လါဒံၣ်စ့ဘၢၣ် ၁၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ ဖဲအပူၤကွံၥ်နွံအခါ တၢ်ဖီၣ်န့ၢ်ဝဲ တရူး(ကၠါဖၠၣ်)ပှၤမၤတၢ်ဖိ ၆ ဂၤလၢ KNU/KNLA-PC ဆှၢခီဖျိဝဲအံၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤ ပှၤဘၣ်မူဘၣ်ဒါ အအိၣ်န့ၣ်လီၤ.
ဖဲတလါအံၤလါဒံၣ်စ့ဘၢၣ်ထီၣ် ၆ သီအနံၤန့ၣ် တရူး(ကၠါဖၠၣ်)ပှၤမၤတၢ်ဖိလၢအိၣ်ဟဲက့ၤလီၤလၢဒူပျၥ်ယၥ်ကီၢ်ရ့ၣ်(သုးက့ ၆) ဒီး ဖၣ်အၣ်ကီၢ်ရ့ၣ်(သုးက့ ၇)ဟီၣ်ကဝီၤပူၤတဖၣ် သုးက ၁ လီၢ်ကဝီၤ(KNLA)ဖီၣ်န့ၢ်ဝဲ ၆ ဂၤ ဖဲနိၣ်မကွံၢ်ကရူၢ် ထူတီၣ်သဝီပူၤဒီး ပှၤသ့ၣ်တဖၣ်အံၤဘၣ်တၢ်ဆှၢ ခီဖျိ အဝဲသ့ၣ်လၢ (KNU/KNLA-PC)အပှၤ ၅ ဂၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢ အသ့ၣ်ညါ ထွဲတၢ်ဂ့ၢ်အံၤစံးဝဲန့ၣ်လီၤ.
အဝဲစံးဝဲ“ပှၤဖီၣ်န့ၢ်(ကၠါဖၠၣ်)ဖဲ(KNLA)သုးရ့ၣ်-၁ ဟီၣ်ကဝီၤ ထူတီၣ်တြဲၤန့ၣ် ၆ ဂၤ. ပှၤနီကါဖိန့ၣ် ၅ ဂၤ. ပှၤနီဖိကါဖိ ၅ ဂၤအံၤ အကဲဝဲ (KNU/KNLA-PC)အပှၤဒီးပှၤနီကါဖိအကျါပၣ်ဃုၥ်လၢသုးခိၣ်ပတီၢ်ညါ. ပသ့ဃုၥ်ဒီးအကါ.ပှၤသ့ၣ်တဖၣ်အံၤအိၣ်ဟဲက့ၤ လီၤလၢ (သုးက့ ၆) ဒီး(သုးက့ ၇)တကပၤ ဟဲဃီၤဝဲလၢ(ဝိၣ်ကၠံ)ကျဲတကပၤန့ၣ်. ပှၤဆှၢ(ကၠါဖၠၣ်)ပှၤနီသိလ့ၣ်ဖိတဖၣ်န့ၣ် သီခါ (တီၤကလ့) အပှၤပၣ်စ့ၢ်ကီးလီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤ တရူး(ကၠါဖၠၣ်) ၆ ဂၤ ဒီး (PC)အပှၤ,တီၤကလ့သီခါအပှၤနီသိလ့ၣ်ဖိလၢတၢ်ဖီၣ်န့ၢ်ဝဲအံၤတဖၣ် တၢ်ပၥ်ဃၥ်အဝဲသ့ၣ် လၢတၢ်ဘံၣ်တၢ်ဘၢအလီၢ်ဒီး ဒ်န့ၣ်အသိးပှၤသ့ၣ်တဖၣ်အံၤဃ့ရ့ထီၣ်သးလၢစ့အိၣ်ဝဲဘၣ်ဆၣ် ဒ်တၢ်သိၣ် တၢ်သီအိၣ်အသိး တၢ်ကဆဲးဟံထီၣ်ဖီၣ်ထီၣ်ဝဲဂ့ၢ်ဝီအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါတဂၤဃီဝဲန့ၣ် စံးအါထီၣ်ဝဲန့ၣ်လီၤ.
