လါယူၤလံ ၁၅သီ, ၂၀၂၆နံၣ်, ခ့ၣ်အဲးစံၣ်,
ဘၣ်ဃးဒီးကီၢ်ပယီၤဂ့ၢ်ဝီအံၤ အပူၤကွံၥ်လါယူၤလံ (၁၂)သီတုၤ(၁၃)သီအနံၤ, တၢ်မၤဝဲကၠီၣ်တဲၣ်ဟံၣ်ကစၢ် တၢ်တူၢ် လိၥ်ခီၣ်ဆၢ တၢ်တၢၣ်ပီၣ်တဲသကိး တၢ်ရဲၣ်တၢ်ကျဲၤအပူၤ ထံၣ်လိၥ်တ့ၢ်ဝဲသးဒီး ကလုၥ်ဒူၣ်ဖီၣ်စုကဝဲၤကရူၢ်ကရၢ ဒီး သုးကရူၢ် ခၢၣ်စးတဖၣ် ဝံၤလံအဂ့ၢ် (Philippines)ထံဂုၤကီၢ်ဂၤကိတိၥ်ဝဲၤကျိၤထုးထီၣ်ပၥ်ဖျါဝဲဖဲ လါယူၤလံ (၁၄)သီ အနံၤန့ၣ်လီၤ.
အပူၤကွံၥ်လါယူၤလံ(၁၂)သီအနံၤ (အၣ်စံၣ်ယၣ်) ကရၢခိၣ် (Philippines) ထံဂုၤကီၢ်ဂၤကိတိၥ်ဝဲၤကျိၤဒီး ကၠီၣ်တဲၣ်ထံဂုၤကီၢ်ဂၤကိတိၥ် ပၣ်ဃုၥ်ပၣ်ဂီၢ်တၢ်မၤဝဲ ကိတိၥ်တၢ်အိၣ်ဖှိၣ်လၢ ကီၢ်ကၠီၣ်တဲၣ် ဘီကီးဝ့ၢ် အပူၤ ထံၣ်လိၥ်တ့ၢ်ဝဲအသးဒီး သုးကရူၢ် ခၢၣ်စး အူတ့ၤမီၤဆွ့ၤန့ၣ်လီၤ.
ဒီးလါယူၤလံ(၁၃)သီအနံၤန့ၣ် ဆဲးထံၣ်လိၥ်ဝဲအသးဒီး ကီၢ်ပယီၤတၢ်ပၢၢ်ဆၢကရူၢ်ကရၢ ကလုၥ်ဒူၣ်ဖီၣ်စု ကဝဲၤတဖၣ် ဒီး တၢ်တၢၣ်ပီၣ်တဲသကိး တၢ်မုၥ်တၢ်ခုၣ်ကီၣ်ကး(NSPNC)တဖၣ်လၢ (ဖၣ်တယါ)ဝ့ၢ် အဂ့ၢ် ပၥ်ဖျါဝဲန့ၣ် လီၤ.
(Philippines)ထံဂုၤကီၢ်ဂၤကိတိၥ်ဝဲၤကျိၤခိၣ်ကျၢၢ် ဟံးန့ၢ်ဝဲမူဒါလၢ ပှၤပၢၤလီၢ်ဆ့ၣ်နီၤအလီၢ်တၢ်အိၣ်ဖှိၣ်အံၤ သုးကရူၢ်ခၢၣ်စး အူတ့ၤမီၤဆွ့ၣ် ပၥ်ဖျါထီၣ်ဝဲ တၢ်မၤဖျိမၤဖျါထီၣ် (အၣ်စံၣ်ယၣ်) တၢ်သးလီၤပလိၥ်(၅)ထံၣ် တၢ်အိၣ်သး, အသီ(၁၀၀) တၢ်မုၥ်တၢ်ခုၣ် တၢ်ရဲၣ်တၢ်ကျဲၤ, တၢ်ဒုးလီၤပှီၢ် ခီကီၢ်ဆၢတၢ်မၤကမၣ် ထံကီၢ်ကွီၢ်မ့ၣ် သဲစး တၢ်မူးတၢ်ရၢ် တၢ်ဟူးတၢ်ဂဲၤတဖၣ်အိၣ်ဝဲအဂ့ၢ် သ့ၣ်ညါဘၣ်န့ၣ်လီၤ.
(အၣ်စံၣ်ယၣ်) ကိတိၥ်တကပၤ ဆီၣ်သခူပၥ်ဖျါထီၣ်ဝဲ တၢ်သးလီၤပလိၥ်(၅)ထံၣ် ဝံၤအလီၢ်ခံ, လၢတၢ်ကလဲၤဟ့ၣ်ဝဲ ပှၤကညီတၢ်ဒိသူၣ်ဒိသးတၢ်ဆီၣ်ထွဲမၤစၢၤလၢ ဟီၣ်ကဝီၤလၢအလိၣ်ဘၣ်တဖၣ်အဂီၢ် (၂၀၂၆)နံၣ် လၢၥ်အပူၤရဲၣ်ကျဲၤ ဝဲလၢ ကဆှၢလီၤဝဲ တၢ်ဒိသူၣ်ဒိသးတၢ်ဆီၣ်ထွဲမၤစၢၤကရူၢ်တဖုလၢ ကီၢ်ပယီၤအဂ့ၢ် သ့ၣ်ညါဘၣ်န့ၣ်လီၤ.
