လါဖ့ၤဘြူၤအါရံၤ ၅ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်တရံးဝၢ်ခီ ဖၣ်အၣ်ကီၢ်ရ့ၣ်(သုးက့ ၇)သ့ၣ်ဘ့ၣ်ထၣ် KNLA သုးဝဲၤလီၢ်ခိၣ်သ့ၣ်တၢ်လီၢ်လၢ အပူၤကွံၥ်တၢ်လဲၤတ့ၢ် လီၤဒြိမ့ၣ်ပိၢ် အံၤန့ၣ် ဖဲတနံၤအံၤ ကညီဒီကလုၥ်စၢဖှိၣ်ကရၢမုၢ်နံၤအတီၢ်ပူၤ ဂီၤခီအဆၢကတီၢ်န့ၣ် တၢ်လဲၤတ့ၢ်လီၤကဒီးဝဲဒြိမ့ၣ်ပိၢ်(၂)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ် လီၤ.
ဖဲတနံၤအံၤလါဖ့ၤဘြူၤအါရံၤ ဂီၤခီ ၈း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် Kamikazi ဒြိ(၂)ဘ့ၣ်လၢအိၣ်ဟဲထီၣ်လၢမုၣ်အ့ပူၤ ကစၢၢ်တကပၤ အံၤ လဲၤတ့ၢ်လီၤဝဲမ့ၣ်ပိၢ် လၢသ့ၣ်ဘ့ၣ်ထၣ် လီၤတဲၥ်ပိၢ်ဖးထီၣ်ဝဲလၢတၢ်ဆါဟံၣ်ကွဲးကါမဲၥ်ချံအဃၢၤ(၁)ဖျၢၣ်ဒီး လီၢ်ခၢၣ်သးသ့ၣ်ပှၢ် ဝဲၤဒၢး အဃၢၤ (၁)ဖျၢၣ် အဂ့ၢ်န့ၣ် ပှၤဘၣ်မူဘၣ်ဒါလၢအိၣ်ဖဲန့ၣ်တဖၣ် စံးဝဲန့ၣ်လီၤ.
“ဒြိန့ၣ်(၂)ဘ့ၣ်ဟဲတ့ၢ်လီၤဝဲဖဲဂီၤခီ ၇း၅၀ တဖျၢၣ်ဒီးဖဲ ၈း၁၀ န့ၣ်တဖျၢၣ်. အလီၤတဲၥ်ပိၢ်ဖးထီၣ်ဖဲသရၣ်စီၤန့ၢ်ဆၢအတၢ်ဆါဟံၣ် ကပၤန့ၣ်တဖျၢၣ်ဒီးလၢသ့ၣ်ပှၢ်ဝဲၤဒၢးကပၤန့ၣ်တဖျၢၣ်.ခဲအံၤတၢ်ဟးဂူၥ်ဟးဂီၤခီန့ၣ်ပလဲၤကွၢ်တဘူၣ်ဘၣ်အဃိတသ့ၣ်ညါဘၣ် ဒံးဘၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တနံၤအံၤလါဖ့ၤဘြူၤအါရံၤ ၅ သီ လၢတၢ်လဲၤတ့ၢ်လီၤဒြိမ့ၣ်ပိၢ်ဘျီအံၤန့ၣ် မ့ၢ်စ့ၢ်ကီးဝဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပှဲၤထီၣ်(၇၉)နံၣ်အမုၢ်နံၤအဃိ တၢ်ဟဲတ့ၢ်လီၤဒြိအံၤလၢအအိၣ်ဒီးတၢ်ပညိၣ်လိၤလိၤအဂ့ၢ်န့ၣ် ကမျၢၢ်ဒီးပှၤဘၣ်မူဘၣ်ဒါလၢအိၣ်ဖဲန့ၣ် တဖၣ် ပဲၥ်ထံနီၤဖးစံးဝဲန့ၣ်လီၤ.
