လါဒံၣ်စ့ဘၢၣ် ၄ သီ, ၂၀၂၅ နံၣ်, ခ့ၣ်အဲးစံၣ်
လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဖိဖြးကီၢ်ဆၣ် ဟွ့နးနးဟီၣ်ကဝီၤအပူၤ ဖဲတနံၤအံၤလါဒံၣ်စ့ဘၢၣ် ၄ သီအံၤ ကၠီၣ်တဲၣ်သုးဖီၣ် ချုးန့ၢ်ဝဲတရူး(ကၠါဖၠၣ်)ပှၤမၤတၢ်ဖိ ၈ ဂၤလၢအိၣ်ဃ့ၢ်ထီၣ်ဝဲဆူတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဟီၣ်ကဝီၤတၢ်လီၢ် တကပၤအဂ့ၢ်န့ၣ် (ThaiPBS North)ကၠီၣ်တဲၣ်တၢ်ကစီၣ်သန့ပၥ်ဖျါဝဲန့ၣ်လီၤ.
ဒ်ကၠီၣ်တဲၣ်တၢ်ကစီၣ်သန့ပၥ်ဖျါဝဲအသိးန့ၣ် တရူး(ကၠါဖၠၣ်)လၢတၢ်ဖီၣ်ချုးန့ၢ်ဝဲ ၈ ဂၤ အံၤ လၢကဟဲမၤ တၢ်လံၣ်တၢ်လီတၢ်ဖံး တၢ်မၤအံၤအဂီၢ် မ့ၢ်ပှၤသ့ၣ်တဖၣ် လၢဘၣ်တၢ်ကိးလံၣ်အီၣ်လီအီၣ် အဝဲသ့ၣ်,ဘၣ်တၢ်မၤဒၢၣ် မၤလီၤတ့ၢ်ဃၥ် အီၤ အဂ့ၢ်န့ၣ် စံးဝဲန့ၣ်လီၤ.
တကတီၢ်ဃီအဝဲသ့ၣ်အံၤ တချုးတၢ်ဖီၣ်ချုးလါဒံၣ်စ့ဘၢၣ် ၃ သီ မုၢ်နၤခီ(DKBA)သုးဖိလၢအအိၣ်ခိးတၢ်ဘံၣ်တၢ်ဘၢတဖၣ် ဖဲအဝဲသ့ၣ် မံဘၣ်သးအခါန့ၣ် အဝဲသ့ၣ်ဃ့ၢ်ထီၣ်ဝဲဒီး တကးဒံးဘၣ်ပှၤသ့ၣ်တဖၣ်အံၤဟဲနုၥ်လီၤလၢကီၢ်ကၠီၣ်တဲၣ်ပူၤလၢ အတဖိးသဲစးဘၣ်အဃိတၢ်ကဆဲးဟံထီၣ်ဖီၣ်ထီၣ်ဂ့ၢ်ဝီဒ်တၢ်သိၣ်တၢ်သီအိၣ်ဝဲအသိးအဂ့ၢ်န့ၣ် ကၠီၣ်တဲၣ်တၢ်ကစီၣ်သန့ ပၥ်ဖျါ ဝဲန့ၣ်လီၤ.
ဒ်န့ၣ်အသိးပှၤသ့ၣ်တဖၣ်အံၤဖဲတၢ်ဖီၣ်ချုးသမံသမိးဝဲအခါ တၢ်ထံၣ်ဃုၥ်အဝဲသ့ၣ်တရူး(မၣ်ပိၤတ့ၤ)တၢ်ဂီၤအဃိ ပှၤသ့ၣ်တဖၣ်အံၤ မ့ၢ်ဝဲသူၣ်ဘီၣ်သးစၢ်အသးနံၣ်ကအိၣ်ဒံးဒၣ်ထဲအနံၣ်(၂၀) ဘျဲၣ်ခိၣ်ဃၢၤဒံးလီၤဒီး တကးဒံးဘၣ်လၢအဝဲသ့ၣ်အအိၣ် တၢ်မၤန့ၢ်ဝဲ လီတဲစိဃုၥ်ဒီးစ့ယိၤ(၂၀၀၀၀)ဘျဲၣ် န့ၣ်လီၤ.
