လါဖ့ၤဘြူၤအါရံၤ ၂၇ သီ, ၂၀၂၆ နံၣ်, ခ့ၣ်အဲးစံၣ်
ပှၤဃိၥ်ဖိလၢအလီၤဘၣ်ဃိၥ်ဖဲချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢဟီၣ်ကဝီၤအပူၤတဖၣ် လၢခ့ၣ်အဲၣ်ယူၣ်- ကညီဒီကလုၥ် စၢဖှိၣ်ကရၢ ကီၢ်ခိၣ်အတၢ်ကလုၢ်အဖီခိၣ် တၢ်ပျၢ်လီၤက့ၤစ့ၢ်ကီးဝဲပှၤဃိဖိ(၂၉)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူ ဘၣ်ဒါ အအိၣ်န့ၣ်လီၤ.
လၢတၢ်န့ၣ်အဃိ ဒ်ကီၢ်ခိၣ်အတၢ်ကလုၢ်နီၣ်ဂံၢ် ၁/၂၀၂၆ အသိးန့ၣ် ဖဲလါဖ့ၤဘြူၤအါရံၤ ၂၅ သီအနံၤ တၢ်မၤဝဲတၢ်ပျၢ်လီၤကွံၥ် ပှၤဃိၥ်ဖိမူးတၢ်ရဲၣ်တၢ်ကျဲၤတခါန့ၣ်လီၤ.
ပှၤဃိၥ်ဖိ(၂၉)ဂၤလၢတၢ်ပျၢ်လီၤဝဲသ့ၣ်တဖၣ်အံၤ ပိၥ်ခွါ(၂၄)ဂၤ,ပိၥ်မုၣ်(၅)ဂၤဒီး ပှၤသ့ၣ်တဖၣ်အံၤမ့ၢ်ပှၤလၢအတၢ်ကမၣ်ဆံး တပၣ်ဃုၥ်လၢ တၢ်ဖီၣ်ဆူၣ်မၤတရီတပါ,တၢ်မၤသံမၤဝီဒီးကသံၣ်မူၤဘှီးကွီၢ်မ့ၣ်သ့ၣ်တဖၣ်အံၤအပူၤဘၣ်အဃိ ဘၣ်တၢ်ပျၢ်လီၤ က့ၤဝဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
လၢတၢ်ပျၢ်လီၤက့ၤပှၤဃိၥ်ဖိဘျီဝဲအံၤ ပှၤလၢအလီၤဘၣ်ဃိၥ်(၇)နံၣ်ဆူဖီခိၣ်ဒ်အမ့ၢ် တၢ်ဖီၣ်ဆူၣ်မၤတရီတပါ, တၢ်မၤသံမၤဝီဒီး ကသံၣ်မူၤဘှီးကွီၢ်သ့ၣ်တဖၣ်အံၤတပၣ်ဃုၥ်ဝဲလၢတၢ်ပျၢ်လီၤက့ၤဘျီဝဲအံၤအပူၤဘၣ်န့ၣ်လီၤ.
ဒ်န့ၣ်အသိးပှၤဃိၥ်ဖိလၢတၢ်ပျၢ်လီၤက့ၤဝဲခဲအံၤတဖၣ် တမ့ၢ်အပူၤဖျဲးထီၣ်လၢတၢ်ကမၣ်ပူၤလၢလၢပှဲၤပှဲၤလံဘၣ်ဒီး မ့မ့ၢ်တခီခီဖျိ တၢ်သိၣ်တၢ်သီတၢ်ပၥ်ပနီၣ်အဖီခိၣ် ဘၣ်တၢ်ပျၢ်လီၤက့ၤဝဲလီၤအဃိ အဝဲသ့ၣ်အံၤအလီၢ်အိၣ်လၢကဘၣ်ဟံန့ၢ်တၢ်မၤလိအသိး ဟးထီၣ်လၢတၢ်ချၢလံဘၣ်ဆၣ်ကဘၣ်အိၣ်ဂ့ၤဂ့ၤဒီးကဘၣ်ဖံးအီၣ်မၤအီၣ်လၢအတီအလိၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
တကတီၢ်ဃီပှၤသ့ၣ်တဖၣ်အံၤမ့ၢ်တလူၤပိၥ်မၤထွဲဒီးမ့ဆဲးမၤကမၣ်ဒံးတၢ်န့ၣ် ကဘၣ်က့ၤတူၢ်ဝဲတၢ်ကမၣ်ခံခါလၢၥ်အဂ့ၢ်န့ၣ် စံးစ့ၢ်ကီး ဝဲန့ၣ်လီၤ.
