လါယူၤ ၄ သီ, ၂၀၂၆ နံၣ်, ခ့ၣ်အဲးစံၣ်
ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် ဂီၤလ့ၤသုးကလၢၤတၢ်ဒုးအဃိ လီၢ်ကဝီၤကမျၢၢ်ပှၤနီၣ်ဂံၢ်အကထိလၢအဃ့ၢ်ထီၣ် ဆူကီၢ်ကၠီၣ်တဲၣ်ပူၤတဖၣ်ဟဲက့ၤကဒါဆူကီၢ်ပူၤတကပၤလံဘၣ်ဆၣ် မ့မ့ၢ်လီၢ်ကဝီၤကမျၢၢ်လၢအိၣ်ဘူးဝဲတၢ်ဒုးကဲထီၣ်လီၢ်သ့ၣ် တဖၣ်န့ၣ်ခီဖျိကဘီယူၤ,ဒြိ,ကျိဖးဒိၣ်တၢ်လီၤဘၣ်ယိၣ်အိၣ်ဒံးဝဲအဃိ တနီၤန့ၣ်လိၣ်ဘၣ်ဒံးဝဲတၢ်ဆီၣ်ထွဲမၤစၢၤ အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါယူၤ ၂ သီအနံၤ လၢကထီၣ်မၤဆှဲကွံၥ်ဝဲဂီၤလ့ၤသုးကလၢၤအံၤအဂီၢ် ဟီၣ်ကဝီၤ(KNLA)သုးပၥ်ဖှိၣ်လဲၤထီၣ် ခးဝဲဘၣ်ဆၣ် ခီဖျိသုးမီၤစိရိၤကဘီယူၤဟဲခးလီၤစၢၤဝဲတၢ်ဒိၣ်ဒိၣ်မုၢ်မုၢ်အဃိ တၢ်ပၢၢ်ဆၢသုးကရူၢ်တကပၤတၢ်ဘၣ်ဒိဘၣ်ထံး အါဝဲ အဖီခိၣ် ဘၣ်ဂုၤကဒါက့ၤဝဲလီၢ်ခံအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဆၣ်တုၤလၢတနံၤအံၤလၢဂီၤလ့ၤသုးကလၢၤအခိၣ်အဃၢၤန့ၣ်ပယီၤသုးကဘီယူၤဟဲတ့ၢ်လီၤတၢ်ဘိၣ်,ဟဲဆှၣ်တၢ်အိၣ်ဒံးဝဲ အသိး တၢ်ပၢၢ်ဆၢသုးပၥ်ဖှိၣ်ကရူၢ်တကပၤစ့ၢ်ကီးသူဝဲဒြိလဲၤတ့ၢ်လီၤဝဲမ့ၣ်ပိၢ်လၢပယီၤသုးအိၣ်အလီၢ်အံၤအဂ့ၢ်န့ၣ် ပှၤလၢဘူးဒီး (KNLA)တဖၣ် စံးဝဲန့ၣ်လီၤ.
ခီဖျိလၢတၢ်ဂ့ၢ်သ့ၣ်တဖၣ်အံၤအဃိ ဖဲလါယူၤထီၣ် ၂ သီ ကမျၢၢ်လၢအကထိဃ့ၢ်ထီၣ်ဆူကၠီၣ်တဲၣ်ပူၤတဖၣ် ခဲအံၤဟဲက့ၤအိၣ်လၢ အဟံၣ်အဃီဘူၣ်လံဘၣ်ဆၣ် မ့မ့ၢ်ကဝီၤဒ့-၄, ၅, ၆ ကမျၢၢ်သ့ၣ်တဖၣ်ခီဟဲက့ၤစ့ၢ်ကီးလံဘၣ်ဆၣ် က့ၤအိၣ်လၢအဟံၣ်အဃီ တဘူၣ်ဒံးဝဲဘၣ် ဘၣ်ဟးအိၣ်နီၤဖးလိၥ်အသးလၢအံၤတဒူၣ်လၢန့ၣ်တဒူၣ်ဒ်န့ၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ ဖဲပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ်ဝဲလီၢ်ကဝီၤပှၤတဝၢခိၣ်နၢ်လၢအိၣ်ဖဲဘူးဖဲန့ၣ်တဂၤအခါစံးဝဲ လၢ “ဖဲတၢ်ဒုးကဲထီၣ်အခါန့ၣ်အဝဲစံၣ်လဲၤစံၣ်ထီၣ်လၢယိၤကီၢ်တပၤအါအါဂီၢ်ဂီၢ်လီၤ.ခဲအံၤတၢ်ဒုးလီၤကယးဘျီဟဲက့ၤခီဃီၤလၢအံၤတကပၤလံ.ပှၤလၢဃုကျဲဘၣ်တဖၣ်န့ၣ်အိၣ်တ့ၢ်ဝဲလၢန့ၣ်တကပၤ,ငါအိၣ်ဝဲဟံၣ်အိၣ်လီၤ.ပှၤလၢအဟဲက့ၤတဖၣ်န့ၣ်ဟးအိၣ်ဖှိၣ်ဝဲလၢကဝီၤဒ့(၁/၂/၃)အပူၤလၢပှၤဟံၣ်ပူၤတဒူၣ်ခံဒူၣ်ဒ်န့ၣ်လီၤ.မ့မ့ၢ်ထံကျိနံၤခီအိၣ်တသ့လၢၤဘၣ်ထံဒိၣ်လီၤဘၢလၢၤလံ.ပှၤသ့ၣ်တဖၣ်န့ၣ်လၢညါခါတၢ်ဒုးကဲထီၣ်အခါန့ၣ်ဟဲလီၤအိၣ်ဖှိၣ်ဝဲဖဲထံကျိကၢၢ်နံၤလီၤ.မ့မ့ၢ်လၢကဝီၤဒ့(၄/၅/၆)တကပၤခီန့ၣ်ဒြိလီၤလၢအကပၤလီၤ ပှၤအိၣ်တဘူၣ်ဘၣ်.မ့မ့ၢ်လၢကဝီၤဒ့(၁/၂/၃)ခီန့ၣ်အိၣ်ဘူးလၢထံနံၤထံးခီန့ၣ်ကိၢ်ညၢ်တစဲး.” အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်အပူၤကွံၥ်တၢ်ဒုးတၢ်ယၤအဃိလီၢ်ကဝီၤကမျၢၢ်ပှၤလီၢ်အိၣ်ကဒုဖိလၢအိၣ်သူမှဲကျိကၢၢ်နံၤသ့ၣ်တဖၣ်အံၤဒီး စ့ၢ်ကီး ခဲအံၤခီဖျိတၢ်စူၤထံထီၣ်အဃိ ဆဲးအိၣ်ဝဲဖဲန့ၣ်တသ့လၢၤဘၣ်,ဘၣ်ဟးအိၣ်နါစိၤဝဲဒ်န့ၣ်လီၤအဖီခိၣ် လၢပှၤသ့ၣ် တဖၣ်အံၤအဂီၢ်လိၣ်ဘၣ်ဝဲဂ့ၢ်ဂီၢ်အူအိၣ်ဆိးလီၢ်ကျဲဒီးတၢ်ဆီၣ်ထွဲမၤစၢၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ တဂၤဃီဝဲန့ၣ် စံးအါထီၣ်ဝဲန့ၣ်လီၤ.
