လါဖ့ၤဘြူၤအါရံၤ ၁၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤလၢတၢ်ဒုးက့ၤဆူၣ်ထီၣ်ကဒါအံၤန့ၣ် လၢကမၤပှဲၤအါထီၣ်သုးဂံၢ်ဘါအဂီၢ် ပယီၤသုးဒီး ကညီဖီၣ်စုကဝဲၤကရူၢ်တဖၣ်ပၥ်ဖှိၣ်ထီၣ်သးဟဲထီၣ်ဝဲအါအါဂီၢ်ဂီၢ်အဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲန့ၣ်လီၤ.
မီၤစိရိၤအံၤလၢကလဲၤထီၣ်မၤပှဲၤသုးဂံၢ်ဘါလၢကတၢတံၥ်ဒီးဖၣ်ပူၤသုးကလၢၤအံၤအဂီၢ် ဖဲလါဖ့ၤဘြူၤအါရံၤ ၁၀ သီအနံၤ လၢမၠဲၣ်ကၠံငူၣ်(ခီတီၢ်)ဝ့ၢ်အံၤတဆီ ပယီၤသုးဒီးသုးခိးကီၢ်ဆၢ(BGF),ဘူးဒးကညီသုးမုၢ်ဒိၣ်(DKBA), ကညီတၢ်မုၥ်တၢ်ခုၣ် ကီၣ်ကး ကရၢ(KNU/KNLA-PC)တဖၣ်ပၥ်ဖှိၣ်ထီၣ်သးကအိၣ်(၂၀၀)ဘျဲၣ်ဟဲထီၣ်ဝဲဆူကမၤမိၢ် တဃ့ၣ်ခိၣ်တကပၤအဂ့ၢ်န့ၣ် သုးက့ ၅ ပှၤကတိၤ တၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
“အပူၤကွံၥ်ခံသီအခါန့ၣ် ပယီၤသုးခီဃီၤဝဲဃိၥ်လိၥ်ကျိလၢ(ခီတီၢ်)ပူၤဘျီန့ၣ်ဟဲထီၣ်ဝဲလၢမဲးပြ့း,မဲးလါတကပၤန့ၣ် မီၤနီၤ. ပှၤနီၣ်ဂံၢ် ကအိၣ်လၢအဂၤ(၂၀၀)ဘျဲၣ်ညါ.ပဒိးန့ၢ်တၢ်ကစီၣ်န့ၣ်ပၣ်ဃုၥ်ဝဲ(BGF),(DKBA),(PC)အပှၤတဖၣ်မီၤနီၤ.အတၢ်ပညိၣ်ဒုကထီၣ်ဆူ ကတၢတံၥ်သုးကလၢၤဒီးဖၣ်ပူၣ်သုးကလၢၤလီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဖၣ်ပူၣ်ဒီးကတၢတံၥ်ပယီၤသုးကလၢၤလၢပယီၤသုးပၥ်ဖှိၣ်ကလဲၤမၤပှဲၤထီၣ်အသုးဂံၢ်ဘါအံၤ စးထီၣ်ဖဲအပူၤကွံၥ်(၂၀၂၄)နံၣ် လံၤလံၤအခါန့ၣ် (သုးက့ ၅)အပှၤကဝီၤခးစဲးပြဲး,ဒီၣ်တဲၥ်ကွံၥ်တၢ်လဲၤတၢ်က့ၤကျဲ,တၢ်အီၣ်တၢ်အီကျိၤအံၤအဃိ လၢကမၤမိၢ်ဝ့ၢ်အံၤ တဆီ ပယီၤသုးဒီး(BGF)ပၥ်ဖှိၣ်ထီၣ်သးဂုၥ်ကျဲးစၢးလဲၤထီၣ်ဝဲအဘျီတဖၣ်အဘျီဘၣ်ဆၣ်ခီဖျိတၢ်ခိးခးအဝဲသ့ၣ်လၢကျဲတီၤအဃိ တုၤလၢခဲအံၤဆဲးလဲၤဝဲတန့ၢ်အိၣ်ဒံးဝဲဖဲဝါဒူသဝီအခိၣ်အဃၢၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါလၢကမၤပှဲၤအါထီၣ်သုးဂံၢ်ဘါအဂီၢ်ပယီၤသုးပၥ်ဖှိၣ်ဟဲထီၣ်သ့ၣ်တဖၣ်အံၤအကျါ ပၣ်ဃုၥ်ဝဲ ကညီဒီကလုၥ် သုးမုၢ်ဒိၣ် (KNA)ဒီးဘၣ်ဆၣ် မ့ၢ်တမ့ၢ်မၤလီၤတံၢ်တန့ၢ်ဒံးဘၣ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
တကးဒံးဘၣ်ဖဲတၢ်ဒုးလီၤပှီၢ်သုးမီၤစိရိၤအကတီၢ်အံၤ ကညီဖီၣ်စုကဝဲၤကရူၢ်တဖၣ်ကြၢးသ့ၣ်ညါလီၤသးလၢ အမ့ၢ်ကညီဒီး တကြၢးလၢကဘၣ်မၤစၢၤသုးမီၤစိရိၤအံၤဘၣ်အဂ့ၢ်န့ၣ် စံးဝဲန့ၣ်လီၤ.
“ပှၤကညီဖိန့ၣ်ပအဲၣ်ဒိးလၢကသ့ၣ်ညါလီၤသးလၢကညီဖိလီၤ.ဖဲပှၤဂဲၤလိၥ်ဝဲသုးမီၤစိရိၤသနူကဘၣ်ကတၢၢ်ကွံၥ်အံၤန့ၣ်အဝဲသ့ၣ် စ့ၢ်ကီးကအဲၣ်ဒိးလၢသုးမီၤစိရိၤသနူကကတၢၢ်ကွံၥ်လီၤမီၤ.သုမ့အဲၣ်ဒိးလၢသုးမီၤစိရိၤသနူကကတၢၢ်န့ၣ်သုမၤစၢၤပှၤမ့တသ့ဘၣ် န့ၣ်တဘၣ်မၤစၢၤဒုၣ်ဒါဘၣ်.ဒ်သိးပှၤဟ့ၣ်ပှၤတၢ်ကစီၣ်အသိးန့ၣ်အဝဲမၤစၢၤကညီဖိတသ့ဘၣ်,မၤစၢၤလၢဒုၣ်ဒါတကပၤဒီး အဃိပအဲၣ်ဒိးတဲလၢမၤစၢၤကညီဖိမ့တသ့ဘၣ်န့ၣ်တဘၣ်မၤစၢၤဒုၣ်ဒါတဂ့ၤ.မ့အိၣ်ဒ်န့ၣ်န့ၣ်ကိၢ်ညၢ်ဒံး.အအံၤမၤစၢၤဒုၣ်ဒါအဃိ ကမ့ၢ်ပှၤလၢအအဲၣ်ဝဲသုးမီၤစိရိၤသနူဒီးအဲၣ်ဒိးပၢၤဃၥ်သုးမီၤစိရိၤအတၢ်ပၢတၢ်ြပးလီၤ”အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲ န့ၣ်လီၤ.
(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံ (သုးက့ ၅)ဟီၣ်ကဝီၤတၢ်ထီၣ်ပယီၤသုးသုးကလၢၤဒုးယၤတၢ်ဟူးတၢ်ဂဲၤ ဒီတကတီၢ် အပူၤန့ၣ် သုးမီၤစိရိၤအံၤဟံန့ၢ်ဝဲတၢ်ဆီၣ်ထွဲမၤစၢၤလၢ(BGF)အအိၣ်အိၣ်ဝဲဘၣ်ဆၣ်လီၤဆီဒၣ်တၢ်ဖဲစးထီၣ်ဖဲအပူၤကွံၥ် (၂၀၂၅) နံၣ်အံၤ ဘူးဒးကညီသုးမုၢ်ဒိၣ်(DKBA)အမဲၥ်ညါ ခဲအံၤပၣ်ဃုၥ် အါထီၣ်ဝဲလၢ(PC)ကညီဖီၣ်စုကဝဲၤကရူၢ် တဒူၣ် ကဒီးဘၣ်ဟဲအိၣ် ထီၣ်ဝဲဒ်အံၤန့ၣ်လီၤ.
