လါယူၤ ၂ သီ, ၂၀၂၆ နံၣ်, ခ့ၣ်အဲးစံၣ်
ဖဲအပူၤကွံၥ်စးထီၣ်လၢလါမးရှးတုၤလၢလါမ့ၤလၢၥ်လၢ(၃)လါအတီၢ်ပူၤ လီၢ်ခၢၣ်သးကညီသးစၢ်ကရၢ(KYO)တီခိၣ်ရိၣ်မဲ အိးထီၣ်ဝဲ တၢ်ကိၢ်ခါသးစၢ်တၢ်မၤလိ()ဝံၤ ဖဲလါမ့ၤလၢၥ်အံၤန့ၣ်တၢ်မၤလိအံၤဝံၤဝဲဒၣ်အဂ့ၢ်န့ၣ် ထုးထီၣ်ပၥ်ဖျါဝဲဖဲတနံၤအံၤလါယူၤ ၂ သီအံၤ န့ၣ်လီၤ.
တၢ်ကိၢ်ခါသးစၢ်တၢ်မၤလိလၢ(Summer Youth Camp)လၢတၢ်အိးထီၣ်ဝဲဒၣ်ဘျီဝဲအံၤန့ၣ် ဘၣ်တၢ်မၤအီၤတဘျီဃီ လၢ ဒူသထူၣ်ကီၢ်ရ့ၣ်(သုးက့ ၁), ချၢၣ်လွံၢ်ထူၣ်ကီၢ်ရ့ၣ် (သုးက့ ၃),ဘျံးဒဝဲၢ်ကီၢ်ရ့ၣ်(သုးက့ ၄), ဒူပျၥ်ယၥ်ကီၢ်ရ့ၣ်(သုးက့ ၆)ဒီး ဖၣ်အၣ်ကီၢ်ရ့ၣ်(သုးက့ ၇)ဟီၣ်ကဝီၤ သ့ၣ်တဖၣ်အံၤအပူၤဒီး သးစၢ်ပိၥ်မုၣ်(၁၄၅)ဂၤ,ပိၥ်ခွါ(၂၀၃)ဂၤ ပၥ်ဖှိၣ်ခဲလၢၥ်(၃၄၈)ဂၤ ဖျိထီၣ်ဝဲတၢ်မၤလိအံၤန့ၣ်လီၤ.
ဒ်န့ၣ်အသိးဒီးလၢတၢ်မၤလိအံၤအပူၤန့ၣ် ကညီသူၣ်ဘီၣ်သးစၢ်အမဲၥ်ညါ ကီၢ်သူလ့ၤတၢ်ပၢဟီၣ်ကဝီၤအပူၤ တလၢၤသူၣ်ဘီၣ်သးစၢ်, ပအိၣ်သူၣ်ဘီၣ်သးစၢ်ဒီးထံဆၢကီၢ်ဆၢဘၣ်ကီဘၣ်ခဲဒဲကဝီၤအပူၤသူၣ်ဘီၣ်သးစၢ်တကးဒံးဘၣ်သူၣ်ဘီၣ်သးစၢ်လၢအိၣ်တၢ်လီၢ် အဂၤသ့ၣ်တဖၣ်စ့ၢ်ကီးဟဲထီၣ်ဝဲတၢ်မၤလိအံၤအိၣ်ဝဲအဂ့ၢ်န့ၣ် (KYO)စံးဝဲန့ၣ်လီၤ.
တၢ်ကိၢ်ခါတၢ်မၤလိလၢ(၃)လါတၢ်ဆၢကတီၢ်အပူၤန့ၣ် တၢ်မၤလိန့ၢ်ဝဲဂံၢ်ခီၣ်ထံးသုးတၢ်သ့တၢ်ဘၣ်,ထံရူၢ်ကီၢ်သဲးဒီးကညီဖိအ တၢ်စံၣ်စိၤတဲစိၤအဂ့ၢ်အကျိၤ,ခ့ၣ်အဲၣ်ယူၣ်အတၢ်သူၣ်ထီၣ်ဆီလီၤသးတၢ်ဘျၢသဲးစး, တၢ်သ့တၢ်ဘၣ်ဒီးဂံၢ်ခီၣ်ထံးတၢ်မၤကျဲတဖၣ်, ဖဲၣ်ဒရၢၣ်သနူ, ကီၢ်သူလ့ၤ(KawThooLei Charter)အဂ့ၢ်အကျိၤ,တၢ်ပၢတၢ်ြပးလၢအဂ့ၤ(Good Governance)ဃုၥ်ဒီး တၢ်သ့ တၢ်ဘၣ်တၢ်ဂ့ၢ်တၢ်ကျိၤအရ့ဒိၣ်လၢအဂၤတဖၣ်တၢ်မၤလိန့ၢ်ဝဲဒၣ်န့ၣ်လီၤ.
တကးဒံးဘၣ်တၢ်တီခိၣ်ရိၣ်မဲအကံၢ်အစီ(Essential Leadership)ဒီးတၢ်သ့ပဲၥ်ထံနီၤဖး(Critical Thinking), တၢ်တၢၣ်ပီၣ် တဲသကိး(Panel Discussion)သ့ၣ်တဖၣ်ပၣ်ဃုၥ်ဝဲအသိးတၢ်ဟ့ၣ်ဃုၥ်စ့ၢ်ကီးဝဲတၢ်သ့ၣ်ညါနၢ်ပၢၢ်ဘၣ်ဃး မ့ၣ်ပိၢ်အဂ့ၢ်အကျိၤ သ့ၣ်တဖၣ် အဂ့ၢ်န့ၣ် (KYO)လံၥ်တၢ်ပၥ်ဖျါအပူၤ စံးဝဲန့ၣ်လီၤ.
ကညီသးစၢ်ကရၢ-KYO အံၤ ဒ်သိးကညီစၢၤသွဲၣ်သီတဖၣ်ကသ့ဟံထီၣ်ဖီၣ်ထီၣ်ပှၤကလုၥ်တၢ်ဖံးတၢ်မၤမူဒါကန့ၢ်အဂီၢ် ဘၣ်တၢ် ဒုးအိၣ်ထီၣ်အီၤဖဲ(၁၉၄၆)နံၣ်အံၤဒီးဖဲန့ၣ်လီၢ်ခံ ခီဖျိခိၣ်နၢ်တနီၤတၢ်ထံၣ်တလီၤပလိၥ်သးဘၣ်အဃိ ဘၣ်တၢ်ပတုၥ်ကွံၥ်ဝဲ ကရၢအံၤ ဖဲန့ၣ်တဘျီန့ၣ်လီၤ. ဘၣ်ဆၣ်ဖဲကညီဒီကလုၥ်တၢ်ပၢၢ်ပှဲၤထီၣ်အနံၣ်(၄၀)အခါန့ၣ် ကညီခိၣ်နၢ်တဖၣ်ထံၣ်ဝဲလၢတၢ်က ဘၣ်ဒုးအိၣ် ထီၣ်က့ၤဝဲကရၢဒ်သိးကကဲထီၣ်တၢ်ဆီၣ်ထွဲမၤစၢၤလၢကညီတၢ်ပၢၢ်ဆၢအတၢ်ဂဲၤလိၥ်ပူၤဂီၢ်အဃိ ဖဲန့ၣ်ဘၣ်တၢ်က့ၤဒုးအိၣ်ထီၣ်က့ၤ ကရၢအံၤဖဲ(၁၉၈၉)နံၣ် မၤနၢၤပျီတၢ်လီၢ်အံၤဖဲလါမ့ၤ ၂၃ သီအနံၤအံၤန့ၣ်လီၤ.