(Philippines)တကပၤ အတၢ်ထံၣ်လိၥ်သးအံၤ ကီၢ်ပယီၤပူၤ သုးဟံးန့ၢ်တၢ်စိကမီၤအလီၢ်ခံ သုးကရူၢ် ခၢၣ်စးဒီး (အၣ်စံၣ်ယၣ်) ထံဂုၤကီၢ်ဂၤကိတိၥ်အဘၢၣ်စၢၤ တၢ်ထံၣ်လိၥ်သးလၢမဲၥ်သကိးမဲၥ်အံၤ မ့ၢ်တၢ်အဆိကတၢၢ် တဘျီ အဂ့ၢ် ပၥ်ဖျါဝဲန့ၣ်လီၤ.
လၢန့ၣ်အမဲၥ်ညါ အပူၤကွံၥ်လါယူၤလံ (၁၃)သီအနံၤ (အၣ်စံၣ်ယၣ်) ကရၢခိၣ် (Philippines) ထံဂုၤကီၢ်ဂၤ ကိတိၥ်ဝဲၤကျိၤမၤဝဲတၢ်ထံၣ်လိၥ်သး ဒီး (NSPNC),ဃုၥ်ဒီး ကလုၥ်ဒူၣ်ဖီၣ်စုကဝဲၤကရူၢ် တၢ်အိၣ်ဖှိၣ်အဆၢကတီၢ် တၢ်ကဘှါရှဲဝဲ ကီၢ်ပယီၤတၢ်သဘံၣ်ဘုၣ်အဂီၢ် ပှၤလၢဘၣ်ထွဲတဖၣ် တၢ်ထံၣ်လိၥ်သးတၢ်ရဲၣ်တၢ်ကျဲၤကအိၣ်ထီၣ်အဂီၢ် တၢၣ်ပီၣ်တဲ သကိးဝဲန့ၣ်လီၤ.
တၢ်တၢၣ်ပီၣ်တဲသကိးအံၤ ကီၢ်ပယီၤကလံၤထံး ပှၤတီခိၣ်ရိၣ်မဲတၢ်ပၢၢ်ဆၢကရူၢ် ခ့ၣ်အဲၣ်ယူၣ်-ကညီဒီကလုၥ် စၢဖှိၣ်ကရၢ ဒီး သိၣ်မှံၤ ကလုၥ်ဒူၣ်ဖီၣ်စုကဝဲၤကရူၢ်တနီၤ ပၣ်ဃုၥ်ပၣ်ဂီၢ်ဝဲအဂ့ၢ် တၢ်ကစီၣ်ဟးထီၣ်ဝဲဒၣ်န့ၣ်လီၤ.
(Philippines)တၢ်ထုးထီၣ်ပၥ်ဖျါအပူၤ တၢ်ထုးထီၣ်ပၥ်ဖျါဝဲဖီၣ်စုကဝဲၤကရူၢ်ကရၢလၢအပၣ်ဃုၥ်ပၣ်ဂီၢ်ဝဲတဖၣ်အမံၤ တ အိၣ်ဝဲဘၣ်ဆၣ် ဖျါဝဲလၢပှၤလၢဘၣ်ထွဲဘၣ်ဃးတဖၣ်အိၣ်ကတီၤပၥ်သးလၢ တၢ်တူၢ်လိၥ်ဝဲ တၢ်မုၥ်တၢ်ခုၣ်တၢ်တၢၣ် ပီၣ်တဲသကိး တၢ်ရဲၣ်တၢ်ကျဲၤန့ၣ်လီၤ.
ကီၢ်ကၠီၣ်တဲၣ်တၢ်အိၣ်ဖှိၣ်အပူၤ ခ့ၣ်အဲၣ်ယူၣ်တကပၤ တပၣ်ဃုၥ်ပၣ်ဂီၢ်ဝဲဒၣ်ဘၣ်အဂ့ၢ် စံးဘၣ်ဝဲခ့ၣ်အဲးစံၣ် ကညီတၢ်ကစီၣ်န့ၣ်လီၤ. ဒ်န့ၣ်အသိး သုးကရူၢ်အံၤ ဘိးဘၣ်ရၤလီၤဝဲ တၢ်မၤတၢ်မုၥ်တၢ်ခုၣ် (၁၀၀)သီ အတီၢ်ပူၤ မၤဝဲသုးဂ့ၢ်ဝီတၢ်ဟူးတၢ်ဂဲၤလၢ ခ့ၣ်အဲၣ်ယူၣ်တၢ်ပၢဟီၣ်ကဝီၤဆူၣ်ဝဲဒၣ်န့ၣ်လီၤ.
ဒ်(အၣ်စံၣ်ယၣ်)တၢ်လဲၤသရံးသးအသိးန့ၣ်, (၂၀၂၆)နံၣ်အပူၤ ကီၢ်ပယီၤကဘၣ်ဟံးန့ၢ်ဝဲ ကရၢခိၣ်မူဒါအဂ့ၢ် သ့ၣ်ညါဘၣ်န့ၣ်လီၤ. ဘၣ်ဆၣ် ကီၢ်ပူၤ တၢ်သဘံၣ်ဘုၣ်အဃိ ကီၢ်ပယီၤခၢၣ်စး (Philippines)ထံကီၢ် ဟံးန့ၢ်ဝဲမူဒါအဂ့ၢ် သ့ၣ်ညါဘၣ်န့ၣ်လီၤ.
