လါမ့ၤ ၇ သီ,၂၀၂၆ နံၣ်, ခ့ၣ်အဲးစံၣ်
ဖဲတနံၤအံၤလါမ့ၤ ၇ သီ ဂီၤခီအဆၢကတီၢ်န့ၣ် တၢ်ဘၣ်ဘျုး ဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) သုးရိၣ်မဲခိၣ်ကျၢၢ် တီခိၣ်ရိၣ်မဲခိၣ်နၢ်ဒိၣ်ထီ မၤဝဲအဆိကတၢၢ်တဘျီတၢ်ထံၣ်လိၥ်အိၣ်သကိးဒီးကမျၢၢ်တၢ်ရဲၣ်တၢ်ကျဲၤတခါလၢ ဒူပျၥ်ယၥ်ကီၢ်ရ့ၣ် (သုးက့ ၆) ရၤမတံကီၢ်ဆၣ် စိၣ်ဆံမၠဲၣ်ဟီၣ်ကဝီၤအပူၤန့ၣ်လီၤ.
ဒ်သိးကသ့ၣ်ညါဘၣ်ကမျၢၢ်ထံဖိကီၢ်ဖိအတၢ်လိၣ်ဘၣ်ဒီးဘှါဆှဲဝဲတၢ်ဂ့ၢ်ကီလၢကမျၢၢ်သဂၢၢ်ဘၣ်ဝဲကန့ၢ်အဂီၢ် ဘၣ်တၢ်မၤဝဲ တၢ်ထံၣ်လိၥ်သးဒ်အံၤလီၤအဂ့ၢ်န့ၣ် (DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစွ့ၤဝၣ် စံးဝဲန့ၣ်လီၤ.
“ကမျၢၢ်တဖၣ်ဟဲသံကွၢ်ယၤလၢပဖံးအီၣ်မၤအီၣ်တၢ်န့ၢ်လံဧါ.ကမျၢၢ်တဖၣ်အံၤထံၣ်ဘၣ်တၢ်ကီတၢ်ခဲန့ၢ်ဖးယံၤလံ.ခဲအံၤအဝဲသ့ၣ် တီၣ်ဖျါထီၣ်ပှၤလၢကဖံးအီၣ်မၤအီၣ်တၢ်အဂီၢ်မီၤ.အဃိဝဲဒၣ်န့ၣ်ပဟ့ၣ်အဝဲသ့ၣ်တၢ်ပျဲလီၤ.တၢ်လၢအလိၣ်သ့ၣ်တဖၣ်န့ၣ်ပကမၤစၢၤ အဝဲသ့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢတၢ်ထံၣ်လိၥ်သးဘျီဝဲအံၤအပူၤ ခီဖျိတၢ်ဒုးတၢ်ယၤအဃိ ဘၣ်ဖံးအီၣ်မၤအီၣ်တၢ်လၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီ အပူၤ ဃုၥ်ဒီးတၢ်ဂ့ၢ်လၢအဂၤသ့ၣ်တဖၣ်ကမျၢ်တဖၣ်ပၥ်ဖျါထီၣ်ဝဲဒီး ဖဲန့ၣ်သုးရိၣ်မဲခိၣ်ကျၢၢ် သုးခိၣ်ဒိၣ်စိ စီၤစွ့ၤဝၣ် ဃုၥ်ဒီး ခိၣ်နၢ်ဘၣ်ထွဲ လၢအဂၤတဖၣ် က့ၤစံးဆၢကဒါက့ၤကမျၢၢ်အတၢ်ပၥ်ဖျါသ့ၣ်တဖၣ်န့ၣ်လီၤ.
လၢတၢ်မၤဝဲတၢ်ထံၣ်လိၥ်အိၣ်သကိးတၢ်ရဲၣ်တၢ်ကျဲၤဘျီဝဲအံၤအပူၤန့ၣ် ဖလူ,ဂီၤလ့ၤ,ထံသဲလဲၤ,ဆိၣ်စံမၠဲၣ်,၀ၣ်မံၤထၣ်, တီၤနံၤ, အူကြ့ၣ်ထၣ်,စွ့ၤအ့မၠဲၤ,သ့ၣ်ဘီဘိ,လၢၢ်ဂီၤ,အူဟူထၣ်,တနီၤထၣ်,ခၠူးကလံ,တၤအုးထၣ်,ကွံလၢၢ်ဆှုၣ်,မီခံ,ဘျၢၣ်ဒိၣ်,လူၤခိၣ်ထၣ်ဒီး ကၠီးခဲးသဝီ ပၥ်ဖှိၣ်(၁၉)ဖျၢၣ် ကမျၢၢ်(၄၀၀)ဃၣ်ဃၣ်ဟဲထီၣ်ဝဲဒၣ်န့ၣ်လီၤ.
