လါမ့ၤ ၇ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ လ့က့ၣ်ဒီးတးပီသုးကလၢၤတၢ်ဒုးအပူၤ ကမျၢၢ်လၢအဃ့ၢ်ထီၣ်(၂၀,၀၀၀) ဃၣ်ဃၣ်အံၤတဖၣ် လိၣ်ဘၣ်ဝဲဂ့ၢ်ဂီၢ်တၢ်ဆီၣ်ထွဲမၤစၢၤအဂ့ၢ်န့ၣ် ကညီဆီၣ်ထွဲမၤစၢၤတၢ်မုၥ်တၢ်ခုၣ်ပှၥ်ဘျးစဲ(KPSN)ထုးထီၣ် ပၥ်ဖျါဝဲဖဲ မဟါလါမ့ၤ ၅ သီအနံၤန့ၣ်လီၤ.
စးထီၣ်ဖဲလါအ့ဖြ့ၣ် ၁၂ သီ ဟီၣ်ကဝီၤ()သုးပၥ်ဖှိၣ်ထီၣ်န့ၢ်လ့က့ၣ်သုးကလၢၤဝံၤတကတီၢ်ဃီတၢ်ဆဲးထီၣ်ဝဲတးပီသုးကလၢၤအံၤဒီး ခီဖျိတၢ်ဒုးကဲထီၣ်ကဘီယူၤဟဲခးလီၤကိးမုၢ်နံၤဒဲးအဃိတးပီကရူၢ်,ပယၢ်ရီကရူၢ်,ဃီဖျိပျဲၢ်ကရူၢ်ဒီးဟးတရဲးကရူၢ်ပူၤ ဒူသဝီ(၂၂)ဖျၢၣ် ပှၤနီၣ်ဂံၢ်(၁၉၂၀၀)ဘျဲၣ်ဘၣ်ဃ့ၢ်ထီၣ်ဟးအိၣ်ဝဲလၢပှၢ်ပူၤကစၢၢ်ခိၣ်ကလိကျါ,သ့ၣ်ခီၣ်ထံးဝၣ်ခီၣ်ထံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကမျၢၢ်လၢအဃ့ၢ်ထီၣ်သ့ၣ်တဖၣ်အံၤဃ့ၢ်ထီၣ်တၢ်ဆၢကတီၢ်ထီၣ်ဘးဝဲလၢ(၁)လါဃၣ်ဃၣ်လံဘၣ်ဆၣ်တုၤလၢခဲအံၤဒိးန့ၢ်ဘၣ်ဝဲ တၢ်ဆီၣ်ထွဲမၤစၢၤတအိၣ်ဒံးဘၣ်ဒီးကက့ၤလၢဟံၣ်အဂီၢ်စ့ၢ်ကီးခီဖျိတၢ်ဒုးတၢ်ယၤကဲထီၣ်,ကဘီယူၤစ့ၢ်ကီးဟဲခးလီၤတၢ်ကိးမုၢ်နံၤဒဲးအဃိ လၢပှၤသ့ၣ်တဖၣ်အံၤအဂီၢ် လိၣ်ဘၣ်ဝဲဂ့ၢ်ဂီၢ်အူတၢ်အီၣ်တၢ်အီ,တၢ်ဘံၣ်တၢ်ဘၢ,တၢ်ခိၣ်ဒုး,ကသံၣ်ကသီသ့ၣ်တဖၣ်အဂ့ၢ်န့ၣ် (KPSN)ပှၤနဲၣ်တၢ် နီၢ်ဝါခုၣ်ဆှံ စံးဝဲန့ၣ်လီၤ.
