လါမ့ၤ ၂၆ သီ, ၂၀၂၆ နံၣ်, ခ့ၣ်အဲးစံၣ်
မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ ကမၤမိၢ်-ကတၢတံၥ်ကျဲလၢတၢ်ဒုးကဲထီၣ်ဝဲလၢပယီၤသုးဒီး(KNLA) သုးပၥ်ဖှိၣ်အဘၢၣ်စၢၤ တပယူၥ်ဃီအံၤန့ၣ် တၢ်ဒုးဆဲးကဲထီၣ်အဃိ ပယီၤသုးသံဘၣ်ဒိဘၣ်ထံး(၁၁)ဂၤအကျါပၣ်ဃုၥ်ဝဲသုးရ့ၣ်ခိၣ်, သုးဒ့ခိၣ်တဖၣ်အသိး ပယီၤသုးအံၤဒွဲၣ်အူအီၣ်ကဒီးဝဲပှၤကမျၢၢ်ဟံၣ်အဖျၢၣ်(၁၀၀)ဃၣ်ဃၣ်အဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ် လီၤ.
အပူၤကွံၥ်ပယီၤသုးကျိၤလၢအဟဲထီၣ်တဖၣ်အံၤမ့အိၣ်ဝဲဒၣ်ဖဲမီလိၥ်ကျိသဝီဒီးဝၣ်သိထၣ်သဝီပူၤဘၣ်ဆၣ်ခဲအံၤ ဟဲထီၣ်ဝဲတုၤလၢ ကဟံလူၢ်(မိုင်လေးဆယ်)တလၢထီၣ်ဝဲမီလိၥ်ကျိတစဲးဖိအဂ့ၢ်န့ၣ် ပှၤလၢဘူးဒီး(KNLA)အံၤတဖၣ်စံးဝဲန့ၣ်လီၤ.
ဒ်န့ၣ်အသိးပယီၤဖဲလါမ့ၤ ၂၄ သီအနံၤန့ၣ် လၢန့ၢ်ကးသဝီဒီး မီလိၥ်ကျိသဝီဘၢၣ်စၢၤ(၁)တီၤဒီး ကဟံလူၢ်(မိုင်လေးဆယ်)တတီၤ တၢ်ဒုးကဲထီၣ်ဝဲလၢပယီၤသုးဒီး(KNLA)သုးပၥ်ဖှိၣ်ဘၢၣ်စၢၤအဃိ ပယီၤသုးတကပၤ သံဝဲ(၄)ဂၤ,ဘၣ်ဒိဘၣ်ထံးဝဲ(၇)ဂၤ အဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤရီဘ့ၤမူ စံးဝဲန့ၣ်လီၤ.
“ဖဲမဟါ ၂၄ သီန့ၣ် တၢ်ခးလိၥ်သးကဲထီၣ်အဖီခိၣ် ပယီၤသုးန့ၣ်ပသ့ၣ်ညါလၢအဘၣ်ဒိ(၇)ဂၤဒီးအသံန့ၣ်(၄)ဂၤ. မ့ဝံၤအကါန့ၣ် တကျၢၢ်တခိၣ်. လၢအသံကျါန့ၣ်ပၣ်ဃုၥ်ဒီးအသုးဒ့ခိၣ်တဂၤ. မ့မ့ၢ်လၢအဘၣ်ဒိအကျါခီန့ၣ်ပၣ်ဃုၥ်စ့ၢ်ကီးအသုးရ့ခိၣ်တဂၤ. သုးကျိၤတဖၣ်န့ၣ်ဖဲတနံၤအံၤအိၣ်ဒံးဖဲကဟံလူၢ်(မိုင်လေးဆယ်)လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါမ့ၤ ၂၅ သီ အနံၤန့ၣ်လီၤ.
လၢန့ၣ်အမဲၥ်ညါတၢ်ဒုးကဲထီၣ်ဝံၤမုၢ်ဆ့ၣ်ထီၣ်ဖဲမဟါလါမ့ၤ ၂၅ သီ မုၢ်ဃ့ၢ်လီၤအဆၢကတီၢ်န့ၣ် ပယီၤသုးကျိၤတဖၣ်အံၤနုၥ်လီၤဝဲ လၢလၢၢ်ကွဲဒိၣ်(ကျောက်ကွင်း)သဝီပူၤဝံၤဒွဲၣ်အူအီၣ်ဝဲသဝီဖိဟံၣ်အဖျၢၣ်(၁၀၀)ဃၣ်ဃၣ်အဂ့ၢ်န့ၣ် (သုးက့ ၅)ပှၤ ကတိၤတၢ်ပၢ စံးအါထီၣ်ဝဲန့ၣ်လီၤ.
