(စစ်ကူ)သုးကျိၤခးဝဲလ့က့ၣ်ကမျၢၢ်ပှၤဃ့ၢ်မှံဟးဖျိးသိလ့ၣ်အဃိ သဝီဖိဒီဖိမိၢ်သံ(၂)ဂၤ,ဘၣ်ဒိ(၂)ဂၤဒီးဖီၣ်က့ၤကိးဝဲ(၄)ဂၤ

လါမ့ၤ ၁၂ သီ, ၂၀၂၆ နံၣ်, ခ့ၣ်အဲးစံၣ်

ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ ပယီၤသုးကျိၤလၢဟဲထီၣ်(စစ်ကူ)ဖဲတးပီသုးကလၢၤတဖၣ်ခးဝဲကမျၢၢ်ပှၤဃ့ၢ် မှံဟး ဖျိးအသိလ့ၣ်တခိၣ်အဃိ ပှၤဒီဖိမိၢ်သံဝဲ(၂)ဂၤ,ဘၣ်ဒိ(၂)ဂၤတကးဒံးဘၣ်အမဲၥ်ညါဖီၣ်က့ၤကိးဝဲကမျၢၢ်(၄)ဂၤအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲဒၣ်န့ၣ်လီၤ.

ဖဲလါမ့ၤ ၉ သီ မုၢ်ဃ့ၢ်လီၤ ၂း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် လၢပယၢ်ရီကရူၢ် လ့က့ၣ်(တောင်ဂူ၀)ဃိၣ်ဖိကျဲ ကမျၢၢ် ပှၤဃ့ၢ်တၢ်ဒုးဖိ(၈)ဂၤလၢအိၣ်သိလ့ၣ်ပူၤလၢအပၣ်ဃုၥ်ဝဲဖိဒံဖိသၣ်ဒီးပိၥ်မုၣ်ပိၥ်မၢၤတဖၣ်အံၤ ပယီၤသုးကျိၤလၢအဟဲထီၣ်လူၤ (စစ်ကူ)ဖဲတးပီသုးကလၢၤအံၤတဖၣ် ကိးပတုၥ်ဒီးခးဝဲဒၣ်သိလ့ၣ်အံၤန့ၣ်လီၤ.

ခီဖျိလၢပယီၤသုးခးဝဲအံၤအဃိ ပှၤဒီဖိမိၢ်ခံဂၤလၢအမ့ၢ် နီၢ်ဖိပံၤနါ(ကိး)နီၢ်ဖီအဲၣ်(၄၆)နံၣ်အံၤဒီးအဖိမုၣ် နီၢ်ပါအံၣ်ဖၠူၤ(၁၃)နံၣ်အံၤ သံကွံၥ်ဝဲဒီး အဖိမုၢ်နီၢ်ရှါမၣ်လ့(၁၅)နံၣ်အံၤဒီးစီၤမီၤခဲ(၄၉)နံၣ်ခံဂၤအံၤဘၣ်ဒိဘၣ်ထံးဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဘၣ်ဃးတၢ်ဂ့ၢ်အံၤလီၢ်ကဝီၤပှၤဘၣ်မူဘၣ်ဒါစံးဝဲလၢ“တၢ်န့ၣ်ဘၣ်ဖဲပှၤသဝီဖိလၢအဃ့ၢ်တၢ်ဒုးတဖၣ်န့ၣ်ဟဲက့ၤဒီးသိလ့ၣ်. သိလ့ၣ် တခိၣ်န့ၣ်ပၣ်ဝဲဒၣ်ပှၤကညီ(၈)ဂၤ.ဖဲအတုၤဖဲ(တောင်ဂူ၀)ကျဲအခါန့ၣ် ပယီၤသုး န့ၣ်မၢအတၢ်အိၣ်ပတုၥ်.ဖဲန့ၣ်ပှၤအိၣ်ပတုၥ်ကါ တဘျီဃီန့ၣ်ပှၤခးကါတဘျီဃီဒီးကျိဖိတဖၣ်လီၤ.ဒီးဖဲန့ၣ်နီၢ်ဖီအဲၣ်ဒီးအဖိမုၣ်န့ၣ်သံ.မ့ဝံၤအဖိမုၣ်လၢအဝဲတဂၤနါက့ဘၣ်ဒိ,.မ့မ့ၢ်လၢစီၤမီၤခဲတဂၤန့ၣ်ခီန့ၣ်ပှၤခးအီၤဘၣ်ဘျီအဝဲစံၣ်ဖျိးထီၣ်.မ့မ့ၢ်လၢအဝဲ(၄)ဂၤန့ၣ်ပယီၤသုးဖီၣ်က့ၤကိးဝဲ”အဂ့ၢ်န့ၣ် စံးဝဲန့ၣ်လီၤ.

