လါဖ့ၤဘြူၤအါရံၤ ၂၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ကြဲၢ်ကီၢ်ဆၣ်အပူၤ တၢ်ဒုးဆဲးကဲထီၣ်ဝဲလၢခံခီခံကပၤအဘၢၣ်စၢၤဒီး လၢတၢ်ဒုးတၢ်ယၤ အံၤအဃိ ကရူၢ်(၃)ဘ့ၣ်ပူၤ ကမျၢၢ်လၢအဃ့ၢ်ထီၣ်တဖၣ်တၢ်ကီတၢ်ခဲအိၣ်လၢကအီၣ်ကအီအဃိလိၣ်ဘၣ်ဝဲတၢ်ဆီၣ်ထွဲမၤစၢၤ အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
တၢ်ကြဲၢ်ကီၢ်ဆၣ်ပူၤ လၢကထီၣ်မၤန့ၢ်က့ၤထံဆၢကီၢ်ဆၢသုးကလၢၤတၢ်လီၢ်လၢအဘၣ်ဟ့ၣ်ဆှူဝဲတဖၣ်အံၤအဂီၢ် စးထီၣ် ဖဲအပူၤ ကွံၥ် ၂၃ သီအနံၤန့ၣ် ပယီၤသုးလၢအိၣ်တၢ်ကြဲၢ်ဝ့ၢ်ခိၣ်ဝ့ၢ်ဃၢၤအံၤတဖၣ်ဖဲအဝဲသ့ၣ်ဟးထီၣ်လၢတၢ်ပၥ်ပနီၣ်လီၢ် အခါတၢ် ခးလိၥ် သးကဲထီၣ်ဝဲဒီး ဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤတကးဒံးဘၣ်ခးလီၤစ့ၢ်ကီးဝဲကျိဖးဒိၣ်အဃိ တၢ်ြကဲၢ်ကရူၢ်, လၢၢ်ဂၢၤကရူၢ် ဒီး ဖါကၤကရူၢ်(၃)ဘ့ၣ် ပူၤ ကမျၢၢ်တဖၣ်ဃ့ၢ်ထီၣ်ဝဲန့ၣ်လီၤ.
ကမျၢၢ်လၢအဃ့ၢ်ထီၣ်သ့ၣ်တဖၣ်အံၤတနီၤန့ၣ်လဲၤဃ့ၢ်ထီၣ်အိၣ်ဝဲလၢထံဆၢကီၢ်ဆၢအဘူးအတံၢ်အိၣ်ဝဲအသိးတနီၤန့ၣ် လဲၤဃ့ၢ် အိၣ်ဝဲလၢပှၢ်လၢ်ကျါတၢ်ဖံးအီၣ်မၤလီၢ်စ့ၢ်ကီးအိၣ်ဝဲအဃိ ပှၤသ့ၣ်တဖၣ်အံၤတၢ်ကီတၢ်ခဲအိၣ်ဝဲလၢတၢ်အီၣ်တၢ်အီတကပၤအဂ့ၢ်န့ၣ် တၢ်ြကဲၢ်ကီၢ်နဲၣ်ရွဲၣ်သဃဲၤ ပဒိၣ်စီၤပူလူး စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ကမျၢၢ်ဒုခဲအံၤဒုတၢ်ဂ့ၢ်ကီအိၣ်ဝဲလၢတၢ်အီၣ်တၢ်အီလီၤ.တနီၤခီန့ၣ်အဘူးအတံၢ်အိၣ်အဃိက့ၤထီၣ်စံၣ်ဝဲလၢထံဆၢကီၢ်ဆၢ ဘဲကျီးအိၣ်တနီၤ.တနီၤန့ၣ်လဲၤစံၣ်အိၣ်ဝဲဖဲသ့ၣ်ခီၣ်ထံးဝၣ်ခီၣ်ထံးအိၣ်တနီၤ.အဃိန့ၣ်အဝဲသ့ၣ်တၢ်ကီတၢ်ခဲအိၣ်ဝဲလၢတၢ်အီၣ်တၢ်အီတကပၤအဃိလိၣ်ဘၣ်တၢ်ဆီၣ်ထွဲမၤစၢၤမီၤ”အဂ့ၢ်န့ၣ် စံးဝဲန့ၣ်လီၤ.