“လၢန့ၣ်တကပၤဒုတၢ်ဖးနးညါလီၤ.ခဲအံၤကဘီယူၤ,ပၤရၤမီၤတၤလ့ၤထံတဖၣ်န့ၣ်ဟဲသူဝဲအါမးလီၤပယီၤသုးန့ၣ်.အဃိလ့က့ၣ်,တးပီ,ပယၢ်ရီသဝီတဖၣ်န့ၣ်ကဘီယူၤအဃိသဝီပူၤလီၤတဘှံးဟးဂီၤလၢၤလံ.ခဲအံၤကဘီယူၤဟဲခးတၢ်အဃိအဝဲသ့ၣ်က့ၤဟံၣ်တဘူၣ်ဒံးဘၣ်ဘၣ်ဟးအိၣ်လၢတၢ်အိၣ်ကဒုလီၢ်ဘျီလိၣ်ဝဲအဒိၣ်ကတၢၢ်န့ၣ်တၢ်ဘံၣ်တၢ်ဘၢ,တၢ်ခိၣ်ဒုး,တၢ်အီၣ်တၢ်အီဒီးကသံၣ်ကသီသ့ၣ်တဖၣ်လီၤ.ခီဖျိပှၤကညီအိၣ်ဒီဒူၣ်ညါအဃိပမၤစၢၤတလၢတလီၣ်ဘၣ်.တကးဒံးဘၣ်ခီဖျိဂ့ၢ်ဂီၢ်အူ,ပှၤနီၣ်ဂံၢ်စ့ၢ်ကီးအါအဃိမ့မ့ၢ်လၢထံဂၤကီၢ်ဂၤတၢ်ဆီၣ်ထွဲမၤစၢၤန့ၣ်ကဘၣ်လီၢ်ဘၣ်စးတစဲးမီၤ”စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါကမျၢၢ်လၢအဃ့ၢ်ထီၣ်သ့ၣ်တဖၣ်အံၤအကျါပၣ်ဃုၥ်ဝဲမိၢ်ဖိဆံး,ပှၤမိၢ်ဒၢ,ပှၤသူၣ်က့သးပှၢ်ဒီးပှၤဖိဒံဖိသၣ်သ့ၣ်တဖၣ်အါမးဒီး ဒ်န့ၣ်အသိးလၢဆူၣ်ချ့တၢ်ကွၢ်ထွဲတကပၤစ့ၢ်ကီးခီဖျိဆူၣ်ချ့ပှၤမၤတၢ်ဖိတကူတလၢဘၣ်အဃိထံၣ်ဘၣ်ဝဲတၢ်ကီတၢ်ခဲ အဂ့ၢ် န့ၣ် လီၢ်ကဝီၤကမျၢၢ်တဖၣ်စံးဝဲအသိးသ့ၣ်ညါဘၣ်န့ၣ်လီၤ.
ဒ်(KPSN)ပၥ်ဖျါထီၣ်ဝဲလၢအ(facebook page)အသိးန့ၣ် ပယၢ်ရီသဝီဖိလၢအဃ့ၢ်ထီၣ်တဂၤစံးဝဲလၢ“ စးထီၣ်ဖဲတါလါလါ ပှဲၤလီၤ(၂)သီန့ၣ် ကဘီယူၤဟဲခးလီၤတၢ်လၢပသဝီပူၤ.တမ့ၢ်အခးဒုၣ်ဒါဘၣ်ခးနၢၤလၢပှၤသဝီဖိလီၤ.အဃိပဘၣ် ဃ့ၢ်ထီၣ်.ပဟး အိၣ်လၢအံၤတဒူၣ် လၢန့ၣ်တဒူၣ်,တၢ်နဟးအိၣ်ဒ်အံၤနဟးဃုအီၣ်ဃုအီတၢ်တဘၣ်စ့ၢ်ဘၣ်.ဟးဒီးဟးတဘူၣ်မ့ဟးန့ၣ် ဘၣ်ပျံၤကဘီ ယူၤ. ပှၤမ့မၤစၢၤ ပှၤတခါခါဒုပကသးခုဖးဒိၣ်လီၤ”အဂ့ၢ်န့ၣ် စံးဝဲန့ၣ်လီၤ.
