣ်သီပျီပူၤအံၤန့ၣ်လီၤ.
ဒ်န့ၣ်အသိးခီၣ်ဖၠူထၢၣ်,လီတဲစိအမဲၥ်ညါ စးထီၣ်ဖဲလါနိၣ်ဝ့ဘၢၣ် ၁၈ သီတုၤ ၂၃ သီ လၢဃုသီအတီၢ်ပူၤ ပယီၤသုးပၥ်ဖှိၣ်ဖီၣ်ချုးဝဲ (ကၠါဖၠၣ်)ပှၤမၤတၢ်ဖိ ၁၅၄၀ ဂၤဒီး ပှၤလၢတၢ်ဖီၣ်ချုးဝဲတဖၣ်အံၤကက့ၤဘၣ်ဆူအကစၢ်ထံကီၢ်အဂီၢ်တၢ်ကဆဲးတၢၣ်ပီၣ် တဲသကိး ဝဲအဂ့ၢ်န့ၣ် ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲန့ၣ်လီၤ.
တကးဒံးဘၣ်လၢတၢ်ကမၤဆှဲကွံၥ်(ကၠါဖၠၣ်)တၢ်ဖံးတၢ်မၤအံၤအဂီၢ်တၢ်ပၥ်ပနီၣ်ဝဲမုၢ်နံၤမုၢ်သီတအိၣ်ဝဲဘၣ်အသိး ပှၤလၢအမၤ(ကၠါဖၠၣ်)တၢ် ဖံးတၢ်မၤအံၤတဖၣ်လၢတၢ်အံးထွဲကွၢ်ထွဲဒီးတၢ်ကဆှၢက့ၤဆူအထံအကီၢ်ဒၣ်ဝဲအဂီၢ်န့ၣ် သုးမီၤစိရိၤတကပၤကဟံထီၣ်ဖီၣ်ထီၣ် မၤဝဲ အဂ့ၢ်န့ၣ် BGF ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် နဲၤမီၤစီၤ စံးဘၣ်ဝဲတၢ်ကစီၣ်သန့သ့ၣ်တဖၣ်န့ၣ်လီၤ.
ကီၢ်အမဲရံၣ်ကၤဘိးဘၣ်ရၤလီၤလၢကမၤဆှဲကွံၥ်ကၠါဖၠၣ်တၢ်ဖံးတၢ်မၤဖဲကီၢ်ဆၢအိၣ်ထီၣ်လီၢ်ခံန့ၣ် BGF ဒီးသုးမီၤစိရိၤအံၤ မၤပိၢ်ဖးထီၣ်ဝဲ မၠၣ်ဝတံၣ်ကလံၤထံး(KK Park)ကရၢၢ်ပူၤတၢ်သူၣ်ထီၣ်အံၤဒံးန့ၣ်လီၤ.ဘၣ်ဆၣ် လၢအတၢ်မၤပိၢ်ဖးထီၣ် (ကၠါဖၠၣ်) တၢ်ဖံးတၢ်မၤလီၢ်ဘျီ ဝဲအံၤစ့ၢ်ကီး မ့ၢ်တၢ်ဂဲၤဒိတခါလီၤအဂ့ၢ်န့ၣ် တၢ်ပဲၥ်ထံနီၤဖးဝဲန့ၣ်လီၤ.
