လါမ့ၤ ၆ သီ, ၂၀၂၆ နံၣ်, ခ့ၣ်အဲးစံၣ်
ဖဲလါမ့ၤ ၄ သီအနံၤန့ၣ် (KTLA)သုးခိၣ်အဲၣ်ခွံသုးတြိၤစုတီၤအဖီလၥ် ဆၣ်ကပီၤသုးရ့ၣ်(၂)အပှၤ (၃၇)ဂၤ ဟဲက့ၤ ပၥ်ဖှိၣ်မၤသကိး တၢ်ဒီး(သုးက့ ၄) ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၂၇ အဂ့ၢ်န့ၣ် (KNLA)ပှၤဘၣ်မူ ဘၣ်ဒါ ပၥ်ဂၢၢ်ပၥ်ကျၢၤ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ဆၣ်ကပီၤသုးရ့ၣ်(၂)လၢအိၣ်ဒဝဲၢ်ခံလၢအဟဲက့ၤပၥ်ဖှိၣ်မၤသကိးတၢ်ဒီးသုးရ့ၣ်-၂၇ အံၤ ခီဖျိတဘၣ်သူၣ်ဘၣ်သးဝဲ သုးခိၣ်အဲၣ်ခွံ အတၢ်ဖံးတၢ်မၤလၢတၢ်က့ၤခးလိၥ်သးလၢကညီဖိကဒဲကဒဲအဘၢၣ်စၢၤအံၤဘၣ်အဃိ ဖဲ ၄ သီ ဟါခီ ၄း၃၀ ဃၣ်ဃၣ်အဆၢကတီၢ် န့ၣ် သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်ဖိဃုၥ်ဒီးအပှၤ(၃၇)ဂၤစိၥ်ဃုၥ်ဝဲတၢ်စုကဝဲၤဟဲက့ၤပၥ်ဖှိၣ်မၤသကိးတၢ်ဘၣ် ဟဲအိၣ်ထီၣ်ဝဲဒ် အံၤန့ၣ်လီၤ.
ဘၣ်ဃးဒီးတၢ်ဂ့ၢ်အံၤ (KNLA)သုးရ့ၣ်-၂၇ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤမူဂ့ၤ စံးဝဲလၢ “ဖဲလါမ့ၤ ၄ သီ ဟါခီကဘၣ်ဖဲ ၄း၃၀ န့ၣ် သုးခိၣ်အဲၣ်ဖိဒီးအပှၤခဲလၢၥ်(၃၇)ဂၤအိၣ်လၢဒဝဲၢ်ခံတကပၤဟဲက့ၤပၥ်ဖှိၣ်မၤသကိးတၢ်ဒီးပှၤ.အဟဲက့ၤဘျီဝဲအံၤပၣ်ဃုၥ်ဒီး တၢ်စုကဝဲၤခဲလၢၥ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဘၣ်ဃးဒီး(KTLA)အပှၤဟဲက့ၤမၤသကိးတၢ်ဒီး(သုးက့ ၄)အံၤန့ၣ် ဒ်တၢ်ဂီၤမူဟးထီၣ်ဝဲလၢ(social media)ပူၤဖျါဝဲအသိးန့ၣ် ပထံၣ်ဘၣ်လၢ(KTLA)လၢအဟဲက့ၤပၥ်ဖှိၣ်မၤသကိးတၢ်တဖၣ်အံၤဆ့ၣ်နီၤတဲသကိးတၢ်ဒီး(သုးရ့ၣ် ၂၇)သုးရ့ၣ်ခိၣ် သုးခိၣ်မူဂ့ၤဘၣ်ဃး အဝဲသ့ၣ်အတၢ်အိၣ်သး,တၢ်ဟဲက့ၤပၥ်ဖှိၣ်မၤသကိးတၢ်အဂ့ၢ်အကျိၤသ့ၣ်တဖၣ်န့ၣ်လီၤ.
