လါဖ့ၤဘြူၤအါရံၤ ၃ သီ, ၂၀၂၆ နံၣ်, ခ့ၣ်အဲးစံၣ်
ဖဲအပူၤကွံၥ်လါယနူၤအါရံၤ ၂၈ သီတုၤ ၃၁ သီအနံၤန့ၣ် လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲကဝီၤအပူၤ လီၢ်ခၢၣ်သးကညီကၠိဖိပှၥ်ဘျးစဲကရူၢ်(KSNG)မၤဝဲ ၃၀ ဝီတဝီနံၣ်ကတၢၢ်တၢ်အိၣ်ဖှိၣ်ဖးဒိၣ်ဒီးလၢ ၂၀၂၆-၂၀၂၇ နံၣ်အဂီၢ် တၢ်ဃုထၢထီၣ်ခိၣ်နၢ်လၢအသီ ဝံၤဝဲလံ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ဃုထၢဘျီလၢလီၢ်ခၢၣ်သး(KSNG)မၤဝဲအံၤမ့ၢ်ဝဲ(၁၆)ဝီတဝီဒီး ခိၣ်နၢ်သီလၢတၢ်ဃုထၢထီၣ်ဘျီဝဲအံၤတဖၣ် လၢတၢ်ဖး သနူအံၤတဆီ ပှၤလၢအကဲထီၣ်(KSNG)ကရၢခိၣ်န့ၣ်မ့ၢ်ဝဲ စီၤအဲၣ်ကဲလၢၢ်ထူ, ကရၢခိၣ်-၂ နီၢ်ထူၣ်စဒ့ဖီ, နဲၣ်ရွဲၣ် စီၤန့ၤထဲၣ်လ့, နဲၣ်ရွဲၣ်သဃဲၤ နီၢ်စ့စ့ ဒီး ပှၤပၢၤစ့န့ၣ်မ့ၢ်ဝဲ နီၢ်ဟ့ၣ်လၢပှဲၤ သ့ၣ်တဖၣ်အံၤ န့ၣ်လီၤ.
(KSNG)မ့ၢ်ကရူၢ်တဖုလၢဟ့ၣ်ဂံၢ်ဟ့ၣ်ဘါသူၣ်ဘီၣ်သးစၢ်,ဟူးဂဲၤပၥ်ဖှိၣ်မၤသကိးတၢ်ဒီးဂံၢ်ခီၣ်ထံးတၢ်ကရၢကရိလၢအဂၤတဖၣ် အဃိ လၢခါဆူညါတၢ်ဖံးတၢ်မၤကိးသနၢၣ်အပူၤမ့ၢ်ဝဲတၢ်ကပီၤမ့ၣ်အူဒၢတဖျၢၣ်အဂ့ၢ်န့ၣ် စီၤအဲၣ်ကဲလၢၢ်ထူ လၢအဘၣ်တၢ်ဃုထၢ ထီၣ်အီၤလၢကရၢခိၣ်အံၤ စံးဝဲန့ၣ်လီၤ.
“လၢတၢ်ဃုထၢဘျီဝဲအံၤယဒိးန့ၢ်ဘၣ်ဝဲကရၢခိၣ်တဂၤအဖီခိၣ်ယတူၢ်ဘၣ်မုၥ်လီၤဘၣ်မနုၤအဃိလဲၣ်ယမၤသကိးတၢ်ဒီး(KSNG) ယတူၢ်ဘၣ်လၢတၢ်ကပီၤမ့ၣ်အူဒၢတဖျၢၣ်လၢအမၤကပီၤထီၣ်ယမဲၥ်လၢယကခါထီၣ်ခီၣ်ခါဆူညါတခါကသ့အဂီၢ်.ဒီးယသးဆူၣ်စ့ၢ်ကီးလီၤလၢပကမၤသကိးဘၣ်တၢ်.ဒ်ပတၢ်ပညိၣ်အိၣ်အသိးပကဟူးဂဲၤဒီးပကသူၣ်ထီၣ်န့ၢ်ဝဲကညီကၠိဖိသးစၢ်တဖၣ်အတၢ်သ့တၢ်ဘၣ်မ့ၢ်ဂ့ၤ,တၢ်ကူၣ်ဘၣ်ကူၣ်သ့မ့ၢ်ဂ့ၤ,တၢ်တီခိၣ်ရိၣ်မဲ,တၢ်ပၢဆှၢရဲၣ်ကျဲၤမ့ၢ်ဂ့ၤဒီးပကမၤလိနၢ်ပၢၢ်သးလၢပပှၤတဝၢအတၢ်ဖံးတၢ်မၤ,ပှၤဂ့ၢ်ဝီ,မုၢ်ကျိၤဝဲၤကွၥ်ဒီးထံရူၢ်ကီၢ်သဲးတၢ်အိၣ်သးသနၢၣ်သ့ၣ်တဖၣ်ဒ်သိးပကနၥ်န့ၢ်လီၤသးကသ့အဂီၢ်ပဟူးဂဲၤမၤတ့ၢ်အီၤဒ်န့ၣ်ဒီးပကဆဲးဟူးဂဲၤအီၤထီဘိလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