တရူး(ကၠါဖၠၣ်)ပှၤမၤတၢ်ဖိ ၈ ဂၤလၢအဃ့ၢ်ထီၣ်တၢ်ဖီၣ်ချုးန့ၢ်ဝဲဖဲဟွ့နးနးသဝီဃၢၤအံၤ အိၣ်ဃ့ၢ်ထီၣ်လၢတၢ်လီၢ်ဖဲလဲၣ်တကပၤခီန့ၣ် ကၠီၣ်တဲၣ်တၢ်ကစီၣ်သန့ပၥ်ဖျါဃုၥ်ဝဲတအိၣ်ဘၣ်ဘၣ်ဆၣ် တၢ်လီၢ်လၢတၢ်ဖီၣ်ချုးန့ၢ်ဝဲတရူးအံၤအိၣ်ဝဲတခီတဝၢ်ဝၢ်ဒီး(DKBA ) တၢ်ပၢဟီၣ်ကဝီၤ ကၠီးခဲး ကၠါဖၠၣ်တၢ်ဖံးတၢ်မၤအလီၢ်အံၤန့ၣ်လီၤ.
ဟွ့နးနးသဝီအပူၤ ဖဲအပူၤကွံၥ်စှၤသီအခါစ့ၢ်ကီးတရူးလၢအိၣ်ဃ့ၢ်ထီၣ်လၢ(DKBA)တၢ်ပၢဟီၣ်ကဝီၤပူၤတဖၣ် ကၠီၣ်တဲၣ်ဖီၣ်ချုးဝဲ တရူး(ကၠါဖၠၣ်)ပှၤမၤတၢ်ဖိ ၂ ဂၤဒံးအဂ့ၢ်န့ၣ် သဝီဖိလၢအိၣ်ဖဲန့ၣ်တဖၣ်စံးဝဲအသိးသ့ၣ်ညါဘၣ်န့ၣ်လီၤ.
စးထီၣ်ဖဲ KK Park ဒီးမ့လဲၣ်ပၤတၢ်ကဲထီၣ်သးဝံၤလီၢ်ခံ ထံဂုၤကီၢ်ဂၤကၠါဖၠၣ်ပှၤမၤတၢ်ဖိလၢအလဲၤမၤတၢ်မၤဖဲန့ၣ်သ့ၣ်တဖၣ် ဂုၥ်ကျဲးစၢး ဃ့ၢ်ထီၣ်လၢကီၢ်ကၠီၣ်တဲၣ်တကပၤအိၣ်ဝဲအါမးအဃိ တၢ်ဖီၣ်ချုးန့ၢ်ဝဲ(ကၠါဖၠၣ်)ပှၤမၤတၢ်ဖိလၢထံဆၢကီၢ်ဆၢအိၣ် တလီၢ်လီၢ်အသိး လၢကဃ့ၢ်ဖျဲးထီၣ်အဂီၢ်ဖဲအဝဲသ့ၣ်ခီထံအခါလီၤအုးသံလၢထံကျါစ့ၢ်ကီးအိၣ်ဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ဖဲအပူၤကွံၥ်လါနိၣ်ဝ့ဘၢၣ်သၢနွံတနွံအခါန့ၣ်စ့ၢ်ကီး ကၠါဖၠၣ်ပှၤမၤတၢ်ဖိလၢအိၣ်ဂီၤလ့ၤဒီးကၠီးခဲးဟီၣ်ကဝီၤပူၤတဖၣ် ကဟးထီၣ်ကွံၥ်လၢဟီၣ်ကဝီၤပူၤလၢအဆိအချ့အဂ့ၢ်န့ၣ် (DKBA)နဲၣ်လီၤတ့ၢ်ဃၥ်တၢ်ကလုၢ်အိၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါစးထီၣ်ဖဲလါအီးကထိဘၢၣ်(ကၠါဖၠၣ်)တၢ်ဂ့ၢ်ကီကဲထီၣ်ဝံၤလီၢ်ခံ ဖဲထံဆၢကီၢ်ဆၢတခီတဝၢ်ဝၢ်န့ၣ် ကၠီၣ်တဲၣ်ဆီလီၤ အါထီၣ်အသုးမၤအါထီၣ်တၢ်ဘံၣ်တၢ်ဘၢဒီး စးထီၣ်ဖဲလါနိၣ်ဝ့ဘၢၣ်လၢၤတုၤလၢလါဒံၣ်စ့ဘၢၣ် ၆ သီအံၤစ့ၢ်ကီး ကီၢ်ဆၣ်(၅)ဘ့ၣ် လၢထံဆၢကီၢ်ဆၢဒီတကျိၤ ချံသန့တၢ်လီၢ်တဖၣ် ကၠီၣ်တဲၣ်တကပၤပံးကွံၥ်ဝဲတၢ်လဲၤထီၣ်က့ၤလီၤန့ၣ်လီၤ.