တကးဒံးဘၣ်ပှၤဃိၥ်ဖိလၢအတပၣ်ဃုၥ်လၢတၢ်ပျၢ်လီၤကွံၥ်ခဲအံၤအကျါတဖၣ်စ့ၢ်ကီး အဝဲသ့ၣ်အံၤဖဲအိၣ်လၢဃိၥ်ပူၤဆၢကတီၢ် ကဟံန့ၢ်တၢ်မၤလိဒီးမ့လူၤပိၥ်မၤထွဲတၢ်သိၣ်တၢ်သီန့ၣ်ကမၤစှၤလီၤန့ၢ်ဝဲတၢ်ကမၣ်(၃)လါန့ၣ်လီၤ.
လၢန့ၣ်အမဲၥ်ညါပှၤဃိၥ်ဖိလၢအအိၣ်တ့ၢ်လၢဃိၥ်ပူၤတဖၣ်အဝဲသ့ၣ်အိၣ်မ့ၢ်ဂ့ၤမ့လူၤပိၥ်မၤထွဲတၢ်သိၣ်တၢ်သီန့ၣ် တၢ်ခွဲးတၢ်ယၥ် တၢ်သူၣ်ကညီၤသးကညီမ့ဟဲအိၣ်ထီၣ်လၢပှၤမ့ပျၢ်လီၤကွံၥ်ပှၤဃိၥ်ဖိန့ၣ် အဝဲသ့ၣ်ကဒိးန့ၢ်ဘၣ်ဝဲတၢ်ခွဲးတၢ်ယၤ အံၤအဂ့ၢ်န့ၣ် ချၢၣ်လွံၢ်ထီၣ်ကီၢ်ရ့ၣ် စံးဝဲန့ၣ်လီၤ.
လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ခိၣ်အတၢ်ကလုၢ်အဖီခိၣ်ဘၣ်ဃး တၢ်ပျၢ်လီၤကွံၥ်ပှၤဃိၥ်ဖိအံၤန့ၣ် ဖဲအပူၤကွံၥ် လါဖ့ၤဘြူၤအါရံၤ(၂၃)အနံၤစ့ၢ်ကီး လၢဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်ကဝီၤအပူၤ တၢ်မၤဝဲတၢ်ပျၢ်လီၤက့ၤပှၤဃိၥ်ဖိ(၁၀၄)ဂၤ တၢ်ရဲၣ်တၢ်ကျဲၤအံၤဒံးန့ၣ်လီၤ.
လၢတၢ်ပျၢ်လီၤက့ၤပှၤဃိၥ်ဖိတၢ်ရဲၣ်တၢ်ကျဲၤအံၤ ခ့ၣ်အဲၣ်ယူၣ်တၢ်ဆၢတဲၥ်အိၣ်လၢ ကီၢ်ရ့ၣ်/သုးက့ကိးဘ့ၣ်ဒဲး အပူၤ ဖဲလါဖ့ၤဘြူၤအါရံၤ ၁၁ သီ ကညီဒီကလုၥ်မုၢ်နံၤကိးမုၢ်နံၤဒဲးန့ၣ် တၢ်ကပျၢ်လီၤက့ၤဝဲပှၤဃိၥ်ဖိလၢအတၢ်ကမၣ်ဆံး သ့ၣ်တဖၣ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိ ဒူပျၥ်ယၥ်ကီၢ်ရ့ၣ်,ချၢၣ်လံၢ်ထူၣ်ကီၢ်ရ့ၣ်အမဲၥ်ညါ လၢကဟဲအံၤ ကီၢ်ရ့ၣ်/သုးက့လၢအိၣ်တ့ၢ်တဖၣ် စ့ၢ်ကီး တၢ်ကဆဲးမၤဝဲတၢ်ပျၢ်လီၤက့ၤပှၤဃိၥ်ဖိတၢ်ရဲၣ်တၢ်ကျဲၤအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