သဝီဖိလၢပယီၤသုးဖီၣ်က့ၤကိးဝဲ(၄)ဂၤန့ၣ်မ့ၢ်ဝဲ ပှၤနီသိလ့ၣ်ဖိ စီၤစ့ၤယၤ, စီၤဖါပှဲၤ,စီၤမီၤစါဒီးစီၤဝ့စီၣ်ထဲၣ်သ့ၣ်တဖၣ်ဒီး ပှၤ(၄)ဂၤ အံၤအကျါမုၢ်ဆ့ၣ်ထီၣ် လါမ့ၤ ၁၀ သီအနံၤန့ၣ် မ့မ့ၢ်စီၤစ့ၤယၤဒီးစီၤဖါပှဲၤ(၂)ဂၤအံၤတၢ်ပျၢ်လီၤက့ၤဝဲဘၣ်ဆၣ်လၢအဝဲခံဂၤန့ၣ် တုၤလၢခဲအံၤတၢ်ဖီၣ်တ့ၢ်ဃၥ်ဒံးဝဲအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.

သုးမီၤစိရိၤအံၤလၢကဒီသဒၢဝဲတးပီသုးကလၢၤအံၤအဂီၢ် ဖဲအပူၤကွံၥ်ခံနွံဃၣ်ဃၣ်အခါန့ၣ် ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ် တြီဆၢခိးခးလီၤဝဲဘၣ်ဆၣ်လၢကျဲအဘိဘိ သုးကျိၤ(၃)ဘိပှၤနီၣ်ဂံၢ်(၃၀၀)ဃၣ်ဃၣ်ဟဲထီၣ်တုၤဝဲဒီး ဟူးဂဲၤဝဲဒၣ်ဖဲဟီၣ်ကဝီၤ ဝဲန့ၣ် အခိၣ်အဃၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဘၣ်ဆၣ်သိလ့ၣ်လၢပယီၤသုးခးဝဲခဲအံၤန့ၣ်မ့ၢ်ဝဲကမျၢၢ်သိလ့ၣ်တကးဒံးဘၣ်မ့ၢ်ဝဲကမျၢၢ်သဝီဖိလၢအဘၣ်ဃ့ၢ်မှံဟးဖျိးအဃိ ကမျၢၢ်ပှၤဃ့ၢ်မှံဟးဖျိးလၢတၢ်ကဘၣ်ဒီသဒၢဝဲဒၣ်အံၤ ထံၣ်ဘၣ်လၢသုးမီၤစိရိၤ ကွၢ်ကပၥ်လုၢ်သ့ၣ်ခါပတၥ်ဝဲကွီၢ်မ့ၣ် အံၤဖျိဖျိဖျါဖျါ န့ၣ်လီၤ.

ဟီၣ်ကဝီၤဖဲန့ၣ်အပူၤစးထီၣ်လၢတၢ်ထီၣ်တးပီသုးကလၢၤဝဲန့ၣ်လ့က့ၣ်,တးပီ,လၢၢ်ချီၣ်,ပယၢ်ရီ,ကါမဲသဝီဃုၥ်ဒီးဒူသဝီလၢအဂၤကမျၢၢ်(၂၀၀၀၀)ဃၣ်ဃၣ်ဃ့ၢ်ထီၣ်ဟးအိၣ်လၢပှၢ်ပူၤ,သ့ၣ်ခီၣ်ထံးဝၣ်ခီၣ်ထံးဒီးတနီၤန့ၣ်လဲၤစံၣ်အိၣ်ဝဲလၢပှၤဒူသဝီလၢအယံၤဒီးတၢ်ဘၣ်ယိၣ်အလီၢ်န့ၣ်လီၤ.