ဒ်န့ၣ်အသိးတကီၢ်ခါဟီၣ်ကဝီၤပူၤဖီၣ်စုကဝဲၤတၢ်သဘံၣ်သဘုၣ်တၢ်အိၣ်သး,ပှၤလီၢ်အိၣ်ကမှံဖိတၢ်ဆီၣ်ထွဲမၤစၢၤတၢ်အိၣ်သး, ကူၣ်သ့,ဆူၣ်ချ့တၢ်ဆီၣ်ထွဲမၤစၢၤအဂ့ၢ်အကျိၤတကးဒံးဘၣ်ကညီဖီၣ်စုကဝဲၤကဒဲကဒဲကအိၣ်ဃူအိၣ်ဖိးက့ၤတၢ်ဂ့ၢ်သ့တတဖၣ်အံၤ လီၢ်ကဝီၤကမျၢၢ်လၢအဟဲထီၣ်တၢ်ထံၣ်လိၥ်အိၣ်သကိးအံၤတဖၣ်ပၥ်ဖျါထီၣ်ဃ့ထီၣ်ဝဲအိၣ်န့ၣ်လီၤ.
ဝၣ်မံၤထၣ်သဝီသးပှၢ် မါမီၤဝ့လဲၤ စံးဝဲလၢ“ဒ်သိးကမျၢၢ်တဖၣ်ကအိၣ်ဘၣ်မုၥ်မုၥ်ခုၣ်ခုၣ်အဂီၢ်အဝဲသ့ၣ်ဟဲထီၣ်ဝဲတၢ်ထံၣ်လိၥ်အံၤ မီၤ.တၢ်လၢကမျၢၢ်ဃ့ထီၣ်ဝဲတဖၣ်န့ၣ်(DKBA)ဟံမူဒါတန့ၢ်ခဲလၢၥ်ဘၣ်န့ၣ်ပသ့ၣ်ညါလီၤ.ဘၣ်ဆၣ်တၢ်ဂ့ၢ်လၢပှၤဃ့ထီၣ် သၢပူခံပူ န့ၣ် အဝဲသ့ၣ်မ့မၤန့ၢ်ဝဲဒုပှၤကမျၢၢ်ကသူၣ်မံသးမုၥ်ဝဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တၢ်ထံၣ်လိၥ်အိၣ်သကိးတၢ်ရဲၣ်တၢ်ကျဲၤလၢ(DKBA)တီခိၣ်ရိၣ်မဲမၤဝဲဘျီဝဲအံၤအပူၤန့ၣ် သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစွ့ၤဝၣ်, သုးခိၣ်စီၤဆါအီၤ, သုးခိၣ် စဲကၠီၤလၣ် ,သုးခိၣ်စီၤစ့ၤဝ့ ဃုၥ်ဒီးခိၣ်နၢ်ဘၣ်ထွဲလၢအဂၤဒီး မ့မ့ၢ်လၢခ့ၣ်အဲၣ်ယူၣ် တကပၤန့ၣ် ရၤမတံကီၢ်ဆၣ်ပှၤဘၣ်မူဘၣ်ဒါဘၣ်ထွဲတနီၤဟဲထီၣ်ဝဲဒၣ်အိၣ်န့ၣ်လီၤ.
ဖဲအပူၤကွံၥ်(၂၀၂၅)လါဒံၣ်စ့ဘၢၣ် ၂၅ သီအခါ ဒ်တၢ်အိၣ်ဖှိၣ်တၢ်ဆၢတဲၥ်အိၣ်အသိးဖဲတၢ်မၤဝဲခိၣ်နၢ်တၢ်ဆီတလဲအခါန့ၣ် သုးခိၣ်ကျၢၢ်ဒိၣ်စိ စီၤစွ့ၤဝၣ် ကဲထီၣ်ဝဲသုးရိၣ်မဲခိၣ်ကျၢၢ်လၢ သုးခိၣ်ကျၢၢ်ဒိၣ်စိ စီၤစတံအလီၢ်အံၤန့ၣ်လီၤ. ဒီးဖဲန့ၣ်ဝံၤ တၢ်ဆၢကတီၢ်(၄)လါဘျဲၣ်အတီၢ်ပူၤအံၤမၤဝဲဒၣ်တၢ်ထံၣ်လိၥ်အိၣ်သကိးဒီးကမျၢၢ်အဆိကတၢၢ်တဘျီဘၣ်ဟဲအိၣ်ထီၣ်ဝဲ ဒ်အံၤ န့ၣ်လီၤ.