“ဖဲလါမ့ၤ၂၅ သီ ဟါခီ မုၢ်ဃ့ၢ်လီၤ ၁း၀၀ နၣ်ရံၣ်အခါန့ၣ် ပယီၤသုးကျိၤနုၥ်လီၤကဒီးလၢလၢၢ်ကွဲသဝီပူၤ. မ့ဝံၤဒွဲၣ်အူအီၣ်ကဒီး ပှၤဟံၣ် ကအိၣ်လၢ(၇)၀,(၈၀)ကအိၣ်လၢအဖျၢၣ်(၁၀၀)ညါ. အဝဲသ့ၣ်မၤတၢ်အံၤဘၣ်ဒိဆါဒိၣ်မး ဟးခးလီၤကျိဖးဒိၣ်လၢကမျၢၢ် အသဝီပူၤမ့ဝံၤဟးဒွဲၣ်အူအီၣ်ပှၤဟံၣ်ပှၤဃီတဖၣ်မီၤ.လူၤမၤဝဲလၢပှၤကမျၢၢ်တဖၣ်လီၤ”အဂ့ၢ်န့ၣ် စံးဝဲန့ၣ်လီၤ.
ပယီၤသုးအံၤတချုးအနုၥ်လီၤဒွဲၣ်အူအီၣ်လၢၢ်ကွဲဒိၣ်သဝီပူၤဟံၣ်ကဲထီၣ်ဒံးဘၣ်အခါ ဖဲအပူၤကွံၥ်လါမ့ၤ ၂၁ သီအနံၤစ့ၢ်ကီး နုၥ်လီၤဒွဲၣ်အူအီၣ်ဒံးဝဲဝၣ်သိထၣ်သဝီပူၤကမျၢၢ်ဟံၣ်အဖျၢၣ်(၇၀) ဃၣ်ဃၣ်ကဲထီၣ်ဒံးန့ၣ်လီၤ.
စးထီၣ်လၢလါမ့ၤထီၣ်အံၤန့ၣ်ပယီၤသုးကျိၤသုးပၥ်ဖှိၣ်လၢအပၣ်ဃုဒီးဘူးဒးကညီသုးမုၢ်ဒိၣ်(DKBA)အံၤလၢကမၤမိၢ်အံၤတဆီဂုၥ်ကျဲးစၢးဟဲထီၣ်ဝဲဆူကတၢတံၥ်တကပၤဒီး ဒ်န့ၣ်အသိး လၢအတၢ်ဟဲထီၣ်လၢကျဲဒီတကျိၤန့ၣ်စ့ၢ်ကီးခီဖျိသူဝဲကဘီယူၤ,ဒြိမ့ၣ်ပိၢ်ဒီး ခးလီၤဝဲကျိတလီၢ်လီၢ်အဃိ ဝၣ်သိထၣ်,မီလိၥ်ကျိ,မီထၣ်, မဲကလါ,န့ၢ်ကး,မဲၤကၠံၣ်ခံ,တရီပူၤ,လၢၢ်ကွဲဒိၣ်,လၢၢ်ကွဲဖိသဝီဃုၥ်ဒီး ဒူသဝီလၢအိၣ်ဘူးဖဲဒုးယၤတၢ်သဘံၣ်သဘုၣ်ကဲထီၣ်လီၢ်အခိၣ်အဃၢၤတဖၣ် ဘၣ်ဃ့ၢ်ထီၣ်တၢ်ဆၢကတီၢ်အိၣ် (၁)လါဃၣ်ဃၣ်လံ န့ၣ်လီၤ.
တကးဒံးဘၣ်ခီဖျိလၢသုးမီၤစိရိၤခးလီၤနါစိၤတၢ်ဒီး,ကဘိယူၤ,ကျိဖးဒိၣ်,ဒြိတဖၣ်ဆူကမျၢၢ်အိၣ်ဆိးလီၢ်ကျဲဒူပူၤသဝီပူၤအဃိ လီၢ်ကဝီၤကမျၢၢ်ဃုၥ်ဒီးသီခါ,တပွဲသံဘၣ်ဒိဘၣ်ထံးဝဲဒၣ်စ့ၢ်ကီးန့ၣ်လီၤ.
တကီၢ်ခါခဲအံၤပယီၤသုးကျိၤပှၤနီၣ်ဂံၢ်အကထိလၢအဟဲထီၣ်ဝဲအံၤတဖၣ်လၢကလဲၤထီၣ်ဆူ ဖၣ်ပူၣ်အဂီၢ် ဂုၥ်ကျဲးစၢး တိဝဲကျဲအဖၢ မုၢ်အသိး စးထီၣ်လၢအဝဲသ့ၣ်ဟဲထီၣ်အံၤခီဖျိတၢ်ဘၣ်သဂၢၢ် ခးလိၥ်သးကဲထီၣ်ကိးမုၢ်နံၤဒဲးဃၣ်ဃၣ်အဃိ ပယီၤသုးသံဘၣ်ဒိ ဘၣ်ထံး ကအိၣ်လၢအဂၤ(၁၀၀)ဃၣ်ဃၣ်လံအသိး (KNLA)တကပၤစ့ၢ်ကီးတၢ်ဘၣ်ဒိဘၣ်ထံးအိၣ်ဝဲအဂ့ၢ်န့ၣ် သ့ၣ်ညါဘၣ်လၢ ဟီၣ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