ဒ်ကီၢ်ဆၣ်နဲၣ်ရွဲၣ်သဃဲၤစံးဝဲအသိးန့ၣ် ခီဖျိလၢဒုးယၤတၢ်သဘံၣ်သဘုၣ်အံၤအဃိ တၢ်ြကဲၢ်ကရူၢ်,ဖါကၤ(ဖားကပ်)ကရူၢ်ဒီးလၢၢ်ဂၢၤ ကရူၢ်ပူၤ ဒူသဝီလၢအဃ့ၢ်ထီၣ်တဖၣ်န့ၣ်မ့ၢ်ဝဲ တၢ်ြကဲၢ်,ပညၤပျံ, နိၣ်ချၢၣ်သဝီ,မိနဲ,ပနွဲၢ်ကျါ,ကွံပညၣ်သဝီ,ကကၠိဃုၥ်ဒီး ဒူသဝီလၢအဂၤ ပှၤနီၣ်ဂံၢ် ပၥ်ဖှိၣ်ခဲလၢၥ်အဂၤ(၁၀၀၀၀)ဃၣ်ဃၣ်ဃ့ၢ်ထီၣ်ဝဲဒၣ်န့ၣ်လီၤ.
ဒ်န့ၣ်အသိးဖဲလီၢ်ကဝီၤကမျၢၢ်သ့ၣ်တဖၣ်အံၤဃ့ၢ်ထီၣ်အခါပယီၤသုးအံၤဟံန့ၢ်ဝဲတၢ်ခွဲးတၢ်ယၥ်နုၥ်လီၤဃုတၢ်လၢကမျၢၢ်အဟံၣ်ပူၤ ဝံၤဟံက့ၤစိၥ်ဝဲတၢ်ဖိတၢ်လံၤအိၣ်ဝဲစ့ၢ်ကီးအဂ့ၢ်န့ၣ် ကမျၢၢ်လၢအိၣ်ဘူးဒီးတၢ်ကဲထီၣ်သးအံၤတဖၣ်စံးဝဲအိၣ်ဘၣ်ဆၣ် ဘၣ်ဃး တၢ်ဂ့ၢ်အံၤ မၤလီၤတံၢ်အီၤတန့ၢ်ဒံးဘၣ်အဂ့ၢ်န့ၣ် ကီၢ်ဆၣ်နဲၣ်ရွဲၣ်သဃဲၤ စံးဝဲန့ၣ်လီၤ.
တကီၢ်ခါခဲအံၤလၢကထီၣ်ဟံန့ၢ်က့ၤထံဆၢကီၢ်ဆၢသုးလၢၤအဂီၢ်ပယီၤသုးလၢအဟးထီၣ်လၢအနီၣ်ဂံၢ်ကအိၣ်(၂၀၀)ဃၣ်ဃၣ်တဖၣ်အံၤ ခဲအံၤအိၣ်ဒံးဝဲဖဲတီၤလိကၠီၤ(တောင်လုံးကျော်)ကစၢၢ်ခီၣ်ထံးဒံးအသိး စးထီၣ်လၢအဝဲသ့ၣ်ဟးထီၣ်တလၢတၢ်ပၥ်ပနီၣ်အလီၢ် တုၤဖဲမဟါလါဖ့ၤဘြူၤအါရံၤ ၂၅ သီအံၤ တၢ်ဒုးဆဲးကဲထီၣ်ဒံးဝဲဒီးဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤန့ၣ်လီၤ.
“ခဲပယီၤသုးန့ၣ်အတၢ်ပညိၣ်အိၣ်လၢကထီၣ်ဟံန့ၢ်က့ၤနီၢ်တယၢ်လူၢ်,တၤလဲၤ,မီၤဖိက့ၣ်သုးကလၢၤမီၤနီၤ. ခဲအံၤပယီၤသုးတဖၣ်န့ၣ် အိၣ်ဒံးဖဲတီၤလိကၠီၤကစၢၢ်ခီၣ်ထံးန့ၣ်ဒံးလီၤ.မဟါအနံၤန့ၣ်တၢ်ဒုးကဲထီၣ်ဒီတနံၤကျၢၤလီၤ.ခဲအံၤတတုၤလၢတၢ်လူၢ်ခိၣ်ဒံးဘၣ်အိၣ်ဒံးဖဲကစၢၢ်ခီၣ်ထံးန့ၣ်ဒံးလီၤ.ပယီၤသုးအိၣ်ဝးဝးလီၤလၢတီၤလိကၠီၤစ့ၢ်ကီးအိၣ်,လၢကကၠိစ့ၢ်ကီးအိၣ်,လၢတၢ်ကြဲၢ်စ့ၢ်ကီးအိၣ်လီၤ”အဂ့ၢ်န့ၣ် တၢ်ကြဲၢ်ကီၢ်ဆၣ်နဲၣ်ရွဲၣ်သဃဲၤ စံးအါထီၣ်ဝဲန့ၣ်လီၤ.