ဂီၤလ့ၤဟီၣ်ကဝီၤအံၤ ဟံၣ်ခိၣ်ပၥ်ဖှိၣ်အိၣ်ဝဲအဖျၢၣ်(၁၀၀၀)ဘျဲၣ် ပှၤနီၣ်ဂံၢ်ပၥ်ဖှိၣ်ခဲလၢၥ်အိၣ်ဝဲ(၄၀၀၀)ဘျဲၣ်ဒီး အပူၤကွံၥ်ကမျၢၢ်လၢအဃ့ၢ်ထီၣ်တ့ၢ်သ့ၣ်တဖၣ်အံၤအပူၤကွံၥ်ခံလါအခါတနီၤန့ၣ်ဒိးန့ၢ်ဘၣ်ဝဲဂံၢ်ခီၣ်ထံးတၢ်အီၣ်တၢ်အီလၢ (၂)လါဂီၢ်အတီၢ်ပူၤ အိၣ်ဝဲဘၣ်ဆၣ်စးထီၣ်ဖဲလါယူၤထီၣ်အံၤတၢ်ဆီၣ်ထွဲမၤစၢၤလၢတၢ်ဟဲမၤစၢၤဝဲတဖၣ်လၢၤဝဲလံအဃိ ထံၣ်ဘၣ်ဝဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဂီၤလ့ၤကမျၢၢ်အမဲၥ်ညါ ဒ်န့ၣ်အသိးတချုးတၢ်ဒုးကဲထီၣ်ဖဲလါမ့ၤ ၁ သီအနံၤန့ၣ်စ့ၢ်ကီး လၢစွ့ၤအ့မၠဲၤ ဒီး ဘျၢၣ်ဒိၣ်သဝီ သ့ၣ်တဖၣ်အံၤအပူၤ ခီဖျိလၢ ပယီၤသုးခးလီၤကျိဖးဒိၣ်,ဒြိဟဲတ့ၢ်လီၤမ့ၣ်ပိၢ်အဃိ သဝီဖိသ့ၣ်တဖၣ်ဘၣ်ဃ့ၢ်ထီၣ်ဒံး ဝဲဒၣ်အဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
တကီၢ်ခါခဲအံၤတၢ်ဆၢကတီၢ်တုၤဃီၤလၢပှၤကဘၣ်သူၣ်ဘုသူၣ်ဟုက့ၤလီၤကဒါတၢ်ဖံးတၢ်မၤလံဘၣ်ဆၣ် ခီဖျိကျိဖးဒိၣ် ,ဒြိ ဒီးကဘီယူၤအတၢ်လီၤဘၣ်ယိၣ်အံၤအဃိ ကမျၢၢ်တဖၣ်အါဒၣ်တက့ၢ်န့ၣ်လဲၤဖံးလဲၤမၤတၢ်လၢကျီးပူၤတဘူၣ်ဝဲဘၣ် ဘၣ်ပၥ်တ့ၢ်ကွံၥ်ဝဲတၢ်ဖံးတၢ်မၤဒ်န့ၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဂီၤလ့ၤဟီၣ်ကဝီၤပူၤစးထီၣ်လၢတၢ်ဒုးကဲထီၣ်တုၤလၢခဲအံၤန့ၣ် ခီဖျိလၢကျိဖးဒိၣ်,ဒြိ,ကဘီယူၤအတၢ်ဘၣ်ယိၣ်အဃိ လၢတၢ်ဘံၣ်တၢ်ဘၢအဖီခိၣ် အူဖူထၣ်,လၢၢ်ဃီၤတုၤဃီၤလၢဂီၤလ့ၤန့ၣ် ခ့ၣ်အဲၣ်ယူၣ်ကးတံၢ်ဃၥ်ဝဲကျဲဒီး တုၤလၢခဲအံၤ တၢ်ဆဲးပံးဃၥ်ဝဲ အဖၢမုၢ်အဂ့ၢ်န့ၣ် သ့ၣ်ညါဘၣ်လၢပှၤဘၣ်မူဘၣ်ဒါအအိၣ်န့ၣ်လီၤ.
