လါမးရှး ၁၀ သီ, ၂၀၂၆ နံၣ်, ခ့ၣ်အဲးစံၣ်
ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်ဟီၣ်ကဝီၤပူၤ ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢခံခီခံကပၤ အဘၢၣ်စၢၤ ဒီး ဒူသဝီ(၅)ဖျၢၣ် လီၢ်ကဝီၤကမျၢၢ်အဂၤ(၄၀၀၀)ဘျဲၣ်ဘၣ်ဃ့ၢ်ထီၣ်ဝဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံးဝဲန့ၣ်လီၤ.
စးထီၣ်ဖဲအပူၤကွံၥ်လါမးရှး ၅ သီအနံၤန့ၣ် ဟီၣ်ကဝီၤအပူၤတၢ်ဒုးကဲထီၣ်တအိၣ်ပယီၤသုး (ခမရ-၂၀/ ခမရ-၄၃၉)ဒီး (ခလရ-၂၆၄) သုးပၥ်ဖှိၣ်သ့ၣ်တဖၣ်အံၤနုၥ်လီၤဝဲဒၣ်လၢ(ရေတွင်းကုန်း)ကရူၢ်ပူၤဝံၤဖီၣ်ဃၥ်ဝဲကမျၢၢ်(၁၆၀)ဂၤ ဒီး တကတီၢ်ဃီ ဖဲလါမးရှး ၇ သီအနံၤ ပယီၤသုးလၢနုၥ်လီၤတဖၣ်အံၤဒီး(KNLA)သုးပၥ်ဖှိၣ်အဘၢၣ်စၢၤတၢ်ဒုးကဲထီၣ်ဝဲဒိၣ်ဒိၣ်မုၢ်မုၢ်န့ၣ် လီၤ.
တၢ်ဒုးကဲထီၣ်အကတီၢ်ခီဖျိပယီၤသုးအံၤသူဝဲဒြိ,ကဘီယူၤဒီးကျိဖးဒိၣ်အဃိ သဝီဖိလၢတၢ်ဖီၣ်ဃၥ်ဝဲအဂၤ(၁၆၀)ဘျဲၣ်လၢပယီၤ သုးပၥ်ဝဲဖဲသဝီပူၤတဖၣ်အကျါ သံကွံၥ်ဝဲ(၂၅)ဂၤဒီး တကးဒံးဘၣ်မၤသံဃုၥ်ဝဲကမျၢၢ်(၅)အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ် ပၥ်ဖျါဝဲန့ၣ်လီၤ.
ခီဖျိပယီၤသုးကျိၤနုၥ်လီၤတၢ်ဒုးကဲထီၣ်,ကဘီယူၤဒီးဒြိအမဲၥ်ညါဖီၣ်တ့ၢ်ဃၥ်မၤသံဃုၥ်ကမျၢၢ်ကဲထီၣ်ဒ်အံၤအဖီခိၣ် (ရေတွင်းကုန်း) သဝီဟံၣ်ခိၣ်(၂၅၅)ဖျၢၣ် ပှၤနီၣ်ဂံၢ်(၁၃၁၁)ဂၤ, (ဒလဆိပ်)သဝီဟံၣ်ခိၣ်(၁၁၁)ဖျၢၣ် ပှၤနီၣ်ဂံၢ်(၄၈၀)ဂၤ, (ကျောင်းကုန်း) ဟံၣ်ခိၣ် (၂၇၇)ဖျၢၣ် ပှၤနီၣ်ဂံၢ်(၁၄၁၁)ဂၤ,(ဝက်ချဲ)သဝီ ဟံၣ်ခိၣ်(၅၃)ဖျၢၣ် ပှၤနီၣ်ဂံၢ်(၂၇၆)ဂၤဒီး (အင်းပရိ)သဝီ ဟံၣ်ခိၣ်(၁၂၄)ဖျၢၣ် ပှၤနီၣ်ဂံၢ် (၆၁၉)ဂၤ ကမျၢၢ်ပၥ်ဖှိၣ်(၄၀၉၇)ဂၤ ဘၣ်ဃ့ၢ်ထီၣ်ဝဲအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤသ့ၣ်ညါဘၣ်န့ၣ်လီၤ.