ဒီးဒြိလၢအဟဲတ့ၢ်လီၤမ့ၣ်ပိၢ်ဘျီဝဲအံၤန့ၣ် အိၣ်ဟဲထီၣ်ဝဲလၢမုၣ်အ့ပူၤဆၢလၥ်မဲၢ်သဝီတကပၤဒီး အပူၤကွံၥ်အမဲၥ်ညါ ခဲအံၤခီဖျိလၢတၢ်ဟဲ တ့ၢ်လီၤကဒီးဒြိမ့ၣ်ပိၢ် ဒ်အံၤအဃိ ကမျၢၢ်အိၣ်ဘူးဖဲန့ၣ်တဖၣ်အိၣ်ဒီးတၢ်ဘၣ်ယိၣ်ဘၣ်ဘှီအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဖၣ်အၣ်ကီၢ်ရ့ၣ်(သုးက့ ၇) သုးဝဲၤလီၢ်ခိၣ်သ့ၣ်တၢ်လီၢ်လၢတၢ်လဲၤတ့ၢ်လီၤဒြိမ့ၣ်ပိၢ်ခဲအံၤ အခိၣ် အဃၢၤန့ၣ် အဘူးကတၢၢ်ဖဲအပူၤ ကွံၥ်(၂၀၂၅)လါအီကူး ၁၀ ဟါခီ အဆၢကတီၢ်န့ၣ် သုးမီၤစိရိၤ(Y12)ကဘီယူၤလဲၤတ့ၢ် လီၤဝဲမ့ၣ်ပိၢ် အဖျၢၣ်(၂၀)ဃၣ်ဃၣ်ဆူ ကျိၣ်ယီၢ်လ့ ဟီၣ်ကဝီၤအပူၤဒံးဒီးလၢကဘီယူၤအံၤအဃိ ကမျၢၢ်လၢအိၣ်ဖဲန့ၣ်တဖၣ် ဃ့ၢ်ထီၣ်ဒံးဝဲဆူ ကီၢ်ကၠီၣ်တဲၣ်တကပၤ အါအါဂီၢ်ဂီၢ်ကဲထီၣ်ဒံးဝဲန့ၣ်လီၤ.
ဒ်န့ၣ်အသိးတချုးတၢ်ကဲထီၣ်သးအံၤဒံးဘၣ်တနံၣ်ဃီဖဲလါယနူၤအါရံၤ ၁၂ သီ ,လါယနူၤအါရံၤ ၃၁ သီဒီးလါမးရှး ၁၈ သီ အခါန့ၣ်စ့ၢ်ကီး တၢ်လဲၤတ့ၢ်လီၤဝဲ(Kamikazi)ဒြိမ့ၣ်ပိၢ်လၢဟီၣ်ကဝီၤပူၤဖဲန့ၣ်ကဲထီၣ်တ့ၢ်ဒံးဝဲန့ၣ်လီၤ.
သုးဟံန့ၢ်တၢ်စိတၢ်ကမီၤဝံၤလီၢ်ခံ ခ့ၣ်အဲၣ်ယူၣ်လီၢ်ခၢၣ်သးဒီး(KNLA)သုးဝဲၤလီၢ်ခိၣ်သ့ၣ်ဟီၣ်ကဝီၤ စးထီၣ်ဖဲအပူၤကွံၥ်(၂၀၂၄) လါအီး ကထိဘၢၣ် ၂၂ သီအဆိကတၢၢ်တဘျီတၢ်လဲၤတ့ၢ်လီၤဝဲ (Kamikazi) ဒြိမ့ၣ်ပိၢ် ၂ ဖျၢၣ်ဒီး အဃိဟီၣ်ကဝီၤပူၤဖဲန့ၣ် စးထီၣ် (၂၀၂၄) တုၤလၢ (၂၀၂၆)လါဖြ့ၤဘြူၤအါရံၤ ၅ သီအံၤ မ့ပၥ်ဖှိၣ်တၢ်လဲၤတ့ၢ်လီၤဒြိဒီးကဘီယူၤလဲၤခးလီၤတၢ်အိၣ်လံဝဲ (၆)ဘျီလံ အဂ့ၢ်န့ၣ် သ့ၣ်ညါဘၣ်န့ၣ်လီၤ.
