လါအ့ဖြ့ၣ် ၉ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)ဟီၣ်ကဝီၤတၢ်ဒုးဃၥ်ဃိၥ်အပူၤ လၢကီၢ်ခိၣ်တၢ်ကလုၢ် အံၤတဆီ တၢ်ပျၢ်ပူၤဖျဲးကဒီး ဝဲပှၤဃိၥ်ဖိ(၃၈)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ် ဘိးဘၣ်ရၤလီၤဝဲ ဖဲတနံၤအံၤန့ၣ်လီၤ.
ဖဲအပူၤကွံၥ်လါအ့ဖြ့ၣ် ၆ သီအနံၤန့ၣ် လၢဖၣ်အၣ်ကီၢ်ရ့ၣ်တၢ်လီၢ်တတီၤအပူၤ ဖၣ်အၣ်ကီၢ်ရ့ၣ်ပၢၤကီၢ်ပှၤဘၣ်မူဘၣ်ဒါတီခိၣ်ရိၣ် မဲမၤဝဲတၢ်ပျၢ်လီၤက့ၤပှၤဃိၥ်ဖိမူးတၢ်ရဲၣ်တၢ်ကျဲၤန့ၣ်လီၤ.
ပှၤဃိၥ်ဖိလၢတၢ်ပျဲပူၤဖျဲးထီၣ်အီၤဘျီဝဲအံၤန့ၣ် ပိၥ်ခွါ(၃၅)ဂၤဒီးပိၥ်မုၣ်(၃)ဂၤ ပၥ်ဖှိၣ်ခဲလၢၥ်(၃၈)ဂၤန့ၣ်လီၤ. ဒီးပှၤလၢတၢ်ပျဲပူၤဖျဲးအီၤ သ့ၣ်တဖၣ်အံၤလီၤဆီဒၣ်တၢ်မ့ၢ်ပှၤလၢအသးနံၣ်ပှၢ်,လၢလူၤပိၥ်မၤထွဲတၢ်သိၣ်တၢ်သီဒီးပှၤလၢတၢ်အိၣ်ဆူၣ်အိၣ်ချ့တဂ့ၤဘၣ်သ့ၣ် တဖၣ်အဂ့ၢ်န့ၣ် လံၥ်တၢ်ပၥ်ဖျါအပူၤစံးဝဲန့ၣ်လီၤ.
တကးဒံးဘၣ်ပှၤဃိၥ်ဖိလၢတၢ်ပျၢ်ဖျဲးအီၤတဖၣ်အံၤဒ်သိးခါဆူမဲၥ်ညါကပူၤဖျဲးဒီးတၢ်မၤကမၣ်ကွီၢ်မ့ၣ်အဂီၢ်န့ၣ် ကီၢ်ရ့ၣ်ပှၤဘၣ်မူဘၣ် ဒါတဲနၢ်ပၢၢ် အဝဲသ့ၣ်အမဲၥ်ညါ ပှၤသ့ၣ်တဖၣ်အံၤလၢကက့ၤဆူအဒူသဝီအဂီၢ် တၢ်ဟ့ၣ်လီၤမၤစၢၤဝဲစ့ဆီၣ်ထွဲလၢတၢ်လဲၤ တၢ်က့ၤ, တၢ်အီၣ်တၢ်အီအဂီၢ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်မၤဝဲတၢ်ပျၢ်ပူၤဖျဲးကွံၥ်ပှၤဃိၥ်ဖိတၢ်ရဲၣ်တၢ်ကျဲၤဘျီဝဲအံၤအပူၤန့ၣ် ဖၣ်အၣ်ကီၢ်ရ့ၣ် နဲၣ်ရွဲၣ် ပဒိၣ်စီၤဘးဒံၤဖိ, ကီၢ်ရ့ၣ်ပၢၤကီၢ်ခိၣ် သုးခိၣ်ဒိၣ်ဂီၢ်ဂ့ၢ် စီၤမီၤကၠံၤ ဃုၥ်ဒီးခိၣ်နၢ်ဘၣ်ထွဲလၢအဂၤတဖၣ် ဟဲထီၣ်ဝဲဒၣ်န့ၣ်လီၤ.
ဘၣ်ဃးတၢ်ပျၢ်ပူၤဖျဲးကွံၥ်ပှၤဃိၥ်ဖိလၢတၢ်ကမၣ်ပူၤအံၤန့ၣ် အဆိကတၢၢ်တဘျီဖဲအပူၤကွံၥ်လါဖ့ၤဘြူၤအါရံၤ ၂၃ သီအနံၤ လၢဒူပျၥ်ယၥ်ကီၢ်ရ့ၣ်(သုးက့ ၆) တၢ်ဒုးဃၥ်ဃိၥ်ပူၤအံၤစ့ၢ်ကီး တၢ်ပျၢ်ပူၤဖျဲးဝဲပှၤဃိၥ်ဖိ(၁၀၄)ဂၤဝံၤ မၤကဒီးဖဲလါဖ့ၤဘြူၤအါရံၤ ၂၅ သီ အခါ စ့ၢ်ကီး ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ပျၢ်ပူၤဖျဲးကွံၥ်ဝဲပှၤဃိၥ်ဖိ(၂၉)ဂၤဒံးန့ၣ်လီၤ.
ကီၢ်ရ့ၣ်ကိးဘ့ၣ်ဒဲးအပူၤဘၣ်ဃးတၢ်ပျၢ်ပူၤဖျဲးကွံၥ်ပှၤဃိၥ်ဖိတၢ်ရဲၣ်တၢ်ကျဲၤအံၤ ဟဲခီဖျိဝဲလၢခ့ၣ်အဲၣ်ယူၣ်အကီၢ်ခိၣ်တၢ်ကနဲၣ်လီၤဒီး တကတီၢ်ဃီပှၤဃိၥ်ဖိသ့ၣ်တဖၣ်အံၤကိးမုၢ်နံၣ်ဒဲးဖဲလါဖ့ၤဘြူၤအါရံၤ ၁၁ သီ ကညီဒီကလုၥ်မုၢ်နံၤန့ၣ် ပှၤဃိၥ်ဖိလၢအတၢ်ကမၣ် တဒိၣ်ဘၣ်တဖၣ် တၢ်ကပျၢ်လီၤကွံၥ်ဝဲအဃိ နံၣ်လၢကဟဲကိးမုၢ်နံၣ်ဒဲးန့ၣ် တၢ်ရဲၣ်တၢ်ကျဲၤအိၣ်လၢတၢ် ကဆဲး ပျၢ်လီၤဝဲအဂ့ၢ်န့ၣ် ခ့ၣ်အဲၣ်ယူၣ် စံးဝဲအသိးသ့ၣ်ညါဘၣ်န့ၣ်လီၤ.