(KSNG)နံၣ်ကတၢၢ်တၢ်အိၣ်ဖှိၣ်လၢတၢ်မၤဝဲလၢ(၄)သီအတီၢ်ပူၤတချုးလီၢ်ခံကတၢၢ်တနံၤတၢ်ဃုထၢထီၣ်ခိၣ်နၢ်သီဒံးဘၣ် လၢတၢ်သၢသီအတၢ်ပူၤန့ၣ်တၢ်ပၥ်ဖျါထီၣ်ဝဲတနံၣ်အတီၢ်ပူၤကရူၢ်အံၤအတၢ်ဖံးတၢ်မၤတၢ်ဟူးတၢ်ဂဲၤဃုၥ်ဒီးခၢၣ်စး တၢ်ဟူးတၢ်ဂဲၤ, တကးဒံးဘၣ်လၢခါဆူမဲၥ်ညါအဂီၢ်တၢ်ပၥ်လီၤဃုၥ်ဝဲတၢ်ဖံးတၢ်မၤအကျိၤအကျဲလၢ တၢ်ကဆဲးဟူးဂဲၤမၤအီၤတဖၣ်အဂ့ၢ်န့ၣ် ကရူၢ်ပှၤဘၣ်မူဘၣ်ဒါစံးဝဲန့ၣ်လီၤ.
လၢန့ၣ်အမဲၥ်ညါပကကွၢ်ထံဆိကမိၣ်က့ၤပပှၤကလုၥ်တၢ်အိၣ်သးဒီးလၢပှၤကလုၥ်တၢ်ဖံးတၢ်မၤအဂီၢ်စ့ၢ်ကီးခိၣ်နၢ်လိၣ်ဘၣ်ဝဲ သူၣ်ဘီၣ်သးစၢ်အဃိ ဒ်သိးပပှၤကလုၥ်တၢ်လိၣ်ဘၣ်ကလၢထီၣ်ပှဲၤထီၣ်အဂီၢ်စ့ၢ်ကီးမူဒါအိၣ်ဝဲလၢပှၤကိးဂၤဒဲးအစုပူၤအဂ့ၢ်န့ၣ် (KSNG)ကရၢခိၣ် စီၤအဲၣ်ကဲလၢၢ်ထူ ဆီၣ်တခူထီၣ်ဝဲကၠိဖိသူၣ်ဘီၣ်သးစၢ်တဖၣ်န့ၣ်လီၤ.
“ဒ်ပတၢ်မုၢ်လၢ်ကွၢ်စိပပၥ်လီၤတ့ၢ်ဃၥ်အသိးန့ၣ်ပနၥ်သပှၢ်တၢၢ်လၢကၠိဖိသ့ၣ်တဖၣ်ကဟဲမၤလိနၢ်ပၢၢ်သးဒီးဒ်ပမ့ၢ်ပှၤကၠိဖိအသိးန့ၣ်ပတၢ်ဂံၢ်စၢ်တၢ်လီၤဟိလီၤဖျဲၣ်ကအိၣ်လီၤဘၣ်ဆၣ်မ့ကွၢ်ပပှၤကလုၥ်တၢ်အိၣ်သးခဲအံၤန့ၣ် ပှၤလိၣ်ဘၣ်ဝဲပှၤသူၣ်ဘီၣ်သးစၢ်လၢ ကမၤသကိးတၢ်လၢပှၤတဝၢတၢ်ဖံးတၢ်မၤပူၤလီၤ.ဒီးပှၤကလုၥ်တၢ်အိၣ်သးခဲအံၤန့ၣ်ပထံၣ်ဒီးပသ့ၣ်ညါလီၤမ့ၢ်ပတုၤဖဲလဲၣ်,ပတုၤလၢတၢ်လီၢ်တတီၤတီၤလံဧါ.မ့တမ့ၢ်ပအိၣ်ဒံးလၢတၢ်ဘၢၣ်စၢၤဒံးလီၤဧါ.ပသ့ၣ်ညါလီၤပသးလီၤ. ပကတုၤလၢပတၢ်မုၢ်လၢ်ဖီတၢၣ် အဂီၢ်န့ၣ်ပခိၣ်ပနၢ်,ပဒီပုၢ်ဝဲၢ်မုၣ်ခွါတဖၣ်ဂုၥ်ကျဲးစၢးမၤတ့ၢ်ဝဲလံ.လၢပမ့ၢ်ကၠိဖိအသိးလၢပသနၢၣ်ပကဃုသကိးဝဲတၢ်ကူၣ်ဘၣ်ကူၣ်သ့ဒီးပ(KSNG)အိးထီၣ်တၢ်ခွဲးတၢ်ယၥ်လၢကၠိဖိတဖၣ်ကဟဲမၤသကိးတၢ်ဒီးပှၤလီၤ.ဒ်သိးပပှၤကလုၥ်တၢ်လိၣ်ဘၣ်ကလၢပှဲၤအဂီၢ်န့ၣ်မူဒါအိၣ်ဝဲလၢပဝဲဒၣ်ကိးဂၤဒဲးအစုပူၤလီၤ”အဂ့ၢ်န့ၣ် စံးဝဲန့ၣ်လီၤ.
