လါယနူၤအါရံၤ ၂၇သီ, ၂၀၂၆နံၣ်, ခ့ၣ်အဲးစံၣ်,
အမဲရကၤကီၢ်ခီဒိၣ်,မဲၤနံၤစိထၣ်(စ့ၤဖီလ်)ဝ့ၢ်ဘၣ်ကီဘၣ်ခဲကညီပိၥ်မုၣ်လၢ(ICE)ဖီၣ်က့ၤကိးဝဲအတဂၤအံၤ,မဟါလါယနူၤအါရံၤ(၂၆)သီအနံၤမုၢ်ဃ့ၢ်လီၤအဆၢကတီၢ်အပူၤတၢ်ပျၢ်လီၤက့ၤဝဲအီၤလံအဂ့ၢ်,သ့ၣ်ညါဘၣ်ဒ်ကညီဖိလၢအိၣ်အမဲရကၤထံကီၢ်တဖၣ်ပၥ်ဖျါထီၣ်ဝဲလၢစိၤရှၢၣ်မံးဒံးယၢၣ်အပူၤန့ၣ်လီၤ.
မဲၤနံၤစိထၣ်ဘၣ်ကီဘၣ်ခဲကညီပိၥ်မုၣ်သးနံၣ်(၃၂)နံၣ်အံၤ,အပူၤကွံၥ်လါယနူၤအါရံၤ(၁၀)သီအနံၤ ICE (Immigration and Customs Enforcement) ကရူၢ်ကရၢတဖၣ်နုၥ်လီၤဖီၣ်က့ၤကိးဝဲအီၤဒီးဆှၢကွံၥ်ဝဲအီၤတဘျီဃီဆူ(Texas)တၢ်ဒုးဃၥ်အလီၢ်အဂ့ၢ်,သ့ၣ်ညါဘၣ်န့ၣ်လီၤ.
တၢ်ဖီၣ်က့ၤကိးအီၤအလီၢ်ခံ,ခီဖျိကညီဖိလၢတုၤအိၣ်အမဲရကၤထံကီၢ်လၢအဟူးဂဲၤဝဲလၢပှၤတဝၢဂ့ၢ်ဂီတၢ်ဖံးတၢ်မၤတဖၣ်ဟံးထီၣ်ဖီၣ်ထီၣ်န့ၢ်ဝဲအီၤတၢ်မူးတၢ်ရၢ်အဃိ,(၂)နွံအတီၢ်ပူၤထူၣ်ဖျဲးထီၣ်က့ၤဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
ဘၣ်ဒီယါကညီဘၣ်ကီဘၣ်ခဲပိၥ်မုၣ်အံၤလၢ(UNHCR)ဘၣ်ကီဘၣ်ခဲတၢ်ရဲၣ်တၢ်ကျဲၤတဆီနုၥ်လီၤဝဲလၢအမဲရကၤထံကီၢ်ပူၤလၢအဖိးမံသဲးစးဖဲအပူၤကွံၥ်(၂၀၂၄)နံၣ်လါနိၣ်ဝ့ဘၢၣ်အပူၤအဂ့ၢ်,သ့ၣ်ညါဒ်အမဲရကၤကညီပှၤတဝၢဂ့ၢ်ဝီတဖၣ်စံးဝဲအသိးန့ၣ်လီၤ.
လၢန့ၣ်အမဲၥ်ညါ,ဖဲအနီၢ်ကစၢ်ပတံထီၣ်ဝဲ(GreenCard)အဆၢကတီၢ်(ICE)နုၥ်လီၤသမံသမိးအီၤအခါဒုးနဲၣ်ဝဲလံၥ်လဲၢ်တၢ်အုၣ်ကီၤသးတန့ၢ်ခဲလၢၥ်ဒံးဘၣ်အဃိ,တၢ်ဖီၣ်ဝဲအီၤအဂ့ၢ်သ့ၣ်ညါဘၣ်န့ၣ်လီၤ.
