လါယူၤ ၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ပယီၤသုးလၢအိၣ်ဆီလီၤသးဖဲန့ၣ် တဖၣ်ပညိၣ်ခးလီၤဝဲကျိဖးဒိၣ်ဆူသဝီပူၤအဃိ ဟံၣ်ဖိဃီဖိဒီဖိမိၢ်ဒီဖိပၢ်သံဝဲ(၃)ဂၤဒီးဖဲန့ၣ်အကျါပၣ်ဃုၥ်ဝဲဖိသၣ်(၁)ဂၤအဂ့ၢ်န့ၣ် (KPSN)ထုးထီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
ဖဲအပူၤကွံၥ်လါမ့ၤ ၃၀ သီအနံၤန့ၣ် ပယီၤသုးခီၣ်သုးရ့ၣ်(ခလရ-၂၆၄)သုးရ့ၣ်လၢအိၣ်ဆီလီၤသးဖဲပဲ ပ့စလိၣ် သဝီပူၤ သ့ၣ်တဖၣ်အံၤ ခးလီၤဝဲ(၁၅၅ မမ)ကျိဖးဒိၣ်တဖျၢၣ်ဆူဝ့ၢ်ဒီခိၣ်သဝီပူၤန့ၣ်လီၤ.
ခီဖျိလၢကျိဖးဒိၣ်အံၤအဃိ ဟံၣ်လီၤပှီၢ်ဟးဂီၤဝဲတဖျၢၣ်ဒီး ဟံၣ်တဖျၢၣ်အံၤအပူၤ ဖိသၣ်(၉)နံၣ်အံၤဃုၥ်ဒီးအမိၢ်(၄၅)နံၣ်, အပါ(၄၇)နံၣ် ၃ ဂၤအံၤ သံဝဲဒၣ်တဘျီဃီဖဲတၢ်ကဲထီၣ်သးအံၤန့ၣ်လီၤ.
တကးဒံးဘၣ်လၢန့ၣ်အမဲၥ်ခီဖျိလၢကျိဖးဒိၣ်အံၤအဃိ သးစၢ်ပိၥ်မုၣ်(၁၈)နံၣ်တဂၤစ့ၢ်ကီးဘၣ်ဒိဘၣ်ထံးဝဲအဂ့ၢ်န့ၣ် (KPSN)လံၥ်တၢ်ပၥ်ဖျါအပူၤစံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ လၢၢ်ဒိၣ်ကီၢ်ဆၣ် ပှၤကတိၤတၢ်ပၢ ပဒိၣ်စီၤဝါမုၢ် စံးဝဲလၢ“ပှၤလၢအဘၣ်ဒိတဂၤအံၤနါက့အကဲဝဲဒၣ် ပှၤဒီမါဝၤခံဂၤလၢအသံအံၤအဖိမုၣ်လီၤ.ကျိဖးဒိၣ်လီၤတဲၥ်အခါန့ၣ်ဘၣ်လၢအဝဲသ့ၣ်မၤဝဲပှၤသးပှၢ်လုၢ်လၢ်တၢ်ဘါမီၤ.ဒုၣ်ဒါခးလီၤကျိဖးဒိၣ်ဘျီဘၣ်ဝဲအဟံၣ်,မ့ဝံၤသံဃုၥ်ဒီးအမိအပါ,အပုၢ်(၃)ဂၤလၢၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးလၢအိၣ် ပ့စလိၣ် သ့ၣ်တဖၣ်အံၤ ညီနုၢ်န့ၣ်ခးလီၤဝဲကျိဖးဒိၣ်ဆူလီၢ်ကဝီၤကမျၢၢ်ဒူသဝီပူၤအိၣ်ဝဲတလီၢ်လီၢ်အဃိ လီၢ်ကဝီၤကမျၢၢ်လၢအိၣ်ဘူးဖဲန့ၣ်တဖၣ်အါဒၣ်တက့ၢ်ဃ့ၢ်ထီၣ်ဟးအိၣ်ဝဲလၢတၢ်ဘံၣ်တၢ်ဘၢအလီၢ်အဂ့ၢ်န့ၣ် လီၢ်ကဝီၤပှၤဘၣ် မူဘၣ်ဒါ စံးဝဲအသိး သ့ၣ်ညါဘၣ်န့ၣ်လီၤ.
တကီၢ်ခါခဲအံၤပယီၤအံၤလၢကထီၣ်ဒိၣ်စိက့ၤဟီၣ်ကဝီၤတၢ်လီၢ်အဂီၢ် လၢၢ်ဒိၣ်ကီၢ်ဆၣ်ဒူသဝီအပူၤ ပယီၤသုးကျိၤနုၥ်လီၤဟူးဂဲၤဝဲ အါအါဂီၢ်ဂီၢ်တကးဒံးဘၣ် အဝဲသ့ၣ်အံၤသူဝဲကဘီယူၤ,ကျိဖးဒိၣ်ဒီးဒြိဟးတ့ၢ်လီၤဝဲမ့ၣ်ပိၢ်တဖၣ်လၢဒူသဝီကမျၢၢ်အိၣ်ဆိးလီၢ်ကျဲအိၣ်ဝဲ ကိးမုၢ်နံၤဒဲးဃၣ်ဃၣ်အဂ့ၢ်န့ၣ် ခ့ၣ်အဲၣ်ယူၣ်စံးဝဲန့ၣ်လီၤ.
လၢတၢ်န့ၣ်အဃိ အဘူးကတၢၢ်ဖဲအပူၤကွံၥ်လါမ့ၤ ၂၆ သီအနံၤန့ၣ် ပယီၤသုး(ခလရ-၂၆၄)တဒူၣ်ဃီဝဲအံၤခီဖျိခးလီၤဝဲ(၁၅၅ မမ) ဟီၣ်ဝ့ၣ်စၣ်(Howitze) ၂ ဖျၢၣ်ဆူကၠိကၠံသဝီပူၤအဃိ သဝီဖိပိၥ်ခွါ(၂)ဂၤဒီးပိၥ်မုၣ်(၁)ဂၤခဲလၢၥ်(၃)ဂၤဘၣ်ဒိဘၣ်ထံးဝဲအသိး ဟံၣ်ဟးဂီၤစ့ၢ်ကီးဝဲ(၃)ဖျၢၣ်ဒံးန့ၣ်လီၤ.
