လါမးရှး ၁၁သီ, ၂၀၂၆နံၣ်, ခ့ၣ်အဲးစံၣ်,
ကညီကီၢ်စဲၣ်ရၤမတံဝ့ၢ်ဟီၣ်ကဝီၤအပူၤမဟါလါမးရှး(၁၀)သီအနံၤမုၢ်နၤခီအနၣ်ရံၣ်(၁၀)ဘျဲၣ်အဆၢကတီၢ်,တၢ်ခးလိၥ်သးကဲထီၣ်ဝဲဒီးတၢ်ဘၣ်ဘျူးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်(DKBA)ကရူၢ်ကရၢဖိဘၣ်ဒိဘၣ်ထံးဝဲ(၄)ဂၤအဂ့ၢ်သ့ၣ်ညါဘၣ်န့ၣ်လီၤ.
တၢ်ခးလိၥ်သးအံၤကဲထီၣ်ဝဲဒၣ်လၢဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ကရူၢ်ကရၢဒီးပယီၤသုးအစုတီၤအဖီလၥ်နီၢ်ဂံၢ်(၃)ကဝီၤဒ့ဝဲၤဒၢးပှၤအိၣ်ခိးတၢ်ဘံၣ်တၢ်ဘၢတဖၣ်အဘၢၣ်စၢၤအဂ့ၢ်,သ့ၣ်ညါဘၣ်န့ၣ်လီၤ.
ဘၣ်ဃးကရူၢ်ကရၢတၢ်ခးလိၥ်သးကဲထီၣ်အဖီခိၣ်,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)လီၢ်ခၢၣ်သးသုးဂ့ၢ်ဝီဝဲၤကျိၤ,အဝဲၤကျိၤခိၣ်(သုးခိၣ်ဒိၣ်ဂီၢ်ဂ့ၢ်)စီၤဖါဘျဲၣ်စံးဝဲဒ်အံၤန့ၣ်လီၤ.
အဝဲစံးဝဲလၢ“တၢ်ကဲထီၣ်သးန့ၣ်ယသ့ၣ်ညါဘၣ်ဆၣ်တလီၢ်တံၢ်ဒံးဘၣ်အဃိပတဲတသ့ခဲလၢၥ်ဒံးဘၣ်,အခီၣ်ထံးခီၣ်ဘိန့ၣ်မ့ၢ်စးထီၣ်လၢပပှၤလဲၤကွံၥ်လီၤတၢ်လၢပယီၤတၢ်လီၢ်ဒီးဘၣ်သံဝဲပယီၤတဂၤအဃိခီဧါမ့ၢ်ဒ်လဲၣ်ဒ်လီၣ်ပနၢ်ဟူကၠါန့ၣ်အဃိပဃုမၤလီၤတံၢ်အဖၢမုၢ်ဒံးလီၤ.ဒီးဖဲမဟါန့ၣ်တၢ်ကဲထီၣ်လၢတၢ်ဂ့ၢ်တၢ်ကျိၤလၢအဂၤဘံဘူသးအိၣ်တဘျူးမံၤညါအဃိပဂုၥ်ကျဲးစၢးမၤလီၤတံၢ်အီၤအဖၢမုၢ်လီၤ”အဂ့ၢ်စံးဝဲဒၣ်န့ၣ်လီၤ.
မဟါတၢ်ကဲထီၣ်သးအံၤဒ်ရၤမတံဟီၣ်ကဝီၤတၢ်ကစီၣ်သန့တဖၣ်ပၥ်ဖျါဝဲအသိးန့ၣ်,(DKBA)(၉၀၇)သုးရ့ၣ်ခိၣ်သုးခိၣ်ကၠံၤလ့ဒီးအပှၤဂံၢ်ဘါအဂၤ(၄၀)ဃၣ်ဃၣ်သ့ၣ်တဖၣ်အံၤလါမးရှး(၁၀)သီမုၢ်နၤခီအဆၢကတီၢ်လဲၤဃီၤဝဲဆူနီၢ်ဂံၢ်(၃)ကဝီၤဒ့ခိၣ်ဝဲၤဒၢးတၢ်လီၢ်တၢ်ကျဲန့ၣ်လီၤ.
ဒီးခီဖျိတၢ်ဂ့ၢ်တၢ်ကျိၤတၢ်ကတိၤအါတၢ်တခါအဖီခိၣ်အဝဲသ့ၣ်ခးဆိဝဲကဝီၤဒ့ခိၣ်ဝဲၤဒၢးအဃိ,ကဝီၤဒ့ဝဲၤဒၢးပယီၤသုးအပှၤအိၣ်ခိးတၢ်ဘံၣ်တၢ်ဘၢတဖၣ်က့ၤခးဆၢကဒါဝဲဒီးဘၣ်ဒိဘၣ်ထံးဝဲအဂ့ၢ်,ပၥ်ဖျါဝဲဒၣ် န့ၣ်လီၤ.
ကညီကီၢ်စဲၣ်,ရၤမတံဝ့ၢ်ဟီၣ်ကဝီၤအံၤပယီၤသုးနုၥ်လီၤဝဲအလီၢ်ခံစးထီၣ်ဝဲလါဖ့ၤဘြူၤအါရံၤအပူၤမၤဝဲတၢ်နုၥ်လီၤဖီၣ်(DKBA)ကၤစံၣ်နိၣ်တၢ်လီၢ်တၢ်ကျဲဒီးအၤဝၤဒ့တၢ်တၤကျိၣ်တၤစ့တၢ်လိၣ်ကွဲလီၢ်တၢ်ကျဲတဖၣ်တပယူၥ်ဃီအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,ခီဖျိခံခီခံကပၤတၢ်ဖ့ၣ်ဆၢစဲးပြဲးဒီးတၢ်ခးလိၥ်သးကဒဲကဒဲအိၣ်ထီၣ်ဝဲတဆံးတက့ၢ်ဒ်အံၤအဃိ,ကမျၢၢ်လီၢ်ကဝီၤဖိတဖၣ်အိၣ်ဒီးတၢ်ဘၣ်ယိၣ်ဘၣ်ဘှီလၢယံၥ်ထီၣ်ယံၥ်ထီၣ်တၢ်သးတမံလိၥ်သးကအါထီၣ်ဒီးတၢ်ခးလိၥ်ကအိၣ်ထီၣ်ဒိၣ်ဒိၣ်မုၢ်မုၢ်အဂ့ၢ်,ရၤမတံဝ့ၢ်ဟီၣ်ကဝီၤတၢ်စီၣ်သန့တဖၣ်ပၥ်ဖျါထီၣ်ဝဲဒၣ်စ့ၢ်ကီးန့ၣ်လီၤ.
