လါဒံၣ်စ့ဘၢၣ် ၄ သီ, ၂၀၂၅ နံၣ်, ခ့ၣ်အဲးစံၣ်
ကညီကီၢ်စဲၣ် ကီးတရံး ဒီး ကြုၢ်တုဝ့ၢ် လၢတၢ်ကဟ့ၣ်တၢ်ဖးအဂီၢ် ခီဖျိပှၤကမျၢၢ်ဟဲသမံသမိးတၢ်ဖးစရီလၢတၢ်ပၥ်ပနီၣ်လီၢ် တအိၣ်ဘၣ်အဃိ သုးမီၤစိရိၤစုတီၤဖီလၥ်အပှၤတဖၣ်ဟးသမံသမိးဝဲတၢ်ဖးစရီဒီးတဲဘၣ်ကမျၢၢ်လၢကလဲၤဟ့ၣ်တၢ်ဖးအဂ့ၢ်န့ၣ် ကမျၢၢ်လၢအိၣ်ဝ့ၢ်ပူၤတဖၣ် စံးဝဲန့ၣ်လီၤ.
သုးမီၤစိရိၤအံၤလၢကဟဲလါဒံၣ်စ့ဘၢၣ် ၂၈ သီ တၢ်ဃုထၢအဂီၢ် ကမျၢၢ်လၢအန့ၢ်ဟ့ၣ်တၢ်ဖးလၢအိၣ်ကီးတရံးဒီးကြုၢ်တုဟီၣ်ကဝီၤ အပူၤတဖၣ် စးထီၣ်ဖဲအပူၤကွံၥ်လါနိၣ်ဝ့ဘၢၣ်လၢၥ်အံၤန့ၣ် ကဝီၤဒ့ပူၤပၢြပးရူဒုးသ့ၣ်ညါလီၤဝဲဒီး ကွဲမုၥ်ကမျၢၢ်လၢကဟဲဒိး သမံသမိးသးန့ၣ်လီၤ.
ဘၣ်ဆၣ်ဟီၣ်ကဝီၤဖဲန့ၣ်အပူၤ တၢ်ဖးစရီပၣ်/တပၣ်ခီဖျိပှၤသးစၢၢ်ဒီးလဲၤကွၢ်ဝဲတအိၣ်ဘၣ်အဃိ သးပှၢ်အနီၢ်ကစၢ်ဃုၥ်ဒီးပယီၤသုး, သွံၣ်ဃူဖှိးပၣ်တံၣ်,ကမျၢၢ်အသုးတဖၣ် ဟးသမံသမိးဝဲတၢ်ဖးစရီလၢဝ့ၢ်ပူၤကဝီၤဒ့ ပှၤဟံၣ်ပှၤဃီဒီး မၢ်လီၤဝဲကမျၢၢ်လၢကဟဲထၢနုၥ် တၢ်ဖးလၢတၢ်ဖးအလီၢ်အဂ့ၢ်န့ၣ် ကီးတရံးကမျၢၢ်ပိၥ်မုၣ်တဂၤ စံးဝဲန့ၣ်လီၤ.
အဝဲစံးဝဲလၢ“ပှၤလဲၤကွၢ်တၢ်ဖးစရီတအိၣ်ဘၣ်အဃိ ပှၤလၢအအိၣ်လၢဟံၣ်တဖၣ်န့ၣ်ပှၤထၢနုၥ်လီၤအဝဲသ့ၣ်လၢတၢ်ဖးစရီပူၤ. သးပှၢ်, သွံၣ်ဃူဖှိး(ကြံ့ခိုင်ရေး),ဘၠူၣ်စီထံဒီးပယီၤသုးဟဲလီၤလၢကဝီၤဒ့ပူၤဒ်သိးကမျၢၢ်အသိးလီၤ.တဲဝဲလၢဖဲတၢ်ဃုထၢအနံၤန့ၣ် ကဘၣ်ဟ့ၣ်စိတၢ်ဖး,မ့တဟ့ၣ်ဘၣ်န့ၣ်ကဘၣ်ဟဲဟ့ၣ်လၢတၢ်ဖးလီၢ်လီၤ.တၢ်ဒုးကဲထီၣ်ကိးမုၢ်နံၤဒဲးနါက့ ကမၢပှၤဟ့ၣ်ဆူၣ်တၢ်ဖး လီၤ ” အဂ့ၢ်န့ၣ် စံးဝဲန့ၣ်လီၤ.