လၢတၢ်အိၣ်ဖှိၣ်တၢ်ဃုထၢဘျီဝဲအံၤအပူၤ ကီၢ်သူလ့ၤဟီၣ်ကဝီၤဃုၥ်ဒီးကညီဘၣ်ကီဘၣ်ခဲဒဲကဝီၤ(၇)ဘ့ၣ်ပူၤ ကရူၢ်အံၤ စုတီၤဖီလၥ် ပှၥ်ဘျးစဲ(၁၆)ဖုခၢၣ်စးတဖၣ်ဒီးခိၣ်နၢ်လီၢ်လံၤပှၤမၤသကိးတၢ်ဖိတဖၣ်ဟဲထီၣ်ဝဲအသိး လၢတၢ်ရဲၣ်တၢ်ကျဲၤဘျီဝဲအံၤ ခိၣ်နၢ်(၁၆)ဂၤ လၢအမၤသကိးတၢ်ဘူးဘူးတံၢ်တံၢ်တဖၣ် ဘၣ်တၢ်ဟ့ၣ်လၤကပီၤစ့ၢ်ကီးအဝဲသ့ၣ်လၢတၢ်ပနီၣ်အဂ့ၢ်န့ၣ် သ့ၣ်ညါဘၣ်န့ၣ် လီၤ.
KSNG အံၤ ဘၣ်တၢ်စးထီၣ်ဒုးအိၣ်ထီၣ်တ့ၢ်အီၤဖဲ(၁၉၉၆)နံၣ် လါယူၤလံ ၆ သီ အခါဖဲမဲၢ်လးဘၣ်ကီ ဘၣ်ခဲဒဲကဝီၤအံၤဒီး ခံနံၣ်တဘျီတၢ်မၤဝဲတၢ်က့ၤဃုထၢထီၣ်ခိၣ်နၢ်လၢအသီန့ၣ်လီၤ.အပူၤကွံၥ်ကရူၢ်အံၤလၢကီၢ်ပူၤ,ထံဆၢကီၢ်ဆၢဒဲကဝီၤအပူၤပှၥ်ဘျးစဲမ့အိၣ်(၁၄)ဖုလီၤဘၣ်ဆၣ် လီၤဆီဒၣ်တၢ် တနံၣ်အံၤတၢ်အိၣ်ဖှိၣ် အပူၤန့ၣ် ကရူၢ်ဖိဟဲအါထီၣ်ဝဲ(၂)ဖုလၢအိၣ်ဖၣ်အၣ်ကီၢ်ရ့ၣ် တန့ခၠါကီၢ်ဆၣ်ဒီး ဘၣ်ဒီၤယါဒဲကဝီၤပူၤအံၤအဂ့ၢ်န့ၣ် သ့ၣ်ညါဘၣ်န့ၣ် လီၤ.
ထံဆၢကီၢ်ဆၢအမဲၥ်ညါကရူၢ်ပှၥ်ဘျးစဲလၢအဂၤတဖၣ်လၢခ့ၣ်အဲၣ်ယူၣ်ကီၢ်ရ့ၣ်ဟီၣ်ကဝီၤပူၤမ့အိၣ်ဘၣ်ဆၣ် မ့မ့ၢ်လၢ ချၢၣ်လွံၢ်ထူၣ် ကီၢ်ရ့ၣ်(သုးက့ ၃),ဒူသထူၣ်ကီၢ်ရ့ၣ်(သုးက့ ၁)ဒီး ဘျံးဒဝဲၢ်ကီၢ်ရ့ၣ်(သုးက့ ၄)ဟီၣ်ကဝီၤအပူၤန့ၣ် ကရူၢ်အံၤအတၢ်ဘျးစဲ တအိၣ်ဝဲဒံး ဘၣ်အဃိ ခါဆူညါတၢ်ရဲၣ်တၢ်ကျဲၤ အိၣ်လၢကဒုးအိၣ်ထီၣ်ဝဲတုၤအန့ၢ်အဂ့ၢ်န့ၣ် (KSNG)ကရၢခိၣ် စံးဝဲန့ၣ်လီၤ.
