လါအ့ဖြ့ၣ် ၃၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် အီးဖးသဝီဖးဒိၣ်အပူၤ ဖဲမဟါအနံၤခီဖျိပယီၤသုးလဲၤတ့ၢ်လီၤဝဲ ဒြိမ့ၣ်ပိၢ်အဃိ ကမျၢၢ်သံ(၂)ဂၤအကျါပၣ်ဃုၥ်ဝဲဖိသၣ်တဂၤဒီး ဘၣ်ဒိဘၣ်ထံးဝဲ(၂)ဂၤအဂ့ၢ်န့ၣ် သ့ၣ်ညါဘၣ်လၢကီးတရံးကမျၢၢ် တဖၣ်အအိၣ်န့ၣ်လီၤ.
ဖဲမဟါလါအ့ဖြ့ၣ် ၂၉ သီ ဂီၤခီ ၉း၂၀ မံးနံးဃၣ်ဃၣ်အဆၢကတီၢ်န့ၣ် ခီဖျိပယီၤသုးအံၤလဲၤတ့ၢ်လီၤဝဲဒြိမ့ၣ်ပိၢ် လီၤတဲၥ်ပိၢ် ဖးထီၣ်ဝဲ လၢ အီးဖးသဝီဖးဒိၣ်(ဖန်းခါကုန်း)တၢ်လီၢ်အဃိ ဘၣ်သံဝဲကမျၢၢ်ပိၥ်ခွါ(၁)ဂၤဒီးဖိသၣ်(၁)ဂၤအမဲၥ်ညါ ဖိသၣ်လၢ အသးနံၣ်တပှဲၤ ဒံးဘၣ်(၂)ဂၤ ဘၣ်ဒိဘၣ်ထံးဝဲစ့ၢ်ကီးအဂ့ၢ်န့ၣ် လီၢ်ကဝီၤကမျၢၢ်စံးဝဲန့ၣ်လီၤ.
“ပယီၤသုးကလၢၤလၢအိၣ်ဖဲကီးတရံးဝ့ၢ်ပူၤတဖၣ်န့ၣ် အဟဲတ့ၢ်လီၤတၢ်ဒီးဒြိအိၣ်တလီၢ်လီၢ်လီၤ.ပှၤကမျၢၢ်ဃ့ၢ်တၢ်ဒုး ဟးပလဲၥ် သးတဖၣ် ခီဖျိတၢ်ကီတၢ်ခဲအိၣ်အါအဃိအဝဲသ့ၣ်ဟဲက့ၤအိၣ်လၢအဟံၣ်အဃီ,ဟဲက့ၤအိၣ်ဘျီတဘၣ်ပှၤအဂၤဘၣ် ဘၣ်ဝဲဒၣ်ကမျၢၢ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါပယီၤသုးဟဲတ့ၢ်လီၤဒြိဘျီဝဲအံၤ ဟံၣ်တၢ်သူၣ်ထီၣ်ဟးဂီၤစ့ၢ်ကီးဝဲ(၁)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤ လၢကီးတရံး-မၠၣ်ဝတံၣ်အ့ရှါကျဲမုၢ်အခိၣ်အဃၢၤန့ၣ် သုးမီၤစိရိၤဒိၣ်စိဝဲဒီး ဆီလီၤပၥ်လီၤဃၥ်ဝဲ တၢ်ဘံၣ်တၢ်ဘၢ လၢလၢပှဲၤပှဲၤအဂ့ၢ်န့ၣ် တၢ်ပၢၢ်ဆၢသုးကရူၢ်တကပၤ စံးဝဲန့ၣ်လီၤ.
လၢန့ၣ်အမဲၥ်ညါသုးမီၤစိရိၤအံၤတၢ်ရဲၣ်တၢ်ကျဲၤအိၣ်လၢကလဲၤထီၣ်ဝဲဆူ(သုးက့ ၆)ကီးတရံးကလံၤထံးတကပၤ အိၣ်အသိး ခဲအံၤပယီၤသုးနုၥ်လီၤဟူးဂဲၤဝဲဒၣ်လၢကမဲၤကိ(ကမိုင်ကုန်း)ဒီးကၠီၤစှၤကိ(ကြောင်လျှာကုန်း)သဝီတကပၤအိၣ်ဝဲအဂ့ၢ်န့ၣ် (KNLA)အပှၤစံးဝဲ အသိး သ့ၣ်ညါဘၣ်န့ၣ်လီၤ.