သုးမီၤစိရိၤအပှၤဟးသမံသမိးတၢ်ဖးစရီလၢပှၤဟံၣ်အံၤအခိၣ်သ့ၣ်န့ၣ်ထၢဝဲပှၤသးနံၣ်ပှဲၤ(၁၈)နံၣ်သ့ၣ်တဖၣ်လီၤဒီး ဒ်န့ၣ်အသိး ကြုၢ်တုဝ့ၢ်ပူၤစ့ၢ်ကီး ခီဖျိပှၤတလဲၤကွၢ်တၢ်ဖးစရီဘၣ်အဃိ ကရူၢ်လၢအဟးသမံသမိးတၢ်ဖးစရီလၢပှၤဟံၣ်သ့ၣ်တဖၣ်အံၤ အ့ဆိး အ့န့ပၥ်ဒ့ၣ်ပၥ်ကမၣ်ဝဲတၢ်အိၣ်အဂ့ၢ်န့ၣ် ကြုၢ်တုဝ့ၢ်ပူၤကမျၢၢ်တဂၤစ့ၢ်ကီး စံးဝဲန့ၣ်လီၤ.
“အဝဲသ့ၣ်ဟးလၢအကရူၢ် နီၤဖးလီၤအကရူၢ်ဝံၤနုၥ်လီၤဝဲလၢကဝီၤဒ့တဖၣ်အပူၤလီၤ. ဟံၣ်ပူၤပှၤကစၢ်မ့တအိၣ်ဘၣ်နါက့ ဟံကွၢ်ဝဲပှၤဖးဖီမုၢ်စရီဒီး ကယဲၢ်မ့ၢ်ပှၤလၢအအိၣ်(၁၈)နံၣ်ဆူဖီခိၣ်န့ၣ် ထၢနုၥ်လီၤဝဲလၢစရီပူၤခဲလၢၥ်လီၤ.ဟံၣ်လၢပှၤဖိသၣ်လဲၤ မၤတၢ်မၤလၢယိၤကီၢ်တဖၣ်န့ၣ်ထၢနုၥ်လီၤဝဲလၢစရီပူၤခဲလၢၥ်လီၤ.နတလဲၤကွၢ်တၢ်ဖးစရီဘၣ်အဃိအဝဲသ့ၣ်အ့န့နၤ,ပၥ်ဒ့ၣ်ပၥ်ကမၣ်နၤဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိး လၢကျးတၢ်ဆါတၢ်ပှ့ၤအလီၢ်ဒီးကျဲမုၢ်တၢ်လီၢ်လၢပှၤဟးထီၣ်က့ၤလီၤအါအလီၢ်သ့ၣ်တဖၣ်န့ၣ်စ့ၢ်ကီး သုးမီၤစိရိၤစုတီၤ ဖီလၥ်ပှၤမၤတၢ်ဖိဘၣ်ထွဲတဖၣ်,သွံၣ်ဃူဖှိးပၣ်တံၣ်ကရၢဖိဒီးပှၤလၢအဟ့ၣ်ဂံၢ်ဟ့ၣ်ဘါသုးမီၤစိရိၤတဖၣ် ဟးနီၤလီၤဝဲလံၥ်က့ဖိလၢ တၢ်ကဟ့ၣ်တၢ်ဖးအဂီၢ်အဂ့ၢ်န့ၣ် ပှၤလၢအထံၣ်တၢ်ဒီးအမဲၥ်တဖၣ်စံးဝဲန့ၣ်လီၤ.
ဒ်တၢ်ပၢၢ်ဆၢကရူၢ်ကရၢဒီးဟီၣ်ကဝီၤပှၤဟ့ၣ်တၢ်ကစီၣ်ဖိစံးဝဲအသိးန့ၣ် ကီးတရံးဒီးကြုၢ်တုဝ့ၢ်ကဝီၤဒ့ပူၤတဖၣ် သုးမီၤစရိၤဒိၣ်စိဝဲ မ့န့ၢ်ဘၣ်ဆၣ် မ့မ့ၢ်ဒူသဝီ,ဝ့ၢ်တဖျၢၣ်ဒီးတဖျၢၣ်အဘၢၣ်စၢၤကျဲသ့ၣ်တဖၣ်န့ၣ်ဒိၣ်စိဝဲတန့ၢ်ဒံးဘၣ်ဒီး တကးဒံးဘၣ်တကီၢ်ခါခဲအံၤ လၢကီးတရံးကလံၤထံးဒီးကလံၤစိးဒူသဝီအပူၤတဖၣ်တုၤလၢခဲအံၤတၢ်ဒုးဆဲးကဲထီၣ်ဒံးဝဲလၢပယီၤသုးဒီး(KNLA)သုးပၥ်ဖှိၣ်အဘၢၣ်စၢၤ ဒံးန့ၣ်လီၤ.