တကးဒံးဘၣ်တၢ်ကဲထီၣ်သးအံၤဝံၤလီၢ်ခံဖဲမဟါလါမ့ၤ ၁၁ သီ ဂီၤခီ ၈း၄၇ ဒီး ၈း၅၁ မံးနံးအဆၢကတီၢ်န့ၣ် လၢပယၢ်ရီကရူၢ်အပူၤ သုးမီၤစိရိၤ(Jet fighter)ကဘီယူၤ ပညိၣ်တ့ၢ်လီၤကဒီးဝဲပီၣ်(၃၀၀)မ့ၣ်ပိၢ် ၂ ဖျၢၣ်လီၤတဲၥ်ပိၢ်ဖးထီၣ်ဝဲလၢပယၢ်ရီသဝီဒီး လ့က့ၣ်သဝီဘၢၣ်စၢၤကျဲကပၤအဃိ ကမျၢၢ်အဟံၣ်ဟးဂီၤဝဲ(၁)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်န့ၣ်အသိးတးပီသဝီလၢကဘီယူၤလဲၤခးလီၤတၢ်န့ၢ်ဝဲလၢတလါဃၣ်ဃၣ်လၢဟံၣ်ဟးဂီၤဝဲဒၣ်အါအါဂီၢ်ဂီၢ်အံၤန့ၣ် ဖဲအပူၤကွံၥ် လါမ့ၤ ၅ သီ, ၆ သီအနံၤ ပၤရၤမီၤတၤလ့ၤထံကဘီယူၤ(၂)ဘ့ၣ်ဒီး(Jet fighter) ၂ ဘ့ၣ် လဲၤတ့ၢ်လီၤဝဲမ့ၣ်ပိၢ်,(၁၂၀ မမ)အချံ ခဲလၢၥ်(၇) ဖျၢၣ် လီၤတဲၥ်ပိၢ်ဖးထီၣ်ဝဲလၢသဝီပူၤဒီးသဝီချၢအဃိ ဟံၣ်တၢ်သူၣ်ထီၣ်ဃုၥ်ဒီးကျီးပူၤတၢ်သူၣ်တၢ်ဖျးတၢ်ထူၣ်တၢ်ဘိ တဖၣ် ဟးဂီၤဘၣ်ဒိဘၣ်ထံးဝဲအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.

တကီၢ်ခါတုၤလၢခဲအံၤလၢတးပီသုးကလၢၤအခိၣ်အဃၢၤန့ၣ် ပယီၤသုးကျိၤလၢအဟဲထီၣ်(စစ်ကူ)တဖၣ်အံၤဒီး ဟီၣ်ကဝီၤ(KNLA) သုးပၥ်ဖှိၣ်အဘၢၣ်စၢၤ ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤအသိး သုးကလၢၤအံၤသုတလီၤတဂ့ၤအဂီၢ် သုးမီၤစိရိၤအံၤတအိၣ်ဘှံးအိၣ်သါသူဝဲဒၣ်ကဘီယူၤ,ကျိဖးဒိၣ်,ပၤရၤမီၤတၤလ့ၤထံကဘီယူၤ ဒိၣ်ဒိၣ်မုၢ်မုၢ်န့ၣ်လီၤ.

လၢတၢ်န့ၣ်အဃိကိးမုၢ်နံၤဒဲးကမျၢၢ်တၢ်ဘၣ်ဒိဘၣ်ထံး ဒီး ဟံၣ်ဃီတၢ်ဟးဂူၥ်ဟးဂီၤ ဟဲအါထီၣ်ကွ့ၢ်ကွ့ၢ်ဒီး ဟီၣ်ကဝီၤပူၤဖဲန့ၣ်ခီဖျိလၢ သုးမီၤ စိရိၤအတၢ်ဟူးတၢ်ဂဲၤအံၤအဖီခိၣ် လီၢ်ကဝီၤကမျၢၢ်ဟံၣ်တၢ်သူၣ်ထီၣ်ဟးဂီၤကအိၣ်လၢအဖျၢၣ်(၁၀၀)ဃၣ်ဃၣ်လံအဂ့ၢ်န့ၣ် သ့ၣ်ညါ ဘၣ် လၢကီၢ်ရ့ၣ်တၢ်မၤနီၣ်စရီအပူၤ န့ၣ်လီၤ.