စးထီၣ်လၢတၢ်ထီၣ်လ့က့ၣ်သုးကလၢၤဝံၤတုၤဃီၤဝဲဒၣ်လၢတးပီသုးကလၢၤတၢ်ဒုးတစု သုးကလၢၤအံၤသုတလီၤတဂ့ၤအဂီၢ် ခီဖျိသုးမီၤစရိၤကဘီယူၤ,ကျိဖးဒိၣ် ဒီးပၤရၤမီၤတၤလ့ၤထံဟဲခးလီၤတၢ်ကိးနံၤဒဲးအဃိ ကရူၢ်(၄)ဘ့ၣ်အံၤအပူၤလၢအမ့ၢ်တးပီ, လ့က့ၣ်,ကါမဲ,လၢၢ်ချၢၣ်,ပယၢ်ရီ, ပှိၢ်သဝီ ဃုၥ်ဒီးဒူသဝီလၢအိၣ်ဘူးဖဲန့ၣ်တဖၣ်ကမျၢၢ်ဘၣ်ဒိဘၣ်ထံးအမဲၥ်ညါ ဟံၣ်တစှၤန့ၢ်အဖျၢၣ် (၁၀၀)အူအီၣ်ဟးဂူၥ်ဟးဂီၤဝဲအါမး အဂ့ၢ် န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီအပူၤန့ၣ်လီၤ.
ဒ်န့ၣ်အသိးတကီၢ်ခါခဲအံၤတၢ်ဆၢကတီၢ်ဘူးထီၣ်စ့ၢ်ကီးဝဲလၢတၢ်စူၤခါတၢ်ကဘၣ်စးထီၣ်ကဒါတၢ်ဖံးတၢ်မၤလံအဃိ လီၢ်ကဝီၤ ကမျၢၢ်လၢအဃ့ၢ်ထီၣ်တဖၣ်အိၣ်ဒီးတၢ်ကိၢ်တၢ်ဂီၤတကးဒံးဘၣ်ဆၢကတီၢ်ခဲအံၤဘူးထီၣ်စ့ၢ်ကီးလၢကၠိကက့ၤအိးထီၣ်ကဒါလံအဃိ မ့ဆဲးလဲၤသးဒ်အံၤကထံၣ်ဘၣ်ဝဲတၢ်ကီတၢ်ခဲအကလုၥ်ကလုၥ်သ့ဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
သုးဟံန့ၢ်တၢ်စိတၢ်ကမီၤဝံၤလီၢ်ခံဖဲအပူၤကွံၥ်(၂၀၂၂)ဒီး(၂၀၂၄)နံၣ်အခါန့ၣ်စ့ၢ်ကီး လ့က့ၣ်,တးပီသုးကလၢၤအခိၣ်အဃၢၤ ခီဖျိတၢ်ဒုးတၢ်ယၤကဲထီၣ်,ကဘီယူၤဟဲခးလီၤတၢ်အဃိ လီၢ်ကဝီၤကမျၢၢ်လၢအိၣ်ဘူးဖဲန့ၣ်ပှၤနီၣ်ဂံၢ်လၢအကလးဘၣ်ဃ့ၢ် ထီၣ်ဒံးဝဲဒၣ်န့ၣ်လီၤ.
ဖဲတလါအံၤလါမ့ၤ ၁ သီအခါ ဒ်(KPSN)ထုးထီၣ်ပၥ်ဖျါဝဲအသိးန့ၣ် (၂၀၂၅)လါအီးကထိဘၢၣ်တုၤ(၂၀၂၆)လါမးရှး လၢ(၆)လါ အတီၢ်ပူၤ ခီဖျိကဘီယူၤ,ကျိဖးဒိၣ်အကလုၥ်ကလုၥ်အဃိ ခ့ၣ်အဲၣ်ယူၣ် ကီၢ်ရ့ၣ်/သုးက့(၇)ဘ့ၣ်အပူၤ ကမျၢၢ်ပှၤလီၢ်အိၣ်ကမှံ အနီၣ်ဂံၢ် အိၣ်ထီၣ်တုၤဝဲလၢ(၂.၄)ခံကကွဲၢ်လွံၢ်ကလီၢ်ဘျဲၣ်ညါန့ၣ်လီၤ.