တကးဒံးဘၣ်ဒီးလၢတၢ်ဟဲက့ၤပၥ်ဖှိၣ်မၤသကိးတၢ်ဘျီဝဲအံၤ ဒ်(Thunder Kawthoolei)ပၥ်ဖျါထီၣ်ဝဲလၢ အ(ဖ့းစဘူး) ပူၤအသိးန့ၣ် ပှၤ(၃၇)ဂၤအံၤအကျါပၣ်ဃုၥ်ဝဲ သုးခိၣ်ပတီၢ်တဂၤ,သုးဒ့ခိၣ်တဂၤ,သုးဒ့ခိၣ်-၂ တဂၤ, သုးဆှ့ၣ်ခိၣ်(၃)ဂၤ အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဆၣ်ဘၣ်ဃးပှၤဟဲက့ၤပၥ်ဖှိၣ်မၤသကိးတၢ်တဖၣ်ပၣ်ဃုၥ်သုးခိၣ်ပတီၢ်တၢ်ဂ့ၢ်အံၤဒ်သိးကသ့ၣ်ညါဘၣ်တၢ်ဂ့ၢ်လီၤတံၢ်လီၤဆဲး အဂီၢ် ပခ့ၣ်အဲးစံၣ်-ကညီတၢ်ကစီၣ်ဂုၥ်ကျဲးစၢးဆဲးကျိး ဝဲပှၤဘၣ်မူဘၣ်ဒါအဖၢမုၢ်အသိး ဘၣ်ဃးတၢ်ဂ့ၢ်အံၤကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲတအိၣ်ဒံးဘၣ်န့ၣ်လီၤ.
(KTLA)ဆၣ်ကဆီသုးတြိၤလၢအဘၣ်တၢ်တီခိၣ်ရိၣ်မဲအီၤလၢသုးခိၣ်အဲၣ်ခွံလၢအိၣ်ဆီလီၤသးဟူးဂဲၤဖဲ ဘျံးဒဝဲၢ်ကီၢ်ရ့ၣ် သုးရ့ၣ်(၁၂)ဒီး ကီၢ်ဆၢသ့ၣ်တဖၣ်အံၤန့ၣ် တၢ်သဘံၣ်သဘုၣ်ကဲထီၣ်ဝဲဒီးဟီၣ်ကဝီၤ(KNLA)အိၣ်ဝဲတလီၢ်လီၢ် န့ၣ်လီၤ.
ကီၢ်သူလ့ၤသုးမုၢ်ဒိၣ်(KTLA)လၢအဘၣ်တၢ်တီခိၣ်ရိၣ်မဲအီၤလၢသုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤနၢၤဒါမၠးအံၤ စးထီၣ်ဖဲ အပူၤကွံၥ်(၂၀၂၅)လီၢ်ခံအံၤ သုးရ့ၣ်ပူၤသုးခိၣ်သုးနၢ်,သုးဖိတဖၣ်ဟဲက့ၤပၥ်ဖှိၣ်မၤသကိးတၢ်ဒီး(KNLA), (KNDO)အမဲၥ်ညါက့ၤ ပၥ်ဖှိၣ် မၤသကိးတၢ်ဒီးတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA),သုးခိးကီၢ်ဆၢ (BGF)ဟဲအါထီၣ်ဝဲဖျိဖျိဖျါဖျါန့ၣ်လီၤ.
ဖဲ-4-5-2026 ဟါခီ-4:30 နၣ်ရံၣ် ပသ့ၣ်ညါဘၣ်လၢ KTLA အပှၤသုးဖိ-၃၇ ဂၤ ဟဲက့ၤမၤသကိးက့ၤတၢ်ဒီး KNLA ကညီဒီကလုာ်တၢ်ထူၣ်ဖျဲးသုးးမုၢ်ဒိၣ်ဖဲသုးက့-၄ န့ၣ်လီၤ. KTLA အပှၤလၢအဟဲက့ၤအကျါပာ်ဃုာ် ဒီး သုးခိၣ်တဂၤ သုးဒ့ခိၣ်တဂၤ သုးဒ့ခိၣ်ခံ ခံဂၤ သုးဆှ့ၣ်ခိၣ်သၢဂၤခဲလၢာ်37ဂၤန့ၣ်လီၤ. KTLA ပှၤလၢဟဲက့ၤအကျါပှၤလၢအတီခိၣ်ရိၤမဲမ့ၢ်ဝဲ သုးရ့ၣ်ခိၣ်ဖိအဲၣ် ဆၣ်ကဆီသုးက့ သုးရ့ၣ်2 အိၣ် တၢ်လီၢ် တဝဲၢ်ခံန့ၣ်လီၤ. ပထံၣ်ဘၣ်လၢ တၢ်ဂီၤမူဟးထီၣ်တဘ့ၣ်အံၤ သုးဖိလၢတၢ်ဖီလာ်တဖၣ်အတၢ်ပာ်ဖျါအသိး အဝဲသ့ၣ်ဃုကျဲသပှၢ်ကတၢၢ်လၢ ဘၣ်သးဟဲက့ၤမၤသကိးတၢ်ဒီး KNLA န့ၣ်လီၤ.