ဖၣ်အၣ်ကီၢ်ဆၣ်ပူၤတၢ်ဖီၣ်န့ၢ်တရူး(ကၠါဖၠၣ်)ဖဲန့ၣ်ဝံၤတယံၤတမီၢ် လၢကၠဲးထိၣ်ကီၢ်ဆၣ် (KNLA)သုးရ့ၣ်-၃ ဟီၣ်ကဝီၤအပူၤစ့ၢ်ကီး တၢ်ဖီၣ်န့ၢ်ကဒီးဝဲ(ကၠါဖၠၣ်)အခီၣ်ဖၠူထၢၣ်,လီတဲစိ(ဖိ)အိၣ်ဝဲ အဖျၢၣ်(၄၀၀)ခိၣ်ဃၢၤညါဒီး ဘၣ်ဆၣ် တၢ်ဖီၣ်န့ၢ်တၢ်ဖိတၢ်လံၤဘျီဝဲအံၤ (ကၠါဖၠၣ်)အကစၢ်တပၣ် ဃုၥ်ဝဲဘၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါအိၣ်ဖဲန့ၣ်တဖၣ်စံးဝဲအသိးသ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤလီၢ်ကဝီၤပှၤဘၣ်မူဘၣ်ဒါလၢအသ့ၣ်ညါထွဲတၢ်ဂ့ၢ်အံၤတဂၤစံးဝဲလၢ“ပှၤဖီၣ်န့ၢ်တရူး(ကၠါဖၠၣ်)ဖဲဖၣ်အၣ်ဝံၤဘျီလၢကၠဲးထိၣ်ကီၢ်ဆၣ် (KNLA)သုးရ့ၣ်-၃ ဟီၣ်ကဝီၤပူၤန့ၣ် ပှၤမၤန့ၢ်(ကၠါဖၠၣ်)အလီတဲစိ,ခီၣ်ဖၠူထၢၣ် ကအိၣ်လၢအဖျၢၣ်(၃၅၀) ဘျဲၣ်ညါ .တၢ်မၢၤအကစၢ်ဒုပှၤတချုးန့ၢ်ဘၣ်. မ့မ့ၢ်ပှၤနီသိလ့ၣ်ဖိခီန့ၣ်အိၣ်ဒၣ်ပှၤနီလ့ၢ်လိၤကါဖဲအံၤလီၤ.”အဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါ စးထီၣ်ဖဲမၠၣ်ဝတံၣ်ဝ့ၢ်ဃၢၤ(KK park)ကၠါဖၠၣ်တၢ်ဖံးတၢ်မၤလီၢ်,ဒီး(မ့လဲၣ်ပၤ)ကၠါဖၠၣ် တၢ်ဂ့ၢ်ကဲထီၣ် ဝံၤန့ၣ် တကီၢ်ခါလၢကၠဲးထိၣ်ဝ့ၢ်,ဘံလ့ဝ့ၢ်ဒီးသထူၣ်ဝ့ၢ်ပူၤ ဟိၤထဲ(Hotel)တဖၣ်အပူၤန့ၣ် တရူး(ကၠါဖၠၣ်)ပှၤမၤတၢ်ဖိဟဲက့ၤနုၥ်လီၤ အိၣ်ဝဲအါအါဂီၢ်ဂီၢ်အဂ့ၢ်န့ၣ် ကမျၢၢ်လၢအိၣ်ဝ့ၢ်အံၤအပူၤတဖၣ်စံးဝဲန့ၣ်လီၤ.
ဒ်န့ၣ်အသိး (သုးက့ ၁)ဟီၣ်ကဝီၤပူၤအမဲၥ်ညါစးထီၣ်ဖဲန့ၣ်ဝံၤလီၢ်ခံန့ၣ် လၢတန့ခၠါကီၢ်ဆၣ် ကညီတၢ်မုၥ်တၢ်ခုၣ် ကီၣ်ကးကရၢ (PC)တၢ်ပၢဟီၣ်ကဝီၤ,သ့ၣ်ကတံၥ် (BGF)တၢ်ပၢဟီၣ်ကဝီၤဒီးဖၣ်အၣ်ဝ့ၢ်ဟီၣ်ကဝီၤအပူၤန့ၣ် တရူး(ကၠါဖၠၣ်)ပှၤမၤတၢ်ဖိ နုၥ်လီၤ အိၣ်ဆိးဝဲအါအါဂီၢ်ဂီၢ်အဂ့ၢ်န့ၣ် တၢ်ကစီၣ်ဟးထီၣ်အိၣ်အသိးကမျၢၢ်လၢအထံၣ်တၢ်ဒီး အမဲၥ် တဖၣ် စံးဝဲအိၣ်န့ၣ်လီၤ.