လါမးရှး ၅ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်ဝတံၣ်-ကီးတရံးကျဲလီၢ်လံၤ တီနီၢ်ကစၢၢ်ကျဲ အီၣ်ဘိၤတဲတၢ်လီၢ် တကပၤန့ၣ် စးထီၣ်ဖဲတလါ အံၤလါမးရှး ၁ သီအနံၤန့ၣ် တၢ်ဒုးက့ၤဆူၣ်ထီၣ်ကဒါက့ၤဝဲလၢပယီၤသုးဒီးဟီၣ်ကဝီၤကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် အဘၢၣ်စၢၤအဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢကရူၢ်အအိၣ်န့ၣ်လီၤ.
ပယီၤသုးကျိၤဟဲထီၣ်နုၥ်လီၤဝဲလၢတီနီၢ်ကစၢၢ်ကျဲလီၢ်လံၤတကးဒံးဘၣ်အမဲၥ်ညါ ပယီၤသုးလၢအိၣ်ထံဖိစီသဝီ,ယီၢ်ကိၥ်သဝီသ့ၣ်တဖၣ် အံၤစ့ၢ်ကီးသူဝဲဒၣ်ကဘီယူၤ,ကျိဖးဒိၣ်,ဒြိ ခးလီၤစိဝဲတၢ်ဆူ အီၣ်ဘိၤတဲတၢ်လီၢ်တကပၤအဂ့ၢ်န့ၣ် သိၣ်မှံၤသုးပၥ်ဖှိၣ်ကရူၢ် ပှၤဘၣ်မူဘၣ်ဒါ တဂၤ စံးဝဲန့ၣ်လီၤ.
အဝဲစံးဝဲလၢ“လၢပျီပူၤဒုတၢ်ဒုးဆူၣ်ထီၣ်လီၤ.အဝဲသ့ၣ်လီကီဝဲ(အီၣ်ဘိၤတဲ)တၢ်လီၢ်မီၤ.မ့မၤဝဲဒ်န့ၣ်မးအဝဲသ့ၣ်အိးထီၣ်ကဒါအ့ရှါကျဲကန့ၢ် အဃိအဝဲသ့ၣ်ဟဲခးလီၤတၢ်ဒီးကဘီယူၤ.ကဘီယူၤလဲၤခးလီၤတၢ်တုၤလၢမံၣ်ဖးလဲၢ်,ယီၢ်ကိၥ်,အီၣ်ဘိၤတဲ သီခါဖၠၣ်အဃၢၤန့ၣ်ညါ. ပယီၤသုး(၉၇)စ့ၢ်ကီးခးလီၤတၢ်ဒီးဒြိ,ကျိဖးဒိၣ်အိၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤန့ၣ်လီၤ.
တကးဒံးဘၣ်ကြုၢ်တု-ကီးတရံးကျဲအံၤဒ်သိးတၢ်ပၢၢ်ဆၢသိၣ်မှံၤကရူၢ်ဟဲထီၣ်ဝဲသုတတုၤတဂ့ၤအဂီၢ် ပယီၤသုးအံၤဟူးဂဲၤမၤအါထီၣ် အသုးဂံၢ်ဘါ လၢတန့ခၠါ(နဘူ)-ယ့ၤကွဲတီၤ(ရင်ကွဲတောင်)သုးကလၢၤတၢ်လီၢ်ဒီးနွါခၠၤကိသဝီတကပၤအဂ့ၢ်န့ၣ် တၢ်ပၢၢ်ဆၢသုးကရူၢ် တကပၤ စံးဝဲအသိး သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤကြုၢ်တုတၢ်ပၢၢ်ဆၢကရူၢ်အပှၤတဂၤစံးဝဲလၢ“ဖဲ ၃ သီဟါခီအခါန့ၣ်ပယီၤသုးဒွဲၣ်အူဝဲ(နွါခၠၤကိ)ဝးဝးတရံးလီၤ. .မ့ဝံၤလၢသဝီၤပူၤန့ၣ်အဝဲသ့ၣ်ခူၣ်လီၤဝဲတၢ်ပူၤတဖၣ်. တကးဒံး ဘၣ်ခဲအံၤအဝဲသ့ၣ်က့ၤတ့ဂ့ၤထီၣ်ကဒါဝဲနဘူ(တန့ခၠါ)-ယ့ၤကွဲတီၤ သုးကလၢၤလံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါပယီၤသုးနီၣ်ဂံၢ်လၢကအိၣ်အဂၤ(၇၀)ဃၣ်ဃၣ်အံၤလၢကြုၢ်တုအံၤတဆီဟဲထီၣ်မၤပှဲၤအါထီၣ်အသုးဂံၢ်ဘါလၢနဘူ(တန့ခၠါ)-ယ့ၤကွဲတီၤသုးကလၢၤဒီး ဒ်န့ၣ်အသိးအဝဲသ့ၣ်အံၤဆီလီၤဝဲတၢ်သမံသမိးတြဲၤ အိၣ်ခိးသမံသမိးဝဲလီၢ်ကဝီၤကမျၢၢ်လၢ အလ့ၢ်ထီၣ်လ့ၢ်လိၤဖဲန့ၣ်တဖၣ်အဂ့ၢ်န့ၣ် ကမျၢၢ်လၢအိၣ်ဘူးဖဲန့ၣ်တဖၣ်စံးဝဲန့ၣ်လီၤ.
ပယီၤသုးလၢအဟဲထီၣ်နုၥ်လီၤဆူမၠၣ်ဝတံၣ်-ကီးတရံး တီၢ်နီၢ်ကစၢၢ်ကျဲလီၢ်လံၤ အီၣ်ဘိၤတဲကျဲတကပၤအံၤတဖၣ် ကျဲလီၢ်လံၤအမဲၥ်ညါ အဝဲသ့ၣ်အံၤအိၣ်ကတီၤထီၣ်အသးလၢကဒိၣ်စိဆီလီၤအသးလၢထိၣ်ကီၥ်ကိဒီးကၠဲၣ်အူၣ်တီၤကျဲတၢ်လီၢ်သ့ၣ်တဖၣ်အံၤအိၣ်ဝဲအဂ့ၢ်န့ၣ် ပှၤလၢအဘူးဒီးပယီၤသုးအံၤတဖၣ်စံးဝဲအသိးသ့ၣ်ညါဘၣ်န့ၣ်လီၤ.