တကးဒံးဘၣ်တကီၢ်ခါခဲအံၤ,ဘၣ်ကီဘၣ်ခဲကညီပိၥ်မုၣ်အံၤထူၣ်ဖျဲးထီၣ်ကွံၥ်ဝဲဒၣ်လၢတၢ်ဒုးဃၥ်အလီၢ်လံဘၣ်ဆၣ်,က့ၤကဒါက့ၤဝဲဆူအဟံၣ်ဖိဃီဖိအိၣ်တတုၤဒံးဘၣ်အဂ့ၢ်,သ့ၣ်ညါဘၣ်န့ၣ်လီၤ.
အမဲရကၤထံကီၢ်ပူၤ,ICE (Immigration and Customs Enforcement) အံၤဟူးဂဲၤဝဲလၢထံလီၢ်ကီၢ်ပူၤတၢ်ဘံၣ်တၢ်ဘၢဝဲၤကျိၤဖီလၥ်(U.S. Department of Homeland Security – DHS)ဒီးဟံးန့ၢ်ဝဲမူဒါလၢတဖိးမံသဲးစးထံဂုၤကီၢ်ဂၤဖိအတၢ်နုၥ်လီၤဟးထီၣ်လၢထံလီၢ်ကီၢ်ပူၤ,ဒုးဆိကတီၢ်ဖီၣ်ဃၥ်ဝဲၦၤတခီထံတခီကီၢ်ဖိဒီး,ဆှၢဖျိးကွံၥ်ဝဲတၢ်လၢထံလီၢ်ကီၢ်ပူၤအဂ့ၢ်,သ့ၣ်ညါဘၣ်န့ၣ်လီၤ.
ဒီးတနံၣ်အံၤ(၂၀၂၆)နံၣ်စးထီၣ်ဖဲလါယနူၤအါရံၤအဆိကတၢၢ်တနွံအပူၤမၤဝဲတၢ်ဟးဖီၣ်သမံသမိးတဖိးမံသဲးဂၤထံဂုၤကီၢ်ဂၤတဖၣ်အိၣ်ဝဲအသိး,မၤဝဲတၢ်ကိးထံၣ်သမံသမိးလၢ(DHS)လံၥ်တၢ်ဆှၢတဖၣ်တဆီအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,(ICE)အတၢ်ဟူးတၢ်ဂဲၤအံၤမ့ၢ်ဒ်သိးတၢ်ကသမံသမိးမၤလီၤတံၢ်က့ၤပှၤဘၣ်ကီဘၣ်ခဲအဂၤ(၂၀၀,၀၀၀)ဃၣ်ဃၣ်လၢအနုၥ်လီၤအိၣ်ဆိးဝဲလၢကီၢ်အမဲရကၤအပူၤဖဲကီၢ်ခိၣ်(ကၠိဘဲၤဒၢၤ)ပၢတၢ်အခါဖဲ(၂၀၂၁)နံၣ်လါယနူၤအါရံၤ(၂၀)သီတုၤ(၂၀၂၅)လါဖ့ၤဘြူၤအါရံၤ(၂၀)သီအပူၤတဖၣ်အဂ့ၢ်,သ့ၣ်ညါဘၣ်ဒ်တၢ်ဘိးဘၣ်ပၥ်ဖျါအိၣ်ဝဲအသိးန့ၣ်လီၤ.
အမဲရကၤထံကီၢ်ပူၤ(၂၀၂၆)နံၣ်စးထီၣ်လၢ(ICE)သမံသမိးတၢ်တုၤလၢခဲအံၤခးသံဝဲပှၤအိၣ်ဝဲ(၂)ဂၤလံအဂ့ၢ်,သ့ၣ်ညါဘၣ်ဒ်ထံဂုၤကီၢ်ဂၤတၢ်ကစီၣ်သန့တဖၣ်ပၥ်ဖျါဝဲအသိးန့ၣ်လီၤ.