ဘၣ်ဃးပယီၤသုးပၥ်ဖှိၣ်လဲၤမၤအါထီၣ်သုးဂံၢ်ဘါလၢ(သုးက့ ၅)ဟီၣ်ကဝီၤပူၤပၣ်ဃုၥ်(PC)တၢ်ဂ့ၢ်အံၤ ဒ်သိးကသ့ၣ်ညါဘၣ် တၢ်အိၣ်သးလီၤ တံၢ်လီၤဆဲးအဂီၢ် ပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ်ဝဲကရူၢ်အံၤ ပှၤကတိၤတၢ်ပၢ သုးခိၣ်ဒိၣ်စိ စီၤကၠီၤညိၣ် ဒီး စံးဝဲလၢတသ့ၣ်ညါထွဲတၢ်ဂ့ၢ်နီမံၤဘၣ်အဃိအပှၤပၣ်တပၣ်ကဃုသ့ၣ်ညါမၤလီၤတံၢ်ဝဲအဂ့ၢ်န့ၣ် စံးဝဲန့ၣ်လီၤ.
(သုးက့ ၅)ဖၣ်ပူၣ်သုးကလၢၤအပူၤ စးထီၣ်ဖဲလါဖ့ၤဘြူၤအါရံၤ ၄ သီအခါန့ၣ် လၢကဆီၣ်ဖျိးကွံၥ်သုးကလၢၤအံၤအဂီၢ် တၢ်ပၢၢ်ဆၢသုးပၥ်ဖှိၣ် လဲၤထီၣ်ခးဝဲသုးကလၢၤအံၤဒီးဖဲန့ၣ်တၢ်ဒုးကဲထီၣ်ဝဲဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤအဃိ ပယီၤသုး တကပၤသံဘၣ်ဒိဘၣ်ထံးအါ မးန့ၣ်လီၤ.
ဒ်န့ၣ်အသိးလၢတၢ်ဒုးဘျီဝဲအံၤဒီတကတီၢ်အပူၤစ့ၢ်ကီးပယီၤသုးအံၤခီဖျိသူဝဲကဘီယူၤမုၢ်နၤမုၢ်ဆါလဲၤတ့ၢ်လီၤဝဲမ့ၣ်ပိၢ်တပယူၥ်ဃီ အဃိ တၢ်ပၢၢ်ဆၢသုးပၥ်ဖှိၣ်တကပၤစ့ၢ်ကီးတၢ်သံတၢ်ဘၣ်ဒိဘၣ်ထံးအါဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖၣ်ပူၣ်သုးကလၢၤအပူၤစးထီၣ်လၢတၢ်ဒုးက့ၤကဲထီၣ်ကဒါတုၤလၢခဲအံၤတစု ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢ ခံခီခံကပၤ အဘၢၣ်စၢၤအသိး ကဘီယူၤစ့ၢ်ကီးလဲၤခးလီၤတၢ်ဒီးတ့ၢ်လီၤန့ၢ်ဝဲတၢ်ဘိၣ်သ့ၣ်တဖၣ်လၢသုးကလၢၤအပူၤအိၣ်ဝဲအဂ့ၢ်န့ၣ် သ့ၣ်ညါဘၣ်လၢသုးက့ပှၤဘၣ်မူဘၣ်ဒါ အအိၣ်န့ၣ်လီၤ.