ဒ်န့ၣ်အသိးတကီၢ်ခါခဲအံၤလီၢ်ကဝီၤဒူသဝီဖဲန့ၣ်အပူၤခီဖျိလၢပယီၤသုးဒီးဟီၣ်ကဝီၤ(KNLA)သုးပၥ်ဖှိၣ်အဘၢၣ်စၢၤဒုးယၤတၢ်ဖ့ၣ်စၢ ဆဲးကဲ ထီၣ်ဒံးဝဲဒီးတကးဒံးဘၣ်ပယီၤသုးခးလီၤကျိဖးဒိၣ်,ဒြိ,ကဘီယူၤစ့ၢ်ကီးလဲၤခးလီၤတၢ်တပယူၥ်ဃီအဃိကမျၢၢ်လၢ အဃ့ၢ် ထီၣ်သ့ၣ်တဖၣ် သဂၢၢ်ဘၣ်ဝဲတၢ်ကီတၢ်ခဲအါမး အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်ချၢၣ်လွံၢ်ထူၣ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် လၢပယီၤသုးအတၢ်နုၥ်လီၤလၢ(ရေတွင်းကုန်း) ကရူၢ်ပူၤဘျီဝဲအံၤ ကမျၢၢ် လၢအသံလၢပယီၤသုးအကျိဖးဒိၣ်,ဒြိဒီးကဘီယူၤအဃိသ့ၣ်တဖၣ်အံၤမ့ၢ်ဝဲ (ကျောင်းကုန်း)သဝီဖိ ၂၁ ဂၤ ဒီး (ဒလပ်ဆိပ်) သဝီဖိ ၄ ဂၤ ပၥ်ဖှိၣ်ခဲလၢၥ်(၂၅)ဂၤ ဒီး ဘၣ်ဒိဘၣ်ထံးစ့ၢ်ကီးဝဲ(၁၇)ဂၤန့ၣ်လီၤ.
မ့ဘၣ်ကွၢ်လၢကမျၢၢ်လၢအသံ(၂၅)ဂၤတဖၣ်အကျါန့ၣ်ပၣ်ဃုၥ်ဝဲပိၥ်မုၣ်(၁၆)ဂၤညါဒီး ဒ်န့ၣ်အသိးပှၤသံသ့ၣ်တဖၣ်အံၤ စ့ၢ်ကီး ပၣ်ဃုၥ်ဝဲဖိသၣ်(၆)နံၣ်ဒီး(၁၆)နံၣ်အဘၢၣ်စၢၤ ၁၆ ဂၤ အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီအပူၤ န့ၣ်လီၤ.
တကးဒံးဘၣ်လၢအန့ၣ်အမဲၥ်ညါပယီၤသုးအံၤဖီၣ်မၤသံကွံၥ်ဝဲ(ရေတွင်းကုန်း)သဝီဖိပိၥ်ခွါ ၄ ဂၤဒီး(ဒလပ်ဆိပ်)သဝီဖိပိၥ်ခွါ ၁ ဂၤ ဒီး ပှၤ(၅)အံၤအကျါ(၄)ဂၤန့ၣ်မ့ၢ်ဝဲကညီကလုၥ်န့ၣ်လီၤ.
တကီၢ်ခါခဲအံၤပယီၤသုးလၢအနုၥ်လီၤဟူးဂဲၤဖဲ(ရေတွင်းကုန်း)ကရူၢ်အပူၤအံၤတဖၣ်တဟးထီၣ်ဒံးဝဲဘၣ်ဆဲးဟူးဂဲၤဒံးဝဲဖဲန့ၣ် အဖၢမုၢ် အဂ့ၢ်န့ၣ် လီၢ်ကဝီၤကမျၢၢ်စံးဝဲန့ၣ်လီၤ.
လီၤဆီဒၣ်တၢ်ချၢၣ်လွံၢ်ထူၣ်ကီၢ်ရ့ၣ်(သုးက့ ၃),ဘျံးဒဝဲၢ်ကီၢ်ရ့ၣ်(သုးက့ ၄)ဒီးမုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤ ၃ ဘ့ၣ်အံၤ အပူၤ မ့ဘၣ်ကွၢ်စးထီၣ်ဖဲလါမးရှးထီၣ် ၅ သီတုၤဃီၤဖဲမဟါ ၉ သီ ထဲဒၣ်လၢ(၅)သီအတီၢ်ပူၤအံၤ ခီဖျိလၢသုးမီၤစိရိၤအကဘီယူၣ်, ဒြိ, ကျိဖးဒိၣ်အံၤအဃိ ကမျၢၢ်သံပၥ်ဖှိၣ်အိၣ်လံဝဲအဂၤ(၄၀)လံအသိးဘၣ်ဒိဘၣ်ထံးစ့ၢ်ကီးအိၣ်လံဝဲ(၃၀) ခိၣ်ဃၢၤလံအဂ့ၢ်န့ၣ် သ့ၣ်ညါဘၣ်န့ၣ်လီၤ.