ဒ်န့ၣ်အသိးတနံၤဃီဖဲအပူၤကွံၥ် ၂၃ သီ တၢ်ဒုးကဲထီၣ်အခါန့ၣ်စ့ၢ်ကီး ပယီၤသုးတကပၤသံဝဲ(၂)ဂၤဒီးဘၣ်ဒိဘၣ်ထံးဝဲ(၈)ဂၤ တကးဒံးဘၣ်အမဲၥ်ညါတၢ်ဒုးဘျီဝဲအံၤအပူၤခီဖျိပယီၤသုးခးလီၤကျိဖးဒိၣ်အဃိ ကမျၢၢ်ဘၣ်ဒိစ့ၢ်ကီးဝဲ(၂)ဂၤန့ၣ်လီၤ.
ဖၣ်အၣ်ကီၢ်ရ့ၣ်(သုးက့ ၇)တၢ်ကြၢ်ကီၢ်ဆၣ်ဟီၣ်ကဝီၤအပူၤလီၤဆီဒၣ်တၢ်ပယီၤသုးကလၢၤလၢအိၣ်ကီၢ်ကၠီၣ်တဲၣ်-ကီၢ်ပယီၤထံဆၢ ကီၢ်ဆၢအံၤတဖၣ်လၢအမ့ၢ် နီၣ်တယၢ်လူၢ်သုးကလၢၤ, တၤလဲၤ(တညၣ်ကၠိ), ပူၣ်လူၣ်တူၤ, မီၤဖိက့ၣ်, နီၢ်တယၢ်လူၢ်သုးကလၢၤ, တခိးဘံၣ်ခံသုးကလၢၤသ့ၣ်တဖၣ်အံၤ ဖဲအပူၤကွံၥ်(၂၀၂၅)နံၣ်အခါန့ၣ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် ထီၣ်မၤန့ၢ်ဝဲဒၣ်န့ၣ်လီၤ.
လၢတၢ်န့ၣ်အဃိသုးကလၢၤလၢဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်ထီၣ်န့ၢ်ဝဲယံၤတ့ၢ်လၢတနံၣ်ဃၣ်ဃၣ်အံၤန့ၣ် လၢကထီၣ်မၤန့ၢ်က့ၤဝဲအဂီၢ် ဖဲအပူၤကွံၥ်လါယနူၤအါရံၤတချုးသုးမီၤစိရိၤမၤတၢ်ဃုထၢအကူၥ်-၃ ဒံးဘၣ်အခါန့ၣ် သုးမီၤစိရိၤဆှၢထီၣ်အပှၤနုၥ်လီၤဟံန့ၢ်အလီၢ်အကျဲလၢတၢ်ြကဲၢ်ဝ့ၢ်ပူၤဃုၥ်ဒီးဝ့ၢ်ခိၣ်ဝ့ၢ်ဃၢၤတၢ်လီၢ်တဖၣ်န့ၣ်လီၤ.
ခဲအံၤတၢ်ဃုထၢအကူၥ်-၃ ဝံၤန့ၢ်လၢတလါဘျဲၣ်လံဘၣ်ဆၣ်အဝဲသ့ၣ်အံၤတက့ၤလီၤကဒါမ့မ့ၢ်တခီအတၢ်ပညိၣ်အိၣ်ဒီး တၢ်ရဲၣ်တၢ်ကျဲၤ ဟဲအိၣ်ဖျါထီၣ်လၢကထီၣ်ဟံန့ၢ်က့ၤသုးကလၢၤလၢထံဆၢ ကီၢ်ဆၢဟီၣ်ကဝီၤပူၤဘၣ်ဟဲအိၣ်ထီၣ်ဝဲဒ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
